កាលពីព្រឹកថ្ងៃទី១១ ខែកក្កដា ឆ្នាំ២០២៤ នៅទីស្ដីការក្រសួងការពារជាតិ មានបើកកិច្ចប្រជុំត្រួតពិនិត្យវឌ្ឍនភាពការងារគណៈកម្មការគ្រប់គ្រង ថែទាំ អគាររដ្ឋបាលសាលប្រជុំទីស្តីការក្រសួងការពារជាតិ ដែលកិច្ចប្រជុំនេះ បានប្រព្រឹត្តទៅស្ថិតក្រោមអធិបតីភាព ឯកឧត្តម នាយឧត្តមសេនីយ៍ ប៊ុន លើត រដ្ឋលេខាធិការ ក្រសួងការពារជាតិ និងជាប្រធានគណៈកម្មការគ្រប់គ្រង ថែទាំ អគាររដ្ឋបាលសាលប្រជុំ ទីស្ដីការក្រសួងការពារជាតិ ព្រមទាំងមានការចូលរួមពីមន្ត្រីយោធាជាន់ខ្ពស់ក្នុងក្រសួងការពារជាតិជាច្រើនរូប។
អគាររដ្ឋបាលសាលប្រជុំទីស្តីការក្រសួងការពារជាតិ គិតចាប់ពីថ្ងៃ៣០ ខែតុលា ឆ្នាំ២០២១ ដល់ថ្ងៃទី៣០ ខែមិថុនា ឆ្នាំ២០២៥ មានរយៈពេលប្រើប្រាស់ ៣២ខែ ក្រោយពីទទួលពីក្រុមហ៊ុនទទួលម៉ៅការ។ ក្រុមបច្ចេកទេសថែទាំ បានបង្កើនការត្រួតពិនិត្យតាមដាន យ៉ាងខ្ជាប់ខ្ជួន និងយកចិត្តទុកដាក់ខ្ពស់ ចំពោះបណ្តាញមេកានិច បណ្តាញអគ្គិសនី-បណ្ដាញទឹក និងសំណង់ស្ថាបត្យកម្ម(តុបតែង) មួយចំនួន ដោយផ្តោតលើសុវត្ថិភាព ផាសុខភាពអ្នកប្រើប្រាស់ និងធ្វើឱ្យប្រាកដប្រជា ឧបករណ៍ បរិក្ខារ សំខាន់ៗ ត្រូវប្រកបដោយគុណភាព និងមានអាយុកាលយូរអង្វែង។ អាគាររដ្ឋបាល និងសាលប្រជុំនៅទីស្ដីការក្រសួងការពារជាតិនេះ បន្ទាប់ពីបានសាងសង់រួចរាល់ និងសម្ពោធដាក់ឲ្យប្រើប្រាស់ជាផ្លូវការ ដែលរួមមានបន្ទប់សវនាការសម្រាប់ថ្នាក់ដឹកនាំជាតិ និងអន្តរជាតិ, សាលប្រជុំខ្នាតតូច, ខ្នាតមធ្យម, និងសាលប្រជុំធំ ដែលអាចចំណុះមនុស្សបានដល់ជាង ១,០០០នាក់, មានទទឹងប្រវែង២៨ម៉ែត្រ បណ្ដោយប្រវែង១៩១ម៉ែត្រ មានកម្ពស់៣២ម៉ែត្រ និងមានចំណតរថយន្តនៅក្រោមដី ដែលអាចចតរថយន្តបានរហូតដល់ទៅ១៥០គ្រឿង។ នេះបើតាមរបាយការណ៍ និងគំនូសបង្ហាញរបស់ ឧត្តមសេនីយ៍ឯក សឿត រឿត នាយក នាយកដ្ឋានវិស្វកម្ម ក្រសួងការពារជាតិ។
ក្នុងសេចក្តីសម្រេចរបស់ក្រសួងការពារជាតិ បានប្រគល់ភារកិច្ចដល់ក្រុមការងារចំនួន ៦ចំណុះឲ្យគណៈកម្មការគ្រប់គ្រង ថែទាំ អគាររដ្ឋបាលសាលប្រជុំទីស្តីការក្រសួងការពារជាតិ ដើម្បីរួមសហការគ្នាថែរក្សា រួមមាន៖ ក្រុមការងាររបស់អគ្គលេខាធិការដ្ឋាន ក្រសួងការពារជាតិ មានភារកិច្ច សម្របសម្រួល ចាត់ចែងគ្រប់គ្រងបន្ទប់ប្រជុំ បន្ទប់សវនាការ និងបន្ទប់ផ្សេងៗទៀត តាមការស្នើសុំ ពីបណ្តាស្ថាប័ន អង្គភាពនានា និងតាមការសម្រេចរបស់ថ្នាក់ដឹកនាំក្រសួងការពារជាតិ សហការជាមួយបណ្តាអគ្គនាយកដ្ឋាន នាយកដ្ឋាន ស្ថាប័ន អង្គភាពចំណុះក្រសួងការពារជាតិ មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាម កងរាជអាវុធហត្ថលើផ្ទៃប្រទេស និងកងពលតូចលេខ៧០ ក្នុងការការពារគ្រប់គ្រង សន្តិសុខ សុវត្ថិភាព របៀបរៀបរយ សណ្តាប់ធ្នាប់ ក្នុងបរិវេណអគាររដ្ឋបាលសាលប្រជុំទីស្ដីការក្រសួងការពារជាតិ ត្រួតពិនិត្យគ្រប់សមាសភាពចេញ-ចូល ក្នុងបរិវេណក្រសួង រៀបចំការចតយានយន្ត ទោចក្រយានយន្ត ឱ្យមានសណ្តាប់ធ្នាប់ និងរបៀបរៀបរយតាមការកំណត់។ គ្រប់គ្រងសម្របសម្រួលការងារពិធីការ និងការទទួលបដិសណ្ឋារកិច្ច គណៈប្រតិភូ និងភ្ញៀវ កិត្តិយសជាតិ អន្តរជាតិ សហការជាមួយក្រុមហ៊ុន ដែលទទួលភារកិច្ច ថែទាំ សម្អាត អនាម័យ បន្ទប់ប្រជុំ បន្ទប់សវនាការ បន្ទប់ទទួលភ្ញៀវ បន្ទប់ធ្វើការ បន្ទប់ទឹក និងទីធ្លាអគារទាំងមូល គ្រប់ជាន់ឱ្យបានស្អាតជាប្រចាំ ត្រួតពិនិត្យ ការថែទាំ សួនច្បារ ដែលដាំជុំវិញបរិវេណអគារ និងបំពេញភារកិច្ចជាក់ស្ដែងផ្សេងៗទៀតដែលពាក់ព័ន្ធ។
ដោយឡែកក្រុមការងារ អគ្គនាយកដ្ឋានយោធសេវាមានភារកិច្ច សហការជាមួយស្ថាប័ន អង្គភាពដែលមានការពាក់ព័ន្ធ ក្នុងការរៀបចំបុណ្យជាតិ និងអន្តរជាតិផ្សេងៗ រៀបចំតាំងព្រះឆាយាលក្ខណ៍ រូបថត និងវីដេអូផ្សេងៗសម្រាប់ពិធីផ្សេងៗ តាមការសម្រេចរបស់ថ្នាក់ដឹកនាំក្រសួង។ រៀបចំបដា ពាក្យស្លោក ទង់ជាតិ ទង់សាសនា ទង់ព្រះមហាក្សត្រ និងទង់ក្អែប តាមការណែនាំ របស់គណៈកម្មាធិការជាតិរៀបចំបុណ្យជាតិ-អន្តរជាតិ។ ការរៀបចំលិខិតបទដ្ឋានអញ្ជើញភ្ញៀវ គ្រប់គ្រង និងផ្សព្វផ្សាយព័ត៌មាន សម្រាប់ពិធីផ្លូវការផ្សេងៗរបស់ក្រសួងការពារជាតិ និងបំពេញភារកិច្ចជាក់ស្តែងផ្សេងៗទៀតដែលពាក់ព័ន្ធ។ និងក្រៅពីនោះមានក្រុមការងារទទួលខុសត្រូវលើការធានាផ្នែកភស្តុភា-ហិរញ្ញវត្ថុ។ ក្រុមការងារអគ្គនាយកដ្ឋាននយោបាយ និងកិច្ចការបរទេស មានភារកិច្ច សហការរៀបចំការងារពិធីការ និងទទួលបដិសណ្ឋារកិច្ច គណៈប្រតិភូ ភ្ញៀវកិត្តិយស អន្តរជាតិ សហការជាមួយស្ថាប័ន អង្គភាពពាក់ព័ន្ធ រៀបចំការតាំងពិព័រណ៍ រូបថត និងវីដេអូផ្សេងៗ សម្រាប់ទទួលស្វាគមន៍ភ្ញៀវអន្តរជាតិ តាមការសម្រេចរបស់ថ្នាក់ដឹកនាំក្រសួង និងបំពេញភារកិច្ចជាក់ស្ដែងផ្សេងៗទៀតដែលពាក់ព័ន្ធ។ ក្រុមការងារនាយកដ្ឋានវិស្វកម្ម មានភារកិច្ចថែទាំ និងជួសជុលអគារតាមសេចក្តីណែនាំ ស្ដីពីការប្រើប្រាស់អគារ ក្នុងទីស្ដីការក្រសួងការពារជាតិ ធានាបានត្រឹមត្រូវតាមបទដ្ឋានបច្ចេកទេស និងប្រកបដោយសុវត្ថិភាព។ ធានាបណ្តាញអគ្គិសនី MV (បណ្តាញតង់ស្យុងមធ្យម) និងម៉ាស៊ីនភ្លើង ថែទាំប្រព័ន្ធម៉ាស៊ីនត្រជាក់ឱ្យមានដំណើរការល្អ ថែទាំប្រព័ន្ធម៉ាស៊ីនពន្លត់អគ្គិភ័យ ថែទាំប្រព័ន្ធជណ្តើរយន្ត(ជណ្តើរជើង និងជណ្តើរយោង)ថែទាំប្រព័ន្ធទឹកស្អាត និងបំពេញភារកិច្ចជាក់ស្តែងផ្សេងៗទៀតដែលពាក់ព័ន្ធ។ ក្រុមការងារនាយកដ្ឋានបញ្ជូនសារ មានការកិច្ច គ្រប់គ្រងម៉ាស៊ីនមេ (Data Center)ទាំងអស់ របស់ប្រព័ន្ធព័ត៌មានវិទ្យាវៃឆ្លាតក្នុងអគារ ផ្តល់សេវាអ៊ុនធឺណែតមានខ្សែ និងសេវាហ្វាយហ្វាយ(WIFI)ក្នុងអគារទាំងមូល សម្របសម្រួលជាមួយក្រុមការងារសណ្តាប់ធ្នាប់ របស់អគ្គលេខាធិការដ្ឋាន លើបញ្ហាបច្ចេកទេសប្រព័ន្ធកាម៉េរ៉ាសុវត្ថិភាព(Camem CCTV) ដោយការិយាល័យសណ្ដាប់ធ្នាប់ ត្រូវចាត់កម្លាំងនាយទាហានប្រចាំការត្រួតពិនិត្យកាមេរ៉ាសុវត្ថិភាព។ ផ្តល់សេវាទូរស័ព្ទមានខ្សែ VOIP សម្រាប់ទាក់ទងនៅក្នុងអគារ ធានាលើការរៀបចំ (Video Conference) ក្នុងអគារទីស្តីការក្រសួងការពារជាតិ។ គ្រប់គ្រងប្រព័ន្ធសម្លេងសាលប្រជុំទាំងអស់ និងប្រព័ន្ធបញ្ចាំងរូបភាព LED តាមបន្ទប់ប្រជុំនានា គ្រប់គ្រងបច្ចេកទេសច្រកចេញចូលសុវត្ថិភាព និងចំណតរថយន្តក្រោមដី ជណ្តើរយន្តដោយស្វ័យប្រវត្តិនៅក្នុងអគារទាំងមូល សម្របសម្រួលជាមួយនាយកដ្ឋានវិស្វកម្ម លើបញ្ហាបច្ចេកទេស ប្រព័ន្ធផ្ដល់សញ្ញាប្រកាសអាសន្ន អគ្គីភ័យ នៅក្នុងអគារទាំងមូល ដោយនាយកដ្ឋានវិស្វកម្ម ត្រូវចាត់កម្លាំងតាមដានជាប្រចាំ សហការជាមួយនាយកដ្ឋានវិស្វកម្ម ផ្តល់សេវាប្រកាសអាសន្នជាសម្លេងក្នុងអគារទាំងមូល សហការជាមួយក្រុមហ៊ុនមិត្តហ្វូន ដើម្បីធានាសេវាប្រព័ន្ធទូរស័ព្ទ នៅក្នុងអគារទាំងមូល បំពេញភារកិច្ចជាក់ស្ដែងផ្សេងៗទៀតដែលពាក់ព័ន្ធ។ បណ្តាស្ថាប័ន អង្គភាពខាងលើ និងស្ថាប័ន អង្គភាពផ្សេងៗទៀត ដែលមានការពាក់ព័ន្ធត្រូវសហការ គ្រប់គ្រង ថែទាំ រៀបចំចាត់ចែង និងប្រើប្រាស់ អគាររដ្ឋបាលសាលប្រជុំទីស្ដីការក្រសួងការពារជាតិ ឲ្យបានល្អ ដោយរក្សាបាននូវគុណភាព និងសោភ័ណភាពយូរអង្វែងនៃអគារ។
តាមរយៈនៃកិច្ចប្រជុំរបស់គណៈកម្មការ នាយឧត្តមសេនីយ៍ ប៊ុន ឡឺត ជំនួសមុខ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានកោតសរសើរ និងវាយតម្លៃខ្ពស់ ចំពោះភាពទទួលខុសត្រូវ របស់ក្រុមការងារជំនាញនីមួយៗ នៃគណៈកម្មការ ក្នុងការគ្រប់គ្រង ថែរក្សា នៅរាល់ទ្រព្យសម្បត្តិរបស់ក្រសួងការពារជាតិ បានយ៉ាងល្អក្នុងរយៈពេល ជិត៣២ខែ កន្លងមកនេះ។ ឯកឧត្តម ប៊ុន ឡឺត សង្ឃឹមយ៉ាងមុតមាំថា ក្រុមការងារទាំងអស់ដែលពាក់ព័ន្ធ និងប្រតិបត្តិអនុវត្តឱ្យកាន់តែល្អថែមទៀត តាមសេចក្តីស្មារតីតួនាទី ភារកិច្ច ដែលគណៈកម្មការ និងថ្នាក់ដឹកនាំក្រសួងការពារជាតិប្រគល់ឱ្យ ៕
