ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា បានអនុញ្ញាតឱ្យលោកឧត្តមសេនីយ៍ត្រី ទីន អុងស្វី (TIN AUNG SWE) នាយការិយាល័យអនុព័ន្ធយោធាមីយ៉ាន់ម៉ាតែងតាំងថ្មី ប្រចាំនៅកម្ពុជា ចូលជួបសម្ដែងការគួរសម និងបង្ហាញមុខ ក្នុងឱកាសរូបលោកមកបំពេញបេសកកម្មការទូតយោធាប្រចាំនៅកម្ពុជា នារសៀលថ្ងៃទី២៧ ខែមិថុនា ឆ្នាំ២០២៤ នៅទីស្ដីការក្រសួងការពារជាតិ។
លោកឧត្តមសេនីយ៍ត្រី ទីន អុងស្វី បានសំដែងការអរគុណចំពោះ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា ដែលបានអនុញ្ញាតឲ្យរូបលោក និងសហការី បានចូលជួបសម្ដែងការគួរសម និងបង្ហាញមុខ ក្នុងឱកាសដែលរូបលោកត្រូវបានប្រមុខការពារជាតិមីយ៉ាន់ម៉ា តែងតាំងជាអនុព័ន្ធយោធាប្រចាំនៅកម្ពុជា ព្រមទាំងបានជម្រាបជូន អំពីមនោសញ្ចេតនារីករាយ ដែលបានមកបំពេញបេសកកម្មការទូតយោធាប្រចាំនៅកម្ពុជា ប្រកបដោយកិត្តិយស ជាប្រទេសដែលមានសាសនា វប្បធម៌ ប្រពៃណីដូចគ្នា។ លោកឧត្តមសេនីយ៍ត្រី ទីន អុងស្វី បានលើកឡើងថា ក្នុងរយៈពេល ៣ខែនៃការមកបន្តបេសកកម្មការទូតយោធានៅកម្ពុជាពីលោកអនុព័ន្ធយោធាចាស់ លោកទទួលបាននូវបទពិសោធន៍ជាច្រើនទាំងវិស័យយោធា និងវិស័យមួយចំនួនទៀត ហើយលោកក៏បានមើលឃើញពីការរីកចម្រើនលើគ្រប់វិស័យរបស់កម្ពុជា។ លោក ទីន អុងស្វី ក៏បានសម្ដែងការអរគុណជាថ្មីម្ដងទៀត ចំពោះថ្នាក់ដឹកនាំកងយោធពលខេមរភូមិន្ទ ដែលបានសហការ និងបង្កលក្ខណៈសម្បត្តិគ្រប់បែបយ៉ាងដល់ការបំពេញបេសកកម្មការទូតយោធារបស់ការិយាល័យអនុព័ន្ធយោធាមីយ៉ាន់ម៉ា គ្រប់អាណត្តិ នៅកម្ពុជា ហើយលោកសន្យាថា នៅក្នុងអាណត្តិរបស់លោកជាប្រធានការិយាល័យអនុព័ន្ធយោធាថ្មីនេះ និងបន្តរួមសហការឱ្យកាន់តែជិតស្និទ្ធថែមទៀតជាមួយនឹងកងយោធពលខេមរភូមិន្ទ។
ជាកិច្ចឆ្លើយតប នាយឧត្តមសេនីយ៍ ទៀ សីហា បានសម្ដែងការស្វាគមន៍ ចំពោះការមកបំពេញបេសកកម្មការទូតយោធារបស់លោកឧត្តមសេនីយ៍ត្រី ទីន អុងស្វី នៅកម្ពុជា ដោយឯកឧត្តម ឧបនាយករដ្ឋមន្ត្រី បានបញ្ជាក់ជូន អំពីសភាពការណ៍មួយចំនួននៅកម្ពុជា ជាពិសេសសន្តិភាព ដែលកម្ពុជាមានក្នុងរយៈពេលជាង ២០ឆ្នាំ កន្លងមកនេះ ក្រោមនយោបាយឈ្នះឈ្នះរបស់ សម្ដេចតេជោ ហ៊ុន សែន អតីតនាយករដ្ឋមន្ត្រី នៃកម្ពុជា ដែលនាំឲ្យកម្ពុជាមានការអភិវឌ្ឍរីកចម្រើនលើគ្រប់វិស័យ។ នាយឧត្តមសេនីយ៍ ទៀ សីហា បានបញ្ជាក់ថា៖ កម្ពុជា មានការសប្បាយចិត្ត ដោយចង់ឃើញប្រទេសមីយ៉ាន់ម៉ា វិលមករកភាពដើមវិញ ក្នុងប្រទេសមួយដែលមានសន្តិភាព។ កម្ពុជាទើបតែទទួលបានសន្តិភាពក្នុងរយៈពេល២០ឆ្នាំ កន្លងមកនេះ។ ឯកឧត្តម បានបន្តទៀតថា៖ ក្នុងរយៈពេលចុងក្រោយនេះ កម្ពុជាបានធ្វើជាម្ចាស់ផ្ទះក្នុងសមយុទ្ធជាច្រើន ជាមួយបណ្ដាប្រទេសក្នុងអាស៊ាន និងអាស៊ី ដូច្នេះកម្ពុជាសំណូមពរតាមរយៈលោកអនុព័ន្ធយោធា ឱ្យមានការចូលរួមក្នុងសមយុទ្ធ ដែលកម្ពុជាធ្វើជាម្ចាស់ផ្ទះ ដូចការចូលរួមរបស់បណ្ដាប្រទេសនៅក្នុងសមាគមអាស៊ានដូចគ្នាផងដែរ។ នាយឧត្តមសេនីយ៍ ទៀ សីហា បានលើកឡើងអំពីទំនាក់ទំនងកាទូតរវាងកម្ពុជា និងមីយ៉ាន់ម៉ា ក្នុងរយៈពេលជាង ៦៩ឆ្នាំកន្លងមកនេះ និងការរក្សាជំហរនៅតែបន្តរក្សាផ្សារភ្ជាប់ទំនាក់ទំនង កិច្ចសហប្រតិបត្តិការរវាងកម្ពុជា-មីយ៉ាន់ម៉ា ដូចកាលពីមុន ទាំងក្នុងក្របខណ្ឌទ្វារភាគី និងពហុភាគី ក្នុងក្របខណ្ឌអាស៊ាន។ លើកិច្ចសហប្រតិបត្តិការវិស័យយោធា ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបញ្ជាក់ជាថ្មីថា៖ នឹងបន្តខិតខំចូលរួមចំណែកពង្រឹងពង្រីកនៅទំនាក់ទំនងកិច្ចសហប្រតិបត្តិការ រវាងកងទ័ព នៃប្រទេសទាំងពីរ ឱ្យកាន់តែប្រសើរឡើងថែមទៀត ជាពិសេសលើការបណ្ដុះបណ្ដាលធនធានមនុស្ស ៕
