ព្រឹកថ្ងៃទី១៧ ខែមិថុនា ឆ្នាំ២០២៤ លោកជំទាវ នាយឧត្តមសេនីយ៍ ដាំ ដារីនី រដ្ឋលេខាធិការ និងជាប្រធានក្រុមការងារយេនឌ័រ ក្រសួងការពារជាតិ បានអញ្ជើញដឹកនាំកិច្ចប្រជុំពិនិត្យវឌ្ឍនភាព ការងារយេនឌ័រ ក្នុងកងយោធពលខេមរភូមិន្ទ និងលើកទិសដៅអនុវត្តបន្ត នៅសាលប្រជុំទីស្តីការក្រសួងការពារជាតិ ដោយមានការចូលរួមពីសំណាក់ ឯកឧត្តម លោកជំទាវ អនុប្រធាន សមាជិក ក្រុមការងារយេនឌ័រ។
ថ្លែងក្នុងកិច្ចប្រជុំ លោកជំទាវ នាយឧត្តមសេនីយ៍ រដ្ឋលេខាធិការ បានកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងអនុវត្តការងារទទួលបានលទ្ធផលល្អប្រសើរ ប្រកបដោយការទទួលខុសត្រូវ នាពេលកន្លងមក។ លោកជំទាវបានបន្ថែមទៀតថា៖ រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃប្រកបដោយគត្តិបណ្ឌិតរបស់ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ជាកម្មវិធីនយោបាយ សម្រាប់ការកសាង និងការពារជាតិ មាតុភូមិ ឆ្នាំ២០២៣ ដល់ឆ្នាំ២០២៨។ ក្នុងនោះរាជរដ្ឋាភិបាលក៏បានកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រីនៅគ្រប់វិស័យជាអាទិភាព ក្នុងរបៀបវារៈគោលនយោបាយ តាមរយៈការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាប័ន្ន ដែលក្នុងនោះស្ត្រីគឺជាស្នូល។
លោកជំទាវ នាយឧត្តមសេនីយ៍ រដ្ឋលេខាធិការ ក៏បានលើកឡើងបន្ថែមទៀតថា៖ ក្រសួងការពារជាតិក្រោមការដឹកនាំរបស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជានិច្ចកាល តែងតែទទួលបានការយកចិត្តទុកដាក់ ក្នុងការលើកកម្ពស់សមភាពយេនឌ័រ តាមរយៈការគាំទ្រដល់ការចូលរួមក្នុងការអនុវត្តការងាររបស់យោធិននារី ក្នុងគ្រប់កិច្ចការ។ លោកជំទាវបានបន្តទៀតថា៖ ផែនការយុទ្ធសាស្ត្របញ្រ្ជាបយេនឌ័រក្រសួងការពារជាតិ ដំណាក់កាលទី២ ឆ្នាំ២០២៤-២០២៨ បានបង្ហាញពីទស្សនវិស័យរយៈពេល៥ឆ្នាំខាងមុខ ដោយផ្ដោតសំខាន់លើការពង្រឹងសមត្ថភាព ចំណេះដឹង ជំនាញ ការទទួលបាននូវតួនាទីភារៈកិច្ច និងរបៀបនៃការអនុវត្តការងារ ដើម្បីឲ្យយោធិននារីអាចចូលរួមបានដូចជាបុរស។ ក្នុងពេលបច្ចុប្បន្ននេះ សមត្ថភាព និងការចូលរួមអនុវត្តការងាររបស់យោធិននារី គឺមានភាពល្អប្រសើរ គួរឲ្យកត់សម្គាល់ ក្នុងនោះគឺយើងមានយោធិននារី ដែលមានជំនាញបើករថក្រោះ ជំនាញកាំភ្លើងធំ ជំនាញការពារអាកាស ជំនាញសង្គ្រោះ ជំនាញនគរបាលយុត្តិធម៌ និងជំនាញផ្សេងៗជាច្រើនទៀតផង។ ក្នុងឱកាសនោះផងដែរ លោកជំទាវ នាយឧត្តមសេនីយ៍ រដ្ឋលេខាធិការ ក៏បានអំពាវនាវដល់សមាជិក និងបណ្ដាញក្រុមការងារយេនឌ័រនៅទូទាំងកងយោធពលខេមរភូមិន្ទ សូមចូលរួមគាំទ្រ និងបរិច្ចាគដោយស្ម័គ្រចិត្ត ជាមួយយុទ្ធនាការ «មួយម៉ឺនរៀល មួយម៉ឺននាក់» ក្រោមគំនិតផ្ដួចផ្ដើមរបស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្ត្រីទីមួយនៅកម្ពុជា ក្នុងគោលបំណងជួយដល់មូលនិធិគន្ធបុប្ផាកម្ពុជា ដើម្បីផលប្រយោជន៍កុមារកម្ពុជា។ នៅទីបញ្ចប់លោកជំទាវ ក៏បានប្រគល់ជូនមានអំណាចរបស់ ឯកឧត្តម ឧបនាយករដ្ឋមន្ត្រី និងលោកជំទាវ បានឧបត្ថម្ភលើកទឹកចិត្តជូនដល់យោធិននារីជំនាញចំនួន១០នាក់ ក្នុងម្នាក់ៗទទួលបានឃីដមួយកញ្ចប់ មីមួយកេស ត្រីខមួយយួរ ថវិកា២០ម៉ឺនរៀល ៕
