នៅថ្ងៃទី០២ ខែមិថុនា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីការពារជាតិ បានជួបប្រជុំទ្វេភាគីជាមួយ ឯកឧត្តម ទុង ជុន (Dong Jun) រដ្ឋមន្ត្រីក្រសួងការពារជាតិ នៃសាធារណៈរដ្ឋប្រជាមានិតចិន ក្នុងឱកាសដែលរដ្ឋមន្ត្រីការពារជាតិទាំងពីរ បានអញ្ជើញមកចូលរួមក្នុងកិច្ចសន្ទនា Shangri-La លើកទី២១ នៅប្រទេសសិង្ហបុរី។
ក្នុងជំនួបនោះ ឯកឧត្តម ទៀ សីហា បានសំដែងការអបអរសាទរចំពោះ ឯកឧត្តម ទុង ជុន (Dong Jun) ដែលត្រូវបានរដ្ឋាភិបាល នៃសាធារណៈរដ្ឋប្រជាមានិតចិន តែងតាំងជារដ្ឋមន្ត្រីក្រសួងការពារជាតិចិន។ ឯកឧត្តម ទៀ សីហា បានសំដែងការអបអរសាទរ ចំពោះសន្ទរកថា របស់ឯកឧត្តម រដ្ឋមន្ត្រីក្រសួងការពារជាតិចិន ថ្លៃងក្នុងវេទិកាកិច្ចប្រជុំកំពូលសន្តិសុខអាស៊ីលើកទី ២១ ដែលក្នុងសន្ទរកថានោះ បានបង្ហាញពីភាពរឹងមាំ របស់ប្រទេសចិន នៅលើឆាកអន្តរជាតិ។ ឯកឧត្តម បានសង្កត់ធ្ងន់ថា៖ រាជរដ្ឋាភិបាលកម្ពុជាក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅតែបន្តគាំទ្រគោលនយោបាយចិនតែមួយ។ ឯកឧត្តម បានបញ្ជាក់ទៀតថា៖ ទំនាក់ទំនងកម្ពុជា ចិន មានការរីកចម្រើន ក្នុងនោះទំនាក់ទំនងកិច្ចសហប្រតិបត្តិការ រវាងកងទ័ពទាំងពីរ ក្រោមការដឹកនាំរបស់ សម្ដេចពិជ័យសេនា ទៀ បាញ់ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានធ្វើឲ្យទំនាក់ទំនងកម្ពុជា ចិន មានការរីកចម្រើនមកដល់បច្ចុប្បន្ននេះ។ ក្នុងនាមជាអ្នកបន្តវេន ឯកឧត្តម ទៀ សីហា បានសន្យាថា នឹងបន្តពង្រឹងពង្រីកកិច្ចទំនាក់ទំនងដែលមានស្រាប់ និងព្យាយាមធ្វើយ៉ាងណាបង្កើននូវទំនាក់ទំនងនេះ អោយបានកាន់តែល្អប្រសើរឡើងបន្ថែមទៀត។
ឯកឧត្តម ទៀ សីហា បានលើកឡើងអំពីកិច្ចសហប្រតិបត្តិការ រវាងកងទ័ពទាំងពីរ កម្ពុជា ចិន លើវិស័យបណ្ដុះបណ្ដាលធនធានមនុស្ស ការផ្លាស់ប្ដូរទស្សនកិច្ច គ្នាទៅវិញទៅមក ពិសេសក្នុងពេលកន្លងមក ក្រសួងការពារជាតិចិន បានឧបត្ថម្ភគាំទ្រដល់កម្ពុជា ក្នុងយុទ្ធនាការប្រយុទ្ធប្រឆាំងជំងឺកូវីដ-១៩ ដែលធ្វើឲ្យកម្ពុជាមានលទ្ធភាពស្ដារសេដ្ឋកិច្ចឡើងវិញបានយ៉ាងឆាប់រហ័ស។ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា បានបញ្ជាក់ទៀតថា៖ សមយុទ្ធ នាគមាសលើកទី៦ រវាងកងទ័ព កម្ពុជា-ចិន បានបញ្ចប់ដោយជោគជ័យ ដែលតាមរយៈធ្វើការធ្វើសមយុទ្ធនេះ បានធ្វើឲ្យខភម មានជំនាញច្បាស់លាស់ និងមានមូលដ្ឋានសំខាន់ ក្នុងការពង្រឹងសមត្ថភាព វិស័យការពារជាតិរបស់ប្រទេសកម្ពុជា។ ឆ្លៀតក្នុងឱកាសនោះ ឯកឧត្តម ទៀ សីហា បានអញ្ជើញ ឯកឧត្តម ទុង ជុន(Dong Jun) រដ្ឋមន្ត្រីក្រសួងការពារជាតិចិន មកទស្សនកិច្ចជាផ្លូវការនៅកម្ពុជាផងដែរ។
មានមតិឆ្លើយតបវិញ ឯកឧត្តម ទុង ជុន(Dong Jun) រដ្ឋមន្ត្រីក្រសួងការពារជាតិចិន បានវាយតំលៃខ្ពស់ ចំពោះទំនាក់ទំនងកិច្ចសហប្រតិបត្តិការ រវាងកងទ័ព នៃប្រទេសទាំងពីរ។ ឯកឧត្តមចាត់ទុក ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា ជាអ្នកដឹកនាំបន្តវេន នៃកងទ័ពយើងទាំងពីរ កម្ពុជា-ចិន ដើម្បីបន្តដឹកនាំ រឹតចំណងមិត្តភាព និងកិច្ចសហប្រតិបត្តិការ រវាងកងទ័ពទាំងពីរ។ ទាក់ទងទៅនឹងទំនាក់ទំនងកិច្ចសហប្រតិបត្តិការ រវាងកងទ័ពប្រទេសទាំងពីរ ឯកឧត្តម រដ្ឋមន្ត្រីក្រសួងការពារជាតិចិន ក៏បានស្នើសុំឲ្យមានការផ្លាស់ប្ដូរគណៈប្រតិភូជាន់ខ្ពស់គ្នាទៅវិញទៅមក ដើម្បីបន្តរក្សាប្រពៃណីមិត្តភាព រវាងកងទ័ពប្រទេសទាំងពី រកម្ពុជា ចិន។ ទាក់ទងទៅនឹងការធ្វើសមយុទ្ធនាគមាស ដែលបានបញ្ចប់ដោយជោគជ័យ កន្លងទៅនេះ។ ឯកឧត្តម ទុង ជុន(Dong Jun) បានបញ្ជាក់ថា៖ យើងអាចសិក្សាស្រាវជ្រាវ ពង្រីកការធ្វើសមយុទ្ធ ដើម្បីបង្កើនសម្ថភាពកងទ័ព និងរៀបចំបណ្តុះបណ្តាលធនធានមនុស្ស និងនាយទាហានវ័យក្មេង ដើម្បីពង្រឹងខឿនការពារជាតិ នៃព្រះរាជាណាចក្រកម្ពុជា។ ជាចុងក្រោយ ឯកឧត្តម ទុង ជុន(Dong Jun) រដ្ឋមន្ត្រីក្រសួងការពារជាតិចិន បានអញ្ជើញ ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា ទៅទស្សនកិច្ច និងចូលរួមកិច្ចប្រជុំ សៀងសាន នៅប្រទេសចិននៅក្នុងឆ្នាំ ២០២៤ នេះផងដែរ ៕
