ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅរសៀលថ្ងៃទី២៩ ខែឧសភា ឆ្នាំ២០២៤ បានអនុញ្ញាតឲ្យ ឯកឧត្តម ឧត្តមសេនីយ៍ឯក ចេរ ជៀនឈឹង(Jia Jian Cheng) មេបញ្ជាការរង និងជានាយសេនាធិការយោធភូមិភាគខាងត្បូង នៃកងទ័ពរំដោះប្រជាជនចិន ចូលជួបសំដែងការគួរសម នៅទីស្តីការក្រសួងការពារជាតិ។
នៅក្នុងឱកាសនោះ នាយឧត្តមសេនីយ៍ ទៀ សីហា បានសម្តែងនូវការស្វាគមន៍យ៉ាងកក់ក្តៅ ចំពោះវត្តមាន ឧត្តមសេនីយ៍ឯក Jia Jian Cheng មេបញ្ជាការរង និងជានាយសេនាធិការយោធភូមិភាគខាងត្បូង នៃកងទ័ពរំដោះប្រជាជនចិន និងសហការី ដែលបានអញ្ជើញមកកាន់ប្រទេសកម្ពុជា ដើម្បីចូលរួមបិទសមយុទ្ធនាគមាសឆ្នាំ២០២៤ រវាងកងយោធពលខេមរភូមិន្ទ និងកងទ័ពរំដោះប្រជាជនចិន។ នាយឧត្តមសេនីយ៍ បានបន្តថា៖ ទំនាក់ទំនងរវាងកងទ័ព នៃប្រទេសទាំងពីរ មានលក្ខណៈល្អ និងស្និទ្ធស្នាលគ្នាពីមួយឆ្នាំទៅមួយឆ្នាំ ហើយឯកឧត្តម ឧបនាយករដ្ឋមន្ត្រី ក៏ថ្លែងអំណរគុណ ចំពោះបក្សរដ្ឋ និងក្រសួងការពារជាតិចិន ដែលតែងតែបានជួយឧបត្ថម្ភគាំទ្រដល់ការកសាងអភិវឌ្ឍប្រទេសជាតិកម្ពុជា ពិសេសបានបង្កលក្ខណៈងាយស្រួលដល់កិច្ចសហប្រតិបត្តិការលំហាត់សមយុទ្ធនាគមាសរួមគ្នាឆ្នាំ២០២៤នេះ និងបានចាត់ទុកថា នេះគឺជាឆ្នាំទី៦ ដែលបានរៀបចំសមយុទ្ធនាគមាស ហើយបានក្លាយទៅជាសមយុទ្ធជាប្រពៃណី។
ជាកិច្ចឆ្លើយតប ឧត្តមសេនីយ៍ឯក Jia Jian Cheng មេបញ្ជាការរង និងជានាយសេនាធិការយោធភូមិភាគខាងត្បូង នៃកងទ័ពរំដោះប្រជាជនចិន បានមានប្រសាសន៍ថា៖ សមយុទ្ធនាគមាសឆ្នាំ២០២៤ ពិតជាមានសារៈសំខាន់ ហើយបានថ្លែងអំណរគុណចំពោះក្រសួងការពារជាតិ និងអគ្គបញ្ជាការដ្ឋាន កងយោធពលខេមរភូមិន្ទ និងកម្លាំងចូលរួមរបស់កម្ពុជា ដែលបានផ្តល់ការគាំទ្រ និងភាពងាយស្រួលសម្រាប់ភាគីចិន ញ៉ាំឲ្យសមយុទ្ធប្រព្រឹត្តទៅដោយរលូន។ ឧត្តមសេនីយ៍ឯក បានលើកឡើងថា៖ យោធភូមិភាគខាងត្បូង និងកងយោធពលខេមរភូមិន្ទ បានរៀបចំសមយុទ្ធនាគមាសនេះ មានចំនួន៥ដងរួចមកហើយ លើកនេះជាលើកទី៦ ដែលឆ្នាំនេះជាសមយុទ្ធខ្លាំងជាងគេ និងមានភាពស៊ីជម្រៅជាងគេ រវាងចិននិងប្រទេសកម្ពុជា នៅក្នុងតំបន់ឥណ្ឌូចិន ហើយបានដើរតួនាទីយ៉ាងសំខាន់ នៅក្នុងការជំរុញទំនាក់ទំនងកងទ័ព នៃប្រទេសទាំងពីរ។ ឯកឧត្តមមេបញ្ជាការរង និងជានាយសេនាធិការយោធភូមិភាគខាងត្បូង នៃកងទ័ពរំដោះប្រជាជនចិន បានគូសបញ្ជាក់ផងដែរថា៖ ប្រទេសចិន និងកម្ពុជាជាមិត្តដែកថែប តែងបានយកអាសាគ្នា រួមសុខ រួមទុក្ខជាមួយគ្នា ហើយជាមិត្តចាស់ និងជាមិត្តពិតប្រាកដ ក្រោមការដឹកនាំ និងការបង្ហាញផ្លូវរបស់លោកប្រធានាធិបតីចិន ស៊ី ជីនពីង ហើយនិងប្រមុខដឹកនាំប្រទេសកម្ពុជា។ ប្រទេសយើងទាំងពីរមានគម្រោងកសាងសហគមន៍វាសនារួមនាយុគ្គសម័យថ្មី ប្រកបដោយគុណភាពខ្ពស់ និងក្នុងកម្រិតស្តង់ដារខ្ពស់ ជំរុញសន្តិភាព សេរីភាព នៅក្នុងតំបន់ ហើយនាំមកនូវសុខុមាលភាពកាន់តែល្អប្រសើរ សម្រាប់ប្រជាជននៃប្រទេសទាំងពីរ។ ក្នុងនោះផងដែរ ឯកឧត្តមក៏បានស្នើសុំដល់កម្ពុជា ក្នុងការផ្លាស់ប្តូរគណៈប្រតិភូទៅវិញទៅមក មិត្តភាព សហប្រតិបត្តិការ កាន់តែស៊ីជម្រៅ និងសូមគោរពអញ្ជើញ ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៅបំពេញទស្សនកិច្ចនៅយោធភូមិភាគខាងត្បូង នៃកងទ័ពរំដោះប្រជាជនចិនផងដែរ ៕
