ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នារសៀលថ្ងៃទី២៩ ខែឧសភា ឆ្នាំ២០២៤ ឯកឧត្តម នាយឧត្តមសេនីយ៍ឯក ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស បានអនុញ្ញាតឲ្យគណៈប្រតិភូដឹកនាំដោយ លោកវរនាវីឯក TAMURA Satoshi ប្រធានយោធាចារ្យ នៃសាលាបញ្ជាការសេនាធិការ នៃកងទ័ពស្វ័យការពារជាតិជប៉ុន ចូលជួបសម្តែងការគួរសម នៅទីស្ដីការក្រសួងការពារជាតិ។
ក្នុងជំនួបសម្តែងការគួរសមនេះ ឯកឧត្តម ណឺម សុវត្ថិ បានបង្ហាញនូវក្ដីសោមនស្សរីករាយ ស្វាគមន៍យ៉ាងកក់ក្តៅចំពោះប្រតិភូ ដែលបានអញ្ជើញមកទស្សនកិច្ចនៅកម្ពុជា។ ឆ្លៀតក្នុងឱកាសនោះ ជំនួសឲ្យឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្តម ណឺម សុវត្ថិ បាននាំនូវការផ្តាំផ្ញើសួរសុខទុក្ខ ជូនចំពោះថ្នាក់ដឹកនាំ នៃក្រសួងការពារជាតិ ក៏ដូចជាកងទ័ពស្វ័យការពារជាតិជប៉ុន។ ឯកឧត្តម ណឺម សុវត្ថិ បានជម្រាបជូនគណៈប្រតិភូអំពីស្ថិរភាព និងស្ថានភាពរីកចម្រើននៅក្នុងព្រះរាជាណាចក្រកម្ពុជា ដែលទទួលបានតាមរយៈការដាក់ចេញប្រកបដោយជោគជ័យ នៃនយោបាយឈ្នះឈ្នះរបស់ សម្ដេចអគ្គមហាសេនាបតីតេជោ ហ៊ុន សែន ហើយស្ថានភាពនេះ បាននឹងកំពុងបន្តរីកចម្រើនឆ្ពោះទៅមុខ តាមរយៈមាគ៌ាដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលការណ៍នេះទាមទារជាចាំបាច់ក្នុង ការលើកកម្ពស់គុណតម្លៃ នៃនយោបាយឈ្នះឈ្នះ ហើយមរតកដែលទទួលបាននេះ ពិតជាមានសារៈសំខាន់ក្នុងការអភិវឌ្ឍវិស័យការពារជាតិកម្ពុជា ដើម្បីរួមចំណែកថែរក្សាបាននូវសន្តិភាព ស្ថិរភាព នៅក្នុងតំបន់ និងអន្តរជាតិ ជាពិសេសការដាក់ចេញនូវសៀវភៅគោលនយោបាយការពារជាតិ បានឆ្លុះបញ្ចាំងឲ្យឃើញច្បាស់អំពីការត្រៀមខ្លួនរបស់កម្ពុជា ក្នុងការឆ្លើយតបទៅនឹងស្ថានភាព ដែលកំពុងមានការវិវត្តនៅជុំវិញពិភពលោក។
នៅក្នុងឱកាសនោះដែរ ឯកឧត្តម ណឺម សុវត្ថិ បានលើកឡើងថា៖ កម្ពុជាសូមថ្លែងអំណរគុណចំពោះកងទ័ពស្វ័យការពារជាតិជប៉ុន ដែលបានបញ្ជូនកងកម្លាំងរក្សាសន្តិភាព ចូលរួមនៅក្នុងបេសកកម្មអ៊ុនតាក់ នាអំឡុងឆ្នាំ១៩៩២ សម្រេចបាននូវការបោះឆ្នោតជាសកលលើកទី១នៅកម្ពុជា ដែលនេះគឺជាផ្នែកដ៏មានសារៈសំខាន់មួយ ក្នុងដំណើរការស្វែងរកសន្តិភាពនៅកម្ពុជា។ ឯកឧត្តម ណឹមសុវត្ថិ បានជំរុញនូវការបង្កើនចំណងមិត្តភាពកិច្ចសហប្រតិបត្តិការ រវាងកងទ័ពទាំងពីរ ជាពិសេសបានថ្លែងអំណរគុណចំពោះការគាំទ្រដ៏កិច្ចការហ្វឹកហ្វឺន និងអប់រំជូនដល់នាយទាហានកម្ពុជា នារយៈពេលកន្លងមក ហើយក្រសួងការពារជាតិកម្ពុជា ត្រៀមខ្លួនជានិច្ចក្នុងការផ្លាស់ប្តូរនូវបទពិសោធ ចំណេះដឹងជូនទៅដល់គណៈប្រតិភូ ដែលបានអញ្ជើញមកនាពេលនេះ។
លោកវរនាវីឯក TAMURA Satoshi បានថ្លែងអំណរគុណដល់កម្ពុជា ដែលបានរៀបចំទទួលបដិសណ្ឋារកិច្ចប្រកបដោយមិត្តភាព និងភាពកក់ក្តៅបំផុត ហើយថ្នាក់ដឹកនាំក៏ដូចជាកងទ័ពស្វ័យការពារជាតិជប៉ុន ក៏មានបំណងពង្រឹងកិច្ចសហប្រតិបត្តិការការពារជាតិ រវាងប្រទេសទាំងពីរឲ្យកាន់តែរឹងមាំបន្ថែមទៀត ៕
