នាព្រឹកថ្ងៃទី២៩ ខែឧសភា ឆ្នាំ២០២៤ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯកឧត្តម ចូសិប ស៊ូអើរ (Joseph Scheuer) អ្នកសម្របសម្រួលអង្គការសហប្រជាជាតិ(អ.ស.ប.) ប្រចាំព្រះរាជាណាចក្រកម្ពុជា បានអញ្ជើញជាអធិបតីភាព ក្នុងពិធីរំលឹកខួបលើកទី៧៦ នៃទិវាអន្តរជាតិកងកម្លាំងរក្សាសន្តិភាព អង្គការសហប្រជាជាតិ និងដាក់កម្រងផ្កាគោរពវិញ្ញាណក្ខ័ន្ធដល់កងកម្លាំងរក្សាសន្តិភាព ដែលបានពលីជីវិតក្នុងបុព្វហេតុបំពេញបេសកកម្មរក្សាសន្តិភាព របស់អង្គការសហប្រជាជាតិ(UN) នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ(PKO) ស្រុកភ្នំស្រួច ខេត្តកំពង់ស្ពឺ។
ឆ្នាំ២០២៤នេះ គឺជាខួបលើកទី៧៦ នៃការរក្សាសន្តិភាពរបស់ អង្គការសហប្រជាជាតិ និងជាខួបលើកទី៣២ ដែល អ.ស.ប. បានបង្កើតបេសកកម្ម ដែលហៅកាត់ថា UNTAC មកបំពេញបេសកកម្មនៅប្រទេសកម្ពុជា ក្នុងការចូលរួមចំណែកស្តារឡើងវិញ នូវសុខសន្តិភាព ជូនប្រទេសកម្ពុជា ដែលហែកហួរដោយសង្រ្គាមស៊ីវិលប្រមាណជាង៣ទសវត្សរ៍។ កម្លាំងរក្សាសន្តិភាពប្រមាណជាង ១៥ពាន់នាក់ នគរបាលស៊ីវិលប្រមាណជាង ៣ពាន់នាក់ និងបុគ្គលិកស៊ីវិល អ.ស.ប. ចំនួន៩០០នាក់ ដែលមកពី៤៥ប្រទេស បានចូលរួមយ៉ាងសកម្ម ពីឆ្នាំ១៩៩២ ដល់ឆ្នាំ១៩៩៣ ក្នុងបេសកកម្មអ៊ុនតាក់(UNTAC)នៅកម្ពុជា ហើយក្នុងនោះកម្លាំងរក្សាសន្តិភាពទាំងយោធា និងស៊ីវិលចំនួន៨២នាក់ បានពលីជីវិតលើទឹកដីកម្ពុជា។
នៅក្នុងរបាយការណ៍ស្វាគមន៍របស់ ឧត្តមសេនីយ៍ទោ សែម រតនា អគ្គនាយករង មជ្ឈមណ្ឌលជាតិរក្សាសន្តិភាព បានឲ្យដឹងថា៖ រយៈពេល ១៧ឆ្នាំ ក្រោយពី UNTAC បញ្ចប់បេសកកម្មនាឆ្នាំ១៩៩៣ ពោលគឺនៅឆ្នាំ២០០៦ កម្ពុជាក៏បានក្លាយជាប្រទេសបរិច្ចាគ ដោយបានបញ្ជូនកម្លាំងរបស់ខ្លួនទៅស្វែងរកសុខសន្តិភាពជូនបណ្តាប្រទេស និងប្រជាជាតិ ដែលរងទុក្ខវេទនាដូចកម្ពុជានាអតីតកាលផងដែរ។ នៅក្នុងរយៈពេល១៨ឆ្នាំនេះ កម្ពុជាដែលជាសមាជិកដ៏សកម្មមួយរបស់អ.ស.ប. បានបញ្ជូនកម្លាំងចូលរួមបេសកកម្មសរុបចំនួន ៩ពាន់ ៥៧០នាក់ ក្នុងនោះមាននារីចំនួន ៨១៨នាក់ ទៅកាន់បេសកកម្មចំនួន១២ ក្នុងប្រទេសចំនួន១០ មានជាអាទិ៍៖ ប្រទេសស៊ូដង់ ស៊ូដង់ខាងត្បូង ឆាដ លីបង់ ស៊ីរី សាយប្រឺស ម៉ាលី អាហ្វ្រិកកណ្តាល យេម៉េន និងសាធារណរដ្ឋប្រជាធិបតេយ្យកុងហ្គោ។ ហើយជាអកុសល វីរយុទ្ធជនកម្ពុជាចំនួន១១រូប បានពលីជីវិតលើសមរភូមិ នៃតំបន់បេសកកម្មនៅសាធារណរដ្ឋម៉ាលី និងអាហ្វ្រិកកណ្តាល។
ឯកឧត្តម ចូសិប ស៊ូអើរ (Joseph Scheuer) អ្នកសម្របសម្រួលអង្គការសហប្រជាជាតិប្រចាំនៅកម្ពុជាបានថ្លែងអំណរគុណ ចំពោះយុទ្ធជន និងយុទ្ធនារី ដែលបានបំពេញភារកិច្ច ក្រោមទង់របស់អ.ស.ប. ដោយប្រកាន់ខ្ជាប់នូវគោលការណ៍របស់អ.ស.ប. ដើម្បីសន្តិភាព ហើយថ្ងៃនេះយើងគោរពនូវការចងចាំចំពោះសមាជិកដែលបានបាត់បង់ជីវិត ក្នុងបុព្វហេតុសន្តិភាព។ ឯកឧត្តម ក៏បានថ្លែងដែរថា៖ ចាប់តាំងពីឆ្នាំ១៩៤៨ រហូតមកដល់បច្ចុប្បន្ន មានអ្នកថែរក្សាសន្តិភាពជាបុរស និងស្ត្រី ប្រមាណ២លាននាក់ ចូលរួមប្រតិបត្តិថែរក្សាសន្តិភាពពិភពលោកក្រោមឆ័ត្រអ.ស.ប. ក្នុងនោះមានយុទ្ធជន យុទ្ធនារី ថែរក្សាសន្តិភាពប្រមាណ ៤២០០នាក់ បានពលីជីវិត ក្នុងបុព្វហេតុរក្សាសន្តិភាពនេះ ក្នុងនោះមានកម្លាំងរក្សាសន្តិភាពកម្ពុជា ចំនួន ១១នាក់ផងដែរ។ ឯកឧត្តម បានបញ្ជាក់ថា៖ ការចូលរួមរបស់យោធិនកម្ពុជា ក្នុងប្រទេសកំពុងហួងហែងដោយសារភ្លើងសង្គ្រាម បានបញ្ជាក់យ៉ាងច្បាស់ឡើងវិញនូវការតាំងចិត្តរបស់កម្ពុជា ចំពោះការប្រកាន់ខ្ជាប់នូវស្មារតីធម្មនុញ្ញអង្គការសហប្រជាជាតិ និងក្នុងសហគមន៍យុទ្ធសាស្ត្ររួមគ្នា ដើម្បីរក្សាសន្តិភាព និងអនាគតដ៏ល្អប្រសើរទាំងអស់គ្នា។
នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងថា៖ សន្តិភាព មានគុណតម្លៃ និងជាឧបរកណ៍ដ៏សំខាន់មិនអាចខ្វះបាន សម្រាប់មនុស្សជាតិនៅលើពិភពលោក។ រាជរដ្ឋាភិបាលកម្ពុជា បានបង្ហាញនូវចក្ខុវិស័យក្នុងការបញ្ជូនកងកម្លាំងរក្សាសន្តិភាព ដោយប្តេជ្ញាចិត្តខ្ពស់ចំពោះប្រតិបត្តិការរក្សាសន្តិភាព ដើម្បីរួមចំណែកជាមួយរដ្ឋសមាជិក សហគមន៍អន្តរជាតិ និងសង្គមស៊ីវិលក្នុងការស្វែងរកសន្តិភាព សន្តិសុខ និងស្ថិរភាពអន្តរជាតិប្រកបដោយចីរភាព ដើម្បីផ្តល់ការគាំទ្រ តាមសំណូមពរជាក់ស្តែងរបស់អង្គការសហប្រជាជាតិ ស្របនឹងកាលៈទេសៈ និងបរិបទសកលនាពេលបច្ចុប្បន្ន។ នាយឧត្តមសេនីយ៍ បានលើកឡើងថា៖ ចំពោះកម្ពុជា ការប្រារព្ធទិវាឆ្នាំនេះ បានធ្វើឱ្យប្រជាជនកម្ពុជានឹកឃើញអំពីគុណតម្លៃនៃ«សន្តិភាព» ដែលកម្ពុជាសម្រេចបានដោយលំបាក ដែលក្នុងពេលបច្ចុប្បន្ននេះ ប្រទេសមួយចំនួនក្នុងតំបន់ និងពិភពលោកនៅបន្តច្បាំងគ្នា និងបង្កការបំផ្លិចបំផ្លាញទ្រព្យសម្បត្តិជាតិ និងអាយុជីវិតប្រជាជន។ ជាការពិតនៅក្នុងរយៈពេលជាង៣០ឆ្នាំកន្លងមកនេះ ទោះបីប្រទេសជាតិកម្ពុជា មានសុខសន្តិភាព មានការអភិវឌ្ឍរីកចម្រើនលើគ្រប់វិស័យយ៉ាងណាក្តី ក៏រាជរដ្ឋាភិបាល និងប្រជាជនកម្ពុជានៅតែចងចាំ និងដឹងគុណជានិច្ច និងសូមថ្លែងអំណរគុណយ៉ាងជ្រាលជ្រៅ ចំពោះអង្គការសហប្រជាជាតិ ដែលបានបញ្ជូនកងរក្សាសន្តិភាព«កងទ័ពមួកខៀវ» មកស្វែងរកសន្តិភាពនៅកម្ពុជា ដែលនាំឱ្យកម្ពុជាមានថ្ងៃនេះ។
នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីការពារជាតិ បានរំលឹកថា៖ ជាការឆ្លើយតបទៅនឹងការអំពាវនាវរបស់អគ្គលេខាធិការអង្គការសហប្រជាជាតិ រាជរដ្ឋាភិបាលកម្ពុជា បានសម្រេចបញ្ជូនកងទ័ពមួកខៀវ ទៅស្វែងរកសុខសន្តិភាព នៅបណ្តាប្រទេសលើពិភពលោក ដែលជួបទុក្ខលំបាកតាំងពីឆ្នាំ២០០៦ រហូតមកដល់ឆ្នាំ២០២៤ «រយៈពេល១៨ឆ្នាំ» កម្ពុជាបានបញ្ជូនកងកម្លាំងចំនួន ៩,៥៧០នាក់ ក្នុងនោះស្ត្រី៨១៨នាក់ ទៅបំពេញបេសកកម្មចំនួន១២ចំនួន ១០ប្រទេស នៅតំបន់អាហ្វ្រិក មជ្ឈឹមបូព៌ា និងអឺរ៉ុប។ បច្ចុប្បន្នកងកម្លាំងរក្សាសន្តិភាពកម្ពុជាចំនួន៦៣៩នាក់ មានស្ត្រី១២៥នាក់ ស្មើនឹង១៩% កំពុងបំពេញបេសកកម្មចំនួន៦ នៅ៥ប្រទេស ដែលកំពុងជួបវិបត្តិ ដើម្បីកសាងរួមគ្នាឱ្យកាន់តែប្រសើរឡើង សម្រាប់អនាគតនូវការអភិវឌ្ឍសេដ្ឋកិច្ច នីតិរដ្ឋ សិទ្ធិស្ត្រី សិទ្ធិមនុស្ស សុខភាព និងការអប់រំ ៕
