នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅរសៀលថ្ងៃទី២៣ ខែឧសភា ឆ្នាំ២០២៤ បានអនុញ្ញាតឲ្យ ឯកឧត្ដម PARK Jung-Wook ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅក្នុងឱកាសដែលឯកឧត្តមបានបំពេញបេសកកម្មការងារការទូតកូរ៉េ ប្រចាំនៅព្រះរាជាណាចក្រកម្ពុជា។
ក្នុងជំនួបនោះ នាយឧត្តមសេនីយ៍ ទៀ សីហា ក្នុងនាមឲ្យរាជរដ្ឋាភិបាលកម្ពុជា ឯកឧត្តមបានសម្តែងនូវការស្វាគមន៍ ចំពោះវត្តមាន របស់ឯកឧត្តម ឯកអគ្គរដ្ឋទូត និងសហការីសាធារណរដ្ឋកូរ៉េប្រចាំនៅកម្ពុជា ដែលបានមកសម្ដែងការគួរសម និងពិភាក្សាការងារជាមួយឯកឧត្តមនាពេលនេះ។ ក្រៅពីនោះ ឯកឧត្តមក៏បានសម្តែងនូវការអរគុណចំពោះឯកឧត្តម ឯកអគ្គរដ្ឋទូតផងដែរ ដែលបានជួយសម្របសម្រួលគ្រប់ទម្រង់បទដ្ឋាន របស់ថ្នាក់ដឹកនាំប្រទេសកម្ពុជា ពិសេសសម្ដេចបវរធិបតី នាយករដ្ឋមន្ត្រី នៃកម្ពុជា ក្នុងដំណើរទស្សនកិច្ចទៅកាន់ប្រទេសកូរ៉េនារយៈពេលកន្លងមក។ ក្នុងឱកាសបំពេញដំណើរទស្សនកិច្ចនៅទីនោះប្រមុខដឹកនាំប្រទេសទាំងពីរ បានពង្រឹងចំណងទាក់ទង កិច្ចសហប្រតិបត្តិការជាមួយគ្នា ប្រកបដោយផ្លែផ្កា ក្នុងការពង្រឹងលើវិស័យ សន្តិសុខ ពិសេសការពង្រឹងលើវិស័យការពារជាតិ របស់ប្រទេសទាំងពីរ កម្ពុជា និងកូរ៉េ។ ដូចដែលឯកឧត្តម និងលោកអនុព័ន្ធយោធាសាធារណរដ្ឋកូរ៉េនៅទីនេះស្រាប់ កន្លងមកភាគីទាំងពីរបានយកចិត្តទុកដាក់ក្នុងការពង្រឹងពង្រីកចំណងទាក់ទង កិច្ចសហប្រតិបត្តិការលើគ្រប់វិស័យ រវាងប្រទេសទាំងពីរ។ ជាមួយនិងនេះផងដែរឯកអគ្គរដ្ឋទូតក៏ដូចជាខាងអនុព័ន្ធយោធា ដែលប្រចាំនៅកម្ពុជាស្រាប់ នូវរាល់កិច្ចសហប្រតិបត្តិការ គឺតែងតែបានយកចិត្តទុកដាក់ ក្នុងការពង្រឹងពង្រីកជាមួយនឹងក្រសួងការពារជាតិកម្ពុជា។
ជាការឆ្លើយតប ឯកឧត្ដម PARK Jung-Wook បានសម្តែងនូវការអរគុណចំពោះ ឯកឧត្ដម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ចំពោះការផ្តល់ពេលវេលា អនុញ្ញាតឲ្យឯកឧត្តម និងសហការី បានចូលជួបសម្តែងការគួរសម និងពិភាក្សាការងារ នៅទីស្ដីការក្រសួងការពារជាតិនាពេលនេះ។ ជាមួយគ្នានេះផងដែរ ឯកឧត្តម ឯកអគ្គរដ្ឋទូត ក៏បានចូលរួមសម្តែងនូវការរំលែកទុក្ខចំពោះក្រុមគ្រួសារយុទ្ធជនពលី ដែលបានជួបឧប្បត្ដិហេតុផ្ទុះគ្រាប់នាពេលកន្លងទៅ នៅយោធភូមិភាគទី៣ របស់ប្រទេសកម្ពុជា។ ឯកឧត្តម ឯកអគ្គរដ្ឋទូតកូរ៉េ ក៏សូមអបអរសាទរ ចំពោះដំណើរបំពេញទស្សនកិច្ចជាប្រវត្តិសាស្ត្ររបស់ សម្ដេចមហាបវរធិបតី ទៅកាន់ប្រទេសកូរ៉េ ហើយបានជួបប្រាស្រ័យទាក់ទងពិភាក្សាគ្នា ប្រកបដោយអត្ថន័យជាប្រវត្តិសាស្ត្រ។ តាមរយៈនៃដំណើរទស្សនកិច្ច និងជំនួសប្រាស្រ័យទាក់ទងគ្នា រវាងថ្នាក់ដឹកនាំទាំងពីរ គឺបានធ្វើឲ្យចំណងសាមគ្គីភាព មិត្តភាព រវាងប្រទេសទាំងពីរ ប្រែក្លាយពីមិត្តភាពធម្មតា ទៅជាដៃគូយុទ្ធសាស្ត្រគ្រប់ជ្រុងជ្រោយ។ តាមរយៈនេះផងដែរចំណងមិត្តភាព រវាងរដ្ឋាភិបាល កងទ័ព និងប្រជាជន នៃប្រទេសទាំងពីរក៏បានដំឡើងពីកិច្ចសហប្រតិបត្តិការធម្មតា ទៅជាកិច្ចសហប្រតិបត្តិការគ្រប់ជ្រុងជ្រោយ ដែលជាការពង្រឹងមូលដ្ឋានគ្រឹះ នៃកិច្ចសហប្រតិបត្តិការទ្វេភាគី របស់ប្រទេសទាំងពីរ ពិសេសគឺការងារមួយ ដែលមានសារៈសំខាន់ និងលេចធ្លោបំផុតចាប់តាំងពីចាប់ផ្ដើមទំនាក់ទំនងការទូតជាផ្លូវការ តាំងពីឆ្នាំ១៩៩២មក។
ឯកឧត្ដម PARK Jung-Wook បានសង្កត់ធ្ងន់ថា៖ តាមរយៈដំណើរទស្សនកិច្ចរបស់ សម្ដេចធិបតី នៅសាធារណរដ្ឋកូរ៉េ ភាគីទាំងពីរ បានជំរុញផងដែរ លើកិច្ចសហប្រតិបត្តិការទ្វេភាគី ដោយផ្ដោតសំខាន់ទៅលើវិស័យការពារជាតិ សេដ្ឋកិច្ច និងវិស័យទេសចរណ៍ រវាងប្រជាជន និងប្រជាជន នៃប្រទេសទាំងពីរឲ្យកាន់តែស៊ីជម្រៅ។ ក្នុងនោះដែរភាគីទាំងពីរ ក៏បានបើកនៅផ្លូវមួយ ក្នុងការពង្រឹងកិច្ចសហប្រតិបត្តិការ រវាងប្រទេសទាំងពីរ ទៅថ្ងៃអនាគតផងដែរ។ ទាក់ទងទៅនឹងវិស័យការពារជាតិ ឯកឧត្តម ឯកអគ្គរដ្ឋទូតបានជម្រាបជូនឯកឧត្តម ឧបនាយករដ្ឋមន្ត្រី ផងដែរថា៖ កងទ័ពនៃសាធារណរដ្ឋកូរ៉េ នៅពេលខាងមុខនេះ នឹងធ្វើការចូលសំចតនាវាចម្បាំងរបស់ខ្លួន ជាលើកទីមួយ ក្នុងអំឡុងពេលឆមាសទី២ នៅឆ្នាំនេះ ក្នុងន័យមួយជំរុញកិច្ចសហប្រតិបត្តិការ រវាងកងទ័ពជើងទឹកនៃប្រទេសទាំងពីរ គឺកូរ៉េ និងកម្ពុជា។ តាមរយៈនេះលោកអនុព័ន្ធយោធា នៃសាធារណរដ្ឋកូរ៉េ នឹងផ្ដល់ព័ត៌មានជាបន្តបន្ទាប់ទៀតអំពីកម្មវិធីនេះ។ ពាក់ព័ន្ធដល់អនុសាសន៍ផ្នែកយោធា នៃសន្តិសុខលម្ហសមុទ្រ ទោះបីភាគីទាំងពីរមិនទាន់បានចុះហត្ថលេខា លើអនុស្សារណៈយោគយល់គ្នាក៏ដោយ ក៏ប៉ុន្តែថ្នាក់ដឹកនាំកងទ័ពជើងទឹកទាំងពីរ នៅតែបន្តជំរុញកិច្ចសហប្រតិបត្តិការពាក់ព័ន្ធទៅនឹងបញ្ហាសន្តិសុខលម្ហសមុទ្រ ដើម្បីឲ្យមានសន្តិភាព ស្ថិរភាព សន្តិសុខនៅក្នុងតំបន់។ ក្នុងន័យនេះ ឯកឧត្តម ឯកអគ្គរដ្ឋទូតក៏បានស្នើសុំដល់ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា ជួយជំរុញឲ្យមានការចុះហត្ថលេខាលើអនុស្សារណៈនេះ ដែលអាចធ្វើទៅបាន។ ចំណុចមួយទៀតពាក់ព័ន្ធទៅនឹងបញ្ហាថែរក្សាសន្តិភាពភីស៊ីអូ(PCO) គឺថ្នាក់ដឹកនាំទាំងពីរ ក៏បានសម្តែងនូវការលើកទឹកចិត្ត ក្នុងការជំរុញបន្ថែមទៀត លើកិច្ចសហប្រតិបត្តិការ ដើម្បីបណ្តុះបណ្តាលវិស័យថែរក្សាសន្តិភាពនេះ ដែលនឹងអាចធ្វើឡើងនៅក្នុងខែវិច្ឆិកាឆ្នាំនេះ ដែលនៅក្នុងកម្មវិធីនោះ មានយោធាចារ្យ ដែលមានសមាសភាពមកពីប្រទេសជប៉ុន អូស្ត្រាលី និងសមាសភាពមកពីសាធារណរដ្ឋកូរ៉េផងដែរ។
ជាការឆ្លើយតប ឯកឧត្តម ទៀ សីហា បានបញ្ជាក់ថា៖ ចាប់តាំងពីឯកឧត្ដមចូលកាន់តំណែងជារដ្ឋមន្ត្រីក្រសួងការពារជាតិ របស់កម្ពុជា ឯកឧត្តមបានពិនិត្យយ៉ាងយកចិត្តទុកដាក់គ្រប់ទំរង់របាយការណ៍ ដែលពាក់ព័ន្ធដល់កិច្ចសហប្រតិបត្តិការ រវាងប្រទេសទាំងពីរ កម្ពុជា និងសាធារណរដ្ឋកូរ៉េ លើវិស័យការពារជាតិ។ ពាក់ព័ន្ធដល់ចំណុច ដែលឯកឧត្តម ឯកអគ្គរដ្ឋទូតកូរ៉េ បានលើកឡើងខាងលើនោះ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបញ្ជាក់ថា៖ កងទ័ពជើងទឹកកម្ពុជា កំពុងតែទន្ទឹងរង់ចាំ អំពីវត្តមានជាលើកដំបូងរបស់នាវាចម្បាំងកងទ័ពជើងទឹកកូរ៉េ ចូលចតនៅកំពង់ផែអន្តរជាតិ ខេត្តព្រះសីហនុ។ ជាការពិត យើងតែបន្តកិច្ចសហប្រតិបត្តិការជាមួយគ្នាជាពិសេស គឺការអប់រំហ្វឹកហ្វឺន តាមការចង្អុលបង្ហាញក៏ដូចជាការណែនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដើម្បីធ្វើទំនើបកម្មវិស័យការពារជាតិ ជាពិសេសចាប់យកនូវជំនាញសម្រាប់កងទ័ពរបស់យើង ឲ្យកាន់តែច្បាស់លាស់បំផុត ដូច្នេះកិច្ចសហប្រតិបត្តិការជាមួយនឹងបណ្ដាប្រទេសមិត្ត យើងត្រូវតែយកចិត្តទុកដាក់ក្នុងការពង្រឹងពង្រីកបន្ថែមទៀត ដើម្បីឲ្យកងទ័ពកម្ពុជាមានគុណភាព ដែលអាចពង្រឹងប្រៀបការពារជាតិរបស់ខ្លួនបានរឹងមាំ។ ចំណុចមួយទៀតពាក់ព័ន្ធទៅដល់បញ្ហាសន្តិសុខលម្ហសមុទ្រនេះ កម្ពុជាបាននិងកំពុងយកចិត្តទុកដាក់ ព្យាយាមប្រឹងប្រែង ដើម្បីឲ្យបានទាន់ដំណើរទស្សនកិច្ចរបស់សម្តេចធិបតី ហ៊ុន ម៉ាណែត ទៅកាន់ប្រទេសកូរ៉េ។
ឯកឧត្តម ទៀ សីហា បានបញ្ជាក់ថា៖ សម្តេចធិបតី ហ៊ុន ម៉ាណែត មានឆន្ទៈខ្ពស់ ក្នុងការពង្រឹងពង្រីកកិច្ចសហប្រតិបត្តិការប្រទេសទាំងពីរ ជាពិសេសការចុះហត្ថលេខាលើអនុស្សារណៈអឹមអូយូ(MOU)នេះ ឲ្យបានលឿនបំផុត ហើយនឹងបន្តពង្រឹងកិច្ចសហប្រតិបត្តិការនេះបន្ថែមទៀត ដើម្បីជំរុញការងារនេះឲ្យបានលឿន។ ចំណុចមួយផ្សេងទៀតកម្ពុជាក៏បានបន្ត និងសហការគ្នា ជាពិសេស នៅក្នុងក្របខ័ណ្ឌអង្គការសហប្រជាជាតិ ហើយកម្ពុជាអបអរសាទរពេលកន្លងមក ក្រោមការហ្វឹកហ្វឺនរួមគ្នាក្នុងនៃសមយុទ្ធពហុជាតិ ដែលកម្ពុជាធ្វើជាម្ចាស់ផ្ទះ បានសម្រេចទៅជោគជ័យក្រោមម្លប់សន្តិភាព ការហ្វឹកហាត់នេះ គឺទទួលបាននូវជំនាញថ្មីៗ និងផ្លែផ្កាជាច្រើន បន្ទាប់ពីការផ្លាស់ប្តូរគំនិត បទពិសោធ និងជំនាញនៃវគ្គហ្វឹកហ្វឺនទាំងនោះ។ ក្រោយកត់សម្គាល់នូវកត្តាចំណុចខាងលើនេះ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបញ្ជាក់ថា៖ យើងបានចុះនូវពិធីសារ ឬអនុស្សារណៈជាច្រើនជាមួយនឹងសាធារណកូរ៉េ ជាពិសេសរវាងក្រសួងការពារជាតិ និងក្រសួងការពារជាតិ នៃប្រទេសកូរ៉េផងដែរ។ ជាក់ស្ដែងនៅក្នុងឆ្នាំ២០២២កន្លងមកនេះ គឺយើងបានចុះអនុស្សារណៈ នៃការយោគយល់គ្នាទៅវិញទៅមក រវាងកងទ័ពជើងគោក នៃប្រទេសទាំងពីរ។ ប្រការនេះឯកឧត្តមគិតថា កិច្ចសហប្រតិបត្តិការរវាងកងទ័ពទាំងពីរ ពីមួយថ្ងៃទៅមួយថ្ងៃ កាន់តែពង្រឹង និងពង្រីកបន្ថែមទៀត តាមការណែនាំរបស់ សម្ដេចធិបតី នាយករដ្ឋមន្ត្រីកម្ពុជា ពិសេសថ្នាក់ដឹកនាំរបស់ក្រសួងការពារជាតិកម្ពុជា។ ឯកឧត្តម ឯកអគ្គរដ្ឋទូត បានអរគុណចំពោះឯកឧត្តម ឧបនាយករដ្ឋមន្ត្រី ដែលបានគាំទ្រដល់គ្រប់សកម្មភាពរបស់សាធារណរដ្ឋកូរ៉េ ៕
