នៅសាលប្រជុំក្រសួងការពារជាតិ ថ្ងៃទី២០ ខែឧសភា ឆ្នាំ២០២៤ លោកជំទាវ នាយឧត្តមសេនីយ៏ ដាំដារីនី រដ្ឋលេខាធិការក្រសួងការពារជាតិ និងជាប្រធានក្រុមការងារស្រង់របាយការណ៏ព័ត៌មានប្រចាំថ្ងៃ និងសំណូមពរនានា របស់ប្រជាពលរដ្ឋ ផ្ញើមកកាន់គេហទំព័ររបស់ សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត បានដឹកនាំកិច្ចប្រជុំក្រុមការងារ ផេកសម្តេច ដើម្បីពិនិត្យមើលនូវរាល់សំណូមនានា ដែលបានឆាតចូលផេក ដើម្បីដោះស្រាយឲ្យទាន់ពេលវេលា មិនថាជាសំណូមពររបស់ប្រជាពលរដ្ឋ ឬកងកំលាំងប្រដាប់អាវុធឡើយ ក្នុងគោលបំណង ធ្វើការដោះស្រាយ សម្របសម្រួល រាល់បញ្ហាកើតឡើងក្នុងខ.ភ.ម និងពីបញ្ហាផ្សេងៗ មានការទាក់ទងនៅតាមបណ្តាអង្គភាពនីមួយៗ ដែលបានធ្វើការសំណូមពរនានា ផ្ញើមកកាន់គេហទំព័ររបស់ សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត។
ក្នុងរបាយការណ៍របស់ ឧត្តមសេនីយ៍ទោ វ៉េង សុខហេង នាយក នាយកដ្ឋានព័ត៌មាន អគ្គនាយកដ្ឋានយោធសេវា ក្រសួងការពារជាតិ បានឲ្យដឹងថា៖ រយៈកាលកន្លងមកនាចុងឆ្នាំ២០២៣ និងដើមឆ្នាំ២០២៤នេះ យើងបានទទួលព័ត៌មាន ហើយក៏បានធ្វើការផ្សព្វផ្សាយជូនថ្នាក់លើ ដើម្បីរួមគ្នាដោះស្រាយទៀតផង។ មានរឿងជាច្រើន ដែលបានបង្ហោះនៅក្នុងហ្វេសប៊ុក ទាក់ទងក្នុងរឿងរបស់កងយោធពលខេមរភូមិន្ទ ក្នុងនោះតាមបណ្ដាកងឯកភាព ក៏បានធ្វើការដោះស្រាយលើបញ្ហាទាំងនោះ បានជាបន្តបន្ទាប់ យើងក៏បានផ្សព្វផ្សាយព័ត៌មានជូនទៅថ្នាក់ ក្រសួងការពារជាតិ ដើម្បីឲ្យបានជ្រាបផងដែរ។
ក្នុងឱកាសនោះលោកជំទាវ ដាំ ដារីនី មានប្រសាសន៍ទៅកាន់ក្រុមការងារ ត្រូវខិតខំប្រឹងប្រែង យកចិត្តទុកដាក់តាមដានរាល់គ្រប់សកម្មភាពការងារ ដែលកើតឡើងតាមបណ្តាអង្គភាពទាំងអស់ ចំពោះខ្លឹមសារ ដែលបានផ្ញើរ មកកាន់ផេករបស់សម្តេចទាំង២។ លោកជំទាវ ក៏បានបញ្ជាក់ថា៖ ការងារផេក(Page)របស់សម្តេចទាំង២ មានដូចជា ហ្វេសប៊ុក(Facebook), តេឡេក្រាម(Telegram)ជាដើម ក្នុងនាមយើងជាអ្នកនាំពាក្យឲ្យក្រសួងការពារជាតិ ត្រូវមានភារកិច្ចធ្វើការឆ្លើយតប និងដោះស្រាយឲ្យបានទាន់ពេលវេលា រាល់សភាពការណ៍នានា ដែលកើតឡើង។ លោកជំទាវ ដាំ ដារីនី មានប្រសាសន៍ថា៖ រយៈពេលកន្លងមក ក្រុមការងារបានធ្វើការតាមដាន ដោយបានឆ្លើយតប និងដោះស្រាយបានល្អ តែក៏នៅមានបញ្ហាមួយចំនួនក៏មានការយឺតយ៉ាវផងដែរ។ លោកជំទាវ ក៏បានសំណូមពរដល់ក្រុមការងារទាំងអស់ ត្រូវរួមសហការគ្នា ដើម្បីបន្តតាមដានការងារ ដែលពាក់ព័ន្ធលើការ comments ក្នុងគេហទំព័ររបស់សម្តេចទាំង២ ដើម្បីឆ្លើយតបទាន់ពេលវេលា ចំពោះបញ្ហាណាដែលត្រូវដោះស្រាយ ពិសេសបញ្ហាដែលទាក់ទងជាមួយកងទ័ព គឺត្រូវយកចិត្តទុកដាក់សំខាន់។ លោកជំទាវបានបន្តទៀតថា៖ នៅពេលទទួលបានបញ្ហាភ្លាម គឺតាមបណ្តាអង្គភាព ដែលមានការពាក់ព័ន្ធ ត្រូវតែធ្វើការសម្របសម្រួលចំពោះបញ្ហានោះជាបន្ទាន់ ហើយបញ្ជូនរឿងនោះទៅតាមបណ្តាជំនាញ ដើម្បីដោះស្រាយឲ្យបានទាន់ពេលវេលា។ ក្រុមជំនាញត្រូវរាយការណ៏ជាបន្ទាន់ទៅកាន់មេបញ្ជាការអង្គភាព ដើម្បីជួយសំរួលដល់ក្រុមការងារហ្វេសប៊ុក ដោយមានការសហការជាមួយការិយាល័យអ្នកនាំពាក្យ ក្នុងការបកស្រាយបំភ្លឺឆ្លើយតបទៅនឹងម្ចាស់អត្ថបទ ក៏ដូចជាបកស្រាយចំពោះថ្នាក់ដឹកនាំ និងសាធារណជនផងដែរ។ លោកជំទាវ រដ្ឋលេខាធិការ បានបញ្ជាក់ក្នុងឱកាសនោះផងដែរថា៖ នៅពេលដែលមានបញ្ហាកើតឡើងភ្លាម គឺក្រុម ការងារទាំងអស់ ត្រូវជូនដំណឺងឲ្យគ្នាជាបន្ទាន់ គឺក្រុមការងារមានភារកិច្ចទទួលខុសត្រូវទាំងអស់គ្នា ហើយស្វែងរកយន្តការជាបន្ទាន់ ដើម្បីសម្របសម្រួលសភាពការណ៏នោះតាមជំនាញ កុំឲ្យរីករាលដាលកាន់តែធ្ងន់ធ្ងរឡើង មុននឹងធ្វើរបាយការណ៏ទៅជូនថ្នាក់ដឹកនាំក្រសួងការពារជាតិ ៕
