ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ និងឧត្តមសេនីយ៍ទោ កៅ ស៊ីវឈឹង នាយរងសេនាធិការ កងទ័ពជើងគោក តំបន់ភូមិភាគខាងត្បូង នៃកងទ័ពរំដោះប្រជាជនចិន និងជាប្រធានក្រុមការងារដឹកនាំសមយុទ្ធភាគីកងទ័ពចិន នៅព្រឹកថ្ងៃទី១៦ ខែឧសភា ឆ្នាំ២០២៤ បានអញ្ជើញបើកសមយុទ្ធ ឆ្នាំ២០២៤ រវាងកងទ័ពកម្ពុជា-ចិន នៅមជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ ស្ថិតក្នុងភូមិច្រកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង។
បើតាមសេចក្តីរាយការណ៍របស់ ឧត្តមសេនីយ៍ទោ ប៉ែន សុក្រឹតវិទ្យា ប្រធានក្រុមការងារប្រតិបត្តិការសមយុទ្ធនាគមាសកម្ពុជា-ចិន ភាគីកងទ័ពកម្ពុជា បានឱ្យដឹងថា៖ សមយុទ្ធនាគមាសកម្ពុជា-ចិន ឆ្នាំ២០២៤ ដែលបានបើកប្រតិបត្តិការនាពេលនេះ ប្រព្រឹត្តទៅរយៈពេល ១៥ថ្ងៃ ចាប់ពីថ្ងៃទី១៦ ដល់៣០ ខែឧសភា ឆ្នាំ២០២៤ ក្រោមប្រធានបទ “ប្រតិបត្តិការប្រឆាំងភេរវកម្មរួមគ្នា និងការងារសង្គ្រោះមនុស្សធម៌”។ គោលបំណងនៃសមយុទ្ធនេះ គឺក្នុងន័យអភិវឌ្ឍឲ្យកាន់តែស៊ីជម្រៅ នូវទំនាក់ទំនងដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ កម្ពុជា-ចិន ពង្រឹងទំនុកចិត្តនយោបាយទៅវិញទៅមក បម្រើឲ្យការកសាងសហគមន៍វាសនារួម កម្ពុជា-ចិន ក្នុងយុគ្គសម័យថ្មី ជំរុញកិច្ចសហប្រតិបត្តិការ និងការផ្លាស់ប្តូរបទពិសោធន៍ រវាងកងទ័ពទាំងពីរ ពង្រឹងទស្សនៈសន្តិសុខ ដែលមានលក្ខណៈរួមគ្នា បរិយាប័ន កិច្ចសហការ និងនិរន្តភាព រួមគ្នាថែរក្សាស្ថានភាពសន្តិភាពតំបន់ដ៏ល្អប្រសើរ នាពេលបច្ចុប្បន្ន លើកកម្ពស់សមត្ថភាព និងលទ្ធភាពប្រយុទ្ធជាក់ស្តែង នៃកងទ័ពទាំងពីរកម្ពុជា-ចិន ក្នុងការប្រយុទ្ធប្រឆាំងនឹងភេរវកម្មនិយម និងលើកកម្ពស់ឥទ្ធិពលឈ្មោះ នៃសមយុទ្ធនាគមាសនៅក្នុងវេទិកាតំបន់ និងអន្តរជាតិ។ សមយុទ្ធនេះមាន២គោលដៅ គឺគោលដៅទី១៖ សមយុទ្ធលើគោក នៅមជ្ឈមណ្ឌលហ្វឹកហ្វឺនកងរាជអាវុធហត្ថ នាភ្នំជុំសែនរីករាយ ក្នុងភូមិសាស្ត្រខេត្តកំពង់ឆ្នាំង និងគោលដៅទី២៖ សមយុទ្ធលើផ្ទៃសមុទ្រ នៅលើផ្ទៃសមុទ្រ និងដែនអាកាសកម្ពុជា ក្នុងតំបន់ខេត្តព្រះសីហនុ។ សមយុទ្ធនេះមានកម្លាំងទ័ព និងសព្វាវុធចូលរួមសមយុទ្ធសរុបចំនួន ២០៧៥នាក់ ដែលក្នុងនោះភាគីកងទ័ពកម្ពុជា មានចំនួន ១៣១៥នាក់, ភាគីចិន មានកម្លាំងចូលរួមចំនួន ៧៦០នាក់។ តាមការកត់សម្គាល់សមយុទ្ធកងទ័ពកម្ពុជា-ចិន នាឆ្នាំ២០២៤នេះ បានធ្វើឡើងក្នុងទ្រុងទ្រាយធំ ជាងបណ្ដាឆ្នាំមុនៗ ក្រោមប្រធានបទ “ប្រតិបត្តិការប្រឆាំងភេរវកម្មរួមគ្នា និងការងារសង្គ្រោះមនុស្សធម៌”។
ឧត្តមសេនីយ៍ទោ កៅ ស៊ីវឈឹង នាយរងសេនាធិការកងទ័ពជើងគោកភាគខាងត្បូង កងទ័ពរំដោះប្រជាជនចិន បានចាត់ទុកសមយុទ្ធនាគមាសឆ្នាំ២០២៤នេះ គឺជាយន្តការជាក់ស្ដែង ក្នុងការអនុវត្តកិច្ចព្រមព្រៀង រវាងថ្នាក់ដឹកនាំកងទ័ពប្រទេសទាំង២ ក្នុងការជំរុញឲ្យកាន់តែស៊ីជម្រៅថែមទៀត នៅកិច្ចសហប្រតិបត្តិការលើវិស័យយោធា និងចូលរួមជំរុញលើកកម្ពស់សមត្ថភាពកងទ័ពប្រទេសទាំង២ ឲ្យកាន់តែរីកចម្រើន ឆ្ពោះទៅមុខកាន់តែទំនើបកម្មនៃសម័យបច្ចេកវិទ្យាឌីជីថល។
មានប្រសាសន៍ក្នុងពិធីបើកសមយុទ្ធនាឱកាសនោះ នាយឧត្តមសេនីយ៍ វង្ស ពិសេន ក្នុងនាមរាជរដ្ឋាភិបាល ក្រសួងការពារជាតិ អគ្គមេបញ្ជាការ នៃកងយោធពលខេមរភូមិន្ទ បានថ្លែងនូវការកោតសរសើរដល់គណៈកម្មការ និងក្រុមការងារសមយុទ្ធនាគមាសទាំង២ភាគី កម្ពុជា-ចិន អាជ្ញាធរដែនដី និងគ្រប់សមត្ថកិច្ចពាក់ព័ន្ធ ក៏ដូចជាបណ្តាស្ថាប័នកងឯកភាពទាំងអស់ នៃកងយោធពលខេមរភូមិន្ទ ដែលបានខិតខំប្រឹងប្រែងយកអស់កម្លាំងកាយចិត្ត ក្នុងការបំពេញភារកិច្ច ធ្វើកិច្ចសហប្រតិបត្តិការល្អជាមួយគ្នា ជាពិសេស ជាមួយមិត្តចិន ក្នុងការរៀបចំសមយុទ្ធនាគមាស២០២៤នេះ ឱ្យបានជោគជ័យ ប្រកបដោយផ្លែផ្កា។ សមយុទ្ធនាគមាសប្រចាំឆ្នាំ រវាងកងយោធពលខេមរភូមិន្ទ ជាមួយកងទ័ពរំដោះប្រជាជនចិននៅឆ្នាំ២០២៤នេះ ត្រូវបានពង្រីកទំហំកាន់តែធំ ខ្លឹមសារកាន់តែស៊ីជម្រៅ និងចំនួនយោធិន យុទោ្ធបករណ៍ចូលរួមកាន់តែច្រើន និងទំនើបជាងឆ្នាំមុនៗ ដើម្បីឱ្យស្របទៅនឹងទំហំកិច្ចសហប្រតិបត្តិការ រវាងកងទ័ពទាំង២ កម្ពុជា-ចិន ដែលកាន់តែរីកចម្រើន និងស៊ីជម្រៅជាលំដាប់លើគ្រប់វិស័យ។ ឯកឧត្តម អគ្គមេបញ្ជាការបន្ថែមថា៖ សមយុទ្ធនាគមាសឆ្នាំនេះ មិនត្រឹមតែជាសមយុទ្ធកម្រិតកងទ័ពជើងគោក និងកងទ័ពជើងគោក នៅលើដីគោកប៉ុណ្ណោះទេ តែមានការពង្រីកដល់លម្ហសមុទ្រ ដែលមានការចូលរួមពីកងទ័ពជើងទឹកកម្ពុជា-ចិនផងដែរ។ ឯកឧត្តម ជឿជាក់ថា៖ សមយុទ្ធនាគមាសនេះ នឹងបន្តរីកចម្រើន និងពង្រីកដល់កងទ័ពជើងអាកាស និងទ័ពជំនាញផ្សេងៗទៀតនាពេលអនាគត។ ឯកឧត្តម វង្ស ពិសេន បានសង្កត់ធ្ងន់ទៀតថា៖ សមយុទ្ធនាគមាស បានក្លាយជានិម្មិតរូប នៃកិច្ចសហប្រតិបត្តិការដ៏រឹងមាំមិនអាចបំបែកបាន រវាងប្រទេសនិងកងទ័ពទាំង២ កម្ពុជា-ចិន សមយុទ្ធនេះ ពិតជាផ្តល់នូវសារសំខាន់ក្នុងការលើកកម្ពស់សមត្ថភាព និងការយល់ដឹងបន្ថែមទៀតដល់កងទ័ពទាំង២ ដូចជាការបង្ហាញអំពីសមត្ថភាព ការផ្លាស់ប្តូរបទពិសោធន៍គ្នាទៅវិញទៅមក បង្កើនការយល់ដឹងពីការបញ្ជាចម្រុះ និងនីតិវិធីប្រតិបត្តិការចម្រុះ យុទ្ធោបករណ៍ បច្ចេកទេស និងជំនាញថ្មីៗ។ សមយុទ្ធនេះ ក៏បានធ្វើឱ្យកងទ័ពយើងពង្រឹងបាននូវទំនាក់ទំនងល្អ បង្កើនចំណងសាមគ្គីភាព ចេះសម្របសម្រួល អាចរស់នៅ និងធ្វើការងាររួមគ្នា ជាមួយជាតិសាសន៍ដទៃ ក្នុងពេលធ្វើប្រតិបត្តិការរួម ដើម្បីឆ្លើយតបយ៉ាងមានប្រសិទ្ធភាព និងទាន់ពេលវេលា ក្នុងប្រតិបត្តិការទាំងថ្នាក់ជាតិ-អន្តរជាតិ ក្នុងគោលបំណងចូលរួមទប់ស្កាត់ និងដោះស្រាយបញ្ហាប្រឈមនានា ដែលអាចកើតមានឡើងជាយថាហេតុ។
នាយឧត្តមសេនីយ៍ អគ្គមេបញ្ជាការ នៃកងយោធពលខេមរភូមិន្ទ បានរំលេចនូវការដឹកនាំរបស់ប្រមុខដឹកនាំ នៃរាជរដ្ឋាភិបាលកម្ពុជា ដែលមាន សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បន្តដឹកនាំប្រទេស បានធ្វើឲ្យប្រទេសកម្ពុជាមានសុខសន្តិភាព នៅទូទាំងប្រទេស ដែលធ្វើឲ្យប្រទេសកម្ពុជា មានឱកាសកសាង ស្ដារ និងអភិវឌ្ឍន៍ប្រទេសឱ្យមានសន្ទស្សន៍កាន់តែរីកចម្រើន ជាបន្តបន្ទាប់លើគ្រប់វិស័យ។ ដូច្នេះកត្តាសន្តិភាព មានតម្លៃដ៏មហាសាល ដែលមិនអាចកាត់ថ្លៃបាន បើគ្មានសន្តិភាព គឺគ្មានអ្វីៗទាំងអស់រហូតមកដល់សព្វថ្ងៃនេះ ហើយក៏គ្មានលទ្ធិប្រជាធិបតេយ្យ សិទ្ធិមនុស្ស និងការអភិវឌ្ឍនោះដែរ។ នាយឧត្តមសេនីយ៍ អគ្គមេបញ្ជាការ បានថ្លែងអរគុណសន្តិភាព ដោយសារនយោបាយឈ្នះឈ្នះ របស់ សម្ដេចតេជោ ហ៊ុន សែន ទើបកម្ពុជាបានបញ្ចប់សង្គ្រាម មានសន្តិភាព យើងទាំងអស់គ្នាត្រូវដឹងគុណស្ថាបនិក មគ្គុទេសឯក នយោបាយឈ្នះ ឈ្នះ របស់ សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ប្រធានឧត្តមប្រឹក្សាព្រះមហាក្សត្រ នៃកម្ពុជា និងជាប្រធានព្រឹទ្ធសភាជាតិ នៃព្រះរាជាណាចក្រកម្ពុជា។ នាយឧត្តមសេនីយ៍ វង្ស ពិសេន ក្នុងនាម នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ពិសេសថ្នាក់ដឹកនាំអគ្គមេបញ្ជាការ នៃកងយោធពលខេមរភូមិន្ទ បានផ្ដាំផ្ញើដល់យោធិនគ្រប់រូប ត្រូវគោរពប្រតិបត្តិឲ្យបានម៉ឺងម៉ាត់ នៅបទវិន័យទូទៅរបស់កងយោធពលខេមរភូមិន្ទ ក្នុងនោះត្រូវយកចិត្តទុកដាក់រួមសហការឲ្យបានស្អិតរមួតជាមួយកងទ័ពមិត្ត ហើយត្រូវយកចិត្តទុកដាក់បង្កើនកិច្ចសហការក្នុងនាមជាម្ចាស់ផ្ទះ មានតួនាទីឈានទៅមុខ ក្នុងការបង្កឲ្យមានភាពស្និទ្ធស្នាល បង្កើតនូវបរិយាកាសរីករាយ សំដៅធ្វើយ៉ាងណាឲ្យភាគីមិត្តបានយល់ និងជ្រោតជ្រាបកាន់តែស៊ីជម្រៅថែមទៀត អំពីតម្លៃនៃវប្បធម៌ ទំនៀមទម្លាប់ ប្រពៃណីរបស់ជាតិយើង។ ក្នុងករណីចាំបាច់ត្រូវចេះជួយសម្របសម្រួលដល់កងកម្លាំងភាគីមិត្ត ផ្ដល់បទពិសោធន៍ និងដកស្រង់បទពិសោធន៍ ពីគ្នាទៅវិញទៅមក ដោយក្តីស្មោះត្រង់ ជ្រះថ្លា ក្នុងនាមសហការីរួមវិជ្ជាជីវៈ។ ទន្ទឹមនឹងនោះត្រូវយកចិត្តទុកដាក់ខិតខំដកស្រង់ខ្លឹមសារ បទពិសោធន៍ សិក្សារៀនសូត្រ ក្រេបយកនូវចំណេះដឹង ចំណេះធ្វើថ្មីៗល្អៗ ទំនើបកម្ម ពីភាគពីមិត្តសម្រាប់មកបំពេញភារកិច្ចការពារជាតិ និងកសាងមាតុភូមិ ក៏ដូចជាការចូលរួមចំណែកថែរក្សាការពារសន្តិភាព ស្ថេរភាព សន្តិសុខក្នុងតំបន់ និងពិភពលោក ឲ្យបានស្ថិតស្ថេរគង់វង្ស ៕
