ក្នុងឱកាសចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ នៅព្រឹកថ្ងៃទី៣០ ខែមីនា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អមដំណើរដោយ ឯកឧត្តម ជារដ្ឋលេខាធិការ អនុរដ្ឋលេខាធិការ ក្រសួងការពារជាតិ នាយសេនាធិការចំរុះ ខ.ភ.ម អគ្គនាយក អគ្គនាយករង និង នាយទាហានជាន់ខ្ពស់ នៅក្នុងស្ថាប័នក្រសួងការពារជាតិ អគ្គបញ្ជាការជាច្រើនរូបទៀត បានអញ្ជើញចុះសាកសួរសុខទុក្ខកងកម្លាំងប្រដាប់អាវុធនៅទិសទី ១ ប្រាសាទព្រះវិហារ យោធភូមិភាគទី ៤ ដែលពិធីសាកសួរសុខទុក្ខនេះ បានប្រារព្ធធ្វើនៅទីបញ្ជាការមុខ បញ្ជាការដ្ឋានអង្គរក្ស ប្រចាំទិសប្រាសាទព្រះវិហារ។
ក្នុងឱកាសនោះ ឯកឧត្តម នាយឧត្តមសេនីយ៍ កិត្តិសង្ហហបណ្ឌិត ហ៊ីង ប៊ុនហៀង អគ្គមេបញ្ជាការរង ខ.ភ.ម និងជាមេបញ្ជាការ បញ្ជាការដ្ឋានអង្គរក្ស បានសំដែងការស្វាគមន៍ដោយបានលើកឡើងអំពីសភាពការណ៍ភូមិសាស្ត្រតំបន់ប្រាសាទព្រះវិហារ គឺនាយទាហាន នាយទាហានរង និងពលទាហាន ខ.ភ.ម គ្រប់បណ្តាកងឯកភាព ដែលឈរជើងនៅទិសជួរមុខ បានយកចិត្តទុកដាក់ការពារបានយ៉ាងរឹងមាំនូវអធិបតេយ្យ បូរណភាពទឹកដី និងសន្តិសុខ ជូនប្រជាពលរដ្ឋរស់នៅ។ ទទឹមនេះ នាយទាហាន នាយទាហានរង និងពលទាហាន ខ.ភ.ម បានអនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្រ្តី ធ្វើយ៉ាងណា កសាងតំបន់ព្រំដែន ជាព្រំដែនមិត្តភាព សន្តិភាព សាមគ្គីភាព និងការអភិវឌ្ឍ។
មានប្រសាសន៍សំណេះសំណាល ជាមួយនាយទាហាន នាយទាហានរង និងពលទាហាន កងនគរបាលជាតិ នៅទិសទី១ យោធភូមិភាគទី ៤ ឯកឧត្តម នាយឧត្តមសេនីយ៍ ទៀ សីហា បានពាំនាំនូវការផ្ដាំផ្ញើសាកសួរសុខទុក្ខពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ផ្ញើជូនកងកម្លាំងប្រដាប់អាវុធទាំងអស់ ដែលកំពុងឈរជើងបំពេញភារកិច្ចការពារអធិបតេយ្យ បូរណភាពទឹកដី និងសន្តិសុខជូនប្រជាពលរដ្ឋនៅទិសទី ១ ប្រាសាទព្រះវិហារ។ ឯកឧត្តម បានសំដែងនូវការកោតសរសើរចំពោះ មេបញ្ជាការ មេបញ្ជាការរង គ្រប់លំដាប់ថា្នក់ ដែលបានដឹកនាំកសាង អង្គភាពរបស់ខ្លួន និងបំពេញភារកិច្ចការពារបូរណភាពទឹកដី ធានាបាននូវស្ថេរភាព និង សន្តិសុខនៅក្នុងតំបន់នេះ ។ ឯកឧត្តម នាយឧត្តមសេនីយ៍ ទៀ សីហា បានជំរុញដល់នាយទាហាន នាយទាហានរង និងពលទាហាន ព្រមទាំងកម្លាំងកងនគរបាលជាតិ ត្រូវរួមសហការគ្នាអោយបានល្អ ក្នុងការបំពេញភារកិច្ចការពារ អធិបតេយ្យ បូរណភាពទឹកដី និងសន្តិសុខជូនប្រជាពលរដ្ឋរស់នៅតាមបណ្តោយព្រំដែន ដើម្បីប្រែក្លាយតំបន់ព្រំដែនជាតំបន់សន្តិភាព និងការអភិវឌ្ឍ។
ឆ្លៀតក្នុង ឱកាសនោះ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បានក្រើនរំលឹក និង ដាស់តឿន ដល់កងកម្លាំងប្រដាប់អាវុធទាំងអស់ មិនត្រូវយកបណ្តាញផ្សព្វផ្សាយសង្គម មកវាយប្រហារលើបុគ្គល ឬ អង្គភាពនោះទេ ដែលធ្វើអោយប៉ះពាល់ដល់កិត្តិយស និងសេចក្តីថ្លៃថ្នូររបស់ខភម។ ទទឹមនេះនាយទាហាន និង ពលទាហានទាំងអស់ មិនត្រូវមានការពាក់ពន្ធ័នឹងគ្រឿងញៀនឡើយ គឺត្រូវជៀសអោយឆ្ងាយពីគ្រឿងញៀន។ ជាចុងក្រោយ ឯកឧត្តម បានជូនពរឆ្នាំថ្មីប្រពៃណីជាតិខ្មែរជូនចំពោះមេបញ្ជាការ មេបញ្ជាការរង នាយទាហាន នាយទាហាន និងពលទាហាន នៅទិសទី ១ ទាំងអស់ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ សូមឲ្យទទួលបាននូវសេចក្តីសុខ សេចក្តីចម្រើន កម្លាំងខ្លាំងក្លា សុខភាពល្អបរិបូណ៌ និងជន្មាយុយឺនយូរ ព្រមទាំងសម្រេចបាននូវជោគជ័យថ្មីៗថែមទៀត ក្នុងការបំពេញភារកិច្ចជូនជាតិមាតុភូមិ។
ក្នុងឱកាសនោះដែរ ឯកឧត្តម ទៀ សីហា ព្រមទាំង ប្រតិភូអមដំណើរ បានបន្តដំណើរអញ្ជើញទៅទស្សនាប្រាសាទព្រះវិហារ ស្ថិតនៅលើភ្នំដងរែកបន្តទៀត។ ប្រាសាទព្រះវិហារ មានទីតាំងស្ថិតនៅភូមិស្វាយជ្រំ ឃុំកន្ទួត ស្រុកជាំក្សាន្ត លើភ្នំដងរែក។ ប្រាសាទព្រះវិហារ ត្រូវបានដាក់ចូលជាសម្បត្តិបេតិកភណ្ឌពិភពលោក កាលពីថៃ្ងទី០៧ ខែកក្កដា ឆ្នាំ២០០៨ ដោយអង្គការយូនីស្កូ (UNESCO)។ ក្រោយចូលជាសម្បត្តិបេតិកភណ្ឌពិភពលោក ប្រាសាទព្រះវិហារ ត្រូវបានគ្រប់គ្រង និងថែទាំដោយអាជ្ញាធរជាតិព្រះវិហារ។ «ប្រាសាទព្រះវិហារ ជាប្រាសាទមួយ ដែលមានតម្លៃយ៉ាងធំធេង សម្រាប់ពលរដ្ឋ កម្ពុជា និងជាតិទាំងមូល ដែលបុព្វបុរសខ្មែរ បានសាងសង់ បន្សល់ទុកដល់កូនចៅជំនាន់ក្រោយមកដល់សព្វថ្ងៃនេះ។ ជាសម្បត្តិបេតិកភណ្ឌពិភពលោក ប្រាសាទព្រះវិហារ ជាដួងព្រលឹងរបស់ជាតិខ្មែរ រះត្រដែតលើកំពូលភ្នំដងរែក។ ប្រាសាទព្រះវិហារ បានកសាងនៅសតវត្សរ៍ទី១១ លើភ្នំដងរែក។ ការកសាងប្រាសាទនេះ គឺដើម្បីឧទ្ទិសដល់ព្រះសិវៈនៃព្រហ្មញ្ញសាសនា។ បច្ចុប្បន្នប្រាសាទព្រះវិហារ ត្រូវបានបងប្អូនប្រជាពលរដ្ឋខ្មែរ ក៏ដូចជាភ្ញៀវទេសចរណ៍ជាតិ និងអន្តរជាតិ ចេញចូលទស្សនាជារៀងរាល់ថ្ងៃ។ បន្ទាប់ពីបានអញ្ជើញទស្សនាប្រាសាទព្រះវិហាររួចមក ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិ បានអញ្ជើញទៅទស្សនាតំបន់ប្រវត្តិសាស្ត្រយោធាតេជោ ៥មករា ស្ថិតនៅជើងភ្នំប្រាសាទព្រះវិហារបន្តទៀត។
ពេលអញ្ជើញដល់ តំបន់ប្រវត្តិសាស្ត្រយោធាតេជោ ៥មករា គណៈប្រតិភូ ត្រូវបានទទួលការស្វាគមន៍ពី ឧត្តមសេនីយ៍ឯក ស្រី ឌឹក មេបញ្ជាការ កងពលធំអន្តរាគមន៍លេខ ៣ ព្រមទាំងនាយទាហាន នាយទាហានរង និងពលទាហាន ក្នុងកងពលតូចអន្តរាគមន៍លេខ ៨ ចំណុះអោយកងពលធំអន្តរាគមន៍លេខ ៣ ជាច្រើនរូបទៀត។
ក្នុងឱកាសនោះ ឯកឧត្តម នាយឧត្តមសេនីយ៍ ទៀ សីហា ព្រមទាំងប្រតិភូអមដំណើរបានអញ្ជើញទៅពិនិត្យតឹកតាងប្រវត្តិសាស្ត្រ ដែលបានបន្សល់ទុកនៅតំបន់ប្រវត្តិសាស្ត្រយោធាតេជោ ៥ មករា។ សូមបញ្ជាក់ថា៖ តំបន់ប្រវត្តិសាស្ត្រយោធាតេជោ ៥ មករា ជាភូមិសាស្រ្តកំពូលភ្នំរាប នៃជ្រលងភូមិសាស្រ្ត វាលឥន្ទ្រីយ៍ មានរយៈកំពស់ ៣២០ ម៉ែត្រ នៅចន្លោះភ្នំប្រាសាទព្រះវិហារ និងភ្នំទ្រព្យ ដោយប៉ែកខាងកើត ជាប់ប្រាសាទព្រះវិហារ ដែលមានរយៈកំពស់ ៦២៥ម៉ែត្រ ខាងលិចជាភ្នំទ្រព្យមានរយៈកម្ពស់ ៥៨៤ម៉ែត្រ និងប៉ែកខាងជើងភូមិសាស្ត្រ មានវាលឥន្ទ្រីយ៍ដែលជាភូមិសាស្រ្ត ប្រសព្វគ្នា រវាងជើងភ្នំប្រាសាទព្រះវិហារ និងជើងភ្នំទ្រព្យ ជាប់នឹងប្រទេសថៃ។ ទីតាំងប្រវត្តិសាស្ត្រនេះមាន៖ អគារទីបញ្ជាសន្តិភាព ដែលអគារនេះ បានដើរតួនាទី ក្នុងការដឹកនាំបញ្ជាដល់កិច្ចការ ការពារអធិបតេយ្យ បូរណភាពទឹកដី និងការពារសម្បត្តិវប្បធម៌ជាតិ នៅជុំវិញតំបន់ប្រាសាទព្រះវិហារ។ ទីបញ្ជាការសន្តិភាព នៅ៥ មករា បានរៀបចំអោយក្លាយទៅជាទីតាំងប្រវត្តិសាស្ត្រយោធា ពីព្រោះទីនេះក៏បានបន្សល់ទុកនៅតឹកតាងប្រវត្តិសាស្ត្រជាច្រើនចាប់ពីឆ្នាំ ២០០៧-២០០៨ មកក្នុងពេលដែលប្រទេសកម្ពុជាមានជម្លោះជាមួយប្រទេសជិតខាង ក្នុងតំបន់ប្រាសាទព្រះវិហារ។ ហើយទីបញ្ជាការសន្តិភាព នៅ ៥ មករានេះ សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ក៏ធ្លាប់បានទៅសាកសួរសុខទុក្ខកងទ័ព ដែលឈរជើងការពារបូរណភាពទឹកដី នៅទិសប្រាទព្រះវិហារផងដែរ ៕
