គណៈប្រតិភូស្នងការនីតិកម្ម នៃក្រសួងការពារប្រទេសវៀតណាម ដឹកនាំដោយ លោកវរសេនីយ៍ឯក ង្វៀន វៀតយុង(Nguyen Viet dung) អនុប្រធានស្នងការនីតិកម្ម នៃក្រសួងការពារប្រទេសវៀតណាម បានចូលជួបសម្តែងការគួរសម ជាមួយលោកជំទាវ នាយឧត្តមសេនីយ៍ ដាំ ដារិនី រដ្ឋលេខាធិការក្រសួងការពារជាតិ កាលពីរសៀលថ្ងៃទី១៨ ខែមីនា ឆ្នាំ២០២៤។
ក្នុងឱកាសនោះ លោកជំទាវ រដ្ឋលេខាធិការ បានថ្លែងជួសមុខឲ្យថ្នាក់ដឹកនាំក្រសួងការពារជាតិ សូមស្វាគមន៍ចំពោះដំណើរទស្សនកិច្ចរបស់គណៈប្រតិភូស្នងការនីតិកម្ម នៃក្រសួងការពារប្រទេសវៀតណាម ដែលបាននាំមកនូវទំនាក់ទំនងកិច្ចសហប្រតិបត្តិការ រវាងកងទ័ពយើងទាំងពីរ ពិសេសគឺកិច្ចសហប្រតិបត្តិការ រវាងនាយកដ្ឋាននីតិកម្មក្រសួងការពារជាតិ និងស្នងការនីតិកម្មនៃក្រសួងការពារប្រទេសវៀតណាម ស្របតាមពិធីសារ នៃអនុស្សរណៈយោគយល់របស់ក្រសួងការពារជាតិ នៃប្រទេសទាំង២។ លោកជំទាវបានបន្តទៀតថា៖ យើងទទួលបាននូវចំណុចមួយចំនួនល្អៗជាច្រើន នៅក្នុងពិធីសារដូចជាធ្វើការផ្លាស់ប្តូរបទពិសោធទៅវិញទៅមក រវាងអ្នកច្បាប់កងយោធពលខេមរភូមិន្ទ និងអ្នកច្បាប់កងទ័ពប្រជាជនវៀតណាម។ លោកជំទាវបានជម្រាបប្រតិភូឲ្យបានដឹងទៀតថា៖ បច្ចុប្បន្ននៅទូទាំងកងយោពលខេមរភូមិន្ទយើង បានរៀបចំរចនាសម្ព័ន្ធឲ្យមាននាយទាហានផ្នែកច្បាប់ នៅទូទាំងបណ្តាកងឯកភាព ដូច្នេះយើងសូមគាំទ្រលើការជួយបណ្ដុះបណ្ដាលនាយទាហានផ្នែកច្បាប់យើង ពីសំណាក់អ្នកច្បាប់របស់ក្រសួងការពារប្រទេសវៀតណាម ដែលបានអនុវត្តនាពេលនេះ។
លោកវរសេនីយ៍ឯក ង្វៀន វៀតយុង(Nguyen Viet dung) បានថ្លែងថា៖ នៅក្នុងកិច្ចពិភាក្សាការងារ រវាងនាយកដ្ឋាននីតិកម្មក្រសួងការពារជាតិកម្ពុជា និងស្នងការនីតិកម្ម នៃក្រសួងការពារប្រទេសវៀតណាម កាលពីពេលថ្មីៗនេះ គឺយើងបានរួមគ្នាធ្វើយ៉ាងណាឲ្យច្បាប់នៅក្នុងជួរកងទ័ព កាន់តែល្អប្រសើរឡើងថែមទៀត ពិសេសនាឆ្នាំ២០២៤តទៅ។ លោកបានបញ្ជាក់ថា៖ គណៈប្រតិភូស្នងការនីតិកម្ម នៃក្រសួងការពារប្រទេសវៀតណាមរបស់លោក មានវត្តមាននៅពេលនេះ គឺនឹងធ្វើបាឋកថាវគ្គបំប៉នជំនាញច្បាប់ជូនដល់នាយទាហានកងយោធពលខេមរភូមិន្ទ នៅសាកលវិទ្យាល័យការពារជាតិ និងនៅសាលានាយទាហានសកម្មត្មាតពង ដែលបាននាំយកនូវ៣ខ្លឹមសារសំខាន់ៗ រួមមាន៖ ខ្លឹមសារទី១ គឺការកសាងច្បាប់របស់កងទ័ពប្រជាជនវៀតណាម ដែលកកើតតាំងពីឆ្នាំ២០១៨, ខ្លឹមសារទី២ ទ្រឹស្ដីមួយចំនួនរបស់ច្បាប់ក្រសួងការពារជាតិប្រទេសវៀតណាម និងខ្លឹមសារទី៣ ទ្រឹស្ដីលើការធានាអនុវត្តច្បាប់របស់ក្រសួងការពារប្រទេសវៀតណាម ៕
