បន្ទាប់ពីបានប្រារព្ធពិធីបញ្ចប់ការចាក់បេតុង៣ជ្រុង ស្តូបអនុស្សាវរីយ៍នយោបាយឈ្នះឈ្នះអន្លង់វែង ស្ថិតនៅលើភ្នំ២០០ នៅក្នុងស្រុកអន្លង់វែង ខេត្តឧត្តរមានជ័យរួចមក នារសៀលថ្ងៃទី១២ ខែមីនា ឆ្នាំ២០២៤ សម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាប្រធានមូនិធីកសាងវិមានស្តូបឈ្នះឈ្នះ បានអញ្ជើញបន្តដំណើរទៅប្រារព្ធពិធីបញ្ចប់ការចាក់បេតុង៣ជ្រុងស្តូបអនុស្សាវរីយ៍នយោបាយឈ្នះឈ្នះប៉ៃលិន ស្ថិតនៅក្នុងខេត្តប៉ៃលិនបន្តទៀត ដែលពិធីនេះមានការអញ្ជើញចូលរួមពី ឯកឧត្តម នាយឧត្តមសេនីយ៍ អ៉ី ឈាន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអនុគណៈកម្មការសាងសង់ស្តូបអនុស្សាវរីយ៍នយោបាយឈ្នះឈ្នះប៉ៃលិន និងលោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន។
ក្នុងសុន្ទរកថាស្វាគមន៍ និងរបាយការណ៍សង្ខេប របស់ឧត្តមសេនីយ៍ឯក សឿន រឿត ប្រធានក្រុមការងារសាងសង់ នៃអនុគណៈកម្មការសាងសង់ស្តូបឈ្នះឈ្នះប៉ៃលិន បានចាត់ទុកវត្តមានរបស់ សម្ដេចពិជ័យសេនា នាឱកាសប្រារព្ធពិធីបញ្ចប់ការចាក់បេតុង៣ជ្រុង ស្តូបអនុស្សាវរីយ៍នយោបាយឈ្នះឈ្នះប៉ៃលិននាពេលនេះ គឺជាកត្តាជំរុញលើកទឹកចិត្តដ៏ធំធេង និងផ្ដល់ភាពកក់ក្ដៅទ្វេឡើងថែមទៀត ដល់ក្រុមការងារ និងបុគ្គលិកកម្មករទាំងអស់គ្នា ក្នុងការសាងសង់ស្តូបឈ្នះឈ្នះប៉ៃលិន ឲ្យកាន់តែសកម្ម ជឿនលឿនទៅមុខ។ ឯកឧត្តម សឿន រឿត បានជម្រាបជូនអំពីវឌ្ឍនភាពការងារ ដែលអនុគណៈកម្មការសាងសង់ស្តូបអនុស្សាវរីយ៍នយោបាយឈ្នះឈ្នះប៉ៃលិន សម្រេចបានចាប់តាំងពីថ្ងៃដំបូងរហូតដល់ថ្ងៃចាក់បេតុង៣ជ្រុង ក្នុងនោះលើការងារសិក្សាគម្រោងប្លង់ រហូតមកដល់សព្វថ្ងៃនេះ ក្រុមការងារបានសិក្សាប្លង់ស្ថាបត្យកម្មតួស្តូប និងគ្រោងបង្គុំស្តូបសម្រេចបានមួយរយភាគរយ លើការងារសាងសង់គ្រោងបង្គុំបេតុងតួរស្តូប ទំហំ៥៩ម៉ែត្រ គុណនឹង ៥៩ម៉ែត្រ។ ការងារដែលសម្រេចបានមួយរយភាគរយរួមមាន៖ ការងារខួងអណ្ដូងគ្រឹះ ការងារចងសសរគ្រឹះ ចាក់បេតុងសសរគ្រឹះ ខួងអណ្ដូង ចាក់បេតុងជើងតាង ចាក់បេតុងសសរតឿ ចាក់បេតុងសសរឡើងជាន់ទី១ ទី២ ទី៣ និងទី៤ ព្រមទាំងការងារផ្សេងៗ ជាច្រើនទៀត។ ចំពោះការងារដែលត្រូវបន្តអនុវត្តរួមមាន៖ បន្តចាក់ក្បាច់ជ្រីជុំវិញតួរស្តូប ក្រាលម៉ាប ក្រាលការ៉ូឡា រៀបតបណ្ដាញអគ្គិសនី បណ្ដាញទឹកស្អាត បន្តការងារបូកជញ្ជាំង៧ទិស ៥ទិស និងលាបថ្នាំនៅពេលខាងមុខ ក្រៅពីនេះក្រុមការងារបន្តឆ្លាក់រូបដំរី តោ និងនាគផងដែរ។ ឯកឧត្តម សឿន រឿត បានថ្លែងអំណរគុណដល់ សម្ដេចពិជ័យសេនា ទៀ បាញ់ ដែលតែងតែផ្តល់នូវអនុសាសន៍ជាប់ជាប្រចាំ ក្នុងពេលដំណើរការសាងសង់ស្តូបឈ្នះឈ្នះប៉ៃលិន ដែលបានលើកទឹកចិត្តយ៉ាងខ្លាំក្លាចំពោះក្រុមការងារធ្វើការងារសាងសង់សម្រេចបានលទ្ធផលល្អនាពេលនេះ។
ថ្លែងនៅក្នុងពិធីបញ្ចប់ការចាក់បេតុង៣ជ្រុង ស្តុបឈ្នះឈ្នះប៉ៃលិន សម្ដេចពិជ័យសេនា ទៀ បាញ់ បានពាំនាំនូវការផ្តាំផ្ញើសួរសុខទុក្ខពី សម្ដេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះឯកឧត្តម អស់លោក លោកស្រី មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ ព្រមទាំងក្មួយៗសិស្សានុសិស្សទាំងអស់ ដែលកំពុងរស់នៅក្នុងខេត្តប៉ៃលិន។ សម្តេចពិជ័យសេនា ទៀ បាញ់ បានសម្តែងនូវការកោតសរសើរ និងវាយតម្លៃខ្ពស់ ចំពោះឯកឧត្តម លោកជំទាវ លោក លោកស្រី សមាជិកអនុគណៈកម្មការ និងក្រុមការងារពាក់ព័ន្ធ ដែលបានខិតខំប្រឹងប្រែងប្រកបដោយស្មារតីទទួលខុសត្រូវខ្ពស់ ក្នុងការសាងសង់ស្តូបឈ្នះឈ្នះនេះ។ ជាមួយគ្នានេះសម្តេចពិជ័យសេនា ថ្លែងអំណរគុណចំពោះក្រសួង ស្ថាប័ន អាជ្ញាធរមូលដ្ឋាន សមត្ថកិច្ចពាក់ព័ន្ធ ព្រមទាំងបងប្អូនប្រជាពលរដ្ឋទាំងអស់ ដែលបានគាំទ្រ និងសហការយ៉ាងជិតស្និទ្ធជាមួយនឹងក្រុមការងារ ក្នុងកិច្ចដំណើរការសាងសង់ស្តូបឈ្នះឈ្នះ បានរលូនតាមកម្មវិធីគ្រោងទុក។
សម្តេចពិជ័យសេនា ទៀ បាញ់ បានបញ្ជាក់ថា៖ នាពេលបច្ចុប្បន្ននេះវិមានឈ្នះឈ្នះ នៅរាជធានីភ្នំពេញ បានក្លាយទៅជាសំណង់ប្រវត្តិសាស្ត្រ ប្រកបដោយមោទនភាព វប្បធម៌ ដែលជាការចងចាំសម្រាប់មនុស្សគ្រប់ជំនាន់ ជាក់ស្ដែងវិមានឈ្នះឈ្នះ បាននិងកំពុងទទួលលទ្ធផលដ៏ត្រចះត្រចង់ តាមរយៈប្រជាជនរាប់លាននាក់ បានមកទស្សនាស្វែងយល់ និងផ្តល់តម្លៃខ្ពស់មិនធ្លាប់មាន ក្នុងការគាំទ្រ ការដឹកនាំស្ថាបនិកមគ្គុទេសក៍ឯក នយោបាយឈ្នះឈ្នះ ជាពិសេសគុណតម្លៃ នៃសន្តិភាព ត្រូវបានលើកកម្ពស់ រួមទាំងទទួលបាននូវពុទ្ធិសំខាន់ៗ។ ការសាងសង់វិមានឈ្នះឈ្នះ នៅរាជធានីភ្នំពេញ និងស្តូបឈ្នះឈ្នះកោះកុង អន្លង់វែង ប៉ៃលិន ហើយនាពេលថ្មីៗនេះ យើងបានផ្សព្វផ្សាយដល់បណ្ដាខេត្តសាងសង់សួនតេជោសន្តិភាព បានបញ្ជាក់ច្បាស់ថា៖ សំណង់ប្រវត្តិសាស្ត្រទាំងអស់នេះ គឺជាកត្តាដ៏សំខាន់បំផុតក្នុងការដាស់តឿនកុលបុត្រខ្មែរ ដែលជាទំពាំងស្នងឫស្សីគ្រប់រូប ឲ្យស្គាល់អំពីតម្លៃនៃសន្តិភាព ដែលជាគុណតម្លៃសកលនៃមនុស្សជាតិ ហើយត្រូវចូលរួមទាំងអស់គ្នា ដើម្បីទប់ស្កាត់នូវគ្រប់ឧបាយកល ដែលបង្កឲ្យមានសង្គ្រាម និងអស្ថេរភាពសង្គម ជាពិសេសយុវជនបន្តវេន ត្រូវសាមគ្គីគ្នារក្សាសន្តិភាពនេះ ឲ្យនៅស្ថិតស្ថេរយូរអង្វែងច្រើនជំនាន់តទៅ ដើម្បីភាពរីកចម្រើនរុងរឿង នៃប្រទេសយើង។ សម្តេចពិជ័យសេនា ទៀ បាញ់ បានសង្កត់ធ្ងន់ថា៖ ប៉ៃលិនគឺជាកន្លែងផ្ទុះដ៏ធំបំផុត នៃនយោបាយឈ្នះឈ្នះ ជាចលនាមួយដ៏គគ្រឹកគគ្រេង និងឈានទៅធ្វើសមាហរណកម្មកម្លាំងជាមួយនឹងរដ្ឋាភិបាល ហើយអន្លង់វែងជាកន្លែងចុងក្រោយ ដែលបានបញ្ចប់សង្គ្រាម នាំមកនូវសន្តិភាពពេញលេញទូទាំងប្រទេស។
ឆ្លៀតនៅក្នុងឱកាសនោះ សម្តេចពិជ័យសេនា ទៀ បាញ់ ស្នើដល់ក្រុមការងារពាក់ព័ន្ធ នៃអនុគណៈកម្មការសាងសង់ស្តូបឈ្នះឈ្នះប៉ៃលិន ត្រូវយកចិត្តទុកដាក់បន្តអនុវត្តដំណើរការសាងសង់ស្តូបឈ្នះឈ្នះប៉ៃលិន តាមផែនការគ្រោងទុកស្របតាមបទដ្ឋានបច្ចេកទេស និងពេលវេលាកំណត់ដោយធានាគុណភាពសំណង់ប្រើប្រាស់បានយូរអង្វែង ធ្វើការជ្រើសរើសជាងចម្លាក់ផ្ទាំងសិលាដែលមានស្នាដៃ ប្រកបដោយសមត្ថភាពវិជ្ជាជីវៈ ធានានូវគុណភាព ថ្មចម្លាក់រក្សាទុកបានយូរអង្វែង ចម្លាក់រំលេចឲ្យមានភាពទាក់ទាញចាប់អារម្មណ៍ពីប្រជាពលរដ្ឋ ភ្ញៀវជាតិ និងអន្តរជាតិមកទស្សនាកម្សាន្ត។ ជំរុញការសាងសង់ហេដ្ឋារចនាសម្ព័ន្ធរណប ដូចជាដាំដើមឈើ ការសាងសង់អគារលើកកម្ពស់សោភ័ណភាព រូបស្តូប រូបឈ្នះឈ្នះ សម្រាប់ប្រជាពលរដ្ឋមកកម្សាន្តនាពេលខាងមុខ។ បន្តសហការឲ្យបានជិតស្និទ្ធជាមួយនឹងក្រុមការងារប្រវត្តិសាស្ត្រយោធា ក្រសួងការពារជាតិ សិក្សាស្រាវជ្រាវឯកសារ វត្ថុតឹកតាងមករក្សាទុកឲ្យបានត្រឹមត្រូវ ត្រូវយកចិត្តទុកដាក់អនុវត្តការងារតាមស្មារតីពិធីផ្សព្វផ្សាយកសាងសមិទ្ធផលប្រវត្តិសាស្ត្រសួនតេជោសន្តិភាព កាលពីថ្ងៃទី០១ ខែមីនា ឆ្នាំ២០២៤ នៅទីស្ដីការក្រសួងការពារជាតិ ៕
