នៅព្រឹកថ្ងៃទី២៦ ខែកុម្ភៈ ឆ្នាំ២០២៤ ឯកឧត្តម នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងជាប្រធានក្រុមការងារក្រសួងការពារជាតិ បានអញ្ជើញជាអធិបតី ក្នុងពិធីប្រកាសសេចក្ដីសម្រេច ស្ដីពីការបង្កើតក្រុមការងារសម្របសម្រួលការត្រៀមរៀបចំឆ្លើយតបសង្គ្រោះបន្ទាន់ និងស្តារឡើងវិញ របស់ក្រសួងការពារជាតិ ដែលរៀបចំធ្វើឡើងនៅសាលប្រជុំទីស្តីការក្រសួងការពារជាតិ។ នៅក្នុងកិច្ចប្រជុំនោះដែរ មានការអញ្ជើញចូលរួមពីសមាសភាពក្រុមការងារសម្របសម្រួល ការត្រៀមរៀបចំឆ្លើយតបសង្គ្រោះបន្ទាន់ និងស្តារឡើងវិញ តាមបណ្ដាអង្គភាពជំនាញ អគ្គបញ្ជាការទ័ពជើងគោក ជើងទឹក និងទ័ពជើងអាកាស អង្គភាពធានាភ័ស្តុភារហិរញ្ញវត្ថុ និងជំនាញវិស្វករ កងពលតូចលេខ៧០ បញ្ជាការដ្ឋានទ័ពពិសេស កងរាជអាវុធហត្ថ កងពលតូចដឹកជញ្ជូនលេខ៩៩ និងមន្ទីរពេទ្យព្រះកេតុមាលា ដែលជាអង្គភាពជំនាញ ធ្លាប់បានចូលរួមសង្គ្រោះគ្រោះមហន្តរាយ ជូនដល់ប្រជាពលរដ្ឋនាពេលកន្លងមក។
បន្ទាប់ពី ឯកឧត្តម ឧត្តមសេនីយ៍ឯក ប៉ាង ធារ៉ូ អគ្គលេខាធិការរង នៃអគ្គលេខាធិការដ្ឋាន ក្រសួងការពារជាតិ នាយក នាយកដ្ឋានកិច្ចការរដ្ឋបាល និងជាសមាជិកក្រុមការងារ អានសេចក្ដីសម្រេច ស្ដីពីការបង្កើតក្រុមការងារសម្របសម្រួល ការត្រៀមរៀបចំឆ្លើយតបសង្គ្រោះបន្ទាន់ និងស្តារឡើងវិញរបស់ក្រសួងការពារជាតិ ជូនអង្គប្រជុំរួចមក ឯកឧត្តម នាយឧត្តមសេនីយ៍ ម៉ឹង សំផន បានមានប្រសាសន៍ថា៖ ក្រុមការងារកងយោធពលខេមរភូមិន្ទ របស់ក្រសួងការពារជាតិ មានបទពិសោធច្រើនលើក ច្រើនសាមកហើយ ក្នុងការធ្វើ្រសកម្មភាពជួយសង្គ្រោះគ្រប់គ្រោះមហន្តរាយ ដូចជាឧបទ្ទវហេតុ នៃគ្រោះមហន្តរាយ ដែលបង្កឡើងពីការធ្លាក់យន្តហោះដឹកអ្នកដំណើរនៅក្នុងទឹកដីខេត្តកំពត, ឧបទ្ទវហេតុ នៃគ្រោះមហន្តរាយការបាក់រលំអាគារ កម្ពស់៥ជាន់ នៅខេត្តព្រះសីហនុ និង ៣ជាន់នៅខេត្តកែប, ការជួយសង្គ្រោះប្រជាពលរដ្ឋរងគ្រោះមហន្តរាយធម្មជាតិ ទឹកជំនន់ នៅតំបន់ជុំវិញរាជធានីភ្នំពេញ និងនៅតាមបណ្ដាខេត្តមួយចំនួន របស់ប្រទេសកម្ពុជា នាពេលកន្លងមក ដូច្នេះយោងតាមបទពិសោធដែលមានកន្លងមក សម្រាប់កម្លាំងកងទ័ពយើងមិនមានបញ្ហាអ្វី ដែលពិបាក លើកលែងតែលិចនាវាធំៗ ដែលយើងមិនមានលទ្ធភាព និងបទពិសោធនោះទេ។ នាយឧត្តមសេនីយ៍ ម៉ឹង សំផន បានរំឭកដល់បណ្ដាអង្គភាពមានការពាក់ព័ន្ធ នឹងការងារសង្គ្រោះគ្រោះមហន្តរាយ ត្រូវពិនិត្យឧបករណ៍សម្ភារៈប្រើប្រាស់ ដែលមានឲ្យបានត្រឹមត្រូវ ដូចជាឧទ្ធម្ភាគចក្រ នាវា អូប័រ រថយន្តដឹកជញ្ជូន រថយន្តសង្គ្រោះ និងមធ្យោបាយផ្សេងៗទៀត នឹងត្រូវបែងចែកកម្លាំងប្រចាំការជាប់ជាប្រចាំ ដើម្បីចុះជួយសង្គ្រោះប្រជាពលរដ្ឋឲ្យបានទាន់ពេលវេលា នៅពេលមានគ្រោះធម្មជាតិកើតឡើងជាយថាហេតុ។ ប្រធានក្រុមការងារកងយោធពលខេមរភូមិន្ទ របស់ក្រសួងការពារជាតិ ជួយសង្គ្រោះគ្រោះមហន្តរាយសង្ឃឹមថា៖ គ្រប់បណ្តាអង្គភាពជំនាញរបស់កងយោធពលខេមរភូមិន្ទ ដែលមានការពាក់ព័ន្ធទាំងអស់ នឹងត្រៀមខ្លួនអនុវត្តនូវភារកិច្ចជួយសង្គ្រោះ គ្រោះមហន្តរាយជាប់ជាប្រចាំ ដើម្បីអនុវត្តលើការងារជួយសង្គ្រោះ ធានាលើទ្រព្យ និងអាយុជីវិតពលរដ្ឋ ដែលរងគ្រោះឲ្យសម្រេចបានលទ្ធផលល្អ តាមការណែនាំរបស់រាជរដ្ឋាភិបាល បានដាក់ចុះ។
សូមជម្រាបថា៖ នៅក្នុងកិច្ចប្រជុំបណ្ដាអង្គភាពជំនាញ ដែលមានការពាក់ព័ន្ធ បានរាយការណ៍ជូនអង្គប្រជុំអំពីការត្រៀមលក្ខណៈរបស់ខ្លួន ទាំងកម្លាំង និងមធ្យោបាយ សម្ភារៈ ដែលខ្លួនមាន ព្រមទាំងបានធ្វើការហ្វឹកហ្វឺនថែមទៀត ក្នុងការត្រៀមលក្ខណៈជួយសង្គ្រោះគ្រោះមហន្តរាយ ក្នុងឆ្នាំនេះ ៕
