ក្រុមហ៊ុនវៀតធេលកម្ពុជា ក្រោមស្លាកយីហោ មិត្តហ្វូន(metfone) បានប្រារព្ធពិធីអបអរសាទរខួបលើកទី១៥ឆ្នាំរបស់ខ្លួន (២០០៩-២០២៤) នៃការបើកសម្ពោធបណ្តាញសេវាមិត្តហ្វូន ក្រោមគំនិត “The Met’s Sonata” នាល្ងាចថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដែលពិធីនេះបានប្រារព្ធធ្វើ នៅសណ្ឋាគារសុខាភ្នំពេញ ក្នុងសង្កាត់ជ្រោយចង្វារ រាជធានីភ្នំពេញ។ ក្នុងឱកាសនោះក៏មានការអញ្ជើញចូលរួមពី រដ្ឋមន្ត្រី រដ្ឋលេខាធិការ មកពីស្ថាប័នក្រសួងនានា ឯកឧត្តម ឯកអគ្គរដ្ឋទូតវៀតណាម ប្រចាំកម្ពុជា, លោក ង្វៀន ហ៊ួយតាំង (Nguyen Huy Tang) ប្រធាន និងនាយកប្រតិបត្តិក្រុមហ៊ុនវៀតធេលគ្រុប(Viettel Group), លោក តាវ ដឹកថាង (Tao Duc Thang) និងឥស្សរជននានា ជាច្រើនរូបទៀត។
ការប្រារព្ធខួបលើកទី១៥ឆ្នាំ របស់ក្រុមហ៊ុនមិត្តហ្វូននេះ ធ្វើឡើងក្នុងគោលបំណងបង្ហាញសារ ដែលមិត្តហ្វូនមាននឹងនៅតែបន្ត ដើម្បីបង្កើតការរួមចំណែកដ៏មានតម្លៃដល់ប្រជាជន និងប្រទេសជាតិកម្ពុជា ដោយការលះបង់ចេញពីបេះដូង។ លោក កៅ ម៉ាញដឹក (Cao Manh Duc) នាយកប្រតិបត្តិក្រុមហ៊ុន បានបញ្ជាក់ឲ្យដឹងថា៖ មិត្តហ្វូនត្រូវបានបើកដំណើរការជាផ្លូវការនៅព្រះរាជាណាចក្រកម្ពុជា នៅថ្ងៃទី១៩ ខែកុម្ភៈ ឆ្នាំ២០០៩ អស់រយៈពេល ១៥ឆ្នាំ ចាប់តាំងពីការចាប់ផ្តើមរបស់ខ្លួន មិត្តហ្វូនបានក្លាយជាអ្នកផ្ដល់សេវាទូរគមនាគមន៍ឈានមុខគេ និងមានមោទនភាព ក្នុងដំណើររបស់ខ្លួន ក្នុងការបម្រើ និងបង្កើតសុភមង្គលជូនប្រជាជនកម្ពុជា។ ជាមួយនឹងហេដ្ឋារចនាសម្ព័ន្ធខ្សែកាបអុបទិកដ៏ធំទូលាយ មិត្តហ្វូនបានឈានជើងចូលក្នុងការពង្រីកការគ្របដណ្តប់ទៅកាន់តំបន់ដាច់ស្រយ៉ាល ដែលអាចឲ្យប្រជាជននៅតំបន់ក្រខ្សត់ តំបន់ព្រំដែន និងតំបន់កោះ អាចទទួលបានសេវាទូរគមនាគមន៍ ក្នុងតម្លៃសមរម្យ។ សមិទ្ធផលនេះបានរួមចំណែកលើកកម្ពស់ស្ថានភាព សេវាទូរគមនាគមន៍នៅកម្ពុជា ស្របទៅនឹងប្រទេសដទៃទៀតក្នុងតំបន់ ដោយហេតុនេះជំរុញការអភិវឌ្ឍសេដ្ឋកិច្ចសង្គមផង។ ក្នុងរយៈពេលប៉ុន្មានឆ្នាំចុងក្រោយនេះ មិត្តហ្វូនបានចូលរួមវិភាគទានប្រមាណ១៣០លានដុល្លារសហរដ្ឋអាមេរិក ក្នុងមួយឆ្នាំៗ ដល់ថវិការបស់រាជរដ្ឋាភិបាលកម្ពុជា ដែលជាប់ចំណាត់ថ្នាក់ក្នុងចំណោមអ្នកបរិច្ចាគកំពូលទាំង៥។ លោក កៅ ម៉ាញ ដឹក (Cao Manh Duc) បានបញ្ជាក់ឲ្យដឹងទៀតថា៖ មិត្តហ្វូននឹងបន្តដឹកនាំដំណើរផ្លាស់ប្តូរឌីជីថលនៅកម្ពុជា ការកសាងហេដ្ឋារចនាសម្ព័ន្ធឌីជីថល វេទិកា និងសេវាកម្ម ដើម្បីបង្កើតសង្គមឌីជីថលជាមួយនឹងសសរស្តម្ភសំខាន់ៗ ចំនួន៤ ទូរគមានគមន៍, ទូរស័ព្ទចល័ត និងអ៊ីនធឺណិតអចល័ត, ដំណោះស្រាយព័ត៌មានវិទ្យា និងហិរញ្ញវត្ថុឌីជីថល និងសេវាកម្មឌីជីថល។ មិត្តហ្វូននាំមុខគេ ក្នុងការផ្លាស់ប្តូរនូវទិន្នន័យជាមួយ៩៧.៥% នៃអតិថិជនរបស់ខ្លួន ដែលប្រើប្រាស់សេវា4G ដោយដាក់ក្នុងចំណោមអត្រាប្រើប្រាស់ទិន្នន័យខ្ពស់បំផុតនៅទូទាំងពិភពលោក។ កំណើននេះកើតចេញពីការប្ដេជ្ញាចិត្តរបស់មិត្តហ្វូន ក្នុងការរក្សាការគ្របដណ្តប់សេវាទូលំទូលាយបំផុត ដើម្បីទៅដល់ប្រជាជនទាំងអស់នៅទូទាំងប្រទេសកម្ពុជា។
ក្នុងសុន្ទរកថាស្វាគមន៍ និងរបាយការណ៍របស់នាយកប្រតិបត្តិក្រុមហ៊ុនវៀតធេល លោក តាវ ដឹកថាង (Tao Duc Thang) បានសម្តែងនូវបំណងចង់បន្តរួមដំណើរជាមួយរដ្ឋាភិបាល និងប្រជាជន ដើម្បីនាំមកនូវសុភមង្គល និងវិបុលភាពដល់កម្ពុជា។ លោកបានថ្លែងថា៖ ដោយមានបំណងចង់បន្តរួមចំណែក និងកសាងប្រទេសកម្ពុជា ជួយប្រជាជនកម្ពុជា ឲ្យមានជីវភាពកាន់តែប្រសើរឡើង មិត្តហ្វូននឹងចូលរួមយ៉ាងសកម្ម ក្នុងការអនុវត្តយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា ដែលការសន្យារបស់យើងចាប់ពី១៥ឆ្នាំមុន និងទៅអនាគត នឹងតែងតែមានដូចជាទស្សនវិស័យរបស់យើងតាំងពីដើមគឺ អ្នកច្នៃប្រឌិត និងយកចិត្តទុកដាក់រាល់ដំណោះស្រាយ រាល់ផលិតផល រាល់សកម្មភាពរបស់មិត្តហ្វូន នឹងខិតខំធានាថាគ្មានប្រជាជនកម្ពុជាណា ដែលមិនទទួលបានប្រព័ន្ធបច្ចេកវិទ្យាឡើយ។ បន្ទាប់ពីការ វត្តអស់រយៈពេល១៥ឆ្នាំ មិត្តហ្វូនបច្ចុប្បន្នជាម្ចាស់ហេដ្ឋារចនាសម្ព័ន្ធទូរគមនាគមន៍ដ៏ធំបំផុត និងរក្សាចំណែកទីផ្សារឈានមុខគេនៅកម្ពុជាផងដែរ។ ក្នុងដំណាក់កាលថ្មី មិត្តហ្វូនកំពុងឈានមុខគេ នៃនិន្នាការបំលាស់ប្តូរឌីជីថល តាមរយៈការបង្កើតកម្មវិធី និងដំណោះស្រាយឌីជីថល ដើម្បីបង្កើនជីវភាពរស់នៅរបស់ប្រជាជនកម្ពុជា មិត្តហ្វូនក៏កំពុងសហការជាមួយក្រសួងស្ថាប័ននានា ក្នុងរាជរដ្ឋាភិបាល លើគម្រោងបម្លាស់ប្តូរឌីជីថលផងដែរ។ បន្ថែមពីលើសកម្មភាពអាជីវកម្មរបស់ខ្លួន មិត្តហ្វូនបានចូលរួមចំណែកយ៉ាងសំខាន់ដល់ការអភិវឌ្ឍប្រទេសកម្ពុជា និងប្រជាជនរបស់ខ្លួន ដោយជាង១ពាន់លានដុល្លា បានចូលរួមចំណែកក្នុងថវិកាជាតិ និងជាង១២០លានដុល្លារអាមេរិក ឧទ្ទិសដល់គំនិតផ្តួចផ្តើមគាំទ្រសហគមន៍ និងសង្គម។
ថ្លែងក្នុងពិធីរំឭកខួប១៥ឆ្នាំ ក្រុមហ៊ុនមិត្តហ្វូន ឯកឧត្តម នាយឧត្តមសេនីយ៍ ទៀ សីហា ឧបកនាយករដ្ឋមន្ត្រី រដ្ឋមន្ត្រីក្រសួងការពារជាតិ បានវាយតម្លៃខ្ពស់ ចំពោះការរួមចំណែក របស់វៀតធេលគ្រុប(Viettel Group) ចំពោះប្រទេសកម្ពុជា និងបង្ហាញពីបំណងចង់បន្តអភិវឌ្ឍទំនាក់ទំនងល្អ រវាងរដ្ឋាភិបាលកម្ពុជា និងវៀតធេលគ្រុបផងដែរ។ ឯកឧត្តម នាយឧត្តមសេនីយ៍ ទៀ សីហា បានថ្លែងអំណរគុណយ៉ាងស្មោះស្ម័គ្រ ចំពោះថ្នាក់ដឹកនាំ នៃក្រុមហ៊ុនវៀតធេល(Viettel Group) ដែលបានដឹកនាំក្រុមហ៊ុនមិត្តហ្វូន បាននាំមកនូវអត្ថប្រយោជន៍ជាច្រើន រួមចំណែកដល់ការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា។ មិត្តហ្វូនបាននាំយកសេវាទូរគមនាគមន៍ បច្ចេកវិទ្យាព័ត៌មានទៅកាន់គ្រប់ទីកន្លែង និងបានជួយលើកកម្ពស់ជីវភាពរស់នៅរបស់ប្រជាជនកម្ពុជានាថ្ងៃអនាគត។ ឯកឧត្តម នាយឧត្តមសេនីយ៍ ទៀ សីហា បានសម្ដែងក្ដីសង្ឃឹមថា៖ ទំនាក់ទំនងកិច្ចសហប្រតិបត្តិការ រវាងរដ្ឋាភិបាលកម្ពុជា និងសមាជិក នៃក្រុមហ៊ុនវៀតធេល(Viettel Group) នឹងបន្តអភិវឌ្ឍយ៉ាងខ្លាំងក្លា និងស៊ីជម្រៅ ដោយនាំមកនូវផលប្រយោជន៍កាន់តែច្រើន ដល់ភាគីទាំងពីរ នឹងរួមចំណែកដល់ការអភិវឌ្ឍប្រកបដោយចិរភាពរបស់កម្ពុជា។ ក្នុងឱកាសនោះដែរ ឯកឧត្តម នាយឧត្តមសេនីយ៍ ទៀ សីហា បានបំពាក់គ្រឿងឥស្សរិយយស មុនីសារាភ៍ណ្ឌ ចំនួន៤ ជូនថ្នាក់ដឹកនាំ និងក្រុមហ៊ុនវៀតធេល(Viettel Group) និងក្រុមហ៊ុនមិត្តហ្វូន សម្រាប់ការរួមចំណែកក្នុងការអភិវឌ្ឍប្រទេសកម្ពុជា។ ក្នុងឱកាសប្រារព្ធខួប១៥ឆ្នាំ ក្រុមហ៊ុនមិត្តហ្វូនក៏បានប្រារព្ធពិធីប្រកាសដាក់ឲ្យដំណើរការកម្មវិធីទូរទស្សន៍ឌីជីថល ធីវីបីរយហុកសិប(TV360) ដែលអនុញ្ញាតឲ្យអ្នកប្រើប្រាស់មើលប៉ុស្តិ៍ទូរទស្សន៍ជាច្រើន ប្រកបដោយគុណភាពខ្ពស់ ជាមួយឧបករណ៍បច្ចេកវិទ្យាផ្សេងៗ កម្មវិធីធីវីបីរយហុកសិប(TV360) គឺជាផ្នែកបន្ទាប់ ដើម្បីបំពេញបន្ថែមប្រព័ន្ធអេកូឌីជីថលរបស់មិត្តហ្វូន ៕
