ក្នុងឱកាសចូលរួមពិធីបុណ្យកាន់បិណ្ឌ-ភ្ជុំបិណ្ឌប្រពៃណីជាតិខ្មែរ គណៈប្រតិភូក្រសួងការពារជាតិ ដឹកនាំដោយ ឧត្តមសេនីយ៍ឯក លី សុសល រដ្ឋលេខាធិការ ក្រសួងការពារជាតិ តំណាង នាយឧត្តមសេនីយ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញជួបសំណេះសំណាល និងសាកសួរសុខទុក្ខបុគ្គលិក និងយោធិនជម្ងឺនៃ ខ.ភ.ម ដែលកំពុងសម្រាកព្យាបាល នៅមន្ទីរពេទ្យព្រះកេតុមាលា នាព្រឹកថ្ងៃទី៣ ខែតុលា ឆ្នាំ២០២៣។
ឧត្តមសេនីយ៍ឯក វេជ្ជបណ្ឌិត លី សុវណ្ណ អគ្គនាយករង អគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ និងជានាយក មន្ទីរពេទ្យព្រះកេតុមាលា បានសំដែងនូវការស្វាគមន៍ និងអរគុណយ៉ាងជ្រាលជ្រៅចំពោះវត្តមានថ្នាក់ដឹកនាំ ក្រសួងការពារជាតិ និងសហការីទាំងអស់ ដែលបានអញ្ជើញមសួរសុខទុក្ខបុគ្គលិក និងយោធិនជម្ងឺនៃ ខ.ភ.ម ដែលកំពុងសម្រាកព្យាបាល នៅមន្ទីរពេទ្យព្រះកេតុមាលា នាពេលនេះ។ ឯកឧត្តម វេជ្ជបណ្ឌិត លី សុវណ្ណ បានបញ្ជាក់ថា នៅក្នុងរយៈពេល៩ខែ ឆ្នាំ២០២៣នេះ មន្ទីរពេទ្យព្រះកេតុមាលា បានខិតខំប្រឹងប្រែងធ្វើការអភិវឌ្ឍន៍រីកចម្រើគួរឲ្យកក់សំគាល់។ ជាមួយគ្នានេះ ដោយបានធ្វើការអភិវឌ្ឍជាបន្តបន្ទាប់ទាំងផ្នែកបច្ចេកទេស ពិនិត្យព្យាបាល-សង្គ្រោះ និងការអភិវឌ្ឍន៍ ធនធានមនុស្ស ឧបករណ៍ សម្ភារៈពេទ្យ ក៏ដូចជា ផ្នែកហេដ្ឋារចនាសម្ព័ន្ធ ដោយបានខិតខំសាងសង់ និងជួសជុល កែលម្អគុណភាពអគារសម្រាកនិងព្យាបាលជាច្រើនទទួលបានលទ្ធផលគួរជាទីមោទនៈបំផុតនាពេលនេះ។
ក្នុងនាមឯកឧត្តម ឧបនាយករដ្ឋមន្ត្រី ទៀ សីហា និងថ្នាក់ដឹកនាំក្រសួងការពារជាតិ អគ្គបញ្ជការដ្ឋាន, ឯកឧត្តម លី កុសល សម្ដែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ វេជ្ជបណ្ឌិត គ្រូពេទ្យ បុគ្គលិកមន្ទីរពេទ្យ ព្រះកេតុមាលា ដែលបានខិតខំប្រឹងប្រែងលះបង់ពុះពារគ្រប់ការលំបាក ទាំងកម្លាំងកាយចិត្ត ក្នុងការជួយសង្គ្រោះអាយុជីវិត ពិនិត្យនិងព្យាបាលដល់យោធិន នាយទាហាន ពលទាហាន នៃខ.ភ.ម ក៏ដូចជាបងប្អូនប្រជាពលរដ្ឋ អ្នកជំងឺជនស៊ីវិលផងដែរ នាពេលកន្លងមកនេះ។ ឯកឧត្តម លី កុសល ក៏បានពាំនាំនូវបណ្តាំការសាកសួរសុខទុក្ខពីសំណាក់ប្រមុខរាជរដ្ឋាភិបាល ថ្នាក់ដឹកនាំក្រសួងការពារជាតិ និងអគ្គមេបញ្ជាការនៃ ខ.ភ.ម ជូនចំពោះថ្នាក់ដឹកនាំ វេជ្ជបណ្ឌិត គ្រូពេទ្យ បុគ្គលិកមន្ទីរពេទ្យ និងយោធិនជម្ងឺ នៃខ.ភ.ម ដែលកំពុងសម្រាកព្យាបាលសុខភាព នៅក្នុងឱកាសបុណ្យកាន់បិណ្ឌ និងភ្ជុំបិណ្ឌនេះ។
ឯកឧត្តម បានមានប្រសាសន៍ថា កងទ័ពគឺជាកម្លាំងស្នូលចាំបាច់បំផុតក្នុងខឿនការពារប្រទេសជាតិមាតុភូមិ និងបូរណភាពទឹកដីមិនអាចខ្វះបាន។ កន្លងមកប្រទេសជាតិរបស់យើងបានធ្លាក់ក្នុងភ្លើងសង្គ្រាមផ្ទៃក្នុងដ៏រាំរ៉ៃជាងបីទស្សវត្ស ចាប់ពីទស្សវត្សទី៦០រហូតដល់ឆ្នាំ១៩៩៨ ទើបទទួលបានសន្តិភាពទាំងស្រុង។ ការទទួលសន្តិភាពកើតចេញពីការចង់បានសន្តិភាព ការបង្រួមបង្រួមជាតិតែមួយក្រោមនយោបាយឈ្នះ ឈ្នះ របស់សម្តេចតេជោ ហ៊ុន សែន រួមជាមួយនឹងប្រតិបត្តិករនយោបាយឈ្នះ ឈ្នះ ដែលនាំមកនូវសន្តិភាព និងការឯកភាពជាតិពេញលេញ ព្រមទាំងមានការចូលរួមពីបងប្អូនយុទ្ធមិត្តទាំងអស់បូជាទាំងកម្លាំអកាយចិត្ត សាច់ស្រស់ឈាមស្រស់ ជាការចូលរួមចំណែកដ៏ធំមួយដែលរាជរដ្ឋាភិបាលមិនអាចបំភ្លេចបានរហូតធ្លាក់ខ្លួនមានជម្ងឺរបួសនិងពិការ ទើបមកសម្រាកព្យាបាលនៅទីនេះ។ ក្រោយព្យាបាលរួចហើយពេលវិល ត្រឡប់ទៅអង្គភាពវិញ យុទ្ធមិត្តរបស់យើងត្រូវខិតខំចូលរួមរៀនសូត្រ ហ្វឹកហាត់បន្តទៀត ទាមទារឲ្យមានការយល់ដឹងពីទំនើបកម្មបច្ចេកវិទ្យានានា សម្ភារៈសព្វាវុធក្នុងប្រព័ន្ធបច្ចេកវិទ្យាទាន់សម័យ និងមានសមត្ថភាពគ្រប់គ្រាន់ក្នុងកិច្ចការពារជាតិឲ្យបានរឹងមាំ។ ជាមួយគ្នានេះ ឯកឧត្តម លី កុសល ក៏បានផ្តាំផ្ញើរនិងជំរុញលើកទឹចិត្តដល់វេជ្ជបណ្ឌិត គ្រូពេទ្យ បុគ្គលិកមន្ទីរពេទ្យព្រះកេតុមាលា បន្តបំពេញតួនាទីភារកិច្ចដ៏ល្អរបស់ខ្លួន ខិតខំកសាង និងអភិវឌ្ឍសមត្ថភាពជំនាញ ឯកទេសនានា ដើម្បីឲ្យទទួលបានកាន់ខ្លាំងក្លា និងទទួលបានជោគជ័យដល់ការពិនិត្យព្យាបាលសុខភាពជូនយោធិនជម្ងឺរបួស នៃ ខ.ភ.ម គ្រួសារកងទ័ព និងប្រជាពលរដ្ឋរបស់យើងតទៅទៀត។ ក្នុងខណៈនោះ ឧត្តមសេនីយ៍ឯក លី កុសល បាននាំយកអំណោយរបស់ក្រសួងការពារជាតិ ចែកជូនដល់យោធិនជម្ងឺនៃ ខ.ភ.ម មានចំនួន ៣២០នាក់ ដែលក្នុងម្នាក់ៗទទួលបាន មី ត្រីខកំប៉ុង ទឹកដោះគោ ស្ករស និងថវិកា ៣ម៉ឺនរៀលផងដែរ ៕
