ហើយនៅរសៀលថ្ងៃទី៣០ ខែតុលា ម្សិលមិញដដែលនេះដែរ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានទទួលជួបលោកជំទាវ អ៊ុល គុលកូកាហ្វ៊ី (Ulku Kocaefe) ឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសតួកគី ប្រចាំនៅកម្ពុជា ចូលជួបសម្ដែងការគួរសម នៅទីស្តីការក្រសួងការពារជាតិ។
នៅក្នុងឱកាសនោះ នាយឧត្តមសេនីយ៍ ទៀ សីហា បានសម្តែងនូវការអបអរស្វាគមន៍របស់លោកជំទាវ ឯកអគ្គរដ្ឋទូត និងបានថ្លែងអំណរគុណចំពោះ រដ្ឋាភិបាល ក្រសួងការពារជាតិ និងប្រជាជន តួកគី ដែលបានជួយឧបត្ថម្ភគាំទ្រដល់ព្រះរាជាណាចក្រកម្ពុជា លើការកសាង អភិវឌ្ឍជាតិ ពិសេសការជួយឧបត្ថម្ភគាំទ្រ ដល់ជួរកងយោធពលខេមរភូមិន្ទ នាពេលកន្លងមក។ ឯកឧត្តម បានលើកឡើងថា លោកជំទាវ ឯកអគ្គរដ្ឋទូតតួកគី ពិតជាបានជ្រាបយ៉ាងច្បាស់ហើយ អំពីស្ថានភាពប្រទេសជាតិកម្ពុជា ពិសេសកម្មវិធីគោលនយោបាយ និងចក្ខុវិស័យនយោបាយ និងការបរទេស របស់រាជរដ្ឋាភិបាលកម្ពុជា នៅក្រោមការដឹកនាំដ៏វាងវៃរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី អាណត្តិទី៧នេះ។ ឯកឧត្តម ទៀ សីហា សង្ឃឹមថា ប្រជាជន និងកងទ័ពទាំងពីរ កម្ពុជា-តួកគី នឹងបន្តពង្រឹងពង្រីកទំនាក់ទំនង នៃការរឹតចំណងមិត្តភាព សាមគ្គីភាព និងកិច្ចសហប្រតិបត្តិការ កាន់តែល្អប្រសើរ និងរីកចម្រើន បន្ថែមទៀត។
ក្នុងឱកាសនោះដែរ លោកជំទាវ ឯកអគ្គរដ្ឋទូតតួកគី បានថ្លែងនូវការអបអរសាទរ នាយឧត្តមសេនីយ៍ ទៀ សីហា ដែលទទួលបាននូវមុខតំណែងជាឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ដែលស្ថិតក្នុងអំឡុងស្ថានភាពពិភពលោកកំពុងមានការផ្លាស់ប្តូរយ៉ាងឆាប់រហ័ស។ លោកជំទាវ បានបញ្ជាក់ថា ប្រទេសតួកគី គឺជាប្រទេសមួយបានជ្រាបយ៉ាងច្បាស់អំពីការថែរក្សាសន្តិភាព ហើយសម្រាប់វិស័យការពារជាតិ គឺត្រូវរៀបចំឲ្យបានរួចរាល់ និងត្រៀមខ្លួនរួចជាស្រេច។ ហើយក៏បានជូនពរដល់នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទទួលបានជោគជ័យក្នុងការបំពេញតួនាទីភារកិច្ច។ លោកជំទាវ ក៏បានបញ្ជាក់ផងដែរថា បើពិនិត្យទៅលើកិច្ចសហប្រតិបត្តិការទ្វេភាគី រវាងប្រទេសកម្ពុជា និងប្រទេសតួកគី គឺមានកំណើនយ៉ាងឆាប់រហ័សក្នុងអំឡុងពេលថ្មីៗនេះ ហើយអ្វីដែលលេចធ្លោធំបំផុតនោះ គឺនៅក្នុងអឡុងឆ្នាំ២០១៨ សម្តេចតេជោ ហ៊ុន សែន នាយករដ្ឋមន្ត្រី បានបំពេញទស្សនកិច្ចជាផ្លូវការនៅប្រទេសតួកគី ធ្វើឲ្យមានការយល់ច្បាស់ពីគ្នាថែមទៀតរវាងថ្នាក់ដឹកនាំកំពូល នៃប្រទេសទាំងពីរ និងនៅអំឡុងឆ្នាំ២០២០ សម្តេចពិជ័យសេនា ទៀ បាញ់ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញបំពេញទស្សនកិច្ចនៅប្រទេសតួកគីផងដែរ ដែលធ្វើឱ្យទំនាក់ទំនងដ៏ត្រង់ជាមួយគ្នា រវាងក្រសួងការពារជាតិទាំងពីរ និងជាមួយស្ថាប័នដទៃទៀត ៕
