នារសៀលថ្ងៃទី០៤ ខែតុលា ឆ្នាំ២០២៣ ឯកឧត្តម នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញ្ញាត្តឱ្យលោកវរសេនីយ៍ឯក នីស្លីប៊ីន អាត់រ៉ាហ៊ីម នាយការិយាល័យ អនុព័ន្ធយោធា ម៉ាឡេស៊ីថ្មី ប្រចាំកម្ពុជា ចូលជួបសម្ដែងការគួរសម និងបង្ហាញមុខ។
មានប្រសាសន៏ក្នុងឱកាសនោះលោក វរសេនីយ៍ឯក នីស្លីប៊ីន អាត់រ៉ាហ៊ីម ថ្លែងជំនួសមុខឲ្យកងទ័ព នៃប្រទេសម៉ាឡេស៊ីបានសំដែងនូវអំណរគុណ យ៉ាងជ្រាលជ្រៅចំពោះ ក្រសួងការពារជាតិកម្ពុជា ដែលបានអនុញាត្ត ឲ្យលោក បានចូលជួបសំដែងការគួរសម ដើម្បីបានពង្រឹងពង្រីក ចំណងទាក់ទង កិច្ចសហប្រតិបត្តិការ និងការសាមគ្គីភាព មិត្តភាព ឲ្យកាន់តែមានភាពជិតស្និទ្ធ។ លោកក៏បានបញ្ជាក់ថា៖ កន្លងមកដោយសារ តែបញ្ហាការ រីករាលដាលនៃជំងឺកូវីដ.១៩បានបណ្តាលឲ្យប្រទេសយើងទាំង២ អនុវត្តនូវកិច្ចសហប្រតិបត្តិការ ពុំបានល្អ ពិសេសលើផ្នែកយោធា។ លោកអនុព័ន្ធក៏បានបញ្ជាក់ថា៖ ពេលនេះកងទ័ពម៉ាឡេស៊ី បានធ្វើការផ្លាស់ប្តូរថ្នាក់ដឹកនាំអគ្គមេបញ្ជាការថ្មី ដូច្នេះឯ.ឧអគ្គបញ្ជាការក៏មានគំរោងអញ្ជើញមកបំពេញទស្សនកិច្ចនៅ ប្រទេសកម្ពុជា ក្នុងពេលឆាប់ៗខាងមុខនេះ។ ចុងក្រោយលោក នីស្លីប៊ីន អាត់រ៉ាហ៊ីម បានសំណូមពរដល់ ឯ.ឧ ឧបនាយករដ្ឋមន្ត្រី ធ្វើយ៉ាងណាឲ្យមានដំណើរការផ្លាស់ប្តូរទស្សនកិច្ចសិក្សាពីគ្នាទៅវិញទៅមករវាងកងទ័ពទាំង២ កម្ពុជា-ម៉ាឡេស៊ី។
មានប្រសាសន៏ក្នុងឱកាសនោះ ឯ.ឧ ទៀ សីហា បានវាយតំលៃខ្ពស់ចំពោះកិច្ចទំនាក់ទំនងល្អ រវាងកម្ពុជា-ម៉ាឡេស៊ី ដែលកើតមានតាំងពីយូរលង់ណាស់មកហើយ ហើយជាបន្តបន្ទាប់ប្រទេសទាំង ពីរតែងបានចូលរួម ជួយគ្នា ទាំងលើក្របខណ្ឌ័អាស៊ាន ជាពិសេសកម្ពុជា-ម៉ាឡេស៊ី មានកិច្ចសហប្រតិបត្តិការដ៏ល្អ។ ឯ.ឧ ឧបនាយករដ្ឋមន្ត្រី ក៏បានថ្លែងអំណរគុណដល់រដ្ឋាភិបាល និងកងទ័ពម៉ាឡេស៊ីដែលបាន ជួយជ្រោមជ្រែងកម្ពុជាលើច្រើនវិស័យ ពិសេសការបណ្តុះបណ្តាលធនធានមនុស្សផងដែរ។ ពាក់ព័ន្ធលើវិស័យយោធា ឯ.ឧ ឯកភាពពីកិច្ចសហការល្អរវាងកងទ័ពប្រទេសទាំងពីរ ក្នុងការផ្លាស់ប្ដូរទស្សនកិច្ចជាដើម។ ឯ.ឧ ទៀ សីហា ក៏បានសម្តែងនូវជំនឿយ៉ាងមុតមាំថា ទៅថ្ងៃអនាគតប្រទេសម៉ាឡេស៊ីនៅតែជាមិត្តរបស់កម្ពុជា និងបន្តកិច្ចសហប្រតិបត្តិការជាមួយគ្នាយូរអង្វែង។
បន្ទាប់ពីបានជួបគណៈប្រតិភូ អនុព័ន្ធយោធាម៉ាឡេស៊ីរួចមក នៅរសៀលថ្ងៃដដែល ឯ.ឧ នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បានអនុញ្ញាត្តឱ្យលោកជំទាវ ម៉ារីយ៉ា អាម៉េលីតា ស៊ី អាហ្គីណូ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វីលីពីន ប្រចាំកម្ពុជា ចូលជួបសម្តែងការគួរសម។
នៅក្នុងជំនួបនេះ ឯ.ឧ ទៀ សីហា បានសម្តែងស្វាគមន៏ ចំពោះលោកជំទាវ ម៉ារីយ៉ា អាម៉េលីតា ស៊ី អាហ្គីណូ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វីលីពីនប្រចាំកម្ពុជា ដែលបានកំពុងបំពេញបេសកកម្មនៅកម្ពុជា និងសូមជូនពរ លោកជំទាវឯកអគ្គរដ្ឋទូតបំពេញភារកិច្ច ប្រកបដោយជោគជ័យ។ ឯ.ឧមានជំនឿថា៖ តាមរយៈលោកជំទាវ ឯកអគ្គរដ្ឋទូតសាធារណរដ្ឋហ្វីលីពីន នឹងខិតខំប្រឹងប្រែង ធ្វើឱ្យទំនាក់ទំនងកិច្ចសហប្រតិបត្តិការរវាងកម្ពុជា ជាមួយសាធារណរដ្ឋហ្វីលីពីន កាន់តែទូលំទូលាយ ជិតស្និទ្ធ និងស៊ីជម្រៅថែមទៀត ព្រមទាំងបានពង្រឹង សាមគ្គីភាព និងមិត្តភាពយូរអង្វែង។ ឯ.ឧ ទៀ សីហា បានបន្ថែមថា៖ ចំពោះក្រសួងការពារជាតិទាំង២ កម្ពុជា ហ្វីលីពីន នឹងបន្តពង្រឹងកិច្ចសហប្រតិបត្តិការដែលមានស្រាប់លើវិស័យរក្សាសន្តិភាព, ធ្វើការផ្លាស់ប្តូរដំណើរ ទស្សកិច្ចទៅវិញទៅមក ហើយយើងនឹងបន្តអនុវត្តនូវអនុស្សារណៈយោគយល់គ្នា រវាងក្រសួងការពារជាតិទាំង២ កម្ពុជា-ហ្វីលីពីន តទៅទៀត។
ជាកិច្ចឆ្លើយតប លោកជំទាវ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋ ហ្វីលីពីន ប្រចាំកម្ពុជា បានសំដែងនូវអំណរគុណ យ៉ាងជ្រាលជ្រៅចំពោះក្រសួងការពារជាតិកម្ពុជា ដែលបានអនុញាត្តឲ្យលោកជំទាវ បានចូលជួបសំដែងការគួរសម ដើម្បីបានពង្រឹងពង្រីក ចំណងទាក់ទង កិច្ចសហប្រតិបត្តិការ និងការសាមគ្គីភាព មិត្តភាព ឲ្យកាន់តែមានភាពជិតស្និទ្ធ។ លោកជំទាវ បានអបអរសាទរជូនពរចំពោះ ឯ.ឧ ទៀ សីហា ដែលរាជរដ្ឋាភិបាលកម្ពុជានាពេលថ្មីៗនេះបានតែងតាំង ឯ.ឧ ជាឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។ ឯ.ឧ ឯកអគ្គរដ្ឋហ្វីលីពីន សង្ឃឹមថា៖ ក្រសួងការពារជាតិ នៃប្រទេសទាំង២កម្ពុជា-ហ្វីលីពីន នឹងបន្តពង្រឹងកិច្ច សហប្រតិបត្តិការលើវិស័យរក្សាសន្តិភាព, ធ្វើការផ្លាស់ប្តូរដំណើរទស្សកិច្ចទៅវិញ ទៅមក ហើយយើងនឹងបន្តអនុវត្តអនុស្សារណៈយោគយល់គ្នា រវាងក្រសួងការពារជាតិទាំង២ បានសំរេចដោយជោគជ័យ ៕
