នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោកជំទាវ ទាង អេង តំណាង ដ៏ខ្ពង់ខ្ពស់សម្តេចពិជ័យសេនា ទៀ បាញ់ និងលោកជំទាវ តៅ ទឿន នាព្រឹកថ្ងៃទី០៨ ខែតុលា ឆ្នាំ២០២៣ រួមជាមួយ ឯកឧត្តម លោកជំទាវ នាយឧត្តមសេនីយ៍ ជារដ្ឋលេខាធិការ អនុរដ្ឋលេខាធិការ ថ្នាក់ដឹកនាំក្រសួងការពារជាតិ ព្រមទាំងមន្ត្រីក្រោមឱវាទិ និងប្រជាពលរដ្ឋដែលជាពុទ្ធបរិស័ទចំណុះជើងវត្តជាច្រើនរូប បានអញ្ជើញចូលរួមកាន់បិណ្ឌវេនទី៩ នៃពិធីបុណ្យភ្ជុំបិណ្ឌ នៅវត្តបុទុមវត្តី ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។
ពិធីបុណ្យភ្ជុំបិណ្ឌ គឺជាពិធីបុណ្យដ៏ធំមួយនៅក្នុងចំណោមពិធីបុណ្យប្រពៃណីជាតិខ្មែរផ្សេងៗទៀត ដែលប្រជាពលរដ្ឋខ្មែរជាពុទ្ធបរិស័ទតែងបានប្រារព្ធពិធីធ្វើជារៀងរាល់ឆ្នាំ ហើយដែលពិធីបុណ្យភ្ជុំបិណ្ឌតែងតែប្រារព្ធធ្វើឡើង មានរយៈពេល១៥ថ្ងៃ គឺចាប់ពីថ្ងៃ១រោច ខែភទ្របទ ដល់ថ្ងៃ១៥រោច ខែភទ្របទ ដែលពិធីបុណ្យនេះត្រូវបានធ្វើឡើង ដើម្បីឧទ្ទិសកុសលផលបុណ្យដល់ដួងវិញ្ញាណក្ខន្ធនៃអ្នកមានគុណទាំងឡាយ មាន៖ មាតាបិតា ជីដូនជីតា គ្រូធ្យាវាចារ្យ បុព្វបុរសជាតិ និងបងប្អូនជនរួមជាតិ ដែលបានលាចាកលោកយើងទៅកាន់លោកខាងមុខមកទទួលយកកុសលផលបុណ្យនេះ ព្រមទាំងបានរួចផុតពីបាបកម្មទាំងឡាយផងដែរ។ ម្យ៉ាងទៀតជាឱកាសដ៏ល្អសម្រាប់ជួបជុំឱពុកម្តាយ បងប្អូនញាតិមិត្ត សាច់សាលលោហិត ដែលរស់នៅទីផ្សេងៗគ្នា អាចជួបជុំ ស្វែងយល់គ្នា អំពីសុខទុក្ខ និងដំណើរប្រព្រឹត្តទៅក្នុងជីវភាពប្រចាំថ្ងៃរវាងគ្នា ទៅវិញទៅមក ព្រមទាំងអាចបង្កើនបាននូវសាមគ្គីដ៏ទូលំទូលាយផងដែរ។
ក្នុងឱកាសនោះ បន្ទាប់ពីបានគោរពថ្វាយផ្កាភ្ញី បូជាទៀនធូក ចំពោះព្រះពុទ្ធព្រះសម្មាសាម្ពុទ្ធ និងនមសិកា ព្រះរតនត្រ័យទៅតាមកន្លងព្រះពុទ្ធព្រះធម៌សម្មាសម្ពុទ្ធរួចមក នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ ទាង អេង រួមជាមួយឯកឧត្តម លោកជំទាវ នាយឧត្តមសេនីយ៍ ជារដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង នាយទាហាន ពលទាហាន ខ.ភ.ម ព្រមទាំងប្រជាពលរដ្ឋដែលជា ពុទ្ធបរិស័ទ បានបង្សុកូល និងរាប់បាត ឧទ្ទិសកុសលដល់ដួងវិញ្ញាណក្ខន្ធបុព្វការីជនមាន មាតាបិតា ជីដូនជីតា និងញាតិការទាំង៧សណ្តាន ដែលបានបែកបាក់ចែកឋានទៅកាន់លោកខាងមុខ ព្រមទាំងឧទ្ទិសកុសលដល់ដួងវិញ្ញាណក្ខន្ធបុព្វបុរស យុទ្ធជន យុទ្ធនារី នៃខ.ភ.ម ដែលបានលះបង់អាយុជីវិត ដើម្បីបុព្វហេតុជាតិមាតុភូមិ និងបងប្អូនប្រជាពលរដ្ឋ ដែលបានបាត់បង់អាយុជីវិតនៅក្នុងរបបប្រល័យពូជសាសន៍ ប៉ុលពត និងបានបួងសួងផងដែរសូមឲ្យថ្នាក់ដឹកនាំមន្ត្រីរាជការ កងកម្លាំងប្រដាប់អាវុធ ខ.ភ.ម និងប្រជាពលរដ្ឋកម្ពុជាទាំងអស់នៅទូទាំងព្រះរាជាណាចក្រកម្ពុជា ទទួលបាននិងជួបប្រទះតែសេចក្តីសុខចម្រើនគ្រប់ៗគ្នា និងប្រទេសជាតិមានសុខសន្តិភាពជារៀងរហូត។
ក្នុងពិធីបុណ្យកាន់បិណ្ឌវេនទី៩នេះ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ ទាង អេង បានវេរប្រគេនទ័យទាន និងគ្រឿងឧបភោគ បរិភោគជាច្រើនមុខជូនដល់ព្រះសង្ឃ វត្តបុទុមវត្តីនាឱកាសនោះ រួមមានអង្ករ ៥០០គីឡូក្រាម, ត្រីខកំប៉ុង ២០០គីឡូក្រាម, មី ២០កេស, ទឹកបរិសុទ្ធ ៤០កេស, ទឹកក្រូច ២០កេស, ព្រមទាំងបច្ច័យប្រាក់រៀល មានចំនួន ២២លាន ៩៩ម៉ឺនរៀល និងប្រាក់ដុល្លា មានចំនួន ៨ពាន់ដុល្លា ៕
