អនុវត្តតាមអនុសាសន៍ដ៏ខ្ពង់ខ្ពស់របស់ នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៅព្រឹកថ្ងៃទី០៩ ខែតុលា ឆ្នាំ២០២៣ នៅទីស្តីការក្រសួងការពារជាតិ ក្រសួងការពារជាតិ បានប្រារព្ធពិធីគោរពទង់ជាតិ នៃព្រះរាជាណាចក្រកម្ពុជា ដោយមានការអញ្ជើញចូលរួមពី ឯកឧត្តម នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នាយឧត្តមសេនីយ៏ នាង ផាត រដ្ឋលេខាធិការប្រចាំការក្រសួងការពារជាតិ ព្រមទាំងមានការចូលរួមពីឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ ក្រសួងការពារជាតិ ឯកឧត្តម ជាអគ្គនាយក អគ្គនាយករង នាយក នាយករង និងនាយទាហាន នាយទាហានរង មកពីស្ថាប័ន នានា ចំណុះអោយក្រសួងការពារជាតិជាច្រើនរូបទៀត។ នេះជាលើកទី១ហើយ ដែលក្រសួងការពារជាតិ ក្នុងរាជរដ្ឋាភិបាល នីតិកាលទី ៧ នៃរដ្ឋសភា បានចាត់តាំង អោយមានការរៀបចំ គោរពទង់ជាតិ នៃព្រះរាជាណាចក្រកម្ពុជា ដែលការគោរពទង់ជាតិនេះ នឹងត្រូវគោរព នៅរៀងរាល់ដើមសប្តាហ៍ វេលាម៉ោង ៧ ព្រឹក នៅកន្លែងត្រួតពល មុខដើមជ្រៃទីស្តីការក្រសួងការពារជាតិ។
មានមតិសំណេះសំណាលជាមួយ ថ្នាក់ដឹកនាំ នាយទាហាន នាយទាហានរង នៅក្នុងក្រសួងការពារជាតិ នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានពាំនាំនូវការផ្តាំផ្ញើសាកសួរសុខទុកពីសំណាក់ សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជូនចំពោះ ឯកឧត្តម លោកជំទាវ ជាថ្នាក់ដឹកនាំ និងនាយទាហាន នាយទាហានរង នៅក្នុងក្រសួងការពារជាតិ ក្នុងមនោសញ្ចេតនានឹករលឹក គោរព ស្រឡាញ់រាប់អាន។ តាមរយៈពីធីគោរពទង់ជាតិ នៃព្រះរាជាណាចក្រកម្ពុជានេះ នៅពេលបន្តបន្ទាប់ខាងមុខទៀត នាយឧត្តមសេនីយ៏ ទៀ សីហា បានបញ្ជាក់ថា៖ នឹងអោយបណ្តា អង្គភាព នានាចូលរួមមានយោបល់ ឬលើកសំណូមពរផ្សេងៗ ដើម្បីរួមគ្នាដោះស្រាយធ្វើយ៉ាងណា អោយការងារនៅក្នុងក្រសួងការពារជាតិដំណើរការទៅមុខដោយរលូន សម្រេចបានលទ្ធផលល្អជូនជាតិមាតុភូមិ ៕
