នៅព្រឹកថ្ងៃទី២០ ខែតុលា ឆ្នាំ២០២៣ ដដែលនោះដែរ នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បានបន្តជួបពិភាក្សាការងារជាមួយ ឯកឧត្តម ប៉ាទ្រីក មូភី (W.Patrick Murphy) ឯកអគ្គរដ្ឋទូត សហរដ្ឋអាមេរិក ប្រចាំកម្ពុជា បន្តទៀត។ នៅក្នុងជំនួបនេះដែរ ឯកឧត្តម ទៀ សីហា បានសម្តែងការស្វាគមន៏ ចំពោះឯកឧត្តម ប៉ាទ្រីក មូភី (W.Patrick Murphy) ដែលបានកំពុងបំពេញបេសកកម្មការទូតនៅកម្ពុជា ក្នុងការពង្រឹងពង្រីក ទំនាក់ទំនងកិច្ចសហប្រតិបត្តិការ រវាងប្រទេសទាំងពីរ កម្ពុជា-សហរដ្ឋអាមេរិក។ ឯកឧត្តម រដ្ឋមន្ត្រីក្រសួងការពារជាតិ មានជំនឿយ៉ាងមុតមាំថា៖ តាមរយៈនៃបេសកកម្មកាទូត របស់ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា នឹងនាំមកនូវទំនាក់ទំនងកិច្ចសហប្រតិបត្តិការ រវាងប្រទេសទាំងពីរ កាន់តែទូលំទូលាយ ជិតស្និទ្ធ និងស៊ីជម្រៅថែមទៀតព្រមទាំងបានពង្រឹង សាមគ្គីភាព និងមិត្តភាពយូរអង្វែង។
ជាកិច្ចឆ្លើយតប ឯកឧត្តម ប៉ាទ្រីក មូភី អបអរសាទរចំពោះ ឯកឧត្តម ទៀ សីហា ដែលបានទទួលមុខតំណែងថ្មី ជាឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក្នុងរាជរដ្ឋាភិបាលថ្មី នីតិកាលទី៧ នៃរដ្ឋសភា។ ឯកឧត្តម បានថ្លែងអំណរគុណ ចំពោះក្រសួងការពារជាតិកម្ពុជា ដែលបានអនុញាត្តឲ្យឯកឧត្តម បានចូលជួបសំដែងការគួរសម ដើម្បីបន្តពង្រឹងពង្រីក ទំនាក់ទំនង កិច្ចសហប្រតិបត្តិការ និងការរឹតចំណងសាមគ្គីភាព មិត្តភាព ឲ្យកាន់តែមានភាពជិតស្និទ្ធ។ ឯកឧត្តម ឯកអគ្គរដ្ឋទូតសហរដ្ឋអាមេរិក សង្ឃឹមថា ក្រសួងការពារជាតិ នៃប្រទេសទាំង២ អាមេរិក-កម្ពុជា នឹងបន្តពង្រឹងកិច្ចសហប្រតិបត្តិការជាមួយគ្នា ដើម្បីចូលរួមថែរក្សា សុខសន្តិភាព នៅក្នុងតំបន់ និងនៅលើសកលលោក ៕
