នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ បានអនុញ្ញាតអោយប្រតិភូស្នងការច្បាប់ ក្រសួងការពារប្រទេស នៃសាធារណរដ្ឋសង្គមនិយមវៀតណាម ដឹកនាំដោយ វរសេនីយ៍ឯក ង្វៀន ឌឹកយ៉ុង អនុប្រធានស្នងការច្បាប់ ក្រសួងការពារប្រទេសវៀតណាម ចូលជួបសម្តែងការគួរសម នារសៀលថ្ងៃទី២៤ ខែតុលា ឆ្នាំ២០២៣ នៅទីស្តីការក្រសួងការពារជាតិ។
ក្នុងឱកាសនោះ នាយឧត្តមសេនីយ៍ នាង ផាត បានថ្លែងនូវការស្វាគមន៍ចំពោះស្នងការច្បាប់ ក្រសួងការពារប្រទេស នៃសាធារណរដ្ឋសង្គមនិយមវៀតណាម ដែលបានមកបំពេញទស្សនកិច្ចនៅកម្ពុជា និងការជួបធ្វើការជាមួយនឹងនាយកដ្ឋាននីតិកម្ម ក្រសួងការពារជាតិ។ នាយឧត្តមសេនីយ៍ នាង ផាត បានចាត់ទុកថា ការជួបធ្វើការងារ រវាងស្នងការច្បាប់ ក្រសួងការពារប្រទេស នៃសាធារណរដ្ឋសង្គមនិយមវៀតណាម ជាមួយនឹងនាយកដ្ឋាននីតិកម្ម ក្រសួងការពារជាតិ នាពេលនេះ បានពង្រឹងនូវចំណងមិត្តភាព សាមគ្គីភាព និងកិច្ចសហប្រតិបត្តិការ នៃក្រសួងការពារជាតិ កម្ពុជា និងវៀតណាម ពិសេសបានធ្វើឲ្យកិច្ចសហប្រតិបត្តិការក្នុងក្របខណ្ឌច្បាប់យោធា លើវិស័យការពារជាតិ នៃកងទ័ពទាំងពីរកាន់តែមានភាពរឹងមាំឡើង។ ឯកឧត្តម បានមានជំនឿសង្ឃឹមថា វៀតណាម នឹងបន្តជួយឧបត្ថម្ភគាំទ្រដល់កម្ពុជាជាបន្តទៅទៀត ពិសេសនៅលើវិស័យច្បាប់យោធានេះ ដែលប្រទេសយើងទាំងពីរមានប្រវត្តិសាស្ត្រជួយគ្នាទៅវិញទៅមក តាំងពីយូរឡុងណាស់មកនោះ។
ក្នុងឱកាសនោះដែរ វរសេនីយ៍ឯក ង្វៀន ឌឹកយ៉ុង បានថ្លែងអំណរគុណចំពោះ ឯកឧត្តម នាង ផាត រដ្ឋលេខាធិការប្រចាំការ ក្រសួងការពារជាតិ ដែលបានឆ្លៀតពេលដ៏មមាញឹកអនុញាតិឲ្យប្រតិភូស្នងការច្បាប់ ក្រសួងការពារប្រទេសវៀតណាម បានចូលជួបសម្តែងការគួរសមនាពេលនេះ។ លោកវរសេនីយ៍ឯក ក៏បានជម្រាបថា ស្នងការច្បាប់ ក្រសួងការពារប្រទេសវៀតណាម នឹងខិតខំជម្រុញឲ្យកិច្ចសហប្រតបត្តិការ នៃស្ថាប័នច្បាប់កងទ័ពទាំងពីរ មានការជឿនលឿនទៅមុខ ក្នុងនោះ ស្នងការច្បាប់វៀតណាម និងនាយកដ្ឋាននីតិកម្ម បានផ្លាស់ប្តូរបទពិសោធន៍អំពីការកសាងច្បាប់ការពារជាតិ និងច្បាប់គ្រប់គ្រងដ្រូន ការផ្លាស់ប្តូរប្រតិភូ និងការបណ្តុះបណ្តាលធនធានមនុស្សនៅលើផ្នែកច្បាប់។ លោកវរសេនីយ៍ឯក ង្វៀន ឌឹកយ៉ុង ក៏បានលើកឡើងថា ភាគីវៀតណាម មានបំណងចង់ពិភាគ្សាផងដែរជាមួយនឹងកម្ពុជា លើការរក្សាសន្តិភាពក្នុងក្របខណ្ឌអង្គការសហប្រជាជាតិ នាពេលខាងមុខ ៕
