សមិទ្ធផលអគារថ្មី មួយខ្នង ដែលសំណង់អគារមិត្តភាពកម្ពុជា-វៀតណាម ស្ថិតក្នុងវរសេនាតូចលេខ២ តំបន់ប្រតិបត្តិការសឹករង រតនគិរី ជាអំណោយរបស់ក្រសួងការពារប្រទេសវៀតណាម ត្រូវបានប្រារព្ធពិធីសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី១៣ ខែធ្នូ ឆ្នាំ២០២៣ ក្រោមអធិបតីភាព នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្ត្រីក្រសួងការពារជាតិ និងឧត្តមសេនីយ៍ត្រី ហឿ វ៉ាន់ទឿង មេបញ្ជាការរង យោធភូមិភាគទី៥ កងទ័ពប្រជាជនវៀតណាម តំណាងរដ្ឋមន្រ្តីការពារប្រទេសវៀតណាម។ សូមបញ្ជាក់ថា៖ ពិធីសម្ពោធដាក់អោយប្រើប្រាស់ជាផ្លូវការសំណង់អគារមិត្តភាពកម្ពុជា-វៀតណាម នៅអូយ៉ាដាវនេះ បានប្រព្រឹត្តទៅក្នុងក្របខណ្ឌ នៃកម្មវិធីជំនួបប្រាស្រ័យមិត្តភាពការពារជាតិព្រំដែន កម្ពុជា-វៀតណា-ឡាវ ថ្នាក់រដ្ឋមន្ត្រីលើកទី១ ឆ្នាំ២០២៣ នៅខេត្តកន្ទុំ ប្រទេសវៀតណាម។
ក្នុងឱកាសនោះ បន្ទាប់ពីសុន្ទរកថាស្វាគមន៍ របស់ឯកឧត្តម ញ៉ែម សំអឿន អភិបាល នៃគណៈអភិបាលខេត្តរតនគិរី រួចមក ឧត្តមសេនីយ៍ឯក ខៀវ សាផាត អគ្គលេខាធិការរង-នាយករង នាយកដ្ឋានបុគ្គលិក ក្រសួងការពារជាតិ និងជាអនុប្រធានក្រុមការងាររៀបចំជំនួបប្រាស្រ័យមិត្តភាព បានអានរបាយការណ៍សាងសង់អគារមិត្តភាពកម្ពុជា-វៀតណាម ដោយបានបញ្ជាក់ថា៖ យោងតាមពិធីសារកិច្ចសហប្រតិបត្តិការឆ្នាំ២០២៣ សំណង់អគារមិត្តភាពកម្ពុជា-វៀតណាម បានបើកការដ្ឋានសាងសង់ នៅថ្ងៃទី០៩ ខែមីនា ឆ្នាំ២០២៣ ដែលអគារនេះមានចំនួន១ខ្នង កម្ពស់ ១ជាន់ ទំហំ ៥៤ម៉ែត្រx១៤.២ម៉ែត្រ មានទំហំស្មើនឹង ៧៩៦.៨ ម៉ែត្រការ៉េ មាន ១០បន្ទប់ ដែលក្នុងនោះ មានបន្ទប់រង់ចាំ១, បន្ទប់ទទួលភ្ញៀវចំនួន២, បន្ទប់សាលប្រជុំ១, បន្ទប់ធ្វើការចំនួន៤ និងបន្ទប់ប្រចាំការចំនួន១។
ក្នុងឱកាសនោះ ឧត្តមសេនីយ៍ត្រី ទៀ វ៉ាន់ទឿង តំណាងរដ្ឋមន្រ្តីការពារប្រទេសវៀតណាម បានបញ្ជាក់ថា៖ សំណង់មិត្តភាព ដែលជាជំនួយដោយក្រសួងការពារប្រទេសវៀតណាម នឹងមានអត្ថន័យជាក់ស្តែងចំពោះអង្គភាព បង្កលក្ខខណ្ឌងាយស្រួលដល់ជីវភាព និងលើកម្ពស់គុណភាព អនុវត្តន៍ការងាររបស់កម្មាភិបាល នាយទាហានវរសេនាតូចលេខ២ តំបន់ប្រតិបត្តិការសឹករង ខេត្តរតនគិរី បន្ថែមទៀត រួមចំណែកលើកកម្ពស់លទ្ធភាពការពារសន្តិសុខនយោបាយ, សណ្តាប់ធ្នាប់ សុវត្តិភាពសង្គម ក្នុងតំបន់ព្រំដែនប្រទេសទាំងពីរ។ ឧត្តមសេនីយ៍ត្រី ទៀ វ៉ាន់ទឿង បានបន្តថា៖ កងកម្លាំងប្រដាប់អាវុធយោធភូមិភាគទី៥ កងទ័ពប្រជាជនវៀតណាម ធ្វើការអស់ពីកម្លាំងកាយចិត្ត ជាមួយយោធភូមិភាគទី១ និងទី៣ ស្ថិតនៅខេត្តទិសឦសានរបស់កម្ពុជា រក្សាបានស្ថិរភាព និងអភិវឌ្ឍន៍ចំណងសាមគ្គីភាព មិត្តភាពជាប្រពៃណី (អ្នកជិតខាងល្អ, មិត្តភាពជាប្រពៃណី, កិច្ចសហប្រតិបត្តិការ លើគ្រប់វិស័យ រឹងមាំយូរអង្វែង) ដើម្បីផលប្រយោជន៍រួមរបស់ប្រជាជនទាំងពីរប្រទេស រួមចំណែកយ៉ាងសកម្ម ដល់សន្តិភាព, ស្ថិរភាព, កិច្ចសហប្រតិបត្តិការ, និងការអភិវឌ្ឍក្នុងតំបន់ក៏ដូចជាពិភពលោក។
ថ្លែងក្នុងឱកាសនោះ នាយឧត្តមសេនីយ៍ ទៀ សីហា បានចាត់ទុក អគារមិត្តភាពកម្ពុជា-វៀតណាម ដែលសម្ពោធដាក់ឱ្យប្រើប្រាស់ជាផ្លូវការនេះ ជាសមិទ្ធផលថ្មីមួយថែមទៀត ដែលក្រសួងការពារប្រទេស នៃសាធារណរដ្ឋសង្គមនិយមវៀតណាម ផ្តល់ជូនក្រសួងការពារជាតិ នៃព្រះរាជាណាចក្រកម្ពុជា បន្ទាប់ពីអគារមិត្តភាពកម្ពុជា-វៀតណាម នៅតំបន់ប្រវត្តិសាស្ត្រយោធាតេជោកោះថ្ម“X16” សម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី២០ ខែមិថុនា ឆ្នាំ២០២២ កន្លងមក។ នាយឧត្តមសេនីយ៍ ទៀ សីហា បន្តថា៖ សមិទ្ធផលនេះ បានឆ្លុះបញ្ចាំងពីលទ្ធផលជាផ្លែផ្កា កើតចេញពីភាពរីកចម្រើនគ្រប់ជ្រុងជ្រោយ គ្រប់កម្រិតនៃកិច្ចសហប្រតិបត្តិការទ្វេភាគី រវាងកម្ពុជា និងវៀតណាម សម្រាប់ឆ្នាំ២០០៣នេះ និងជាការចូលរួមអបអរសាទរជំនួបប្រាស្រ័យមិត្តភាពការពារជាតិថ្នាក់រដ្ឋមន្ត្រី លើកទី១ ចំនួន៣ប្រទេស កម្ពុជា-ឡាវ-វៀតណាម ដែលនឹងប្រព្រឹត្តទៅ នៅថ្ងៃទី១៤ ខែធ្នូ ឆ្នាំ២០២៣ សំដៅរួមចំណែកបង្កើនទំនាក់ទំនងជិតខាងល្អ មិត្តភាពជាប្រពៃណី កិច្ចសហប្រតិបត្តិការយូរអង្វែង និងគ្រប់ជ្រុងជ្រោយ។
ឯកឧត្តម ទៀ សីហា សង្កត់ធ្ងន់ថា៖ ការរៀបចំសម្ពោធអគារមិត្តភាពកម្ពុជា-វៀតណាមនាថ្ងៃនេះ បានរួមចំណែកយ៉ាងសំខាន់ក្នុងការចូលរួមអបអរសាទរ នូវសមិទ្ធផលនានា ដែលកងទ័ពប្រទេសទាំងពីរសម្រេចបាននាពេលកន្លងមក ក្នុងស្មារតី លើកកម្ពស់ប្រសិទ្ធភាព កិច្ចសហប្រតិបត្តិការកម្ពុជា-វៀតណាម គ្រប់ជ្រុងជ្រោយ និងបង្កើនថែមទៀតនូវទំនាក់ទំនងសហប្រតិបត្តិការ កសាងខ្សែព្រំដែនកម្ពុជា-វៀតណាម មានសន្តិភាព ស្ថិរភាព និងអភិវឌ្ឍប្រកបដោយចីរភាព សំដៅរួមគ្នាសហការ អភិវឌ្ឍ គ្រប់គ្រង រក្សាការពារតំបន់ព្រំដែន ឱ្យក្លាយទៅជាតំបន់សេដ្ឋកិច្ចវិនិយោគ ពាណិជ្ជកម្ម ទេសចរណ៍ វប្បធម៌ អប់រំ វិទ្យាសាស្ត្រ បច្ចេកទេសនាពេលខាងមុខ ដែលជានិមិត្តរូបនៃចំណងសាមគ្គីភាពស្អិតរមួត រវាងប្រជាជាតិ និងប្រទេសយើងទាំងពីរ។ ឯកឧត្តម បានសម្តែងជំនឿយ៉ាងមុតមាំថា៖ ក្រោយពីការរៀបចំពិធីសម្ពោធអគារនានេះទៅ កងទ័ពនៅតាមព្រំដែនប្រទេសទាំងពីរ នឹងបន្តលើកកម្ពស់ និងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការដែលមានស្រាប់ តាមស្មារតីមិត្តភាពជាប្រពៃណី ភាពជាអ្នកជិតខាងល្អ ទំនាក់ទំនងយូរអង្វែង និងភាពជាដៃគូយុទ្ធសាស្ត្រគ្រប់ជ្រុងជ្រោយ និងអនុវត្តប្រកបដោយប្រសិទ្ធភាពនូវកិច្ចព្រមព្រៀង កិច្ចសហប្រតិបត្តិការ និងការសម្រេចចិត្តនានា របស់ថ្នាក់ដឹកនាំប្រទេសទាំងពីរនាពេលថ្មីៗនេះ ៕
