បន្ទាប់ពីបានចុះត្រួតពិនិត្យការធ្វើដំណើរចេញចូលរបស់ពលករ ឆ្លងកាត់ព្រំដែន នៅច្រកទ្វារអន្តរជាតិប៉ោយប៉ែត និងច្រកទ្វារម៉ាឡៃ ខេត្តបន្ទាយមានជ័យ និងជួបប្រជុំជាមួយកម្លាំងមានសមត្ថកិច្ច ដែលមានការពាក់ពន្ធ័ ដើម្បីដោះស្រាយបញ្ហា ជួយសម្រួលដល់ការធ្វើដំណើរឆ្លងកាត់ព្រំដែន ចេញចូលរបស់ប្រជាពលករខ្មែរ អោយមានភាពងាយស្រួលរួចមក នៅថ្ងៃទី១៨ ខែធ្នូ ឆ្នាំ២០២៣ ឯកឧត្តម សៀក សុជាតិ រដ្ឋលេខាធិការក្រសួងការពារជាតិ និងជាអនុប្រធានគណៈកម្មការចំពោះកិច្ច និងដោះស្រាយបញ្ហាដំណើរចេញចូលរបស់ពលករខ្មែរតាមព្រំដែន នៃព្រះរាជាណាចក្រកម្ពុជា បានបន្តចុះត្រួតពិនិត្យ និងដោះស្រាយបញ្ហាដំណើរចេញចូល របស់ពលករខ្មែរ តាមបណ្តោយព្រំដែននៅ ច្រកអូបីជាន់-ច្រក៤៣-ច្រកភ្នំឆ័ត្រ-ច្រកប្រាសាទត្បែង និង ច្រកជប់គគី ព្រំដែនកម្ពុជា ថៃ ស្ថិតនៅក្នុងខេត្តបន្ទាយមានជ័យបន្តទៀត។
ការចុះត្រួតពិនិត្យនៅតាមបណ្តាច្រកទ្វាព្រំដែន ក្រុមការងារទី២ នៃគណៈកម្មការចំពោះកិច្ច របស់រាជរដ្ឋាភិបាលនេះ ក្នុងគោលបំណង ជួយសម្របសម្រួលជូនពលករខ្មែរ ដែលបានធ្វើដំណើរឆ្លងកាត់ព្រំដែន អោយធានាបានសន្តិសុខ សណ្តាប់ធ្នាប់ សុវត្ថិភាពល្អ ក្នុងការធ្វើដំណើរ។ ការចុះត្រួតពិនិត្យច្រកអូបីជាន់ ច្រក៤៣ ច្រកភ្នំឆ័ត្រ ច្រកប្រាសាទត្បែង និងច្រកជប់គគី ព្រំដែនកម្ពុជា ថៃ ស្ថិតនៅក្នុងខេត្តបន្ទាយមានជ័យ នាពេលនោះ ដើម្បីពង្រឹងការអនុវត្តការងាររបស់មន្ត្រីសមត្ថកិច្ច អាជ្ញាធរពាក់ព័ន្ធ ឈរជើងនៅច្រកទ្វារព្រំដែន ក្នុងការសម្របសម្រួលការឆ្លងដែនជូនប្រជាពលរដ្ឋដោយស្របច្បាប់។ ការចុះបំពេញការងារនេះមានការចូលរួមពី តំណាង អគ្គនាយកដ្ឋាន អន្តោប្រវេស្តន៍ តំណាងអភិបាលខេត្តបន្ទាយមានជ័យ តំណាងក្រសួងមហាផ្ទៃ និងសមាជិក នៃក្រុមការងារទី២ នៃគណៈកម្មការចំពោះកិច្ច របស់រាជរដ្ឋាភិបាល មួយចំនួនទៀត។
ក្នុងឱកាសចុះពិនិត្យតាមច្រកនីមួយៗ នាឱកាសនោះដែរ ក្រុមការងារគណៈកម្មការចំពោះកិច្ច ក៏បានតាមស្តាប់ នូវរបាយការណ៍ពីមន្ត្រីកម្លាំងមានសមត្ថកិច្ចពាក់ព័ន្ធ ឈរជើងនៅច្រកព្រំដែនខាងលើ ដែលក្នុងរយៈពេលកន្លងមក បានជួយសម្របសម្រួលជូនពលករខ្មែរ ដែលបានធ្វើដំណើរឆ្លងកាត់ព្រំដែន ធានាបាន សន្តិសុខ សណ្តាប់ធ្នាប់ សុវត្ថិភាពល្អ ក្នុងការធ្វើដំណើរ។
ក្នុងកិច្ចប្រជុំជាមួយកម្លាំងមានសមត្ថកិច្ចមានការពាក់ពន្ធ័នាពេលនោះ ឯកឧត្តម សៀក សុជាតិ បានកោតសរសើរដល់កម្លាំងមានសម្ថកិច្ច ដែលឈរជើងនៅតាមបណ្តាច្រកខាងលើ ដែលក្នុងពេលកន្លងមកបានខិតខំបំពេញការងារ ស្របតាមការណែនាំរបស់គណៈកម្មាការចំពោះកិច្ច បានដាក់ចុះ។ ឯកឧត្តម សៀក សុជាតិ បានសំណូមពរដល់កម្លាំងសមត្ថកិច្ចច្រកទ្វារព្រំដែននៅ ច្រកអូបីជាន់-ច្រក៤៣-ច្រកភ្នំឆ័ត្រ-ច្រកប្រាសាទត្បែង និងច្រកជប់គគី បន្តយកចិត្តទុកដាក់បំពេញការងារ ដោយត្រូវធ្វើការសហការអោយបានល្អ ជាមួយប្រទេសជិតខាង ទទឹមនេះត្រូវជួយអប់រំផ្សព្វផ្សាយដល់ពលករ ក៏ដូចជាប្រជាពលរដ្ឋរស់នៅតាមព្រំដែន អោយបានយល់ជ្រួតជ្រាបអំពីច្បាប់ បទបញ្ញត្តិនានា ពាក់ព័ន្ធនឹងការឆ្លងកាត់ព្រំដែន ដើម្បីធានាអោយបាននូវសន្តិសុខ សុវត្ថិភាព សន្តិភាព និងការអភិវឌ្ឍតាមតំបន់ព្រំដែនអោយកាន់តែមានការរីកចម្រើន ៕
