ក្នុងពិធីសំណេះសំណាលជាមួយ នាយទាហាន នាយទាហានរង និងពលទាហាន កងកិត្តិយសត្រែទ័ព និងសិល្បៈយោធាភីរម្យ នារសៀលថ្ងៃទី២០ ខែធ្នូ ឆ្នាំ២០២៣ នៅទីស្ដីការក្រសួងការពារជាតិ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានលើកឡើងថា៖ ប្រវត្តិកកើត របស់កងឯកភាពនានា ក្នុងកងយោធពលខេមរភូមិន្ទ គឺត្រូវតែចងក្រង និងរក្សាទុកជាប្រវត្តិសាស្ត្រ ដើម្បីសម្រាប់ យោធិនបន្តវេនរបស់យើង បានយល់ដឹងអំពីការតស៊ូ និងការធ្វើពលីកម្ម ដ៏ធំធេងរបស់បុព្វបុរសយើងសម័យមុន ដែលបានបន្សល់ទុកមក។
ឯកឧត្តម រដ្ឋមន្ត្រី ទៀ សីហា បានថ្លែងនូវការកោតសរសើរ ដល់នាយទាហាន នាយទាហានរង និងពលទាហាន កងកិត្តិយសត្រែទ័ព និងសិល្បៈយោធាភីរម្យ ដែលកន្លងមកបានបំពេញភារកិច្ចបានល្អ និងយកចិត្តទុកដាក់យ៉ាងម៉ត់ចត់ជាទីបំផុត ក្នុងការបំរើប្រតិភូជាតិ និងអន្តរជាតិ ពិសេសប្រតិភូយោធាជាន់ខ្ពស់ នៃ បណ្តាប្រទេសជាមិត្ត ដែលបានមកបំពេញទស្សនកិច្ចនៅព្រះរាជាណាចក្រកម្ពុជា នេះគឺជាកិត្តិយបំផុតរបស់ ខ.ភ.ម ដែលបានទទួលបំរើប្រតិភូកន្លងមក។ ឯកឧត្តមក៏បានលើកជាអនុសាសន៍ជូនចំពោះ កងឯកភាពសិល្បៈយោធាភីរម្យ គឺយើងត្រូវសម្ដែង និងបង្ហាញ ឲ្យកងទ័ពឃើញ នូវទស្សនៈរបស់យើងក្នុងការចូលរួមចំណែក កសាងជាតិការពារមាតុភូមិ និងអភិវឌ្ឍន៍ប្រទេសជាតិ ជាមួយរាជរដ្ឋាភិបាល ពិសេសបង្ហាញនូវភារកិច្ចសំខាន់ៗនានា ដែលកងទ័ពយើងត្រូវបំពេញ ដោយបង្កប់អត្ថន័យទាំងនេះ នៅក្នុងសិល្បៈ និងចំរៀងដែលយើងបាននាំយកទៅសំដែងនៅទីនោះ។ ដោយមើលឃើញថា ប្រវត្តិកកើតកងឯកភាពសិល្បៈយោធាភីរម្យ និងកងឯកភាព កងកិត្តិយសត្រែទ័ព មានប្រវត្តិកកើត ចាប់តាំងពីដំណើរការចេញតស៊ូរំដោះប្រទេសឲ្យរួចចេញពី របបប្រល័យពូជសាសន៏ ប៉ុល ពត មកម៉្លេះ, ឯកឧត្តម ឧបនាយករដ្ឋមន្ត្រី ក៏បានណែនាំគ្រប់បណ្តាកងឯកភាពទាំងអស់ នៅទូទាំងប្រទេសត្រូវតែចងក្រងនូវប្រវត្តិសាស្ត្រ របស់កងឯកភាពខ្លួនឲ្យបានល្អ គឺក្នុងបំណងបង្ហាញដល់យុទ្ធជនវ័យក្មេង របស់យើង ដែលបន្តវេន បានស្គាល់នូវវីរៈភាពដ៏អង់អាចក្លាហាន របស់មេបញ្ជាការ, នាយ និងពលទាហាន ជំនាន់មុន បានបន្សល់ទុកឲ្យ រហូតមកដល់សព្វថ្ងៃ។
ឯកឧត្តម ទៀ សីហា ក៏បានជំរុញដល់ថ្នាក់ដឹកនាំ នាយ និងពលទាហាន ក្នុងកងឯកភាព កងកិត្តិយស ត្រែទ័ព និងសិល្បៈយោធាភីរម្យ ត្រូវខិតខំបង្កើនការសិក្សាជំនាញបន្ថែម ដោយត្រូវចេះជ្រើសរើសគ្រូល្អៗ ដែលមានស្នាដៃ និងបទពិសោធន៏ ហើយត្រូវចេះបង្កើតនូវស្នាដៃថ្មីៗ ក្នុងសិល្បៈ ដើម្បីបង្ហាញដល់យោធិនយើង បានយល់ដឹង អំពីភារកិច្ច និងតួនាទីការពារជាតិរបស់ខ្លួន តាមរយៈការសំដែងសិល្បៈរបស់យើង។ មិនតែប៉ុណ្ណោះ យោធិននៅក្នុងកងឯកភាពសិល្បៈ ក៏មានលទ្ធភាពក្នុងការចូលរួមបញ្ចេញស្នាដៃ ប្រឡងប្រជែងជាមួយសិល្បៈថ្នាក់ជាតិ និងអន្តរជាតិ លើការសំដែង និងចំរៀង ដូចនឹងផ្នែកកីឡាទៀតផង។
គួរបញ្ជាក់ថា៖ កងឯកភាព សិល្បៈយោធាភីរម្យ ត្រូវបានបង្កើតឡើងនៅខេត្តឡុងយ៉ាវ នៃប្រទេស វៀតណាម ក្នុងសម័យកាលតស៊ូរំដោះប្រទេសពីរបបប្រល័យពូជសាសន៏ ដោយបានឆ្លងកាត់ការសំដែងផងប្រយុទ្ធផង នាសម័យកាលនោះ។ ចំពោះកងកិត្តិយសត្រែទ័ព ក៏បានបង្កើតក្នុងឆ្នាំ១៩៧៩ ដោយបានប្រមូល អ្នកជើងចាស់ ពីសង្គម ដែលសល់ពីរបបប្រល័យពូជសាសន៏បន្តិចបន្តួចប៉ុណ្ណោះ ៕
