កាលពីរសៀលថ្ងៃទី២៧ ខែធ្នូ ឆ្នាំ២០២៣ នៅទីស្តីការក្រសួងការពារជាតិ បានប្រជុំឆ្លងសេចក្ដីព្រាងរបាយការណ៍ បូកសរុបការងារឆ្នាំ២០២៣ និងទិសដៅអនុវត្តឆ្នាំ២០២៤ ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
ក្នុងសេចក្ដីព្រាងរបាយការណ៍បូកសរុបលទ្ធផលការងារឆ្នាំ២០២៣ ដែលអានដោយ ឧត្តមសេនីយ៍ឯក ចាន់ សារ៉ាង អគ្គលេខាធិការរង និងជានាយក នាយកដ្ឋានសរុប អគ្គលេខាធិការដ្ឋាន ក្រសួងការពារជាតិបានលើកឡើងពីព្រឹត្តិការណ៍សំខាន់ៗ ដែលបានកើតមានឡើងនៅក្នុងព្រះរាជាណាចក្រកម្ពុជា និងបានបង្ហាញពីសភាពការណ៍វិវឌ្ឍន៍រីកចម្រើនថ្មីៗ ក្នុងឆ្នាំ២០២៣កន្លងមក ដែលកងយោធពលខេមរភូមិន្ទ បានចូលរួមបំពេញភារៈកិច្ច សហការការពារជាមួយស្ថាប័ននានា ទទួលបានលទ្ធផលល្អប្រសើរ ពិសេសព្រឹត្តិការណ៍ នៃការបោះឆ្នោតជ្រើសរើស តំណាងរាស្ត្រនីតិកាលទី៧, ព្រឹត្តិការណ៍រៀបចំសមយុទ្ធរួមគ្នា (នាគមាស ២០២៣ កម្ពុជា-ចិន), ការរៀបចំលំហាត់ហ្វឹកហ្វឺនប្រតិបត្តិការពហុជាតិ លើទីលានសកម្មភាពមីន មនុស្សធម៌ ដែលមាន១៤ប្រទេសចូលរួម និងព្រឹត្តិការណ៍ នៃការរៀបចំសមយុទ្ធរួមគ្នា (ទេវតាសន្តិភាពឆ្នាំ២០២៣ កម្ពុជា-ចិន) ពិសេសប្រតិបត្តិការណ៍ នៃជំនួបប្រាស្រ័យមិត្តភាព ក្នុងក្របខ័ណ្ឌរដ្ឋមន្ត្រីការពារជាតិ លើកទី១ បីប្រទេស កម្ពុជា-ឡាវ-វៀតណាម ដែលហៅកាត់ថា(CLV) ដែលបានរួមគ្នាធ្វើពិធីគោរពបង្គោលព្រំដែនអធិបតេយ្យ លាប ពណ៌បង្គោល និងធ្វើពិធីដាំដើមឈើជានិមិត្តរូបផងដែរ នៅជុំវិញតំបន់ប្រសព្វព្រំដែន នៃប្រទេសទាំង៣ ត្រីកោណមរកត កម្ពុជា-វៀតណាម-ឡាវ នាពេលកន្លងមក។
ក្នុងរបាយការណ៍ឆ្នាំ២០២៣ ក៏បានលើកឡើងពីលទ្ធផលការងារ នៃកិច្ចការពារសន្តិសុខ ស្ថិរភាព សណ្ដាប់ធ្នាប់សាធារណៈ ដែលកងយោធពលខេមរភូមិន្ទ ដូចជាកងរាជអាវុធហត្ថ កងអង្គរក្ស បានខិតខំពុះពារសម្រេចបាននៅក្នុងរយៈពេល១ឆ្នាំកន្លងទៅ ក្រោមកិច្ចសហការជាមួយបណ្តាកម្លាំងមានសមត្ថកិច្ច និងអាជ្ញាធរមូលដ្ឋាន ក្នុងការបំពេញភារៈកិច្ច ការពារអធិបតេយ្យ បូរណភាពទឹកដី និងភាពសុខសាន្ត ជូនប្រជាពលរដ្ឋនៅទូទាំងប្រទេស។ នៅក្នុងរយៈពេល១ឆ្នាំ ២០២៣នេះដែរ កងយោធពលខេមរភូមិន្ទបានបន្តពង្រឹងកិច្ចការពារជាតិលើគ្រប់វិស័យ នៅតាមតំបន់ព្រំដែនគោក ដែនសមុទ្រ ធ្វើល្បាតជាប្រចាំក្នុងភូមិសាស្ត្រទទួលខុសត្រូវរៀងៗខ្លួន ដើម្បីតាមដានត្រួតពិនិត្យគ្រប់គ្រងសភាពការណ៍ និងចូលរួមទប់ស្កាត់បទល្មើសគ្រប់ប្រភេទនៅតាមតំបន់ព្រំដែន និងសកម្មភាពឆ្លងដែនខុសច្បាប់។ កងយោធពលខេមរភូមិន្ទបានម្ចាស់ការ និងសហការជាមួយអាជ្ញាធរមានសមត្ថកិច្ចគ្រប់ជាន់ថ្នាក់ ចូលរួមយ៉ាងសកម្មការពារសន្តិសុខ សណ្ដាប់ធ្នាប់សាធារណៈ ធ្វើការបង្ការទប់ស្កាត់ និងបង្ក្រាបសកម្មភាពបទល្មើសគ្រប់ប្រភេទ ភាពអនាធិបតេយ្យផ្សេងៗ និងសហការចូលរួមការពារសន្តិសុខ សុវត្ថិភាពជូនប្រមុខថ្នាក់ដឹកនាំ រាជរដ្ឋាភិបាល ថ្នាក់ដឹកនាំគណៈប្រតិភូជាតិ អន្តរជាតិនានា និងការអនុវត្តច្បាប់ចរាចរណ៍ផ្លូវគោក ព្រមទាំងគោរពអនុវត្តបទបញ្ជា អនុសាសន៍របស់ប្រមុខរាជរដ្ឋាភិបាល ក្នុងការបង្ក្រាបសកម្មភាពបំផ្លិចបំផ្លាញធនធានធម្មជាតិ។ បណ្ដាស្ថាប័នអង្គភាពទូទាំងកងយោធពលខេមរភូមិន្ទ បានយកចិត្តទុកដាក់រៀបចំផែនការ សកម្មភាពការងាររបស់ខ្លួន និងបានបន្តអនុវត្តការងារហ្វឹកហ្វឺន, ការងារអប់រំចិត្តសាស្ត្រនយោបាយ និងការងារសតិអារម្មណ៍, ការងារកសាងបែបបទយោធិនចូលនិវត្តន៍ និងយោធិនប្រភេទ២, ការងារកសាងច្បាប់ និងលិខិតបទដ្ឋានផ្សេងៗ, ការងារធានាភ័ស្តុភារហិរញ្ញវត្ថុ, ការងារធានាគ្រឿងបំពាក់សម្ភារៈបច្ចេកទេស កែច្នៃ ជួសជុលថែទាំ លើកកម្ពស់សុវត្ថិភាព គុណភាពគ្រឿងបំពាក់, ការងារសុខាភិបាលបានលើកកម្ពស់សុខុមាលភាព និងការបន្តចាក់វ៉ាក់សាំងបង្ការជំងឺកូវីដ-១៩ ជូនកងទ័ព និងគ្រួសារ, បានគ្រប់គ្រង និងធានាដល់ការប្រើប្រាស់បណ្ដាញទំនាក់ទំនងបញ្ជូនសារ, ការងារកសាងបណ្ដាញផ្លូវគមនាគមន៍ ស្ពានលូ និងសំណង់ផ្សេងៗ ក្នុងកងទ័ព បានគ្រប់គ្រងអចលនទ្រព្យរបស់កងយោធពលខេមរភូមិន្ទ, ធ្វើការងារល្អលើការងារទំនាក់ទំនងកិច្ចសហប្រតិបត្តិការយោធា ជាមួយបណ្ដាប្រទេសក្នុងតំបន់ និងនៅលើសកលលោក, ការងារកសាង និងដំណើរការវិមានឈ្នះ ឈ្នះ និងតំបន់ប្រវត្តិសាស្ត្រយោធា បន្តការបំពេញបេសកកម្មរក្សាសន្តិភាព ក្រោមឆត្រអង្គការសហប្រជាជាតិ ព្រមទាំងការងារមួយចំនួនទៀត ដោយសម្រេចបានផលល្អ។ កិច្ចប្រជុំក៏បានបន្តពិភាក្សាផ្លាស់ប្ដូរយោបល់គ្នា និងកែតម្រូវលើចំណុចខ្វះខាតនានា ដើម្បីឲ្យរបាយការណ៍នេះ ប្រព្រឹត្តទៅប្រកបដោយខ្លឹមសារ និងអត្ថន័យដែលរំលេចឲ្យឃើញពីស្នាដៃ ដែលកងយោធពលខេមរភូមិន្ទ បានខិតខំកន្លងមក សម្រាប់វិស័យការពារជាតិ។
មានប្រសាសន៍បូកសរុបក្នុងកិច្ចប្រជុំ នាយឧត្តមសេនីយ៍ ទៀ សីហា បានមានប្រសាសន៍ថា៖ រយៈពេលពេញមួយឆ្នាំ២០២៣កន្លងមកនេះ គឺជារយៈពេលមួយដ៏មានសារៈសំខាន់ ដោយមានព្រឹត្តិការណ៍ទាំងជាតិ និងអន្តរជាតិធំៗជាច្រើន ក្នុងនោះកងយោធពលខេមរភូមិន្ទ និងក្រសួងការពារជាតិ បានដើរតួនាទីយ៉ាងសំខាន់ក្នុងការរួមចំណែកជួយដល់រាជរដ្ឋាភិបាលថ្មី អាណត្តិទី៧ ដើម្បីភិវឌ្ឍន៍សង្គមកម្ពុជាឲ្យកាន់តែរីកចម្រើន ក្រោយពីមានការអាក់ខានអស់រយៈពេលជាង២ឆ្នាំកន្លងមក ដោយសាររោគរាតត្បាតជាសកល នៃជំងឺឆ្លងកូវីដ-១៩។ នៅក្នុងរយៈពេលនេះដែរ កងយោធពលខេមរភូមិន្ទក៏បានធ្វើការកែទម្រង់ ក្នុងនោះបានបន្តធ្វើការកែសម្រួលនិងបង្កើតក្របខ័ណ្ឌមួយចំនួន ស្របតាមការចាំបាច់ចំពោះមុខ និងមានលក្ខណៈយុទ្ធសាស្ត្រយូរអង្វែង ព្រមទាំងបានយកចិត្តទុកដាក់គ្រប់គ្រង និងពង្រឹងសមត្ថភាព គុណភាពយោធិន គ្រប់លំដាប់ថ្នាក់ គ្រប់ជំនាញ និងកសាងប្រភពនាយទាហានសម្រាប់បន្តវេន ពីនាយទាហានដែលត្រូវចូលនិវត្តន៍។ សម្រាប់ឆ្នាំ២០២៤ខាងមុខនេះ ឯកឧត្ដម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដាក់ចេញនូវទិសដៅឲ្យដល់គ្រប់អង្គភាពកងយោធពលខេមរភូមិន្ទ ត្រូវបន្តពង្រឹងលើកិច្ចការ ការពារអធិបតេយ្យ បូរណភាពទឹកដី និងរួមសហការទប់ស្កាត់ បង្ការបង្ក្រាបបទល្មើសគ្រប់ប្រភេទនៅតាមតំបន់ព្រំដែនគោក ដែនសមុទ្រ និងសកម្មភាពឆ្លងដែនខុសច្បាប់ទៅវិញទៅមក រវាងប្រទេសជិតខាងឲ្យមានប្រសិទ្ធភាព។ ជាមួយគ្នានេះដែរ ក៏ត្រូវបន្តកិច្ចសហប្រតិបត្តិការល្អថែមទៀត ជាមួយប្រទេសជិតខាង និងដោះស្រាយរាល់បញ្ហាផ្សេងៗ ដែលកើតមានឡើងដោយសន្តិវិធី។ ឯកឧត្តម ឧបនាយករដ្ឋមន្ត្រីក៏បានក្រើនរំលឹកឲ្យស្ថាប័នពាក់ព័ន្ធទាំងអស់ ពិសេសស្ថាប័នអាវុធហត្ថ កងអង្គរក្ស និងមេបញ្ជាការបីប្រភេទទ័ព ត្រូវពង្រឹងឡើងវិញលើការងារអប់រំចិត្តសាស្ត្រ ពិសេសត្រូវបន្តកិច្ចសហការឲ្យបានជិតស្និទ្ធ ជាមួយគ្រប់សមត្ថកិច្ច ក្នុងការរក្សាសន្តិសុខ សណ្ដាប់ធ្នាប់ សុវត្ថិភាព ជូនថ្នាក់ដឹកនាំប្រមុខរាជរដ្ឋាភិបាល ក៏ដូចជាថ្នាក់ដឹកនាំប្រតិភូជាតិ និងអន្តរជាតិ ដែលអញ្ជើញមកធ្វើទស្សនកិច្ច និងបំពេញការងារនៅកម្ពុជា ប្រកបដោយសុវត្ថិភាព ៕
