នារសៀលថ្ងៃទី២៨ ខែធ្នូ ឆ្នាំ២០២៣កន្លងទៅនេះ មុននឹងប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យ នយោបាយឈ្នះ ឈ្នះ និងខួប៥ឆ្នាំ នៃការកសាងវិមានឈ្នះ ឈ្នះ, នៅវិមានឈ្នះ ឈ្នះ បានប្រារព្ធពិធីក្រុងពលី ដើម្បីបួងសួងសុំសេចក្ដីសុខចម្រើន ពីទេវតាថែរក្សាទឹកដី នៃព្រះរាជាណាចក្រកម្ពុជា ដើម្បីប្រារព្ធខួបលើកទី២៥ នៃការបញ្ចប់សង្គ្រាមស៊ីវិល នៅកម្ពុជា និងការអនុវត្តប្រកបដោយជោគជ័យ នយោបាយឈ្នះ ឈ្នះ និងខួប៥ឆ្នាំ នៃការកសាងវិមានឈ្នះ ឈ្នះ ដែលប្រព្រឹត្តទៅនៅព្រឹកទី២៩ ខែធ្នូ ឆ្នាំ២០២៣ ឲ្យដំណើរការទៅទទួលបានលទ្ធផលល្អ។
សូមបញ្ជាក់ថា៖ ឆ្នាំ២០២៣នេះ រាជរដ្ឋាភិបាលកម្ពុជា បានរៀបចំប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យ នៃនយោបាយឈ្នះ ឈ្នះ (២៩ ធ្នូ ឆ្នាំ១៩៩៨-២៩ ធ្នូ ឆ្នាំ២០២៣) និងខួប៥ឆ្នាំ នៃការកសាងវិមានឈ្នះ ឈ្នះ (២៩ ធ្នូ ឆ្នាំ២០១៨-២៩ ធ្នូ ឆ្នាំ២០២៣) នៅទីតាំងវិមានឈ្នះ ឈ្នះ រយៈពេលបីថ្ងៃ ចាប់ពីថ្ងៃទី២៩ ខែធ្នូ ឆ្នាំ២០២៣ រហូតដល់ពិធីឆ្លងឆ្នាំសកល ឈានចូលឆ្នាំ២០២៤។
ការរៀបចំប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា នៃការអនុវត្តប្រកបដោយជោគជ័យ នយោបាយឈ្នះ ឈ្នះ ជាការចងចាំនូវការបញ្ចប់សង្គ្រាមស៊ីវិលទាំងស្រុងនៅកម្ពុជា នឹងនាំមកនូវសន្តិភាព និងការឯកភាពជាតិពេញលេញ និងការអភិវឌ្ឍប្រទេសជាតិមកដល់សព្វថ្ងៃនេះ។ ការរៀបចំព្រឹត្តិការណ៍នេះ ស្របជាមួយខួប៥ឆ្នាំ នៃការកសាងវិមានឈ្នះ ឈ្នះ ដែលជាសំណង់ប្រវត្តិសាស្ត្រ ដើម្បីរំឭកដល់វីរភាព និងគុណតម្លៃ នៃនយោបាយឈ្នះ ឈ្នះ ដែលបានផ្ដួចផ្ដើមឡើងដោយ សម្ដេចអគ្គមហាសេនាបតីតេជោ ហ៊ុន សែន ដែលជាស្ថាបនិក និងជាមគ្គុទេសក៍ឯកសន្តិភាព និងជាការបង្កើនការយល់ដឹងពីប្រវត្តិសាស្ត្រជាតិ និងស្មារតីស្រឡាញ់ជាតិមាតុភូមិ ក្នុងការបន្តថែរក្សាស្ថិរភាព សន្តិសុខ និងអភិវឌ្ឍន៍ជាតិ។
បច្ចុប្បន្នក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត ក្នុងនីតិកាលទី៧នេះ បានដាក់ចេញនូវគោលដៅពង្រឹង និងរក្សាសន្តិភាពទៅតាមទស្សនវិជ្ជាឈ្នះ ឈ្នះ ជាមរតកដែលបានបន្សល់ទុក ហើយបាននឹងកំពុងអនុវត្តយុទ្ធសាស្ត្របញ្ចកោណ ដំណាក់កាលទីមួយ ដែលមានចក្ខុវិស័យ ដើម្បីកំណើនការងារ សមធម៌ ប្រសិទ្ធភាព និងចិរភាព។ ជាមួយគ្នានេះក្នុងបរិបទសម័យទំនើប ទាមទារឲ្យមានការរួមចំណែកពីបច្ចេកវិទ្យាឌីជីថល ក្នុងការអភិវឌ្ឍប្រទេសជាតិ បូករួមជាមួយកម្លាំងចលករ សកម្មរបស់យុវជនកម្ពុជា និងភាពចាំបាច់កំណត់ការងារអាទិភាពមួយផ្នែក លើបច្ចេកទេសឌីជីថល រួមជាមួយកិច្ចការបន្តរក្សានូវសុខសន្តិភាព សម្រាប់ប្រជាជន ប្រកបដោយភាពកត្តញ្ញូ សុខដុម និងការចូលរួមបង្កើនការងារ រក្សាតម្លាភាពសម្រាប់សង្គម ដែលបន្តនាំកម្ពុជាឲ្យមានភាពរីកចម្រើនលើគ្រប់វិស័យ និងមានមូលដ្ឋានសេដ្ឋកិច្ចរឹងមាំ និងធំទូលាយ។
ព្រឹត្តិការណ៍នេះនឹងធ្វើឲ្យប្រវត្តិសាស្ត្រ សរសេរពីវីរៈជនប្រតិបត្តិករពិត ដែលបានរួមចំណែក ក្នុងការដំណើរការអនុវត្តនយោបាយឈ្នះ ឈ្នះ ដែលបានបញ្ចប់សង្គ្រាមទាំងស្រុងនៅកម្ពុជា បង្កើតសន្តិភាព និងការឯកភាពជាតិពេញលេញ ដែលមាន សម្ដេចតេជោ ហ៊ុន សែន ជាស្ថាបនិក និងជាមគ្គុទ្ទេសក៍ឯក រួមជាមួយប្រតិបត្តិករជាច្រើនរូបបានរួមចំណែក។ ការចូលរួមអបអរសាទរ នឹងរៀបចំប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះ ឈ្នះ និងខួប៥ឆ្នាំ នៃការកសាងវិមានឈ្នះ ឈ្នះ ថ្ងៃទី២៩ ខែធ្នូ ឆ្នាំ២០២៣ បង្ហាញពីមោទនភាពជាតិថ្មីមួយទៀត សម្រាប់ប្រជាជនកម្ពុជា ជាកាតព្វកិច្ចមួយ រួមចំណែកពីក្រសួងស្ថាប័ន ក្នុងការបង្ហាញអំពីសមិទ្ធផលនានា របស់រាជរដ្ឋាភិបាល ដែលមានភាពរីកចម្រើន ក្នុងសម័យកាលសន្តិភាព ស្របតាមទិសស្លោក មានសន្តិភាពមានការអភិវឌ្ឍ ពោលគឺជាសមិទ្ធផល នៃការរីកចម្រើនក្រោមម្លប់ នៃសន្តិភាពពេញលេញ ដើម្បីប្រវត្តិសាស្ត្រសរសេរ និងចារឹកពីយើងសម្រាប់មនុស្សជំនាន់ក្រោយ។
ព្រឹត្តិការណ៍ខាងលើនឹងរៀបចំរយៈពេលបីថ្ងៃនៅថ្ងៃទី២៩ ទី៣០ ទី៣១ ខែធ្នូ ឆ្នាំ២០២៣ ក្រោមការដឹកនាំ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ដោយមានកម្មវិធីសំខាន់ៗដូចជាអបអរសាទរ ខួបលើកទី២៥ នៃទិវានយោបាយឈ្នះ ឈ្នះ និងខួប៥ នៃការកសាងវិមានឈ្នះ ឈ្នះ ក្រោមអធិបតីភាពដ៏ខ្ពង់ខ្ពស់ សម្ដេចធិបតី ហ៊ុន ម៉ាណែត នាយករដ្ឋមន្ត្រី ការតាំងពិព័រណ៍សមិទ្ធផលរយៈពេល២៥ឆ្នាំ ដែលសម្រេចបាន ក្រោយអនុវត្តនយោបាយឈ្នះ ឈ្នះ របស់ក្រសួងស្ថាប័ន និងកម្លាំងប្រដាប់អាវុធ, ការបាញ់កាំជ្រួច, ការប្រគំតន្ត្រីសម័យ ផ្ទាំងទស្សនីយភាពសិល្បៈ, ការតាំងពិព័រណ៍ផលិតផល និងមហោស្រពម្ហូបអាហារ ព្រមទាំងកម្មវិធីកម្សាន្តផ្សេងៗទៀត ៕
