អគ្គនាយកដ្ឋានភស្តុភារ-ហិរញ្ញវត្ថុ ក្រសួងការពារជាតិ បានប្រជុំបូកសរុបលទ្ធផលការងារភស្តុភារ-ហិរញ្ញវត្ថុ ឆ្នាំ២០២៣ និងទិសដៅអនុវត្តបន្តឆ្នាំ២០២៤ នាព្រឹកថ្ងៃទី០៥ ខែមករា ឆ្នាំ២០២៤នេះ ស្ថិតក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
ឯកឧត្តម ឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋានភស្តុភារ-ហិរញ្ញវត្ថុ បានរាយការណ៍គ្រប់ជ្រុងជ្រោយពីសមិទ្ធផលការងារ ដែលអគ្គនាយកដ្ឋានភស្តុភារ-ហិរញ្ញវត្ថុ សម្រេចបានក្នុងឆ្នាំ២០២៣កន្លងទៅនេះ ប្រកបដោយភាពទន់ភ្លន់ បត់បែនតាមស្ថានភាពវិវត្តជាក់ស្តែង។ របាយការណ៏បានរំលេចនូវភារកិច្ចទាំង៥របស់ខ្លួន មានជាអាទិ៍៖ ទី១-ការងារហិរញ្ញវត្ថុ, ទី២-ការងារផ្គត់ផ្គង់, ទី៣-ការងារធានាប្រេងឥន្ធនៈ, ទី៤-ការងារដឹកជញ្ជូន និងទី៥-ការងារសុខាភិបាល និងមន្ទីរពេទ្យ ព្រមទាំងការងារផ្សេងៗទៀត។
ក្នុងរបាយការណ៍ក៏បានលើកឡើងដែរថា៖ រយៈពេលពេញមួយឆ្នាំ២០២៣ សភាពការណ៍សន្តិសុខ សេដ្ឋកិច្ចនៅក្នុងតំបន់ និងសកលលោក នៅតែបន្តវីវត្តន៍ប្រែប្រួល ស្មុគស្មាញ និងពិបាកប៉ាន់ស្មាន ដោយបង្កើតឱ្យមានបញ្ហាប្រឈមជាច្រើន រួមជាមួយការបន្តកើតឡើងនូវអំពើភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ឧក្រិដ្ឋកម្មបច្ចេកវិទ្យាព័ត៌មានទំនើប ជំងឺរាតត្បាត គ្រោះធម្មជាតិ និងការប្រែប្រួលអាកាសធាតុ។ ទោះបីមានផលប៉ះពាល់ បណ្តាលមកពីបញ្ហាប្រឈមយ៉ាងស្លុគស្មាញខាងលើក្ដី ក៏ប៉ុន្តែអគ្គនាយកដ្ឋានភស្តុភារ-ហិរញ្ញវត្ថុ ក្រសួងការពារជាតិ បានរួមសហការជាមួយនាយទាហានជំនាញ និងអង្គភាពពាក់ព័ន្ធទាំងអស់ ក្នុងកងយោធពលខេមរភូមិន្ទ ខិតខំសម្រេចជោគជ័យនូវបេសកកម្មរបស់ខ្លួន ជាមួយនឹងសមិទ្ធផល និងស្នាដៃជាច្រើន បានរួមចំណែកយ៉ាងសំខាន់ ក្នុងការការពារបូរណភាពទឹកដី អធិបតេយ្យជាតិ ថែរក្សាសុខសន្តិភាព ស្ថិរភាពនយោបាយ បានយ៉ាងល្អប្រសើរ។
ក្នុងនាមថ្នាក់ដឹកនាំក្រសួងការពារជាតិ អគ្គបញ្ជាការដ្ឋាន នៃកងយោធពលខេមរភូមិន្ទ, ឯកឧត្តម នាយឧត្តមសេនីយ៍ ទៀ សីហា បានថ្លែងថា៖ សមិទ្ធផលដែលគ្រប់កងឯកភាពក្នុងកងយោធពលខេមរភូមិន្ទសម្រេចបាន នៅឆ្នាំ២០២៣កន្លងទៅ បានឆ្លុះបញ្ចាំងពីកិច្ចខិតខំប្រឹងប្រែង ក្នុងការចូលរួមអនុវត្តយ៉ាងសកម្ម នូវកម្មវីធីនយោបាយ និងយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលនីតិកាលទី៦ នៃរដ្ឋសភា និងការចាប់ផ្តើមអនុវត្តនូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា សំដៅលើកកម្ពស់វិស័យការពារជាតិ កាន់តែរីកចម្រើនថែមទៀត។
ឯកឧត្តម នាយឧត្តមសេនីយ៍ ទៀ សីហា បានគូសបញ្ជាក់ថា៖ ឆ្នាំ២០២៤នេះ ជាឆ្នាំទី១ នៃការអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដែលជារបៀបវារៈនយោបាយដ៏សំខាន់ សម្រាប់ការអភិវឌ្ឍប្រទេសជាតិប្រកបដោយទស្សនវិស័យច្បាស់លាស់ និងវែងឆ្ងាយ នាំប្រទេសជាតិឱ្យកាន់តែមានការអភិវឌ្ឍរីកចម្រើនលើគ្រប់វិស័យជាបន្តទៀត ក្នុងនោះស្នូលនៃយុទ្ធសាស្ត្របញ្ចកោណដំណាក់កាលទី១ គឺផ្តោតលើការកែទម្រង់ ការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋ ឱ្យក្លាយជារដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ។ រាជរដ្ឋាភិបាលបានចាត់ទុកថា៖ ថវិកាឆ្នាំ២០២៤ ត្រូវតែជាថវិកាយុទ្ធសាស្រ្ត នៃការរក្សាសមិទ្ធផល ដែលសម្រេចបានដោយលំបាក និងការបន្តបុកគ្រឹះថ្មីៗ ក្នុងការបោះជំហានឆ្ពោះទៅសម្រេចគោលដៅសំខាន់ៗ នៃកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ នីតិកាលទី៧ នៃរដ្ឋសភា ដើម្បីបន្តរក្សាសន្តិភាព ស្ថិរភាព និងទ្រទ្រង់ដំណើរនិវត្តន៍តទៅមុខឥតឈប់ឈររបស់កម្ពុជា លើវិថីនៃការអភិវឌ្ឍប្រកបដោយ គុណភាព និងចីរភាព ឆ្ពោះទៅចក្ខុវិស័យកម្ពុជា ឆ្នាំ២០៥០។ ប្រការនេះ ទាមទារឱ្យយើងទាំងអស់គ្នាយកចិត្តទុកដាក់ខ្ពស់ ចំពោះការលើកកម្ពស់ភាពជាអ្នកដឹកនាំ និងសមត្ថភាពនាយទាហានជំនាញ តាមគ្រប់ស្ថាប័ន អង្គភាព ក្នុងកងយោធពលខេមរភូមិន្ទ ដោយផ្សារភ្ជាប់ និងការធានាបាននូវសមត្ថភាព អនុវត្តការងារជាក់ស្តែង លទ្ធផល និងការទទួលខុសត្រូវខ្ពស់ ដើម្បីឆ្លើយតបនឹងអាទិភាព សំខាន់ៗនៅក្នុងដំណាក់កាលថ្មីនេះ រួមមានជាអាទិ៍៖ ការពង្រឹងការងារជំនាញទាំង៥ ការអនុវត្តប្រកបដោយគុណភាព ការកសាងមូលធនមនុស្សសម្រាប់បន្តវេន ដោយចាប់ផ្ដើមការងាររបស់ខ្លួន ក្នុងជំហរដ៏រឹងមាំប្រកបដោយជីវភាព ថាមពល និងភាពស្វាហាប់ សមត្ថភាព និងជំនាញវិជ្ជាជីវៈខ្ពស់ ភាពសកម្ម និងបុរេសកម្ម ភាពស្អាតស្អំ និងសុច្ចរិត។
ជាមួយគ្នានេះ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានជម្រុញដល់មន្ត្រីជំនាញភស្តុភារ-ហិរញ្ញវត្ថុ ត្រូវបន្តអនុវត្តរាល់វិធានការ កំណែទម្រង់ ការគ្រប់គ្រងហិរញ្ញវត្ថុសាធារណៈ ក្នុងនោះការកែប្រែតាមទម្រង់បែបបទថវិកាកម្មវិធី ដោយត្រូវណែនាំរៀនសូត្រជូនខ្សែរយៈជំនាញហិរញ្ញវត្ថុគ្រប់ថ្នាក់ អនុវត្តឱ្យបានត្រឹមត្រូវ តាមនីតិវិធីទម្រង់បែបបទ ដែលបានកំណត់, បន្តសហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងការអនុវត្តកម្មវិធីកំណែទម្រង់ ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ឆ្នាំ២០២៤, ពល្បឿនការដោះស្រាយយោធិនប្រភេទ២ ចេញពីជួរទ័ព និងជម្រុញទូទាត់ប្រាក់បូជាសពយោធិនពលី មរណៈ រួមជាមួយការងារផ្គត់ផ្គង់ ការងារធានាប្រេងឥន្ធនៈ ការងារដឹកជញ្ជូន ការងារសុខាភិបាល និងមន្ទីរពេទ្យ ឱ្យកាន់តែមានប្រសិទ្ធភាពថែមទៀត។
ក្នុងឱកាសនោះដែរ ឯកឧត្តម ឧត្តមសេនីយ៍ឯក លី កុសល រដ្ឋលេខាធិការ ក្រសួងការពារជាតិ ប្រធានក្រុមជួយរដ្ឋមន្ត្រី លើការងារអគ្គនាយកដ្ឋានភស្តុភារ-ហិរញ្ញវត្ថុ ក៏បានដឹកនាំប្រជុំពិភាក្សាជាមួយ ឯកឧត្តម លោកជំទាវ លោក លោកស្រី ដែលជាថ្នាក់ដឹកនាំ និងនាយទាហានជំនាញភស្តុភារ-ហិរញ្ញវត្ថុគ្រប់កងឯកភាព ក្នុងកងយោធពលខេមរភូមិន្ទ។ កិច្ចពិភាក្សាបានផ្តោតទៅលើភារកិច្ចសំខាន់ៗទាំង៥ ដែលអគ្គនាយកដ្ឋានបានអនុវត្តឆ្នាំ២០២៣ រួមជាមួយបញ្ហាប្រឈម និងការងារសេសសល់មួយចំនួន រួមគ្នាស្វែងរកដំណោះស្រាយ សម្រាប់ដាក់ចេញទិសដៅអនុវត្តការងារឆ្នាំ២០២៤ ឱ្យកាន់តែគ្រប់ជ្រុងជ្រោយ និងមានប្រសិទ្ធភាពថែមទៀត។
កិច្ចប្រជុំនេះ បានរៀបចំឡើងដោយមានការចូលរួមពីនាយទាហានគ្រប់កងឯកភាព ក្នុងកងយោធពលខេមរភូមិន្ទ ចំនួន១៨១កងឯកភាព ដើម្បីជួបជុំគ្នា និងរួមគ្នាធ្វើការពិនិត្យវាយតម្លៃ អំពីសមិទ្ធផល លើការងារភស្តុភារ-ហិរញ្ញវត្ថុ ដែលអគ្គនាយកដ្ឋានភស្តុភារ-ហិរញ្ញវត្ថុ សម្រេចបានក្នុងឆ្នាំ២០២៣កន្លងទៅ។ ជាមួយគ្នានេះ នាយទាហានជំនាញទាំងអស់ បានរួមគ្នាធ្វើការវាយតម្លៃបញ្ហាប្រឈម និងការងារដែលនៅសេសសល់ ដើម្បីដោះស្រាយព្រមទាំងដាក់ចេញទិសដៅការងារ សម្រាប់ឆ្នាំ២០២៤ ប្រកបដោយភាពគ្រប់ជ្រុងជ្រោយ និងមានប្រសិទ្ធភាព ដើម្បីរួមចំណែកអនុវត្តនូវគោលនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ៕
