សេនានុព័ន្ធកងទ័ពភូមិន្ទថៃ ប្រចាំព្រះរាជាណាចក្រកម្ពុជា បានប្រារព្ធពិធីអបអរសាទរ ព្រះរាជពិធីបុណ្យចម្រើនព្រះជន្ម នៃព្រះរាជាណាចក្រថៃ និងខួបអនុស្សាវរីយ៍ថ្ងៃកំណើតកងទ័ពភូមិន្ទថៃ នាថ្ងៃទី១៨ ខែមករា ឆ្នាំ២០២៤ កន្លងទៅថ្មីៗនេះនៅសណ្ឋាគារ សាន់ & មូន រីវើសាយ(Sun & Moon Riverside Hotel) ដែលពិធីនេះមានការអញ្ជើញចូលរួមជាអធិបតីភាព ពីសំណាក់ ឯកឧត្តម នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ និងឯកឧត្តម ឈើតកៀត អត្ថាករ (Cherdkiat Atthakor) ឯកអគ្គរាជទូត នៃព្រះរាជាណាចក្រថៃ ប្រចាំព្រះរាជាណាចក្រកម្ពុជា។
លោកវរសេនីយ៍ឯក កនវ៉ារ៉ាណុន ឃ្លុនព្រុំស៊ូវណ្ណ (Kornwaranon Glunpromsuwan) សេនានុព័ន្ធជើងគោក នៃកងទ័ពភូមិន្ទថៃ បានឲ្យដឹងថា៖ នៅថ្ងៃទី១៨ ខែមករា ជារៀងរាល់ឆ្នាំ ត្រូវបានប្រារឰឡើង ដើម្បីរំឭកដល់ទិវាកងទ័ពភូមិន្ទថៃ ដែលជាកងកម្លាំងយោធា ដែលមានតួនាទី និងទំនួលខុសត្រូវ ក្នុងការធានាស្ថិរភាព និងការពារវឌ្ឍនភាព និងវិបុលភាពនាពេលអនាគតរបស់ប្រជាជាតិថៃ រួមទាំងតាមរយៈការពង្រឹងកិច្ចសហប្រតិបត្តិការជិតស្និទ្ធ ជាមួយសម្ព័ន្ធមិត្តទាំងអស់ នៅកម្រិតផ្សេងៗ នៅក្នុងវិស័យដែលមានផលប្រយោជន៍ទៅវិញទៅមក របស់យើង។ ជាមួយគ្នានេះដែរ លោកវរសេនីយ៍ឯកសេនានុព័ន្ធ នៃកងទ័ពភូមិន្ទថៃ សូមថ្លែងអំណរគុណយ៉ាងជ្រាលជ្រៅ ចំពោះឯកឧត្តម លោកជំទាវ អស់លោក លោកស្រី ដែលបានមកចូលរួមនៅក្នុងកម្មវិធីដ៏ពិសេសនេះ និងបានថ្វាយព្រះពរព្រះករុណាជាអម្ចាស់ជីវិតតម្កល់លើត្បូងព្រះបាទ មហា វិជ្ជិរ៉ាឡុងកន (Maha Vajiralongkorn) ព្រះមហាក្សត្រ នៃព្រះរាជាណាចក្រថៃ និងសម្ដេចព្រះមហាក្សត្រី សុធីតា វិជ្ជិរ៉ាឡុងកន (Suthida Vajiralongkorn) ព្រមទាំងថ្វាយព្រះពរ ព្រះករុណា ព្រះបាទសម្ដេច ព្រះបរមនាថ នរោត្តម សហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរផងដែរ។
ថ្លែងក្នុងឱកាសនោះ ឧត្តមសេនីយ៍ឯក ផាត វិបុលសុភ័ក្ត្រ អគ្គនាយករង អគ្គនាយកដ្ឋាននយោបាយ និងកិច្ចការបរទេស និងជានាយកដ្ឋានទាក់ទងអន្តរជាតិ នៅក្នុងនាមឲ្យក្រសួងការពារជាតិ អគ្គបញ្ជាការដ្ឋាន នាយទាហាន និងពលទាហាន នៃកងយោធពលខេមរភូមិន្ទ បានសម្ដែងនូវទឹកចិត្ត សោមនស្សរីករាយឥតឧបមា និងអំណរសាទរ ជូនចំពោះថ្នាក់ដឹកនាំ ក្រសួងការពារជាតិ នាយទាហាន ពលទាហានកងទ័ពភូមិន្ទថៃ នៅក្នុងឱកាសប្រារព្ធខួបអនុស្សាវរីយ៍ថ្ងៃកំណើតកងទ័ពភូមិន្ទថៃ នាពេលនេះ។ ឧត្តមសេនីយ៍ឯក ផាតវិបុលសុភ័ក្រ្ត បានធ្វើការវាយតម្លៃខ្ពស់ ចំពោះកិច្ចសហប្រតិបត្តិការ រវាងកងយោធពលខេមរភូមិន្ទ និងកងទ័ពភូមិន្ទថៃ ដែលមានការរីកចម្រើន ពីមួយថ្ងៃទៅមួយថ្ងៃ ឥតឈប់ឈរ តាមរយៈការផ្លាស់ប្តូរគណៈប្រតិភូគ្រប់កម្រិតថ្នាក់ រវាងកងទ័ពនៃប្រទេសទាំងពីរ កម្ពុជា-ថៃ ជារៀងរាល់ឆ្នាំ ហើយអ្វីដែលគួរឲ្យកត់សម្គាល់ផងដែរ សម្រាប់ឆ្នាំ២០២៣ គឺកាលពីថ្ងៃទី២៨ ខែកញ្ញា ឆ្នាំ២០២៣ ឯកឧត្ដម សេដ្ឋា ថាវីស៊ីន(Srettha Thavisin) នាយករដ្ឋមន្ត្រី នៃព្រះរាជាណាចក្រថៃ បានអញ្ជើញមកបំពេញទស្សនកិច្ចផ្លូវការលើកដំបូង នៅព្រះរាជាណាចក្រកម្ពុជា និងបានបង្កើតកិច្ចសហប្រតិបត្តិការ ពហុវិស័យ រវាងប្រទេសទាំងពីរ ក្រោមស្មារតីពង្រឹងបន្ថែមទៀត នូវភាពជាដៃគូ ដើម្បីសន្តិភាព និងវិបុលភាព ព្រមទាំងបានអញ្ជើញចូលរួមទទួល និងប្រគល់មជ្ឈមណ្ឌលសំចត និងទទួលជនរងគ្រោះដោយសារការជួញដូរ។ បន្ថែមលើសពីនេះទៀតកាលពីថ្ងៃទី០១ ដល់ថ្ងៃទី០២ ខែធ្នូ ឆ្នាំ២០២៣កន្លងទៅថ្មីៗនេះ ឯកឧត្តម សុធីន ខ្លាំងសែង (Sutin Klungsang) រដ្ឋមន្ត្រីក្រសួងការពារជាតិ នៃព្រះរាជាណាចក្រថៃ ក៏បានអញ្ជើញមកបំពេញទស្សនកិច្ចផ្លូវការលើកដំបូង នៅព្រះរាជាណាចក្រកម្ពុជា និងបានចូលជួបសម្តែងការគួរសមថ្នាក់ដឹកនាំជាន់ខ្ពស់ ព្រះរាជាណាចក្រកម្ពុជា ដើម្បីចូលរួមពង្រឹង និងពង្រីកកិច្ចសហប្រតិបត្តិការ រវាងប្រទេសទាំងពីរ ជាពិសេសវិស័យយោធា ឲ្យកាន់តែស៊ីជម្រៅកើនឡើងបន្ថែមទៀត ៕
