ព័ត៌មាន

តំបន់​ប្រតិបត្តិការ​សឹក​រង​កោះ​កុង ប្រជុំ​បូក​សរុប​លទ្ធផល​ការ​ងារ​យោធា​ឆ្នាំ​២០១៨ ​និង​ផ្សព្វ​ផ្សាយ​ផែន​ការ​សកម្ម​ភាព​ការ​ងារ​យោធា​ឆ្នាំ​២០១៩​
នាយកដ្ឋានព័ត៌មាន(៣)
438
823 ​ឯកឧត្តម ​ឧត្តម​សេនីយ៍​ឯក​ បណ្ឌិត​ យឿន ​សុខុន ​មេ​បញ្ជាការ​រង​ កង​ទ័ព​ជើង​គោក ​និង​ជា​មេ​បញ្ជាកា​យោធ​ភូមិ​ភាគ​ទី​៣​ លោក​ជំទាវ​ មិថុនា ​ភូ​ថង ​អភិបាល ​នៃ​គណៈ​អភិបាល​ខេត្ត​កោះ​កុង

    កាល​ពី​ថ្ងៃ​ទី​២៧ ​ខែ​កុម្ភៈ​ ឆ្នាំ​២០១៨ ​នៅ​បញ្ជាការ​ដ្ឋាន​តំបន់​ប្រតិបត្តិការ​សឹក​រង​កោះ​កុង ​បាន​ប្រជុំ​បូក​សរុប​លទ្ធផល​​ការ​ងារ​យោធា​ឆ្នាំ​​២០១៨​ និង​ផ្សព្វ​ផ្សាយ​ផែន​ការ​សកម្មភាព​ការ​ងារ​យោ​ធា​ឆ្នាំ​២០១៩ ​ដែល​កិច្ច​ប្រជុំ​នេះ​បាន​ប្រព្រឹត្តិ​ទៅ​ ក្រោម​អធិបតី​ភាព ​ឯកឧត្តម ​ឧត្តម​សេនីយ៍​ឯក​ បណ្ឌិត​ យឿន ​សុខុន ​មេ​បញ្ជាការ​រង​ កង​ទ័ព​ជើង​គោក ​និង​ជា​មេ​បញ្ជាកា​យោធ​ភូមិ​ភាគ​ទី​៣​ លោក​ជំទាវ​ មិថុនា ​ភូ​ថង ​អភិបាល ​នៃ​គណៈ​អភិបាល​ខេត្ត​កោះ​កុង ​ព្រម​ទាំង​មេ​បញ្ជាការ​ មេ​បញ្ជាការ​រង​ និង​ប្រធាន​មន្ទីរ​ជុំ​វិញ​ខេត្ត​ និង​នាយ​ទាហាន ​នាយ​ទាហាន​រង​ជា​ច្រើន​រូប​ទៀត​។

    ជា​​កិច្ច​ចាប់​ផ្ដើម​ក្នុង​ឱកាស​នោះ​បន្ទាប់​ពី​ ឯកឧត្តម ​ឧត្តម​សេនីយ៍​ទោ ​សុខ​ សុវត្ត​ទុម ​មេ​បញ្ជា​ការ​ តំបន់​ប្រតិបត្តិការ​សឹក​រង​កោះ​កុង ​ឡើង​អាន​របាយ​ការណ៍ ​ស្វាគមន៍​ជូន​គណៈ​ធិបតី ​និង​អង្គ​ពិធី​ទាំង​មូល​រួច​មក​  លោក​វរសេនីយ៍​ឯក​ អ៊ុន​ ច័ន្ទ​មុណី ​នាយ​រង​សេនា​ធិការ ​តំបន់​ប្រតិបត្តិ​ការ​សឹក​រង​កោះ​កុង ​ឡើង​អាន​របាយ​ការណ៍​ បូក​សរុប​ការ​ងារ​យោធា​ប្រចាំ​ឆ្នាំ​២០១៨ ​ដោយ​បាន​លើក​ឡើង​ពី​លទ្ធផល​ការ​ងារ​ដែល​បញ្ជាការ​ដ្ឋាន​តំបន់​ប្រតិបត្តិការ​សឹក​រង​កោះ​កុង​ សំរេច​បាន​ក្នុង​ភារ​កិច្ច​ការ​ពារ​បូរណ​ភាព​ទឹក​ដី ​ការ​ពារ​សន្តិ​សុខ​ជូន​ប្រជា​ពល​រដ្ឋ​ និង​កសាង​អង្គភាព​។​

    បន្ទាប់​មក ​ឧត្តមសេនីយ៍​ត្រី ​កែវ​ វិចិត្រ​ មេ​បញ្ជាការ​រង​ និងជា​នាយ​សេនា​ធិការ ​តំបន់​ប្រតិបត្តិការ​សឹក​រង​ កោះ​កុង ​អាន​របាយ​ការណ៍​ ផ្សព្វផ្សាយ​ផែន​ការ​ សកម្មភាព​ការ​ងារ​យោធា​ឆ្នាំ​២០១៩​ ជូន​អង្គ​ពិធី​ផង​ដែល​។បន្ទាប់​មក​ទៀត ​លោក​វរសេនីយ៍​ទោ ​ងួន ​ធឿន ​នាយ​រង​សេនា​ធិការ ​តំបន់​ប្រតិបត្តិការ​សឹក​រង​កោះ​កុង​ ឡើង​អាន​របាយ​ការណ៍ ​បូក​សរុប​ការ​ងារ​ប្រឡង​ប្រណាំង​ឆ្នាំ​២០១៨ ​និង​ផ្សព្វ​ផ្សាយ​ការ​ងារ​ប្រឡង​ប្រណាំង​ឆ្នាំ​២០១៩​   និង​​បន្ទាប់​ពី​ លោក​វរសេនីយ៍​ឯក​ អ៊ុង ​វ៉ា​រី​ជាតិ ​មេ​បញ្ជាការ​រង​ តំបន់​ប្រតិបត្តិការ​សឹក​រង​កោះ​កុង ​អាន​សេចក្ដី​សម្រេច​ ស្តី​ការ​បំពាក់​គឿង​ឥស្សរិយ៍​យស ​ជូន​ប័ណ្ណ​សរសើរ ​និង​លិខិត​សរសើរ​ ដល់​កង​ឯក​ភាព​ ​និង​បុគ្គល​ដែល​មាន​ស្នា​ដៃ​ឆ្នើម ​ក្នុង​ការ​ងារ​ប្រឡង​ប្រណាំង ​រួច​មក ​លោក​ជំទាវ​ មិថុនា ​ភូ​ថង​ អភិ​បាល​បាន​ឡើង​មាន​មតិ​ចូល​រួម​សំណេះ​សំណាល​ ដល់​នាយ​ទាហាន ​នាយ​ទាហាន​រង​ ជា​ពិសេស ​នាយ​ទាហាន ​នាយ​ទាហាន​រង​ ជា​នារី​ត្រូវ​យក​ចិត្ត​ទុក​ដាក់​លើ​ការ​ងារ​យ៉ែន​ឌ័រ ​ដែល​ជា​ធន​ធាន​រួម​ចំណែក​ក្នុង​ការ​ងារ​សង្គម​ដ៏​សំខាន់ ​និង​​បាន​នាំ​យក​អំណោយ​មួយ​ចំនួន​ជូន​ដល់​យោធិន​ជា​នារី​ចំនួន​៣៥​នាក់​ ក្នុង​ម្នាក់​ៗ​ទទួល​បាន​ឃីត​១​កញ្ចាប់ ​មី​១​កេស ​ និង​ថវិកា​ចំនួន​៥០.០០០៛​ ដើម្បី​ចូល​រួម​អបអរ​សាទរ​ខួប​លើក​ទី​១០៨​ ទិវា​នារី​អន្ដរ​ជាតិ​៨​មីនា​ ​នា​ថ្ងៃ​ខាង​មុខ​ផង​ដែរ​។​

    ជា​ចុង​ក្រោយ​ ឯកឧត្តម​ បណ្ឌិត ​យឿន​សុខុន ​បាន​មាន​មតិ​សំណេះ​សំណាល ​ពាំ​នាំ​ការ​ផ្ដាំ​ផ្ញើ​សាក​សួរ​សុខ​ទុក្ខ​  ពី​ឯកឧត្តម​ មេ​បញ្ជាការ​កង​ទ័ព​ជើង​គោក ​ដែល​តែង​តែ​យក​ចិត្ត​ទុក​ដាក់ ​ដល់​នាយ​ទាហាន ​នាយ​ទាហាន​រង​ ក្នុង​កង​យោធពល​ខេមរ​ភូមិន្ទ ​ជា​ពិសេស ​នាយ​ទាហាន ​នាយ​ទាហាន​រង​ ដែល​ឈរ​ជើង​តាម​ខ្សែ​បន្ទាត់​ព្រំ​ដែន​ទិស​កោះ​កុង​។ ឯកឧត្តម​ បណ្ឌិត ​យឿន​សុខុន ​បាន​ក្រើន​រំលឹក ​ដល់​នាយ​ទាហាន ​នាយ​ទាហាន​រង​ និង​ពល​ទាហាន ​ត្រូវ​ចូល​រួម​ការ​ពារ​សុខ​សន្ដិភាព ​ការ​ពារ​រាជ​រដ្ឋាភិបាល​ស្រប​ច្បាប់​ ត្រូវ​បន្ដ​រក្សា​សុខ​សន្ដិភាព​តាម​បន្ទាត់​ព្រំ​ដែន ​បន្ដ​ពង្រឹង​ឃឿន​ការ​ងារ​ជាតិ​អោយ​បាន​រឹង​មាំ ​ចូល​រួម​ចលនា ​ភូមិ ​ឃុំ​មាន​សុវត្ថ​ភាព ​(​ជៀស​អោយ​ផុត​ពី​គឿង​ញៀន ​និង​ចូល​រួម​ការ​អភិវឌ្ឈន៍​ប្រទេស​ជាតិ​អោយ​មាន​ការ​រីក​ចំរើន​។ ជា​ចុង​បញ្ចាប់​ឯកឧត្តម​បាន​បំពាក់ ​នូវ​គឿង​ឥស្សរិយ៍​យស​ជូន​ដល់​ នាយ​ទាហាន ​ចំនួន​៣៧​នាក់​ ប្រគល់​ និង​ប័ណ្ណ​សរសើរ​ លិខិត​សរសើរ​ ចំនួន៣៣​សន្លឹក​  ក្នុង​នោះ​ផង​ដែល​ ឯកឧត្តម ​បាន​ផ្ដល់​នូវ​ថវិកា ​ចំនួន ​២.០០០.០០០៛ ​និង​គ្រឿង​ឧបភោគ ​បរិភោគ ​សំភារៈ​ប្រើ​ប្រាស់​មួយ​ចំនួន​ធំ​ទៀត​ ៕

អត្ថបទថ្មីៗ

សេចក្តីប្រកាស

សារជូនពរ

វីដេអូ