ព័ត៌មាន

ពិធីសម្តែងលំហាត់សំយោគអន្តរាវុធបញ្ចប់វគ្គរបស់និស្សិតនាយទាហានទ័ពជើងគោកជំនាន់ទី៧
នាយកដ្ឋានព័ត៌មាន(១)
441
783 រូបភាពឯកឧត្តម ហ៊ុន ម៉ាណែតក្នុងពិធីសម្តែងលំហាត់សំយោគអន្តរាវុធបញ្ចប់វគ្គរបស់និស្សិតនាយទាហានទ័ពជើងគោកជំនាន់ទី៧

នាព្រឹកថ្ងៃសុក្រទី១៥ ខែកុម្ភៈ ឆ្នាំ២០១៩ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានអញ្ជើញជាអធិបតី ក្នុងពិធីសម្តែងលំហាត់សំយោគអន្តរាវុធបញ្ចប់វគ្គរបស់និស្សិតនាយទាហានទ័ពជើងគោកជំនាន់ទី៧ នៅវិទ្យាស្ថានទ័ពជើងគោក។ក្នុងឱកាសនោះ ឯកឧត្តម ឧត្តមសេនីយ៍ឯក ហ៊ុន ម៉ាណែត បានមានប្រសាសន៍ទៅកាន់ប្អូនៗថាៈ ខ្ញុំសូមអបអរសាទរចំពោះលទ្ធផលរបស់ប្អូនៗ និស្សិតនាយទាហានទាំងអស់ និងសូមថ្លែងការកោតសរសើរផងដែរចំពោះយោធាចារ្យ គណ:គ្រប់គ្រងវគ្គ គណៈគ្រប់គ្រងសាលា និងបុគ្គលិកគ្រប់ថ្នាក់ទាំងអស់ ដែលបានបណ្ដុះបណ្ដាលធនធានសម្រាប់កងទ័ពរបស់យើង តាំងពីប្អូនៗមិនទាន់ដឹងអ្វីទាំងអស់ពីកងទ័ព អោយក្លាយជានាយទាហានមានចំណេះដឹង មានសមត្ថភាពជំនាញ មានវិន័យសណ្ដាប់ធ្នាប់ ដែលនេះ គឺជាការអភិវឌ្ឍប្រកបដោយមោទនភាព។ឯកឧត្តម បានលើកឡើងថា សមត្ថភាពទាំងអស់នេះ គឺជាសមត្ថភាពមូលដ្ឋានគ្រឹះ  ដើម្បីចែករំលែក និងបំពេញបន្ថែមនៅពេលដែលយើងចេញទៅអនុវត្ត។   នេះគឺជាគោលការណ៍សំខាន់ណាស់សម្រាប់ការបណ្ដុះបណ្ដាលកងទ័ពប្រកបដោយមោទនភាព។  ឯកឧត្តម ក៏សូមថ្លែងអំណរគុណដល់រដ្ឋាភិបាល និងកងទ័ពប្រជាជនចិន ដែលជានិច្ចកាលតែងតែជួយបណ្ដុះបណ្ដាល កសាងហេដ្ឋារចនាសម្ព័ន្ធផ្សេងៗរបស់សាលា ជាពិសេសផ្តល់លទ្ធភាពឲ្យប្អូនៗបានចេញទៅបំប៉នបន្ថែមនៅប្រទេសចិនតាមជំនាញរបស់ខ្លួន និងសូមបន្តការជួយឧបត្ថម្ភនេះ តទៅទៀត ដោយសង្ឃឹមថាភាគីចិននឹងជួយកាន់តែច្រើនទៀត។ឯកឧត្តម បានបន្តថា ការកសាងសមត្ថភាពនេះ គឺជាការងារចាំបាច់សំខាន់សម្រាប់កងទ័ពរបស់យើង ដើម្បីបង្កើនភាពក្លាហាន និងភាពម្ចាស់ការរបស់យើងក្នុងការការពារទឹកដី ដែលនេះគឺជាភារកិច្ចសំខាន់បំផុតនៅក្នុងនាមជាកងទ័ព។ ការកសាងកម្លាំងធនធានរបស់យើង ដើម្បីពង្រឹងវិស័យការពារជាតិ ធានាសម្រាប់កម្លាំងបន្តវេនដែលជាកម្លាំងចាំបាច់ក្នុងការដឹកនាំ និងជាឆ្អឹងខ្នងនៅក្នុងវិស័យការពារជាតិ។មេបញ្ជាការកងទ័ពជើងគោក បានថ្លែងបន្តទៀតថា «កំណែទម្រង់ និងពង្រឹងកងទ័ព គឺដើម្បីជាតិយើងខ្លាំង យើងការពារជាតិយើង គ្មាននរណាការពារយើងទេ ពេលមានសភាពការណ៍ យើងត្រូវរៀនរស់ដោយខ្លួនឯង ការពារបូរណភាពទឹកដីត្រូវមាននាយទាហានដែលមានសមត្ថភាពដឹកនាំកងទ័ព ដែលនេះគឺជាការងារចាំបាច់។ ជំនាញយើង សព្វាវុធយើង ពេលខ្លះយើងប្រៀបធៀបទៅប្រទេសជិតខាងគេដើរមុនយើងខ្លះ ប៉ុន្តែកុំភ្លេចថា សម្ភារគ្រាន់តែជាឧបករណ៍បង្កើនប្រសិទ្ធិភាពប្រយុទ្ធទេ សំខាន់លើមនុស្សមានឆន្ទៈ ការទុកចិត្តលើខ្លួនឯង ក្នុងសមត្ថភាពប្រយុទ្ធ។ ដូច្នេះវាមិនសំខាន់លើសព្វាវុធនោះទេ វាសំខាន់លើឆន្ទៈប្រយុទ្ធ ព្រោះឆន្ទ:ធ្វើឲ្យយើងមានម្ចាស់ការរៀបចំប្រយុទ្ធ»។ឯកឧត្តម ហ៊ុន ម៉ាណែត បានប្រាប់ទៅកងទ័ពថា កងទ័ពត្រូវមានមានមោទនភាពជាតិខ្មែរ ការពារបូរណភាពទឹកដី មានជំហរនឹងនរច្បាស់លាស់ ជឿទុកចិត្តលើរាជរដ្ឋាភិបាល និងត្រូវការពារ ជាតិ សាសនា ព្រះមហាក្សត្រ ការពាររដ្ឋាភិបាលស្របច្បាប់ «ខ្ញុំជឿជាក់ថា ប្អូនៗមិនចង់ឃើញប្រទេសរបស់យើងហែកជាពីរជាបី កាប់សម្លាប់គ្នាផ្ទៃក្នុងដូចពីអតីតកាលនោះទេ។ ដូច្នេះ គោលដៅធំរបស់យើង ត្រូវការពារសុខសន្តិភាព ការពារស្ថិរភាព ដើម្បីសេចក្តីសុខប្រជាពលរដ្ឋ និងសម្រាប់ខ្មែរតែមួយ។ ប្រឆាំងជនណាដែលញុះញង់ ដើម្បីបម្រើនយោបាយណាមួយ ដែលនាំឲ្យបែកបាក់ផ្ទៃក្នុង និងប៉ុនប៉ងបំផ្លាញសុខសន្តិភាព សេចក្តីសុខរបស់ប្រជាពលរដ្ឋ»។ពាក់ព័ន្ធស្ថានភាព EBA វិញ ឯកឧត្តម ហ៊ុន ម៉ាណែត ក៏បានលើកឡើងផងដែរថា រាជរដ្ឋាភិបាលបានខិតខំបម្រើជាតិ កសាងប្រទេសឲ្យរីកចម្រើនបានប៉ុណ្ណេះ សេដ្ឋកិច្ចយើងរឹងមាំបានប៉ុណ្ណេះ យើងកុំព្រួយបារម្ភ អ្វីដែលសំខាន់យើងត្រូវម្ចាស់ការការពាររឹងមាំជាតិរបស់យើង គ្មានបរទេសណាមកធ្វើសេដ្ឋកិច្ចឲ្យយើងនោះទេ មានតែយើងអ្នកធ្វើសេដ្ឋកិច្ចខ្លួនឯង គ្មាននរណាមកការពារសុខសន្តិភាពឲ្យយើងនោះទេ មានតែយើងទេជាអ្នកការពារសុខសន្តិភាព គ្មាននរណាការពារច្បាប់យើងទេ មានតែយើងកាពារច្បាប់របស់យើង។ «ស្រុកខ្មែរយើងតាំងពីមានសង្គ្រាមបែកបាក់រហូត យើងខ្លាំងបានប៉ុណ្ណេះ ប្រជាពលរដ្ឋមានជីវភាពរឹងមាំប៉ុណ្ណេះ កងទ័ពរឹងមាំប៉ុណ្ណោះ យើងមិនត្រូវខ្លាចនោះទេ សំខាន់បំផុតជាតិរបស់យើង មិនឱនក្បាល យកកិត្តិយសជាតិ ឯករាជ្យជាតិលត់ជង្គង់ទៅឲ្យនរណាដើម្បីសុំអំណោយនោះទេ។ យើងរឹងមាំខ្លួនឯង ការពារជាតិខ្លួនឯង សេដ្ឋកិច្ចជាតិឯងរឹងមាំ។ EBA មិនធ្វើឲ្យយើងស្លាប់នោះទេ ប៉ុន្តែផ្ទុយទៅវិញធ្វើឲ្យយើងខ្លាំងរឹងមាំ ធ្វើឲ្យយើងម្ចាស់ការខ្លួនឯង កាន់តែស្គាល់ខ្លួនឯង កាន់តែពង្រឹងខ្លួនឯង ដើម្បីជាតិរស់ដោយខ្លួនឯង»។ជាចុងក្រោយ ឯកឧត្តម ក៏បានផ្តាំឲ្យប្អូនៗខិតខំតស៊ូ ប្រឹងប្រែង អត់ធ្មត់បន្តទៀតដើម្បីភាពជោគជ័យទាំងក្នុងសាលា និងនៅពេលអនាគត។ នេះគឺជាមោទនភាពណាស់ ដែលមាននាយទាហានប្រកបដោយសមត្ថភាព និងការប្រកួតប្រជែង មានឆន្ទ:និងកាន់តែមានតម្លៃសម្រាប់កងទ័ពរបស់យើង៕

អត្ថបទថ្មីៗ

សេចក្តីប្រកាស

សារជូនពរ

វីដេអូ