ព័ត៌មាន

ឯកឧត្តម​ ណឹម​ សុវត្ថិ​ ត្រួត​ពិនិត្យ​កិច្ច​ប្រជុំ​អាស៊ាន ​សម្រាប់​ផែន​ការ​ឆ្នាំ​២០២០​
នាយកដ្ឋានព័ត៌មាន(៣)
474
782 ឯកឧត្តម​ ណឹម​ សុវត្ថិ​ ត្រួត​ពិនិត្យ​កិច្ច​ប្រជុំ​អាស៊ាន ​សម្រាប់​ផែន​ការ​ឆ្នាំ​២០២០​

    នាយក​ដ្ឋាន​កិច្ច​ការ​អាស៊ាន ​នៃ​អគ្គ​នាយក​ដ្ឋាន​នយោបាយ ​និង​កិច្ច​ការ​បរទេស​ ក្រសួង​​ការ​ពារ​ជាតិ​ បាន​បើក​កិច្ច​ប្រជុំ​ត្រួត​ពិនិត្យ​កិច្ច​ប្រជុំ​អាស៊ាន ​វេទិកា​តំបន់​អាស៊ាន ​តាម​ស្ថាប័ន​​ជំនាញ ​សម្រាប់​រៀបចំ​ផែន​ការ ​ឆ្នាំ​២០២០ ​នៅ​ព្រឹក​ថ្ងៃ​ទី​១៣​ ខែ​កុម្ភៈ​នេះ ​ស្ថិត​ក្រោម​អធិបតី​ភាព ​ឯ.ឧ ​នាយ​ឧត្តមសេនីយ៍ ​ណឹម សុវត្ថិ អគ្គ​នាយក ​អគ្គនាយក​ដ្ឋាន​នយោបាយ ​និង​កិច្ច​ការ​បរទេស ​និង​​មា​ន​ការ​ចូល​រួម​ពី​នាយ​ទាហាន ​និង​មន្ត្រី​ជំនាញ​ធ្វើ​កិច្ច​ការ​អាស៊ាន​ផ្នែក​យោធា ​មក​ពី​​ស្ថាប័ន​នានា​​ជា​ច្រើន​រូប​ទៀត។

    កិច្ច​ប្រជុំ​នេះ ​បាន​ធ្វើ​ឡើង​ដើម្បី​ជូន​ដំណឹង​ដល់​ស្ថាប័ន​ជំនាញ​ក្នុង​ការ​ចំណាយ​សម្រាប់​​កិច្ច​​ប្រជុំ​​​អាស៊ាន​ វេទិ​កា​តំបន់​អាស៊ាន ​និង​កិច្ច​ប្រជុំ​សន្តិសុខ​ពាក់​ព័ន្ធ​ ក្នុង​ឆ្នាំ​២០១៨​កន្លង​ទៅ។​ ពិនិត្យ​លើ​​ចំនួន​ថវិកា​ដែល​ត្រូវ​ចំណាយ​សម្រាប់​កិច្ច​ប្រជុំ​ឆ្នាំ​២០១៩​នេះ ​ក៏​ដូច​ជា​បង្ហាញ​ជូន​អង្គភាព​​ជំនាញ ​អំពី​​របៀប​ទូទាត់​ថវិកា​បន្ទាន់​ពី​ការ​ចូល​រួម​ប្រជុំ​នៅ​ក្រៅ​ប្រទេស ​ដើម្បី​បាន​សម​ស្រប​តាម​​នីតិវិធី​​ទូ​ទាត់​​របស់​​នាយក​ដ្ឋាន​ហិរញ្ញវត្ថុ ​ក្រសួង​ការ​ពារ​ជាតិ​ និង​ធ្វើ​ការ​ផ្ទៀង​ផ្ទាត់​ចំនួន​កិច្ច​ប្រជុំ​អាស៊ាន​ វេទិកា​​អាស៊ាន ​និង​កិច្ច​ប្រជុំ​សន្តិសុខ​ពាក់​ព័ន្ធ​សម្រាប់​ឆ្នាំ​២០២០​ ជា​មួយ​បណ្តា​ជំនាញ​។

   ​ឯ.ឧ ​ឧត្តមសេនីយ៍​ឯ​ក ឡៃ ចិ​ន្តា អគ្គ​នាយក​រង​ អគ្គ​នាយក​ដ្ឋាន​នយោបាយ ​និង​កិច្ចកា​រ​បរទេស ​និង​ជា​នាយក​ នាយក​ដ្ឋាន​កិច្ច​ការ​អាស៊ាន ​បាន​ឲ្យ​ដឹង​ថា​៖ កិច្ច​ប្រជុំ​ក្នុង​ក្រប​ខណ្ឌ​អាស៊ាន​​យោធា ​វេទិកា​តំបន់​អាស៊ាន ​និង​វេទិកា​សន្តិសុខ​ពាក់​ព័ន្ធ​ តែង​តែ​មាន​ការ​កើន​ឡើង​​ជា​លំដាប់​​​ពី​​​១ឆ្នាំ​​​ទៅ​១​ឆ្នាំ។​ ពាន់​ព័ន្ធ​នឹង​កិច្ច​ប្រជុំ​នេះ ​តម្រូវ​ឲ្យ​នាយក​ដ្ឋាន​កិច្ច​ការ​អាស៊ាន​ ដែល​ជា​អង្គភាព​ស្នូល ​ត្រូវ​រៀបចំ​ធ្វើ​បច្ចុប្បន្ន​ភាព​ជា​ប្រចាំ​នូវ​ចំនួន​កិច្ច​ប្រជុំ​តាម​ក្រប​ខណ្ឌ​នីមួយៗ​ ដើម្បី​ងាយ​ស្រួល​រៀប​ចំ​​កញ្ចប់​​ថវិកា​ឲ្យ​សម​ស្រប​ទៅ​តាម​ចំនួន​កិច្ច​ប្រជុំ​ដែល​មាន​ ដោយ​អនុលោម​ទៅ​តាម​គម្រោង​​ផែន​ការ​​ថវិកា​​កម្ម​វិធី​របស់​រាជរដ្ឋា​ភិបាល។​ 

   ឯ.ឧ​ នាយ​ឧត្តមសេនីយ៍ ​ណឹម​ សុវត្ថិ​ បាន​មាន​ប្រសាសន៍​ក្នុង​ឱកាស​នោះ​ថា​៖ វិស័យ​​នយោបាយ ​សន្តិសុខ ​និង​យោធា ​មាន​វិវត្តន៍​ប្រែ​ប្រួល​ជា​ច្រើន​ និង​មមា​ញឹក​ផង​ដែ​រ ទាំង​ជាតិ​ តំបន់ ​និង​លើ​ពិភព​លោក​។ ​ប្រការ​នេះ​ធ្វើ​ឲ្យ​មន្ត្រី​ទទួល​បន្ទុក​កិច្ច​ការ​អាស៊ាន ​ត្រូវ​មាន​ការ​តាម​​ដាន​​​​ចាប់​​អារម្មរណ៍​​យ៉ាង​ច្រើន​ ដើម្បី​ឲ្យ​កិច្ច​ដំណើរ​ការ​ការ​ងារ​របស់​ខ្លួន​បាន​​ប្រព្រឹត្ត​ទៅ​​​ចំ​ទិស​ដៅ ​ហើយ​និង​​ស៊ី​ចង្វាក់​ ទៅ​នឹង​ការ​ប្រែ​ប្រួល​នៃ​សភាព​ការណ៍​វិវត្តន៍​ថ្មីៗ​ទាំង​អស់​នោះ។​ ក្នុង​នាម​អគ្គនាយក​ដ្ឋាន​​នយោបាយ ​និង​កិច្ចការ​បរទេស,​ ឯ.ឧ ​​ណឹម​ សុវត្ថិ​ បាន​សម្តែង​នូវ​ការ​កោត​សរសើ ​និង​វាយ​តម្លែ​ខ្ព​ស់ ចំពោះ​នាយក​ដ្ឋាន​កិច្ចការ​អាស៊ាន ​នាយ​ទាហាន ​និង​មន្ត្រី​ជំនាញ​កិច្ច​ការ​អាស៊ាន​ផ្នែក​យោធា ​នៃ​ខ.ភ.ម​ ដែល​បាន​ខិត​ខំ​ពុះ​ពារ​បំពេញ​តួនាទី​ភារកិច្ច​នៅ​ក្នង​រយៈ​ពេល​កន្លង​មក​នេះ ​ហើយ​សង្ឃឹម​ថា​ នឹង​ទទួល​បាន​ជោគ​ជ័យ​ជា​បន្ត​ទៀត​នៅ​ពេល​ខាង​មុខ​។​ ឯ.ឧ ​នាយ​ឧត្តមសេនីយ៍ ​បាន​បញ្ជាក់​ថា​៖ ក្រុម​ការ​ងារ​ជំនាញ ​និង​មន្ត្រី​យោធា​ផ្នែក​អាស៊ាន ​ត្រូវ​រៀន​សូត្រ​យល់​ដឹង​ឲ្យ​បាន​ច្បាស់​នូវ​គោល​ការណ៍​គោល​នយោ​បាយ​របស់​រាជ​រដ្ឋាភិបាល ​ក្រសួង​​ការ​ពារ​ជាតិ​ នយោ​បាយ​ឈ្នះៗ ​និង​អំពី​វិមាន​ឈ្នះ​ឈ្នះ​ ហើយ​សកម្ម​ក្នុង​ការ​ឆ្លើយ​បំភ្លឺ​បាន​ទាន់​ពេល​វេលា​​​នៅ​រាល់​វេទិកា​កិច្ច​ប្រជុំ​អន្តរ​ជាតិ​​ ដែល​ប៉ះ​ពាល់​កិត្តិស័ព្ទ​ កិត្តិនាម​របស់​ប្រទេស​ជាតិ​ និង​ខ.ភ.ម​ ៕

អត្ថបទថ្មីៗ

សេចក្តីប្រកាស

សារជូនពរ

វីដេអូ