ឯ.ឧ.ភួង ស៊ីផាន ប្រជុំជ្រើសរើសសិស្សនាយទាហានសកម្ម ជំនាន់ទី២១ - ព័ត៌មានក្នងស្រុក

ព័ត៌មាន

ឯ.ឧ.ភួង ស៊ីផាន ប្រជុំជ្រើសរើសសិស្សនាយទាហានសកម្ម ជំនាន់ទី២១

គណៈកម្មាធិការជ្រើសរើស និងត្រួតពិនិត្យលក្ខណៈសម្បត្តិសិក្ខាកាមមកបណ្តុះបណ្តាលនៅក្នុង និងក្រៅប្រទេសបានប្រជុំពិភាក្សាស្តីពីការជ្រើសរើសសិស្សនាយទាហានសកម្ម ជំនាន់ទី២១ នាយទាហានទ័ពជើងគោក ជំនាន់ទី៩ និងនាយទាហានបន្តវេន ជំនាន់ទី១០ សម្រាប់ឆ្នាំសិក្សា២០១៦-២០១៧ នៅរសៀលថ្ងៃទី១៥ ខែកញ្ញាម្សិលមិញនេះ ស្ថិតក្រោមអធិបតីភាព ឯ.ឧ នាយឧត្តមសេនីយ៍ ភួង ស៊ីផាន អនុរដ្ឋលេខាធិការ ក្រសួងការពារជាតិ ។
        នាយកដ្ឋានបុគ្គលិក ក្រសួងការពារជាតិ បានមានឲ្យដឹងថាការជ្រើសរើសសិស្ស និស្សិតចូលរួមបំរើក្នុងក្របខ័ណ្ឌនៃ ខ.ភ.ម ក្នុងឆ្នាំសិក្សា ២០១៦-២០១៧ ក៏ដូចបណ្តាការជ្រើសរើសនៅក្នុងបណ្តាឆ្នាំមុនៗដែរ សម្រាប់វគ្គនាយទាហានសកម្ម ជំនាន់ទី២១ មានចំនួន១២០នាក់, វគ្គនាយទាហានទ័ពជើងគោក ជំនាន់ទី៩ មានចំនួន២៥០នាក់ និងសម្រាប់វគ្គនាយទាហានបន្តវេន ជំនាន់ទី១០ មានចំនួន២៥០នាក់។ សិស្សនិស្សិតទាំងពីរភេទត្រូវមានអាយុចាប់ពី១៨ឆ្នាំ ដល់ ២៥ឆ្នាំ ដោយមានសញ្ញាប័ត្រមធ្យមសិក្សាទុតិយភូមិ ឬសញ្ញាប័ត្រប្រហាក់ប្រហែលឡើង ព្រមនិងមានកំពស់១ម៦០ សម្រាប់បុរស និងនារីមានកំពស់ ១ម៥០ ឡើងទៅ ។
         មានប្រសាសន៍នៅក្នុងកិច្ចប្រជុំនោះ ឯ.ឧ នាយឧត្តមសេនីយ៍ ភួង ស៊ីផាន បានលើកឡើងថាការជ្រើសរើសសិស្សនាយទាហានសកម្ម ជំនាន់ទី២១ នាយទាហានទ័ពជើងគោក ជំនាន់ទី៩ និងនាយទាហានបន្តវេន ជំនាន់ទី១០នេះ ក្រសួងការពារជាតិមានគោលបំណងសំខាន់ ដោយអនុវត្តតាមកម្មវិធីគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលនីតិកាលទី៥ ក្នុងកិច្ចការកសាងពង្រឹងខឿនការពារជាតិ ការពារបូរណភាពទឹកដីបានកាន់តែរឹងមាំឡើងថែមទៀត។ ឯ.ឧ អនុរដ្ឋលេខាធិការ បានបញ្ជាក់ថា៖ពីមួយឆ្នាំទៅមួយឆ្នាំនាយទាហានរបស់យើង មានវ័យកាន់តែចាស់មានអាយុត្រូវចូលនិវត្តន៍ជាបន្តបន្ទាប់ ដែលទាមទារឲ្យយើងត្រូវកសាងពង្រឹងនូវធនធានមនុស្ស នាយទាហានវ័យក្មេងនៅក្នុងជួរ ខ.ភ.ម ដែលចេញពីសិស្សនិស្សិតរបស់យើង ដើម្បីបន្តវេនចូលរួមក្នុងការការពារជាតិមាតុភូមិ និងអភិវឌ្ឍន៍ជាតិតទៅអនាគត។
       ក្នុងនាមប្រធានគណៈកម្មាធិការជ្រើសរើស ឯ.ឧ.ភួង ស៊ីផាន បានជំរុញ និងណែនាំដល់គណៈកម្មាធិការជ្រើសរើស ត្រូវយកចិត្តទុកដាក់ធ្វើការផ្សព្វផ្សាយឲ្យបានទូលំទូលាយ ដើម្បីឲ្យការជ្រើសរើសសិស្សនាយទាហានសកម្ម ជំនាន់ទី២១ នាយទាហានទ័ពជើងគោក ជំនាន់ទី៩ និងនាយទាហានបន្តវេន ជំនាន់ទី១០នេះទទួលបានគុណភាព និងប្រសិទ្ធិភាពខ្ពស់ តាមផែនការក្រសួងការពារជាតិចង់បាន ។
គួរបញ្ជាក់ថា ការជ្រើសរើសនេះ នឹងធ្វើការចែកពាក្យនឹងទទួលពាក្យសុំចុះឈ្មោះប្រឡងចាប់ផ្តើមពីថ្ងៃទី២៦ ខែកញ្ញា រហូតដល់ថ្ងៃទី២២ ខែវិច្ចិកា ឆ្នាំ២០១៦ នៅសាកលវិទ្យាល័យការពារជាតិ (ឬស្សីកែវ) និងនៅមណ្ឌលយោធភូមិភាគទី១, ២, ៣, ៤ និងយោធភូមិភាគទី៥ ។