ពិធីសម្ពោធដាក់ឲ្យប្រើប្រាស់អគារនៅទីបញ្ជាការដ្ឋានកងរាជអាវុធហត្ថលើផ្ទៃប្រទេស - ព័ត៌មានក្នងស្រុក

ព័ត៌មាន

ពិធីសម្ពោធដាក់ឲ្យប្រើប្រាស់អគារនៅទីបញ្ជាការដ្ឋានកងរាជអាវុធហត្ថលើផ្ទៃប្រទេស

សម្តេចតេជោ ហ៊ុន សែន នាយករដ្ឋមន្ត្រីបានដាក់បទបញ្ជមួយចំនួនបើកយុទ្ធនាការទ្រង់ទ្រាយធំដើម្បីពង្រឹងសន្តិសុខជាតិក្នុងក្របខណ្ឌទូទាំងប្រទេសឡើងវិញ។
ព្រឹកថ្ងៃទី១១កក្កដាក្នុងពិធីសម្ភោធដាក់ឲ្យប្រើប្រាស់អគារសេនាធិការដ្ឋាននិងសមិទ្ធិផលនានារបស់បញ្ជាការដ្ឋានកងរាជអាវុធហត្ថលើផ្ទៃប្រទេសដែលបានចំណាយថវិកាសាងសង់សរុបជាង៥លានដុល្លាអាមេរិកនោះ,សម្ដេចតេជោនាយករដ្ឋមន្ត្រីបានថ្លែងថា៖ដំណាក់កាលនេះជាដំណាក់កាលដែលយើងត្រូវតែចាត់វិធានការប្រឆាំងនឹងបទឧក្រិដ្ឋនានាព្រោះថាមួយរយៈចុងក្រោយនេះពិតមែនតែនៅក្នុងក្របខណ្ឌនៃទំនាក់ទំនងទៅតាមបណ្ដាព្រំដែនជាមួយប្រទេសជិតខាងមានសុវត្ថិភាពនិងទំនាក់ទំនងល្អប៉ុន្តែសន្តិសុខនៅខាងផ្ទៃក្នុងប្រទេសរបស់យើងមានបញ្ហា,ដែលប៉ះទៅលើប្រជាពលរដ្ឋស្លូតត្រង់,ប៉ះទៅលើអ្នកនយោបាយ,ប៉ះទៅលើអ្នកធ្វើធុរកិច្ចរហូតប៉ះទៅដល់សមត្ថកិច្ចខ្លួនឯងក៏ត្រូវគេសម្លាប់ ។
សម្ដេចតេជោលើកឡើងថា៖ម្សិលមិញនេះមានរឿងអកុសលដែលបានកើតឡើងពាក់ព័ន្ធជាមួយនឹងការបាញ់ប្រហារយ៉ាងឃោរឃៅព្រៃផ្សៃពីឃាតករចំពោះលោកបណ្ឌិតកែម ឡី,នេះគឺជាលើកទី២ហើយដែលយើងបានជួបប្រទះនូវស្ថានភាពបែបនេះលើកទី១គឺលោកឧកញ៉ាអ៊ឹង ម៉េងជឺ,ឯលើកទីពីរកាលពីម្សិលមិញគឺលោកបណ្ឌិតកែម ឡីដែលជាអ្នកវិភាគដ៏ល្បីល្បាញមួយរូប។ក្នុងនាមរាជរដ្ឋាភិបាលនិងក្នុងនាមសម្ដេចផ្ទាល់,សម្ដេចតេជោបានចូលរួមមរណទុក្ខជាមួយគ្រួសារសពក៏ដូចជាការសោកស្ដាយនិងថ្កោលទោសយ៉ាងម៉ឺងម៉ាត់ចំពោះអំពើព្រៃផ្សៃនេះហើយសម្ដេចបានចេញបទបញ្ជាឱ្យអាជ្ញាធរមានសមត្ថកិច្ចស្វែងរកនូវជនដៃដល់និងជនឃុបឃិតទាំងឡាយដើម្បីផ្ដន្ទាទោសតាមច្បាប់។
ក្នុងនេះដែរសម្ដេចតេជោបានអំពាវនាវឱ្យប្រជាពលរដ្ឋរក្សាភាពស្ងប់ស្ងៀមនិងទុកលទ្ធភាពឱ្យក្រសួងមានសមត្ថកិច្ច,ស្ថាប័នមានសមត្ថកិច្ចធ្វើការឱ្យពេញលេញ។ក្នុងនេះដែរសម្ដេចលើកឡើងថា៖តើអ្នកណានឹងទទួលផលចំណេញពីសោកនាដកម្មដែលបានកើតឡើងនេះហើយអ្នកណាទទួលផលខាត?,សម្ដេចតេជោសង្កត់ធ្ងន់ថា៖រាជរដ្ឋាភិបាលគឺពិតជាទទួលផលប៉ះពាល់យ៉ាងធ្ងន់ធ្ងរចំពោះមុខមាត់អំពីកង្វះខាតដែលម្ខាងគឺអសមត្ថភាពក្នុងការការពារសន្តិសុខសម្រាប់ប្រជាពលរដ្ឋតែម្ខាងទៀតត្រូវបានគេលាបពណ៌ភ្លាមៗអំពីបញ្ហានេះដែលមានចរិតជាបញ្ហាខាងនយោបាយដូច្នេះសង្ឃឹមថាប្រជាពលរដ្ឋនឹងទុកលទ្ធភាពឱ្យក្រសួងមានសមត្ថកិច្ចស្ថាប័នមានសមត្ថកិច្ចធ្វើកិច្ចការរបស់គេដោយត្រឹមត្រូវម៉ត់ចត់ហើយដែលចៀសវាងបង្វែរបញ្ហាពីសោកនាដកម្មមួយនេះទៅជាបញ្ហាខាងនយោបាយដែលនាំឱ្យល្អក់កករទៅដល់សភាពការណ៍របស់ប្រទេសយើង។សម្ដេចតេជោក៏សង្ឃឹមផងដែរថាអ្នកនយោបាយផ្សេងទៀតនឹងមិនប្រើប្រាស់បញ្ហានេះធ្វើជាបញ្ហានយោបាយអុចអាលដែលនាំឱ្យទៅជាចលាចលនោះទេ។សម្ដេចបន្ថែមថា រឿងទាំងអស់នៅប្រទេសរបស់យើងងាយណាស់ក្នុងការប្រែពណ៌ពីឧក្រិដ្ឋកម្មទៅជារឿងនយោបាយសម្ដេចសង្ឃឹមថាប្រជាពលរដ្ឋនឹងមិនប្រែក្លាយបញ្ហាឧក្រិដ្ឋកម្មបែបនេះទៅជារឿងនយោបាយនោះទេ,ចំណែកសមត្ថកិច្ចត្រូវតែខិតខំធ្វើកិច្ចការងារនេះឱ្យអស់ពីដៃពីជើងដើម្បីទទួលបាននូវសុខសុវត្ថិភាពរបស់ប្រជាជន ។
ចំពោះបទបញ្ជាដែលសម្ដេចតេជោបានដាក់ចេញសម្រាប់ការបើកយុទ្ធនាការទ្រង់ទ្រាយធំដើម្បីពង្រឹងសន្តិសុខជាតិក្នុងក្របខណ្ឌទូទាំងប្រទេសឡើងវិញនោះចំណុចទី១សម្ដេចលើកឡើងថា៖ទាមទារនូវការចាត់វិធានការគឺការប្រឆាំងនឹងឃាតកម្មការប្លន់ប្រដាប់អាវុធនិងត្រូវការពារប្រជាជនគ្រប់រូបមិនថាអ្នកនយោបាយធុរជនឬប្រជាជននោះទេ។ពិតមែនតែកន្លងទៅបញ្ហាអសន្តិសុខបានកើតឡើងនៅស្ទើរគ្រប់ទីកន្លែងទាំងនៅកណ្ដាលទីក្រុងនៃប្រទេសនានាក៏ដោយប៉ុន្តែសម្ដេចតេជោបញ្ជាក់ថា៖យើងមិនត្រូវយកបញ្ហាដែលកើតនៅប្រទេសរបស់គេ មកបិទបាំងនូវភាពទន់ខ្សោយនៃប្រតិបត្តិការរក្សាសន្តិសុខនៅក្នុងប្រទេសរបស់យើងទេដូច្នេះយើងត្រូវចាត់គ្រប់វិធានការទាំងអស់ដើម្បីបំបាត់ចោលនូវឃាតកម្មការប្លន់ប្រដាប់អាវុធនិងរូបភាពដទៃទៀត,ដូច្នេះយើងត្រូវរៀបចំផែនការជាកញ្ចប់ដើម្បីដោះស្រាយបញ្ហាឧក្រិដ្ឋកម្មនៅក្នុងប្រទេសរបស់យើង។
ក្នុងចំណុចទី២សម្ដេចអំពាវនាវឱ្យចូលរួមគ្រប់តួអង្គពាក់ព័ន្ធជាពិសេសគឺប្រជាពលរដ្ឋ អ្នកប្រើប្រាស់ខ្លួនឯងតែម្ដងដើម្បីទប់ស្កាត់បញ្ហាគ្រឿងញៀន ដែលជាបញ្ហា កាន់តែធ្ងន់ធ្ងរទៅៗនៅក្នុងប្រទេសហើយដែលបញ្ហាគ្រឿងញៀននេះក៏ជាហេតុនាំឱ្យកើតបញ្ហាឃាតកម្មនិងឧក្រិដ្ឋកម្មផ្សេងៗនោះ ។
ចំណុចទី៣នៃបញ្ជាសម្ដេចតេជោបានបញ្ជាថាត្រូវគ្រប់គ្រងអាវុធជាតិផ្ទុះឱ្យបានម៉ត់ចត់ទាំងនៅតាមអង្គភាពនិងនៅតាមឃ្លាំងនានាហើយក៏ត្រូវរកវិធីកុំឱ្យអាវុធជាតិផ្ទុះអាចធ្វើចរាចរឆ្លងកាត់នៅក្នុងប្រទេសកម្ពុជាផងដែរ ។
ក្នុងនេះដែរព្រមជាមួយការអបអរសាទរចំពោះការរីកលូតលាស់នៃកម្លាំងកងរាជអាវុធហត្ថលើផ្ទៃប្រទេសដែលមានអាយុកាល២៣ឆ្នាំនោះសម្ដេចតេជោនាយករដ្ឋមន្ត្រីបានអរគុណចំពោះប្រិយមិត្តបរទេសដែលបានចូលរួមចំណែកនៅក្នុងការកសាងកងរាជអាវុធហត្ថនិងជួយដល់កងរាជអាវុធហត្ថរបស់កម្ពុជាហើយសម្ដេចសង្ឃឹមថាសប្បុរសជននិងប្រិយមិត្តបរទេសនឹងចូលរួមចំណែកថែមទៀតដើម្បីបំពាក់សម្ភារៈបច្ចេកទេសជាពិសេសលើផ្នែកប្រព័ន្ធបច្ចេកវិទ្យាឱ្យកាន់តែទំនើបនិងទាន់សម័យដើម្បីកងរាជអាវុធហត្ថ ប្រតិបត្តិការទាន់ហេតុការណ៍ក៏ដូចជាធ្វើទំនើបកម្មថែមទៀតនៃសកម្មភាពរបស់កងរាជអាវុធហត្ថលើផ្ទៃប្រទេស ៕