នាយឧត្តមសេនីយ៏មាស.សាវ៉ននាំយកប្រាក់បេឡាមរណៈសង្គ្រោះបើកជូនគ្រួសារសពអតីតយុទ្ធជន១០គ្រួសារនៅខេត្តកំពង់ឆ្នាំង - ព័ត៌មានក្នងស្រុក

ព័ត៌មាន

នាយឧត្តមសេនីយ៏មាស.សាវ៉ននាំយកប្រាក់បេឡាមរណៈសង្គ្រោះបើកជូនគ្រួសារសពអតីតយុទ្ធជន១០គ្រួសារនៅខេត្តកំពង់ឆ្នាំង

គ្រួសារសពនៃសមាជិកសមាគមអតីតយុទ្ធជនចំនួន១០គ្រួសារនៅខេត្តកំពង់ឆ្នាំងទទួលបានការបើកប្រាក់ឧបត្ថម្ភពីបេឡាសង្គ្រោះរបស់សមាគមអតីតយុទ្ធជនកម្ពុជា តាមរយៈនាយឧត្តមសេនីយ៏មាស.សាវ៉នអគ្គលេខាធិការរងសមាគមអតីតយុទ្ធជនកម្ពុជាកាលពីព្រឹកថ្ងៃទី៧ខែកក្កដាឆ្នាំ២០១៦នេះ។វត្តមានអមដំណើរនាឱកាសនោះដែរមាន ប្រធានលេខាធិការសមាគមប្រធាននិងអនុប្រធានគណៈជំនាញហិរញ្ញវត្ថុ អនុប្រធានគណៈជំនាញផ្សព្វផ្សាយឃោសនាអប់រំប្រធានអនុប្រធានសមាគមខេត្តកំពង់ឆ្នាំង ព្រមទាំងមន្រ្តីពាក់ព័ន្ធមួយចំនួនទៀត។
តាមសេចក្តីរាយការណ៏របស់សមាគមខេត្តកំពង់ឆ្នាំងបានឲ្យដឹងថា៖គិតចាប់ពីថ្ងៃទី១៣ខែកញ្ញាដល់ថ្ងៃទី១៦ខែតុលាឆ្នាំ២០១៥សមាគមអតីតយុទ្ធជនកម្ពុជាបានបើកផ្តល់រួចហើយ នូវចំនួនសព១២៥សពដោយសរុបថវិកាអស់ចំនួនប្រាំរយលានរៀលជាថវិកាបានមកពីការជួយឧបត្ថម្ភរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា និង ជាប្រធានសមាគមអតីតយុទ្ធជនកម្ពុជានិងមួយផ្នែកទៀតជាថវិកាបានមកពីការជួយឧបត្ថម្ភ របស់សប្បុរសជននានា។ ដោយឡែកសពសមាជិកដែលត្រូវប្រគល់ជូននាពេលនេះមានចំនួន១០សពក្នុងនោះមាន៧សពស្ថិតនៅស្រុកកំពង់ត្រឡាចនិង៣សពទៀតស្ថិតនៅស្រុកសាមគ្គីមានជ័យ សរុបថវិកាចំនួន៤០លានរៀល។ជាមួយនោះសមាគមអតីតយុទ្ធជនខេត្តកំពង់ឆ្នាំងបានឧបត្ថម្ភបន្ថែមអង្ករចំនួន២៥គ.កនិងមី១កេស សម្រាប់គ្រួសារនីមួយៗផងដែរ។
មានប្រសាសន៏ក្នុងឱកាសនោះនាយឧត្តមសេនីយ៏មាស សាវ៉នបានគូសបញ្ជាក់ថាប្រាក់បេឡាមរណៈសង្គ្រោះរបស់សមាគមអតីតយុទ្ធជនកម្ពុជាដែលត្រូវបើកជូននាពេលនេះគឺ អនុវត្តន៏តាមលក្ខ័ន្តិកៈលេខ០០៤ស.អ.កចុះថ្ងៃទី២០ខែមិថុនាឆ្នាំ២០១០ដោយក្នុងមួយ គ្រួសារទទួលបានប្រាក់ឧបត្ថម្ភចំនួន៤លានរៀល។នាយឧត្តមសេនីយ៏មាស សាវ៉នបន្តថា ក្រោយពីមហាសន្និបាទតំណាងទូទាំងប្រទេសអាណត្តិទី២សម្តេចអគ្គមហាសេនាបតីតេជោ ហ៊ុន សែន បានកែសម្រួលរចនាសម្ពន្ធ័សមាគមអតីតយុទ្ធជនកម្ពុជាពីថ្នាក់កណ្តាល រាជធានី ខេត្ត ក្រុង ស្រុក រហូតថ្នាក់ ឃុំ សង្កាត់ ដើម្បីពង្រឹងយន្តការនៃការដឹកនាំឲ្យកាន់តែមានប្រសិទ្ធិភាពឆ្លើយតបឲ្យបានទាន់ពេលវេលា នូវសេចក្តីត្រូវការរបស់សមាជិកសមាគមអតីតយុទ្ធជននិងគ្រួសារអតីតយុទ្ធជនដើម្បីរួមចំណែកកាត់បន្ថយភាពក្រីក្ររបស់ប្រជាពលរដ្ឋស្របតាម គោលនយោបាយរបស់រាជរដ្ឋាភិបាលកម្ពុជា។ដោយផ្អែកតាមស្មារតីមហាសន្និបាទលើកទី២នាយឧត្តមសេនីយ៏មាស សាវ៉ន បានជម្រុញឲ្យសមាគមអតីតយុទ្ធជនកម្ពុជាខេត្តកំពង់ឆ្នាំង ត្រូវមានទិសដៅជាយុទ្ធសាស្រ្តបន្តស្រង់សិ្ថត្តិមុខសញ្ញាអតីតយុទ្ធជនប្រចាំខែដើម្បីដកប្រាក់ភាគទាននិង មរណៈសង្គ្រោះជូនបេឡាជាតិ អតីតយុទ្ធជនបានទាន់ពេលវេលា។និងម្យ៉ាងវិញទៀតសមាគមអតីតយុទ្ធជនកម្ពុជាខេត្តត្រូវរៀបចំឯកសារស្រង់ទិន្នន័យស្ថានភាព អតីតយុទ្ធជននៅតាមមូលដ្ឋានភូមិឃុំដើម្បីរៀបចំបញ្ជីឈ្មោះអតីតយុទ្ធជនទាំងនោះឲ្យមានមូលដ្ឋានគ្រប់គ្រងច្បាស់លាស់៕