នាយឧត្តមសេនីយ៍ មាស សុភា បើកកិច្ចប្រជុំបូកសរុបលទ្ធផលនៃកិច្ចសហប្រតិបត្តិការការពារព្រំដែនឆ្នាំ២០១៥.២០១៦ និងដាក់ទិសដៅអនុវត្តបន្តសំរាប់ឆ្នាំ២០១៧ រវាងបញ្ជាការដ្ឋាន កងទ័ពជើងគោកនៃខ ភ ម ជាមួយបញ្ជាការដ្ឋានកងទ័ពការពារព្រំដែនវៀតណាម - ព័ត៌មានក្នងស្រុក

ព័ត៌មាន

នាយឧត្តមសេនីយ៍ មាស សុភា បើកកិច្ចប្រជុំបូកសរុបលទ្ធផលនៃកិច្ចសហប្រតិបត្តិការការពារព្រំដែនឆ្នាំ២០១៥.២០១៦ និងដាក់ទិសដៅអនុវត្តបន្តសំរាប់ឆ្នាំ២០១៧ រវាងបញ្ជាការដ្ឋាន កងទ័ពជើងគោកនៃខ ភ ម ជាមួយបញ្ជាការដ្ឋានកងទ័ពការពារព្រំដែនវៀតណាម

នៅសណ្ឋាការភ្នំពេញនារសៀលថ្ងៃទ២៨មិថុនាឆ្នាំ២០១៦នេះមានបើកកិច្ចប្រជុំបូកសរុបលទ្ធផលស្តីពីកិច្ចសហប្រតិបត្តិការការពារព្រំដែនប្រចាំឆ្នាំ២០១៥.២០១៦និងទិសដៅបន្តឆ្នាំ២០១៧រវាងបញ្ជាការដ្ឋានកងទ័ពជើងគោកនៃ ខ.ភ.ម ជាមួយនឹងបញ្ជាការដ្ឋានកងទ័ពការពារព្រំដែន នៃកងទ័ពប្រជាជនវៀតណាម ដែលពិធីនេះបានប្រព្រឹត្តិទៅស្ថិតក្រោមអធិបតីភាពឯកឧត្តមនាយឧត្តមសេនីយ៍ មាស សុភា អគ្គមេបញ្ជាការរងនិងជាមេបញ្ជាការកងទ័ពជើងគោកនៃ ខ ភ ម និងឯកឧត្តមឧត្តមសេនីយ៍ទោ ហ្វាង សួនជៀន សមាជិកគណៈកម្មាធិការមជ្ឈឹមបក្សកុម្មុនីសវៀតណាមនិងជាមេបញ្ជាការបញ្ជាការដ្ឋានកងទ័ពការពារព្រំដែនកងទ័ពប្រជាជនវៀតណាម។
អញ្ជើញចូលរួមក្នុងកិច្ចប្រជុំនាពេលនោះគេសង្កេតឃើញមានភាគីកម្ពុជា មានឯកឧត្តមអស់លោកជា មេបញ្ជាការរងកងទ័ពជើងគោក ឯកឧត្តមអស់លោកជាមេបញ្ជាការ មេបញ្ជាការងយោធភូមិភាគទី១ ទី២ ទី៣ យោធភូមិភាគពិសេស និងបណ្តាខេត្តមួយចំនួនទៀតចំណុះឲ្យកងទ័ពជើងគោគនៃ ខ ភ ម ក្នុងការបូកសរុបលទ្ធផលការងារនៃកិច្ចសហប្រតិបត្តិការទៅតាមកិច្ចព្រមព្រៀងរវាងក្រសួងការពារជាតិនៃប្រទេសទាំងពីរកម្ពុជានិងវៀតណាម ។ គួរបញ្ជាក់ថាៈ កិច្ចប្រជុំទ្វេភាគីដែលរៀបចំឡើងដោយបញ្ជាការដ្ឋានកងទ័ពជើងគោកសំរាប់ឆ្នាំនេះគឺដើម្បីបូកសរុបលទ្ធផលកិច្ចសហប្រតិបត្តិការឆ្នាំ២០១៥ ២០១៦ និងដាក់នូវទិសដៅ សំរាប់អនុវត្តន៍បន្តឆ្នាំ២០១៧រវាងកងទ័ពនៃប្រទេសទាំងពីរ កម្ពុជា វៀតណាម ពិសេសរវាងអង្គភាពកងការពារព្រំដែនគោក កងទ័ពជើងគោកនៃ ខ ភ ម និងបញ្ជាការដ្ឋានកងទ័ពការពារព្រំដែនកងទ័ពប្រជាជនវៀតណាម និងបណ្តាអង្គភាពពាក់ព័ន្ធរបស់ ខ ភ ម ថាតើក្នុងបណ្តាឆ្នាំកន្លងមកនេះ ភាគីនៃស្ថាប័ន្តកងទ័ពប្រទេសទាំងពីរបានបំពេញតួនាទីភារកិច្ចនៃកិច្ចសហប្រតិបត្តិការរវាងកងទ័ព ប្រទេសទាំងពីរស្របទៅតាមកិច្ចព្រមព្រៀង មានការរីកចម្រើនបានដល់កំរិតណា ហើយនូវមានអ្វីដែលជាចំណុចខ្វះខាតដែលត្រូវបំពេញសំរាប់ឆ្នាំខាងមុខទៀត។
កិច្ចប្រជុំក៍បានពិភាក្សាផ្លាស់ប្តូរយោបល់គ្នាទៅវិញទៅមកយ៉ាងល្អិនល្អន់ ដោយផ្តោតយ៉ាងសំខាន់ទៅលើ កិច្ចសហប្រតិបត្តិការ ធ្វើយ៉ាងណាបង្កើនសកម្មភាពក្នុងការពង្រឹងពង្រីកទំនាក់ទំនងឲ្យកាន់តែជិតស្និទ្ធរវាងកងទ័ពទាំពីរកម្ពុជា វៀតណាម ក្នុងការរួមគ្នាកសាងតំបន់ព្រំដែននៃប្រទេសទាំងពីរឲ្យក្លាយជាព្រំដែនសន្តិភាព និងមានការអភិវឌ្ឍន៍រីកចម្រើន ។ ឯកឧត្តមឧត្តមសេនីយ៍ទោ ហ្វាង សួនជៀន មេបញ្ជាការបញ្ជាការដ្ឋានកងទ័ពការពារព្រំដែនកងទ័ពប្រជាជនវៀតណាមបានមានប្រសាសន៍ក្នុងកិច្ចប្រជុំដោយបានគូសបញ្ជាក់អំពីកិច្ចសហប្រតិបត្តិការដ៍ល្អរវាងកងទ័ពទាំងពីរវៀតណាម កម្ពុជា ក្នុងការរួមគ្នាកសាងនូវចំណងសាមគ្គីភាព មិត្តភាពនិងកិច្ចសហប្រតិបត្តិការរបស់កងទ័ពប្រទេសទាំងពីរ ពិសេសរវាងបញ្ជាការដ្ឋានកងទ័ពការពារព្រំដែនកងទ័ពប្រជាជនវៀតណាមជាមួយនិងកងកម្លាំងការពារព្រំដែននៃបញ្ជាការដ្ឋានកងទ័ពជើងគោគនៃ ខ ភ ម ដែលរហូតមកដល់ពេលនេះភាគីយើងទាំងពីរបានអនុវត្តទទួលលទ្ធផលយ៉ាងល្អប្រសើរ ។ ឯកឧត្តមឧត្តមសេនីយ៍ទោ ហ្វាង សួនជៀន បានគូសបញ្ជាក់ទៀតថាៈ ក្នុងឆ្នាំ២០១៥ ២០១៦នេះភាគីយើងទាំងពីរបានអនុវត្តយ៉ាងល្អទៅតាមកិច្ចព្រមព្រៀងនៃអនុសារណៈរបស់រដ្ឋាភិបាលយើងទាំងពីរ ក្រសួងការពារជាតិវៀតណាមនិងកម្ពុជា បញ្ជាការដ្ឋានកងទ័ពការពារព្រំដែនកងទ័ពប្រជាជនវៀតណាម បានចុះហត្ថលេខាលើកំណត់ហេតុទទួលយកអង្គភាពកងការពារព្រំដែនកងទ័ពជើងគោកនៃ ខ ភ ម និងបណ្តាយោធភូមិភាគ នៃ ខ ភ ម កម្ពុជា ក្នុងការជួយឧបត្ថម្ភគ្នាដោយបានផ្លាស់ប្តូរប្រតិភូគ្នាគ្រប់លំដាប់ថ្នាក់របស់យោធភូមិភាគនិងខេត្តក្រុងរបស់វៀតណាមក្នុងការចងសម្ព័ន្ធមេត្រីភាពជាមួយបណ្តា អង្គភាពមួយចំនួនរបស់កម្ពុជា តាមរយៈនៃការផ្លាស់ប្តូរទស្សនកិច្ចគ្នាទៅវិញទៅមកប្រកបដោយភាពផ្លែផ្កាតាមលក្ខ័ន្ត លក្ខណៈប្រវត្តិសាស្ត្រ ត្រូវបានបន្តពង្រឹងពង្រីកបានយ៉ាងល្អក្នុងការរក្សាបាននូវព្រំដែនសន្តិភាព មិត្តភាពស្ថេរភាព កិច្ចសហប្រតិបត្តិការនិងការអភិវឌ្ឍន៍តំបន់ព្រំដែនរីកចម្រើន ។ ភាគីទាំងពីរបានបង្កើនកិច្ចសហការរវាងកម្លាំងទាំងពីរភាគីរបស់ខ្លួនក្នុងការក្តាប់នូវរាល់សភាពការណ៍ ផ្លាស់ប្តូរមតិយោបល់ ដោះស្រាយវីន្និឆ័យនិងផ្តល់ពត៌មានពីគ្នាទៅវិញទៅមកក្នុងការប្រឆាំងគ្រប់បទល្មើសជ្រៀតចូលព្រំដែន ការឆ្លងដែនខុសច្បាប់ ការជួញដូគ្រឿងញៀននិងបទល្មើសផ្សេងៗទៀត ដោយយើងរក្សាបាននិងរួមគ្នាបង្ក្រាបបានយ៉ាងទាន់ពេលវេលា ។ជាងនេះទៀតភាគីទាំងពីរបានបង្កើនសកម្មភាពក្នុងការល្បាតរួមដើម្បីទប់ស្កាត់ បានទាន់ពេលវេលានូវគ្រប់ករណីដែលកើតមានឡើងពាក់ព័ន្ធដល់សន្តិសុខតាមព្រំដែនគោកព្រំដែនសមុទ្រ ដើម្បីបង្កគ្រប់លក្ខណសម្បត្តិដល់ការប្រកបរបររកស៊ីនៃប្រជាជនប្រទេសយើងទាំងពីរឲ្យមានលក្ខណៈល្អប្រសើរ ។
ឯកឧត្តមមេបញ្ជាការកងទ័ពការពារព្រំដែនវៀតណាមក៍បានថ្លែងនូវការអរគុណចំពោះភាគីកម្ពុជាដែលក្នុងរយៈកាលកន្លងមកបានបង្កើនកិច្ចសហការក្នុងការជួយរុករកនូវអដ្ឋិធាតុទាហានបាត់ខ្លួនវៀតណាមនៅកម្ពុជាបានធ្វើមាតុភូមិនិវត្តន៍មកវៀតណាមវិញ ។ ឯកឧត្តមនាយឧត្តមសេនីយ៍ មាស សុភា ជំនួសមុខឲ្យប្រមុខរាជរដ្ឋាភិបាល ក្រសួងការពារជាតិ អគ្គមេបញ្ជាការនៃ ខ ភ ម ពិសេសកងទ័ពជើងគោកបានសំដែងនូវការអរគុណយ៉ាងជ្រាលជ្រៅចំពោះឯកឧត្តមមេបញ្ជាការកងទ័ពការពារព្រំដែនកងទ័ពប្រជាជនវៀតណាមចំពោះការជួយឧបត្ថម្ភទាំងស្មារតីនិងសំភារៈ ថវិកាពីភាគីមិត្តដល់ ខ ភ ម ពិសេសដល់បញ្ជាការដ្ឋានកងទ័ពជើងគោកកម្ពុជារហូតមក ។ ឯកឧត្តម មាស សុភា បានបញ្ជាក់ជូនក្នុងកិច្ចប្រជុំថាៈ ឯកឧត្តមឯកភាពចំពោះលើខ្លឹមសាររបាយការណ៍និងកំណត់ហេតុរួមទាំងការលើកឡើងវាយតំលៃចំពោះការសន្និដ្ឋានសភាពការណ៍របស់ភាគីមេបញ្ជាការកងទ័ពការពារព្រំដែនវៀតណាម ហើយភាគីកម្ពុជានឹងបន្តបង្កើនកិច្ចសហប្រតិបត្តិការឲ្យកាន់តែជិតស្និទ្ធជាមួយគ្រប់អង្គភាពតាមព្រំដែននៃប្រទេសទាំងពីរកម្ពុជា វៀតណាមក្នុងការកសាងខ្សែបន្ទាត់ព្រំដែនសន្តិភាព មិត្តភាពនិងការអភិវឌ្ឍន៍រីកចម្រើន ។ ឯកឧត្តម មាស សុភា សង្ឃឹមយ៉ាងមុតមាំថា ឆ្លងតាមលទ្ធផលនៃកិច្ចប្រជុំនាលើនេះភាគីយើងទាំងពីរ និងកាន់តែសម្រេចបានជោគជ័យក្នុងការពង្រឹងពង្រីកចំណងទាក់ទងកិច្ចសហប្រតិបត្តិការរវាងកងទ័ពយើងទាំងពីរកាន់តែរឹងមាំនិងរីកចម្រើន ។