ឯកឧត្តម នាង ផាត ផ្សព្វផ្សាយអប់រំចិត្តសាស្ត្រ វិទ្យាស្ថានទ័ពជើងគោក - ព័ត៌មានក្នងស្រុក

ព័ត៌មាន

ឯកឧត្តម នាង ផាត ផ្សព្វផ្សាយអប់រំចិត្តសាស្ត្រ វិទ្យាស្ថានទ័ពជើងគោក

ខ.ភ.ម ជាកំលាំងស្នូលមានតួនាទីភារកិច្ចពង្រឹងស្ថេរភាពនយោបាយ សន្តិភាព ការអភិវឌ្ឍន៍ និងការពារប្រជាជនកម្ពុជា។ ឯកឧត្តម នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ បានមានប្រសាសន៍ដូចនេះនៅក្នុងឱកាសអញ្ជើញធ្វើបទឧទ្ទេសនាម ផ្សព្វផ្សាយការងារអប់រំចិត្តសាស្ត្រ និងសភាពការណ៍ថ្មីដល់កម្មសិក្សាការី វិទ្យាស្ថានទ័ពជើងគោក (ថ្លុកតាសេក) ក្នុងខេត្តកំពង់ស្ពឺ នាព្រឹកថ្ងៃទី២២ ខែមិថុនា នេះ។
តាមសេចក្តីរាយការណ៍របស់ ឧត្តមសេនីយ៍ឯក ម៉ម យឿន នាយកវិទ្យាស្ថានទ័ពជើងគោក បានឲ្យដឹងថា៖ បច្ចុប្បន្នវិទ្យាស្ថានបាននឹងកំពុងហ្វឹកហ្វឺនបណ្តុះបណ្តាលក ម្មសិក្សាការី វគ្គនាយទាហានទ័ពជើងគោកជំនាន់ទី៥, ទី៦, ទី៧ និងជំនាន់ទី៨ មានកម្មសិក្សាការីចំនួន១ពាន់នាក់, វគ្គនាយទាហានបន្តវេនជំនាន់ទី៩ មានកម្មសិក្សាការីចំនួន ២៥០នាក់, វគ្គបំប៉ននាយទាហានថ្នាក់កងអនុសេនាតូច ថ្នាក់កងអនុសេនាធំ មានកម្មសិក្សាការីចំនួន ១៨០នាក់ និងវគ្គបំប៉នគីមីសាស្ត្រ មានចំនួន ៩០នាក់។
ឯកឧត្តម នាយឧត្តមសេនីយ៍ នាង ផាត បានចាត់ទុកកម្មសិក្សាការីវគ្គនាយទាហានជើងគោក និងវគ្គនាយទាហានបន្តវេនគឺជានាយទាហានវ័យក្មេងដែលនឹងត្រូវប ន្តវេនរបស់ ខ.ភ.ម ក្នុងការបំពេញភារកិច្ចការពារជាតិ បូរណភាពទឹកដី និងការពារប្រជាជនកម្ពុជា។ ក្នុងនាមឧបនាយករដ្ឋមន្ត្រី ទៀ បាញ់, នាយឧត្តមសេនីយ៍ នាង ផាត បានសម្តែងនូវការកោតសរសើរ និងវាយតម្លៃខ្ពស់ចំពោះវិទ្យាស្ថានទ័ពជើងគោកថា ជាថ្នាលដែលបានចូលរួមចំណែកកសាងកម្លាំងធនធានមនុស្ស ខ.ភ.ម និងកិច្ចពង្រឹងខឿនការពារជាតិ អធិបតេយ្យបូរណភាពទឹកដី។

ឯកឧត្តម នាង ផាត បានលើកឡើងផងដែរពីសភាពការណ៍ការវិវត្តន៍នយោបាយជាតិ និងសភាពការណ៍កើតឡើងថ្មីៗនៅលើសកលោក និងនៅក្នុងតំបន់ដែលពាក់ព័ន្ធទៅនឹងតួនាទីភារកិច្ច ក៏ដូចជាការជះឥទ្ធិពលផ្នែកសតិអារម្មណ៍នយោបាយចិត្តសាស្ត្ររ បស់កងទ័ព និងសារៈសំខាន់ក្នុងការបំពេញតួនាទីភារកិច្ចចំពោះមុខរបស់ ខ.ភ.ម ស្របតាមគោលដៅភារកិច្ចរបស់រាជរដ្ឋាភិបាល ក្រសួងការពារជាតិ និងអគ្គបញ្ជាការនៃ ខ.ភ.ម។

ឯកឧត្តម នាយឧត្តមសេនីយ៍ បានលើកឡើងនូវប្រសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ថា៖ សន្តិភាពក្នុងប្រទេសមួយ បានធ្វើឲ្យមានសន្តិភាពដល់បណ្តាប្រទេសជិតខាង ក្នុងតំបន់ និងពិភពលោក ប៉ុន្តែអស្ថេរភាពរបស់ប្រទេសមួយ វាបានជះឥទ្ធិពលនិងមានផលប៉ះពាល់ដល់ប្រទេសជិតខាង ប្រទេសនៅក្នុងតំបន់ និងនៅលើពិភពលោកផងដែរ។ ឯកឧត្តម បានបញ្ជាក់ថា នៅក្រោមការដឹកនាំរបស់សម្តេចអគ្គមហាសេនាបតីតេជោ បានឆ្លងកាត់ការដឹកនាំប្រទេសទាំងពេលមានអំណោយផលផង និងមិនអំណោយផលផង ហើយបានការពារប្រទេសឲ្យស្ថិតស្ថេរគង់វង្ស ក្នុងឯករាជ្យ សន្តិភាព អធិបតេយ្យភាព និងបូរណភាពដែនដីដ៏ពេញលេញ។ ទន្ទឹមនេះ ក៏បានខិតខំប្រឹងប្រែងកសាង និងអភិវឌ្ឍប្រទេសជាតិដោយចេញពីបាតដៃទទេ ក្នុងនោះបានកសាងនូវហេដ្ឋារចនាសម្ព័ន្ធនានាជាច្រើន ធ្វើឲ្យប្រទេសជាតិមានការ រីកចំរើនយ៉ាងឆាប់រហ័សនៅលើគ្រប់វិស័យ ព្រមទាំងបានលើកស្ទួយនូវកិត្យានុភាពប្រទេសជាតិ និងខ.ភ.ម ឲ្យស្មើមុខស្មើមាត់នៅលើឆាកអន្តរជាតិ។ ឯកឧត្តម បានបន្តថាចំពោះផែនការយុទ្ធសាស្ត្រការពារជាតិ, រាជរដ្ឋាភិបាលក៏បានយកចិត្តទុកដាក់យ៉ាងខ្លាំងក្លា ដោយបានធ្វើការប្រែក្លាយតំបន់ដែលធ្លាប់តែមានជម្លោះប្រយុទ្ធ នឹងគ្នា ទៅជាតំបន់អភិវឌ្ឍន៍ និងតំបន់ទេសចរណ៍ ដោះស្រាយព្រំដែនដោយសន្តិវិធី ដោយបានធ្វើឲ្យខ្សែបន្ទាត់ព្រំដែនមិត្តភាព សន្តិភាព កិច្ចសហប្រតិបត្តិការ និងការអភិវឌ្ឍន៍។

ឯកឧត្តម នាយឧត្តមសេនីយ៍ បានផ្តាំផ្ញើរដល់កម្មសិក្សាការី វិទ្យាស្ថានទ័ពជើងគោក បន្តការខិតខំប្រឹងប្រែងរៀនសូត្រហាត់ពត់លត់ដំខ្លួន ដើម្បីក្លាយជានាយទាហានដ៏ល្អរបស់ ខ.ភ.ម ។ ក្នុងនោះ បានសង្កត់ធ្ងន់ថា ខ.ភ.ម ត្រូវបន្តបំពេញតួនាទី ភារកិច្ចរបស់ក្នុងការការពាររដ្ឋធម្មនុញ គាំទ្រភាពត្រឹមត្រូវស្របច្បាប់នៃរដ្ឋសភា និងរាជរដ្ឋាភិបាល ដែលកើតចេញពីឆន្ទៈរបស់ប្រជាពលរដ្ឋ ដើម្បីថែរក្សាការពារសន្តិភាព ស្ថេរភាព របៀបរៀបរយ និងសណ្តាប់ធ្នាប់ បំរើផលប្រយោជន៍ដ៏ឧត្តុង្គឧត្តមរបស់ប្រទេសជាតិ មាតុភូមិ និងប្រជាពលរដ្ឋ៕