ឯកឧត្តម ឧបនាយករដ្ឋមន្ត្រី ទៀ បាញ់ ជួបរដ្ឋមន្ត្រីការពារជាតិឡាវ និងលេខាធិការក្រុមប្រឹក្សាសហព័ន្ធរុស្សី - ព័ត៌មានក្នងស្រុក

ព័ត៌មាន

ឯកឧត្តម ឧបនាយករដ្ឋមន្ត្រី ទៀ បាញ់ ជួបរដ្ឋមន្ត្រីការពារជាតិឡាវ និងលេខាធិការក្រុមប្រឹក្សាសហព័ន្ធរុស្សី

      ឆ្លើយតបតាមការអញ្ជើញរបស់ ឯកឧត្តម នាយឧត្តមសេនីយ៍ សឺជី សយហ្គូ រដ្ឋមន្ត្រីក្រសួងការពារប្រទេសសហព័ន្ធរុស្សី ឯកឧត្តម នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៃព្រះរាជាណាចក្រកម្ពុជា និងលោកជំទាវ តៅ តឿន បានដឹកនាំគណៈប្រតិភូក្រសួងការពារជាតិកម្ពុជា អញ្ជើញទៅបំពេញទស្សនៈកិច្ចជាផ្លូវការ និង ជាមិត្តភាពនៅសហពន្ទ័រុស្ស៊ីរយៈពេល ៩ ថ្ងៃ ចាប់ពីថ្ងៃទី២៣ ខែមេសា ដល់ថ្ងៃទី១ ខែឧសភា ឆ្នាំ២០១៦ ។
      បន្ទាប់ពីបានអញ្ជើញទៅដល់ទីក្រុងម៉ូស្គូ សហព័ន្ធរុស្សីរួចមក នាថ្ងៃទី២៥ ខែមេសា ឆ្នាំ២០១៦ ឯកឧត្តម ឧបនាយករដ្ឋមន្ត្រី ទៀ បាញ់ ព្រមទាំងសមាជិកគណៈប្រភូអមដំណើរបានចូលជួបពិភាក្សាការងារជាមួយ ឯកឧត្តម ឧត្តមសេនីយ៍ឯក ចាន់យ៉ាឡាត ចាន់សាម៉ន រដ្ឋមន្ត្រីក្រសួងការពារជាតិឡាវ ។ នៅក្នុងជំនួបនោះ ឯកឧត្តម ចាន់យ៉ាឡាត ចាន់សាម៉ន រដ្ឋមន្ត្រីក្រសួងការពារជាតិឡាវ បានសំដែងការស្វាគមន៍ និងបានវាយតំលៃខ្ពស់ចំពោះជំនួបរវាងរដ្ឋមន្ត្រីការពារជាតិប្រទេសទាំងពីរ ឡាវ និងកម្ពុជា នៅរុស្សីនាពេលនេះ ជាពិសេសក្នុងពេលដែលគណៈប្រតិភូប្រទេសទាំងពីរបានមកដល់រុស្ស៊ី ដើម្បីចូលរួមក្នុងសន្និសិទ្ធទីក្រុងម៉ូស្គូលើកទី៥ ស្តីពីសន្តិសុខអន្តរជាតិ ក៏ដូចជាការចូលរួមកិច្ចប្រជុំរដ្ឋមន្ត្រីការពារជាតិអាស៊ាន និង រដ្ឋមន្ត្រីការពារជាតិរុស្សីក្រៅផ្លូវការនៅទីក្រុងម៉ូស្គូផងដែរ ។
      មានមតិឆ្លើយតបវិញ ឯកឧត្តម ទៀ បាញ់ បានបញ្ជាក់ថា ៖ កិច្ចប្រជុំនៅរុស្សីនាពេលនេះក៏ជាកិច្ចការមួយដ៏សំខាន់សំរាប់យើងនៅក្នុងតំបន់ ដែលក្នុងពេលបច្ចុប្បន្ននេះរុស្សីបានដើរតួនាទីយ៉ាងសំខាន់នៅក្នុងពិភពលោក ហើយអាចជួយជំរុញកិច្ចការក្នុងតំបន់អោយបានប្រសើរផងដែរ ។ ឆ្លៀតក្នុងឪកាសនោះ ឯកឧត្តម ទៀ បាញ់ ក៏បានសំដែងការអបអរសាទរចំពោះ ឯកឧត្តម ចាន់យ៉ាឡាត ចាន់សាម៉ន ដែលត្រូវបានទទួលការតែងតាំងជារដ្ឋមន្ត្រីក្រសួងការពារជាតិឡាវថ្មីហើយឯកឧត្តម ទៀ បាញ់ ក៏បានអញ្ជើញ ឯកឧត្តម ចាន់យ៉ាឡាត ចាន់សាម៉ន ទៅបំពេញទស្សនៈកិច្ចជាផ្លូវការ និងជាមិត្តភាពនៅព្រះរាជាណាចក្រកម្ពុជា ដើម្បីពង្រឹងចំណងសាមគ្គីភាព មិត្តភាព និងកិច្ចសហប្រតិបត្តិការរវាងកងទ័ពប្រទេសទាំងពីរអោយកាន់តែរឹងមាំ និងរីកចំរើនឡើងថែមទៀត ។ ឯកឧត្តម ឧបនាយករដ្ឋមន្ត្រីបានបន្តថា៖ ឯកឧត្តម និងដឹកនាំគណៈប្រតិភូក្រសួងការពារជាតិកម្ពុជាទៅចូលរួមក្នុងកិច្ចប្រជុំរដ្ឋមន្ត្រីការពារជាតិអាស៊ាន ADMM តាមការគ្រោងទុកដែលប្រទេសឡាវត្រូវធ្វើជាម្ចាស់ផ្ទះក្នុងឆ្នាំនេះ ។
      មានមតិឆ្លើយតបវិញនាឪកាសនោះដែរ ឯកឧត្តម ចាន់យ៉ាឡាត ចាន់សាម៉ន រដ្ឋមន្ត្រីក្រសួងការពារជាតិឡាវ បានបញ្ជាក់ថាៈ កម្ពុជា និងឡាវ តែងតែមានទស្សនៈដូចគ្នាចំពោះបញ្ហាសន្តិភាព ស្ថេរភាព និងសន្តិសុខ នៅក្នុងតំបន់ ។ ឯកឧត្តម រដ្ឋមន្ត្រីក្រសួងការពារជាតិឡាវបានថ្លែងអំណរគុណដល់ ឯកឧត្តម ទៀ បាញ់ ដែលនឹងដឹកនាំគណៈប្រតិភូក្រសួងការពារជាតិកម្ពុជាទៅចូលរួមកិច្ចប្រជុំរដ្ឋមន្ត្រីការពារជាតិអាស៊ាន ADMM នៅប្រទេសឡាវនាខែក្រោយនេះ ។ ឯកឧត្តម រដ្ឋមន្ត្រីក្រសួងការពារជាតិឡាវ បានជំរាបជូនដល់ ឯកឧត្តម នាយករដ្ឋមន្ត្រី ទៀ បាញ់ អំពីការយកចិត្តទុកដាក់របស់ឡាវ ចំពោះទំនាក់ទំនងរវាងកងទ័ពប្រទេសទាំងពីរហើយក្នុងនាម ឯកឧត្តម ជារដ្ឋមន្ត្រីក្រសួងការពារជាតិឡាវ ឯកឧត្តមបានប្តេជ្ញាខិតខំប្រឹងប្រែង ធ្វើយ៉ាងណាដើម្បីជំរុញអោយកិច្ចសហប្រតិបត្តិការរវាងកងទ័ពប្រទេសទាំងពីរ កម្ពុជា ឡាវ អោយកាន់តែជិតស្និតឡើងថែមទៀត ។
      បន្ទាប់មកនៅរសៀល ថ្ងៃទី២៥ ខែមេសា ឆ្នាំ២០១៦ ឯកឧត្តម ឧបនាយករដ្ឋមន្ត្រី ទៀ បាញ់ ព្រមទាំងគណៈប្រតិភូអមដំណើរក៏បានចូលជួបពិភាក្សាការងារជាមួយ ឯកឧត្តម ប៉ាទ្រូស៊ែវ លេខាធិការក្រុមប្រឹក្សាសហព័ន្ធរុស្សីបន្តទៀត ។ នៅក្នុងជំនួបសន្ទនានាឪកាសនោះ ឯកឧត្តម ប៉ាទ្រូស៊ែវ បានចាត់ទុកដំណើរទស្សនៈកិច្ចរបស់គណៈប្រតិភូក្រសួងការពារជាតិកម្ពុជាមកកាន់រុស្សីនាពេលនេះជាសក្ខីភាពបង្ហាញអោយឃើញពីការរឹតចំណងមិត្តភាព សាមគ្គីភាព រវាងប្រទេសទាំងពីរកាន់តែខ្លាំងក្លាឡើងថែមទៀតលើគ្រប់វិស័យ ។ ឯកឧត្តម ប៉ាទ្រូស៊ែវ ក៏បានចាត់ទុកដំណើរទស្សនៈកិច្ចរបស់គណៈប្រតិភូក្រសួងការពារជាតិកម្ពុជានៅសហព័ន្ធរុស្សីនាពេលនេះគឺជាដៃគូរដ៏ល្អរបស់រុស្សី ក្នុងចំណោមបណ្តាប្រទេសនៅក្នុងតំបន់អាស៊ីប៉ាស៊ីភិច ។ ឯកឧត្តម បានបន្តថា៖ កម្ពុជានិងរុស្សីបានធ្វើកិច្ចសហប្រតិបត្តិការជាមួយគ្នាយ៉ាងច្រើនដែលបានធ្វើអោយចំណងសាមគ្គីភាព មិត្តភាពរវាងប្រទេសទាំងពីរ កម្ពុជា និង រុស្សីកាន់តែមានការរីកចំរើនទៅមុខ។ ឯកឧត្តមសង្ឃឹមថា៖ ប្រទេសទាំងពីរនឹងបន្តកិច្ចសហប្រតិបត្តិការជាមួយគ្នា ដើម្បីរឹតចំណងសាមគ្គីភាព មិត្តភាពអោយកាន់តែមានភាពជិតស្និត និងរីកចំរើន ។
      មានមតិឆ្លើយតបវិញនាឪកាសនោះ ឯកឧត្តម ទៀ បាញ់ បានវាយតំលៃខ្ពស់ចំពោះកិច្ចសហប្រតិបត្តិការ ចំណងមិត្តភាព សាមគ្គីភាពរវាងប្រទេសទាំងពីរ កងទ័ពទាំងពីរកម្ពុជា រុស្សី ក្នុងរយៈពេលកន្លងមក ជាពិសេសក្នុងពេលបច្ចុប្បន្ននេះក្រុមប្រឹក្សាសហព័ន្ធរុស្សីបានធ្វើកិច្ចសហប្រតិបត្តិការបានយ៉ាងល្អជាមួយក្រសួងមហាផ្ទៃនៃព្រះរាជាណាចក្រកម្ពុជា ។ ឯកឧត្តម ទៀ បាញ់ បានបញ្ជាក់បន្ថែមថា៖កិច្ចប្រជុំរដ្ឋមន្ត្រីការពារជាតិអាស៊ាននិងរដ្ឋមន្ត្រីការពារជាតិរុស្សី និងសន្និសិទ្ធទីក្រុងម៉ូស្គូលើកទី៥ ស្តីពីបញ្ហាសន្តិសុខអន្តរជាតិដែលបានប្រារព្ធធ្វើនៅរុស្សីនាពេលនេះគឺមានសារៈសំខាន់ក្នុងការរួមចំណែកពង្រឹងសន្តិសុខ សន្តិភាព និងស្ថេរភាព នៅក្នុងតំបន់ និងពិភពលោក ៕