ឯ.ឧ ហ៊ីង ប៊ុនហៀង បិទវគ្គឆត្រយោងជំនាន់ទី២០ - ព័ត៌មានក្នងស្រុក

ព័ត៌មាន

ឯ.ឧ ហ៊ីង ប៊ុនហៀង បិទវគ្គឆត្រយោងជំនាន់ទី២០

ការហ្វឹកហ្វឺនកងទ័ព ជាកត្តាសំខាន់ និងចាំបាច់បំផុត ដែលរាជរដ្ឋាភិបាល ក្រសួងការពារជាតិ និងអគ្គបញ្ជាការនៃខ.ភ.ម បានយកចិត្តទុកដាក់យ៉ាងខ្លាំង ដើម្បីពង្រឹងខឿនការពារជាតិ សមត្ថភាព និងគុណភាពនៅក្នុងជួរកងទ័ព លើការការពាររក្សាបូរណៈភាពទឹកដី ការពារប្រជាជន និងការកសាងអភិវឌ្ឍន៍ជាតិ។ ឯកឧត្ដម នាយឧត្ដមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង នៃកងយោធពលខេមរៈភូមិន្ទ បានមាន ប្រសាសន៍លើកឡើងដូចនេះ នៅក្នុងពិធីបិទវគ្គហ្វឹកហ្វឺនជំនាញឆត្រយោង ជំនាន់ទី២០, វគ្គជំនាញអាវុធគាំទ្រត្បាល់១០០មម ត្បាល់៨២មម ដេកា៧៥មម ជំនាន់ទី១, វគ្គអាវុធបេ៤០ បេ៤១កន្លះមម ជំនាន់ទី១ និងវគ្គជំនាញឆ្លាមសមុទ្រ ជំនាន់ទី៤ របស់កងពលតូចទ័ពពិសេសឆត្រយោង៩១១ នៅទីលានក្តាន់រយ ស្រុកសំរោងទង ខេត្តកំពង់ស្ពឺ នាព្រឹកថ្ងៃទី១៥ ខែមិនានេះ។
តាមរបាយការណ៍ ឯ.ឧ ឧត្តមសេនីយ៍ឯក ចាប ភក្តី នាយរងសេនាធិការចំរុះនៃខ.ភ.ម និងជាមេបញ្ជាការ កងពលទ័ពពិសេសឆត្រយោង៩១១ បានឲ្យដឹងថា ការបិទវគ្គនាពេលនេះ មានវគ្គចំនួន០៤ ក្នុងនោះវគ្គហ្វឹកហ្វឺនជំនាញឆត្រយោង ជំនាន់ទី២០ មានសិក្ខាកាមចំនួន ២០០នាក់ ហ្វឹកហាត់រយៈពេល៦១ថ្ងៃ ទទួលបាននិទ្ទេសល្អមាន ១២៣នាក់, វគ្គជំនាញអាវុធគាំទ្រត្បាល់១០០មម ត្បាល់៨២មម ដេកា៧៥មម ជំនាន់ទី១ មានសិក្ខាកាម ១៨០នាក់ ហ្វឹកហាត់រយៈពេល០៣ខែ ទទួលបាននិទ្ទេសល្អមាន ៧៣នាក់, វគ្គអាវុធបេ៤០ បេ៤១កន្លះមម ជំនាន់ទី១ មានសិក្ខាកាម ១៤០នាក់ ហ្វឹកហាត់រយៈពេល០៣ខែ ទទួលបាននិទ្ទេសល្អមាន ៣៧នាក់ និងវគ្គជំនាញឆ្លាមសមុទ្រ ជំនាន់ទី៤ មានសិក្ខាកាម ៥០នាក់ ហ្វឹកហ្វឺនរយៈពេល៦ខែ និងទទួលបាននិទ្ទេសល្អចំនួន ៣១នាក់។
ឯកឧត្ដម ហ៊ីង ប៊ុនហៀង បានគូសបញ្ជាក់ថា រាជរដ្ឋាភិបាល នីតិកាលទី៥ នៃរដ្ឋសភាបានបន្តកិច្ចខិតខំប្រឹងប្រែងយ៉ាងពេញទំហឹង ក្នុងគោលដៅពង្រឹងការពារបូរណៈភាពទឹកដីថែមទៀត ដោយធ្វើការដោះស្រាយបញ្ហាព្រំដែនជាមួយប្រទេសជិតខាងដោយសន្តិវិធី។ ទន្ទឹមនឹងនេះរាជរដ្ឋាភិបាល ក៏បានខិតខំប្រឹងប្រែងកសាងជាជំហ៊ានៗនូវសង្គមកម្ពុជាមួយមានសន្តិភាព ស្ថិរភាព នយោបាយសន្តិសុខ និងសណ្តាប់ធ្នាប់សង្គម ជួយប្រជាពលរដ្ឋ មានការអភិវឌ្ឍន៏ប្រកបដោយចីរភាព និងសមធម៌ជាមួយនឹងការប្រកាន់ខ្ចាប់យ៉ាងម៉ឺងម៉ាត់នូវគោលការណ៏លទ្ធិប្រជាធិបតេយ្យសេរីពហុបក្ស ការគោរពសិទ្ធិ និងសេចក្តីថ្លៃថ្នូររបស់មនុស្សជាតិ។ ឯកឧត្ដម អគ្គមេបញ្ជាការរង បានផ្ដាំផ្ញើរដល់សិក្ខាកាម នាយ និងពលទាហាន នៃខ.ភ.ម បន្តការយកចិត្តទុកដាក់ បំពេញតួនាទីរបស់ខ្លួនឱ្យបានល្អថែមទៀត បន្តការពង្រឹងសមត្ថភាពរបស់ខ្លួន ចូលរួមការពារបូរណៈភាពទឹកដី ការពារជាតិ សាសនា ព្រះមហាក្សត្ររាជ និងរដ្ឋាភិបាលស្របច្បាប់ ជាពិសេសអនុវត្តន៍ឱ្យបានម៉ឺងម៉ាត់ នូវអនុសាសន៍របស់សម្ដេចតេជោហ៊ុនសែន។
ឯកឧត្ដម ហ៊ីង ប៊ុនហៀង បាននាំយកអំណោយដ៏ថ្លៃថ្លា របស់សម្តេចតេជោ ហ៊ុនសែន និងសម្តេចកិត្តិព្រឹទ្ធបណ្ឌិត ឧបត្ថម្ភដល់កងពលតូចទ័ពពិសេសឆត្រយោង៩១១ មានអង្ករចំនួន ០៥តោន, មី ១០០កេស, ខោអាវប៉ារ៉ាចំនួន ៣០០កំប្លេរ, មួក៣០០, ភេសជ្ជៈ ១០០កេស, ទឹកសុទ្ធ ១០០កេស ទឹកក្រូច ១០០កេស និងថវិកាចំនួន ១៥លានរៀល ព្រមទាំងបានចែកជូនថវិកាដល់សិក្ខាកាម ក្រុមគ្រូយោធាចារ្យ អ្នកបំរើការ និងសិស្សនាយទាហានសកម្មផងដែរ៕