ពិធីសម្ពោធស្តូបអនុស្សាវរីយ៍យុទ្ធជនពលី កម្ពុជា -វៀតណាម - ព័ត៌មានក្នងស្រុក

ព័ត៌មាន

ពិធីសម្ពោធស្តូបអនុស្សាវរីយ៍យុទ្ធជនពលី កម្ពុជា -វៀតណាម

    ស្តូបអនុស្សាវរីយ៍យុទ្ធជនពលីកម្ពុជា-វៀតណាម នៅខេត្តកំពតបានប្រារព្ធពិធីសម្ពោធដាក់ឲ្យប្រើប្រាស់ជាផ្លូវការនៅថ្ងៃទី១១ ខែមីនា ឆ្នាំ២០១៦ នេះក្រោមអធិបតីភាព ឯកឧត្តម មិន ឃិន អនុប្រធានអចិន្រ្តៃយ៍ និងអគ្គលេខាធិការនៃក្រុមប្រឹក្សារណសិរ្យសាមគ្គី អភិវឌ្ឍន៍មាតុភូមិកម្ពុជា ឯកឧត្តម ឧត្តមសេនីយ៍ឯក ង្វៀន ថាញ់ គង់ អនុរដ្ឋមន្រ្តី ក្រសួងការពារប្រទេសវៀតណាម ឯកឧត្តម ខូយ ឃុនហ៊ួរ អភិបាលខេត្តកំពត ព្រមទាំងឯកអគ្គរដ្ឋទូតវៀតណាម ប្រចាំកម្ពុជា និងមានការចូលរួមពីមន្រ្តីរាជការ កងកម្លាំងប្រដាប់អាវុធ ប្រជាពលរដ្ឋសិស្សានុសិស្សនៅក្នុងខេត្តចូលរួមយ៉ាងច្រើនកុះករ ។
   ក្នុងឪកាសនោះ ឯកឧត្តម ខូយ ឃុនហ៊ួរ បានលើកឡើងពីប្រវត្តិនិងមូលហេតុនៃការកសាងស្តូបនេះឡើងដែលស្តូបអនុស្សាវរីយ៍យុទ្ធជនពលីកម្ពុជា វៀតណាម នេះត្រូវបានសាងសង់ឡើងនាខែធ្នូ ឆ្នាំ១៩៨៨ នាសម័យរដ្ឋកម្ពុជា ក្នុងគោលបំណងដើម្បីអបអរសាទរខួបអានុស្សាវរីយ៍ទី១០ ថ្ងៃជ័យជំនះ ៧មករា ៧មករា១៩៧៩-៧មករា១៩៨៨ ជានិមិត្តរូបរំលឹកអនុស្សាវរីយ៍ ចំណងមិត្តភាព សាមគ្គីភាព សហប្រតិបត្តិការអន្តរជាតិ រវាងកងស្ម័គ្រចិត្ត UN - ជាមួយកងទ័ពនិងប្រជាជនកម្ពុជាដែលបានរួមគ្នាវាយផ្តួលរំលឹករបបប្រល័យពូជសាសន៍ប៉ុលពត ។
   ឯកឧត្តម បានបញ្ជាក់ទៀតថា ការផ្តួចផ្តើមសាងសង់ស្តូបអនុស្សាវរីយ៍នេះឡើងគឺជាសំណូមពរដ៏ពិសិដ្ឋរបស់ជនជាតិកម្ពុជាដែលបានរួចចាកផុតសេចក្តីស្លាប់នៃរបបប៉ុលពតសម្រាប់ជាការចងចាំរឿងពិតនៃប្រវត្តិសាស្រ្ត និងជាការគោរពដឹងគុណជានិច្ចចំពោះវីរភាពដ៏អង់អាចក្លាហានរបស់កងទ័ពកម្ពុជា និងកងទ័ពស្ម័គ្រចិត្តវៀតណាមដែលបានបូជាជីវិត សាច់ស្រស់ ឈាមស្រស់ ក្នុងបុព្វហេតុសង្រ្គោះប្រជាជន និងប្រទេសកម្ពុជា ឲ្យរស់ឡើងវិញនិងមានការអភិវឌ្ឍន៍ដូចសព្វថ្ងៃនេះ ។
    នៅក្នុងឪកាសនោះ ឯកឧត្តម ឧត្តមសេនីយ៍ឯក ង្វៀន ថាញ់គង់ អនុរដ្ឋមន្រ្តីក្រសួងការពារប្រទេសវៀតណាម បានចាត់ទុកស្តូបអនុស្សាវរីយ៍យុទ្ធជនពលីកម្ពុជា វៀតណាម ដែលបានសាងសង់រួចនៅក្នុងខេត្តកំពត និងបានប្រារព្ធពិធីសម្ពោធនាពេលនេះ គឺជាសំណង់មួយក្នុងចំណោមសំណង់ប្រវត្តិសាស្រ្តនានានិងជាគំរូដ៏ពិសិដ្ឋនៃទំនាក់ទំនងរវាងប្រទេសទាំងពីរ កម្ពុជា - វៀតណាម ទុកសម្រាប់មនុស្សជំនាន់ក្រោយ ។ ឯកឧត្តម ក៏បានសម្តែងការដឹងគុណចំពោះការពលីកម្ម ដ៏ធំធេងចំពោះវីរៈយុទ្ធជនពលីកម្ពុជា វៀតណាម ជាពិសេសលោកឪពុកអ្នកម្តាយដែលបានបញ្ជូនកូនរបស់ខ្លួនទៅសមរភូមិដើម្បីប្រយុទ្ធប្រឆាំងសត្រូវរួម ហើយបានពលីជីវិត ដើម្បីបុព្វហេតុការពារមាតុភូមិកម្ពុជា និងវៀតណាម ។ ឯកឧត្តមបានប្តេជ្ញាចិត្តរៀនសូត្រតាមគំរូវីរភាពយុទ្ធជនកម្ពុជា វៀតណាម និងប្តេជ្ញាចិត្តរួមកម្លាំងជាមួយគ្នាដើម្បីកសាងចំណងសាមគ្គីភាព មិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ កម្ពុជា វៀតណាម ពីមួយថ្ងៃទៅមួយថ្ងៃកាន់តែរីកចម្រើនថែមទៀត ។ ថ្លែងទៅកាន់ពិធីសម្តោពស្តូបអនុស្សាវរីយ៍យុទ្ធជនពលីកម្ពុជា វៀតណាម នៅខេត្តកំពត នាឪកាសនោះដែរ ឯកឧត្តម មិន ឃិន បានរំលឹកឡើងវិញពីដំណើរការសាងសង់ ជួសជុល កែលំអរស្តូបអនុស្សាវរីយ៍យុទ្ធជនពលីកម្ពុជា វៀតណាម នៅទូទាំងប្រទេសកម្ពុជា ដែលបានកើតឡើងពីការខិតខំប្រឹងប្រែងរវាងថ្នាក់ដឹកនាំប្រទេសទាំងពីរ ។ ឯកឧត្តម មិន ឃិន បានកោតសរសើរ និងវាយតម្លៃខ្ពស់ចំពោះការយកចិត្តទុកដាក់របស់ខេត្តកំពត ដែលបានសហការរៀបចំជួសជុល កែលំអរស្តូបនេះឲ្យមានសោភ័ណភាពឡើងវិញដែលជាសមិទ្ធផលរួមទុកជាប្រយោជន៍ជាតិ ពិសេសដើម្បីពង្រឹងពង្រីកចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ កម្ពុជា វៀតណាម ។
   នៅក្នុងឪកាសនោះគណៈអធីបតីក៏បានកាត់ខ្សែបូរបើកសម្ពោធឲ្យប្រើប្រាស់ជាផ្លូវការនូវស្តូបអនុស្សាវរីយ៍ យុទ្ធជនពលីកម្ពុជា វៀតណាម ក្នុងខេត្តកំពតចាប់ពីពេលនេះតទៅ៕