ឯ.ឧនាង.ផាតប្រជុំបង្កើតគណកម្មាការដោះស្រាយគោលនយោបាយយោធិនប្រភេទ២ - ព័ត៌មានក្នងស្រុក

ព័ត៌មាន

ឯ.ឧនាង.ផាតប្រជុំបង្កើតគណកម្មាការដោះស្រាយគោលនយោបាយយោធិនប្រភេទ២

     ក្រសួងការពារជាតិបានបើកកិច្ចប្រជុំបង្កើតគណៈកម្មាធិការដោះស្រាយគោលនយោបាយយោធិនប្រភេទ២និងសោធននិវត្តន៍ខ.ភ.មនាព្រឹកថ្ងៃទី9ខែមិនានេះដើម្បីធ្វើការដោះស្រាយប្រាក់គោលនយោបាយរបស់រាជរដ្ឋាភិបាលជូនដល់យោធិនប្រភេទ២និងយោធិនសោធននិវត្តន៍នៃខ.ភ.មដែលនឹងត្រូវរំសាយចេញពីជួរទ័ពនាឆ្នាំ២០១៦។
     កិច្ចប្រជុំនេះធ្វើឡើងស្ថិតក្រោមអធិបតីភាពឯ.ឧនាយឧត្តមសេនីយ៍ នាង ផាតរដ្ឋលេខាធិការក្រសួងការពារជាតិនិងឯកឧត្តមអគ្គនាយកដ្ឋាននិងអស់លោកមន្ត្រីជំនាញពាក់ព័ន្ធក្នុងក្រសួងការពារជាតិនិងអគ្គមេបញ្ជាការនៃ ខ.ភ.ម ។
     ក្នុងនោះឯ.ឧឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវាបានអានសេចក្តីសម្រេចរបស់ក្រសួងការពារជាតិប្រកាសបង្កើតគណៈកម្មាការនិងអនុគណៈកម្មាការដោះស្រាយគោលនយោបាយយោធិនប្រភេទ២និងសោធននិវត្តន៍ក្នុងនោះមានឯ.ឧ នាង ផាត រដ្ឋលេខាធិការក្រសួងការពារជាតិនិងជាប្រធានគណៈកម្មាធិការដោះស្រាយគោលនយោបាយយោធិនប្រភេទ២និងសោធននិវត្តន៍ខ.ភ.មហើយ ឯ.មាស សាវ៉ន ជាអនុប្រធានអចិន្ត្រៃយ៍និងឯ.ឧនាយឧត្តមសេនីយ៍ ស៊ុំ សំណាងជាអនុប្រធានគណៈកម្មាធិការ។
     តាមរបាយការណ៍របស់នាយកដ្ឋានយោធាស៊ីវិលនិងនាយកដ្ឋានសោធន៍នៃអគ្គនាយកដ្ឋានយោធាសេក្នុងផែនការឆ្នាំ២០១៦នេះមានយោធិនមានចំនួន១.៣៩៤នាក់ដែលត្រូវធ្វើការកាត់រំសាយចេញពីជួរខ.ភ.មក្នុងនោះមានយោធិនប្រភេទ២ដែលជាយោធិនពិការពលីនិងមរណៈមានចំនួន១.០៣២នាក់និងយោធិនសោធននិវត្តន៍ដែលជាយោធិនសោធននិងបាត់បង់សមត្ថភាពការងារមានចំនួន៣៦២នាក់ ។
     មានប្រសាសន៍ផ្តាំផ្ញើរក្នុងឱកាសនោះឯ.នាង ផាត បានថ្លែងថាការដោះស្រាយគោលនយោបាយយោធិនប្រភេទ២និងសោធននិវត្តន៍ខ.ភ.មគឺជាកិច្ចការដ៏មានសារៈសំខាន ដើម្បីលើកកម្ពស់ដល់ការធ្វើកំណែទម្រង់នៃខ.ភ.មនិងការចូលរួមចំណែកអនុវត្តគោលនយោបាយយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាល។ឯ.ឧរដ្ឋលេខាធិការបានសម្តែងនូវការកោតសរសើរនិងវាយតម្លៃខ្ពស់ចំពោះការអនុវត្តរបស់គណៈកម្មាការនិងអនុគណៈកម្មាការដោះស្រាយគោលនយោបាយយោធិនប្រភេទ២និងសោធននិវត្តន៍ខ.ភ.មដែលកន្លងមកនេះបានដំណើរការបើកប្រាក់គោលនយោបាយទៅដល់យោធិនប្រភេទ២និងយោធិនសោធននិវត្តន៍បានយ៉ាងល្អនិងបានរលូនមិនមានការថ្នាំងថ្នាក់ណាមួយមកដល់ក្រសួងពិបាកនឹងដោះស្រាយនោះឡើយ ។
     នៅព្រឹកមិញដដែលនេះដែរឯ.ឧនាយឧត្តមសេនីយ៍នាង.ផាតបានបន្តអញ្ជើញជាអធិបតីភាពបើកកិច្ចប្រជុំអនុគណៈកម្មាធិការដោះស្រាយគោលនយោបាយយោធិនប្រភេទ២និងសោធននិវត្តន៍ខ.ភ.មឆ្នាំ២០១៦ជាបន្តទៀត។

      អនុគណៈកម្មាធិការដោះស្រាយគោលនយោបាយយោធិនប្រភេទ២និងសោធននិវត្តន៍ខ.ភ.មមានសមាជិកចំនួន២១រូបក្នុងនោះឯ.ឧឧត្តមសេនីយ៍ឯកសំ.ចាន់ធួនអគ្គនាយករងអគ្គនាយកដ្ឋានយោធសេវាក្រសួងការពារជាតិជាអនុគណៈកម្មាការដោះស្រាយគោលនយោបាយយោធិនប្រភេទ២និងសោធននិវត្តន៍ខ.ភ.ម
       ឯ.ឧ នាង ផាត ក៏បានផ្តល់អនុសាសន៍ផ្តាំផ្ញើរមួយចំនួនដល់អនុគណៈកម្មាការដោះស្រាយគោលនយោបាយយោធិនប្រភេទ២និងសោធននិវត្តន៍ត្រូវយកចិត្តទុកដាក់ចុះស្រង់បញ្ជីធ្វើបែបបទឯកសារឲ្យបានច្បាស់លាស់នូវយោធិនយោធិនប្រភេទ២និងសោធននិវត្តន៍ដើម្បីត្រូវកាត់រំសាយចេញនាឆមាសទី២ឆ្នាំ២០១៦នេះ។ឯ.ឧ នាង ផាត បានបញ្ជាក់ថានេះកិច្ចការយ៉ាងសំខាន់មួយដែលរួមចំណែកនៅក្នុងការកែទម្រង់ខ.ភ.ម។បើកិច្ចការនេះសម្រេចទៅបានល្អវានិងបង្ករលក្ខណៈងាយស្រួលដល់ការកសាងកម្លាំងធនធានមនុស្សទាំងលើការកសាងសមត្ថភាពនិងគុណភាពដើម្បីបំពេញបន្ថែមក្របខ័ណ្ឌនិងបន្តវេនខ.ភ.មក្នុងកិច្ចការការពារជាតិមាតុភូមិនៅពេលអនាគតជាបន្តទៅទៀត ។
     គួរបញ្ជាក់ថាការចុះស្រង់បញ្ជីធ្វើបែបបទឯកសារដោះស្រាយគោលនយោបាយយោធិនប្រភេទ២និងយោធិនសោធននិវត្តន៍គ្រោងនឹងចុះទៅតាមតំបន់សឹករងកងពលនិងយោធភូមិភាគនៅដើមខែឧសភាឆ្នាំ២០១៦ខាងមុខនេះតទៅនៅក្រសួងការពារជាតិ ៕