ខួបលើកទី១០៥ ទិវានារីអន្តរជាតិ ៨ មីនា ក្រសួងការពារជាតិ - ព័ត៌មានក្នងស្រុក

ព័ត៌មាន

ខួបលើកទី១០៥ ទិវានារីអន្តរជាតិ ៨ មីនា ក្រសួងការពារជាតិ

    ស្ថិតក្រោមប្រធានបទ(វិនិយោគលើសមភាពយេនឌ័រ ដើម្បីកិច្ចអភិវឌ្ឍន៏ប្រកបដោយចីរភាព) ក្រសួងការពារជាតិនៅរសៀលថ្ងៃទី៤ ខែមីនា ឆ្នាំ២០១៦ បានប្រារព្ធពិធីរំលឹកខួបលើកទី ១០៥ ទិវានារីអន្តរជាតិ ៨ មីនា ក្រោមអធិបតីភាព ឯ.ឧ នាយឧត្តមសេនីយ៍ ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ,ឯ.ឧ ជារដ្ឋលេខាធិការ . ឯ.ឧ អនុរដ្ឋលេខាធិការ , អគ្គនាយកដ្ឋាន ព្រមទាំងយុទ្ធនារីចំណុះក្រសួងការពារជាតិ, អគ្គបញ្ជាការ បញ្ជាការដ្ឋានកងទ័ពជើងគោក, ជើងទឹក, ជើងអាកាស, កងរាជអាវុធហត្ថ ,បញ្ជាការដ្ឋានអង្គរក្ស,បញ្ជាការដ្ឋានជាតិកំលាំងពិសេសប្រឆាំងភេវរកម្ម និងនារីរក្សាសន្តិភាពអង្គការសហប្រជាជាតិប្រមាណជិត៤០០នាក់ បានចូលរួម ។ ពិធីរំលឹកខួបលើកទី១០៥ ទិវានារីអន្តរជាតិ៨ មីនានៅឆ្នាំនេះគឺធ្វើឡើងក្នុងគោលបំណងរំលឹកពីប្រវត្តិនៃការតស៊ូទាមទារសិទ្ធិសេរីភាពរបស់នារីទូទាំងពិភពលោក ។ មិនតែប៉ុណ្ណោះជាសកម្មភាពជំរុញការលើកកំពស់ស្ថានភាពជីវភាពតំលៃឋានៈ តួនាទីនិងសិទ្ធិរបស់ស្រ្តីដែលជាការរួមចំណែកក្នុងការលើកកំពស់សមភាពយេនឌ័រនៅកម្ពុជា។ ដោយឡែកក្នុង ខ.ភ. ម មាននារីរាប់ពាន់នាក់បាន ស្ម័គ្រចិត្តចូលបំរើកងទ័ពនៅគ្រប់កងឯកភាពជំនាញបច្ចេកទេស សុខាភិបាល ក៏ដូចជាទ័ពប្រយុទ្ធ ហើយបានខិតខំប្រឹងប្រែងអស់ពីកំលាំងកាយចិត្តប្រាជ្ញាស្មារតីប្រកបដោយអំណត់ព្យាយាមពុះពារការលំបាក ដើម្បីចូលរួមចំណែកក្នុងបុព្វហេតុការពារឯករាជ្យជាតិអធិបតេយ្យ បូរណភាពដែនដី និងអភិវឌ្ឍន៏ជាតិមាតុភូមិ និងជាពិសេសបានចេញទៅបំពេញបេសកកម្មសន្តិភាពអង្គការសហប្រជាជាតិ ចូលរួមប្រកួតកីឡាជាលក្ខណៈអន្តរជាតិ ដោយបានទទួលលទ្ធផលនិងស្នាដៃយ៉ាងប្រសើរហើយបានចូលរួមចំណែកយ៉ាងសកម្មផងដែរក្នុងការអនុវត្តន៏កម្មវិធីនយោបាយនិងយុទ្ធសាស្ត្រ ចតុកោណរបស់រាជរដ្ឋាភិបាលបានយ៉ាងល្អ ។
   កន្លងមកដោយមានការយកចិត្តទុកដាក់ពីថ្នាក់ដឹកនាំក្រសួងការពារជាតិ, អគ្គបញ្ជាការនៃ ខ.ភ.ម ព្រមទាំងមេបញ្ជាការគ្រប់កងឯកភាពអំពីយេនឌ័រក្នុង ខ.ភ.ម លើកកំពស់ការយល់ដឹងអំពីទស្សនៈយេនឌ័រនិងមានការគាំទ្រកាន់តែខ្លាំងដល់ការបញ្ជា្របយេនឌ័រកាត់បន្ថយការរើសអើងគ្រប់រូបភាពហើយបានចាត់ទុកនារីជាការងារស្នូលរបស់អង្គភាពផងដែរធ្វើឲ្យស្ថានភាពស្ត្រីក្នុងខ.ភ.មកាន់តែប្រសើរឡើងជាបន្តបន្ទាប់ក្នុងនោះមាននារីខភមមានឱកាសទទួលបានឋានៈជាឧត្តមសេនីយ៍និងមានកាន់តួនាទីសំខាន់ៗក្នុងកងឯកភាពរបស់ខ្លួនជាច្រើនរូបទៀតផង ។
   ក្នុងឱកាសនោះ ឯ.ឧ នាយឧត្តមសេនីយ៍ ទៀ បាញ់ បានមានប្រសាសន៏ថា៖ បច្ចុប្បន្ននេះស្ត្រីកម្ពុជាបានដើរតួនាទីយ៉ាងសំខាន់ទាំងក្នុងវិស័យនយោបាយ, តុលាការ និងជាអ្នកដឹកនាំ ក្នុងវិស័យឯកជនហើយបានទទួលការគាំទ្រយ៉ាងពេញលេញនិងការផ្ដល់តំលៃដល់ស្រ្តីខ្មែរពីព្រះមហាក្សត្រ,ព្រឹទ្ធិសភា រដ្ឋសភា និងរាជរដ្ឋាភិបាល ។ ឯ.ឧ បានបន្តថា៖ រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌឹតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធិបណ្ឌឹត ប៊ុន រ៉ានី ហ៊ុន សែន បានខិតខំយ៉ាងខ្លាំងក្លាដើម្បីកែប្រែឥរិយាបទណាដែលរារាំងសិទ្ធិសមភាពរវាងបុរសនិងស្រ្តីតាមរយៈការដាក់ចេញនូវវិធាន ការនានាដូចជាបង្កើនសមមាត្រនៃការចូលរួមរបស់ស្ត្រីក្នុងស្ថាប័នជាតិពង្រឹងតួនាទីស្រ្តីក្នុងមុខងារនយោបាយចូលរួមក្នុងរដ្ឋបាលសាធារណៈពង្រឹងការឈរឈ្មោះតាមបណ្តាភូមិ ឃុំ សង្កាត់ទូទាំងប្រទេស ។ឯ.ឧ ឧបនាយករដ្ឋមន្ត្រី ក៏បានសំដែងនូវការកោតសរសើរចំពោះយុទ្ធនារីគ្រប់រូបដែលបានខិតខំប្រឹងប្រែងក្នុងការបំពេញភារកិច្ច ប្រកបដោយឆន្ទៈមុះមុតព្យាយាមពុះពារគ្រប់ឧបសគ្គដើម្បី រួមចំណែកក្នុងបុព្វហេតុការពារឯករាជ្យ សន្តិភាព ការពារបូរណភាពដែនដី ការអភិវឌ្ឍន៏និងសេចក្ដីសុខក្សេមក្សាន្ដរបស់ប្រជាពលរដ្ឋ ។ ឯ.ឧ បានសំដែងនូវការគោរពនិងដឹងគុណស្ត្រីទូទាំងប្រទេស ដែលបានលះបង់ប្តី . សី កូនចៅ និងសាច់ញាតិចូលបំរើក្នុងជួរកងទ័ព ។ ទាក់ទងទៅនឹងប្រធានបទ (វិនិយោគលើសមភាពយេនឌ័រ ដើម្បីកិច្ចអភិវឌ្ឍន៏ប្រកបដោយចីរភាព) ឯ.ឧ បានកត់ សំគាល់អំពីប្រសិទ្ធិភាពនៃការអប់រំចំណេះដឹង សីលធម៌ និងគុណធម៌ សំរាប់ជាប្រយោជន៏ដល់ការអភិវឌ្ឍន៏ស្រ្តីគឺចំពោះមុខទាមទារឲ្យស្ត្រីយើងខិតខំលើកកំពស់សមត្ថភាពរបស់ខ្លួនដើម្បី សមភាព ការងារជាមួយបុរស។ ជាចុងក្រោយ ឯ.ឧ ក៏បានផ្ដាំផ្ញើដល់នារីខ.ភ.ម ត្រូវបន្តចូលរួមចំណែកក្នុងកិច្ចការពារជាតិមាតុភូមិ ,ហើយបានផ្ដាំផ្ញើដល់ មេបញ្ជាការគ្រប់លំដាប់ថ្នាក់ត្រូវចិត្តទុកដាក់ផ្ដល់ឱកាស និងបទពិសោធន៏ការងារដល់នារី, ត្រូវសហការជាមួយកំលាំងសមត្ថកិច្ចបង្ក្រាបអំពើជួញដូរមនុស្សពិសេសស្រ្តីនិងកុមារ , ទប់ស្កាត់រាល់អំពើហឹង្សាការរើសអើងក្នុងគ្រួសារ ៕