ឯកឧត្តម ទៀ បាញ់ ជួបពិភាក្សាការងារជាមួយ ឯកឧត្តម Dmitry Tivetkov ឯកអគ្គរដ្ឋទូតសហព័ន្ធរុស្សីប្រចាំកម្ពុជា - ព័ត៌មានក្នងស្រុក

ព័ត៌មាន

ឯកឧត្តម ទៀ បាញ់ ជួបពិភាក្សាការងារជាមួយ ឯកឧត្តម Dmitry Tivetkov ឯកអគ្គរដ្ឋទូតសហព័ន្ធរុស្សីប្រចាំកម្ពុជា

    កាលពីរសៀលថ្ងៃទី០២ ខែមីនា កន្លងទៅនេះ ឯកឧត្តម ឌីមីទ្រី ធីវិកកូរ ឯកអគ្គរដ្ឋទូតសហព័ន្ធរុស្សីប្រចាំនៅកម្ពុជាបានចូលជួបពិភាក្សាការងារជាមួយ ឯកឧត្តម ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នៅទីស្តីការក្រសួងការពារជាតិ ។
   ជំនួបរវាង ឯកឧត្តម ឧបនាយករដ្ឋមន្រ្តី ទៀ បាញ់ ជាមួយឯកឧត្តម អគ្គរដ្ឋទូតសហព័ន្ធរុស្សីនាពេលនេះបានពិភាក្សាផ្តោតទៅលើការរៀបចំដំណើរទស្សនៈកិច្ចរបស់គណៈប្រតិភូក្រសួងការពារជាតិកម្ពុជា ដឹកនាំដោយ ឯកឧត្តម ទៀ បាញ់ អញ្ចើញទៅបំពេញទស្សនៈកិច្ចជាផ្លូវការ និងជាមិត្តភាពនៅសហព័ន្ធរុស្សីនាចុងខែមេសា ឆ្នាំ២០១៦ ខាងមុខនេះ ។ ឆ្លើយតបទៅតាមការអញ្ជើញរបស់រដ្ឋមន្រ្តីក្រសួងការពារជាតិសហព័ន្ធរុស្សី ។ ឯកឧត្តម អគ្គរដ្ឋទូតសហព័ន្ធរុស្សី បានចាត់ទុកដំណើរទស្សនកិច្ចរបស់គណៈប្រតិភូក្រសួងការពារជាតិកម្ពុជា នៅសហព័ន្ធរុស្សីនាពេលខាងមុខនេះថា នឹងនាំមកនូវផលប្រយោជន៍ដល់ប្រទេសទាំងពីរ ។ ឯកឧត្តម ឌីមីទ្រី ធីវិកកូរ បានឲ្យដឹងថានៅចុងខែមេសា ឆ្នាំ២០១៦ សហព័ន្ធរុស្សី និងរៀបចំធ្វើសន្និសិទសន្តិសុខ អន្តរជាតិលើកទី៥ នៅទីក្រុងម៉ូស្គូ និងនៅក្នុងខែកញ្ញានឹងមានរៀបចំតាំងពិព័ណ៍សម្ភារៈយោធាទំនើបដែលនៅក្នុងព្រឹត្តិការណ៍នេះមានការចូលរួមពីបណ្តាប្រទេសជាច្រើន ។
   មានមតិឆ្លើយតបវិញ ឯកឧត្តម ទៀ បាញ់ បានបញ្ជាក់ថា ដំណើរទស្សនៈកិច្ចរបស់គណៈប្រតិភូក្រសួងការពារជាតិកម្ពុជានៅសហព័ន្ធរុស្សីខាងមុខ នឹងនាំមកនូវការពង្រឹងនិងទំនាក់ទំនងកិច្ចសហប្រតិបត្តិការរវាងកងទ័ពប្រទេសទាំងពីរ កម្ពុជា និងសហព័ន្ធរុស្សីឲ្យបានកាន់តែប្រសើរឡើងថែមទៀត ។ ឯកឧត្តម ឧបនាយករដ្ឋមន្រ្តី បានចាត់ទុកសន្និសិទ សន្តិសុខ អន្តរជាតិលើកទី៥ នៅទីក្រុងម៉ូស្គូដែលសហព័ន្ធរុស្សីរៀបចំឡើងនោះគឺមានសារៈ សំខាន់សម្រាប់បណ្តាប្រទេសដែលបានអញ្ជើញចូលរួមសម្តែងនូវទស្សនៈរបស់គេដែលទាក់ទងទៅនឹងបញ្ហាសន្តិសុខដែលកំពុងកើតមានឡើងនាពេលបច្ចុប្បន្ននេះ ៕