ឯ.ឧ ទៀ បាញ់ បើកការដ្ឋានសាងសង់វិមានឈ្នះឈ្នះ - ព័ត៌មានក្នងស្រុក

ព័ត៌មាន

ឯ.ឧ ទៀ បាញ់ បើកការដ្ឋានសាងសង់វិមានឈ្នះឈ្នះ

       ដោយបានការឯកភាពពីរាជរដ្ឋាភិបាលនាព្រឹកថ្ងៃទី២៥ខែកុម្ភៈឆ្នាំ២០១៦គណៈកម្មាការវិមានអនុស្សាវរីយ៍នយោបាយឈ្នះឈ្នះនិងការបញ្ចប់សង្គ្រាមស៊ីវិលនៅកម្ពុជារៀបចំពិធីបញ្ចុះបឋមសិលានិងបើកការដ្ឋានសាងសង់វិមានឈ្នះឈ្នះជាផ្លូវការដែលប្រព្រឹត្តទៅក្រោមអធិបតីភាពឯ.ឧទៀ.បាញ់ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិនិងលោកជំទាវតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា។
       វិមានអនុស្សាវរីយ៍នយោបាយឈ្នះឈ្នះមានទីតាំងស្ថិតនៅសង្កាត់បាក់ខែងខ័ណ្ឌជ្រោយចង្វារាជធានីភ្នំពេញនៅខាងមុខពហុកីឡាដ្ឋានមរតតេជោហើយត្រូវបានសាងសង់លើផ្ទៃដីប្រមាណជាង០៨ហិចតា។បើយើងឈរនៅចំកណ្តាលធៀបរវាងវិមានឈ្នះឈ្នះជាមួយនឹងពហុកីឡាដ្ឋានមរតកតេជោគឺយើងអាចមើលឃើញពីទិដ្ឋភាពរួមដ៏ស្រស់ស្អាតរបស់អគារទាំងពីរនោះរត់ត្រួតគ្នានៅលើអក្សមេតែមួយ។
      នៅក្នុងរបាយការណ៍របស់ឯ.ឧ នាយឧត្តមសេនីយ៍ ណឹម សុវត្ថិ អគ្គនាយកនយោបាយនិងកិច្ចការបរទេសនិងជាប្រធានក្រុមការងារសាងសង់វិមានឈ្នះឈ្នះបានរាយការណ៍ជូនអង្គពិធីជ្រាបថាចាប់តាំងពីបង្កើតគណៈកម្មាការសាងសង់វិមាននយោបាយឈ្នះឈ្នះរហូតមកដល់បច្ចុប្បន្នមានរយៈពេល៥០៤ថ្ងៃគត់ដែលគណៈកម្មាការបានខិតខំធ្វើការប្រជុំពិភាក្សាជាបន្តបន្ទាប់ព្រមទាំងចុះសិក្សាស្រាវជ្រាវឯកសារនិងរចនាបថតាមប្រាង្គប្រាសាទនានាទាំងក្នុងនិងក្រៅប្រទេសផងដែរ។
      នៅក្នុងសន្ទរកថារបស់ឯ.ឧ ឧបនាយករដ្ឋមន្ត្រី ទៀ បាញ់ បានគូសបញ្ជាក់ថាជាច្រើនជំនាន់មកហើយព្រះរាជាណាចក្រកម្ពុជាយើងពុំធ្លាប់ទទួលបានសន្តិភាពពេញលេញដូចសម័យសព្វថ្ងៃនេះទេជួនកាលមានការបែកបាក់ទៅជាពីរជាបីភាគីដែលនាំឲ្យប្រទេសជាតិមានជម្លោះនឹងគ្នាឥតឈប់ឈរ។នៅក្នុងដំណាក់កាលចុងក្រោយគឺដោយសាររបបប្រល័យពូជសាសន៍ ប៉ុលពត អៀងសារី បានធ្វើឲ្យប្រទេសកម្ពុជាមានមហន្តរាយយ៉ាងធ្ងន់ធ្ងរនោះទើបមានព្រឹត្តិការណ៍ថ្ងៃទី២ធ្នូ១៩៧៨និងថ្ងៃទី៧មករា១៩៧៩រហូតដល់១៩៩៨ដែលជាការអនុវត្តនយោបាយឈ្នះឈ្នះនិងការបញ្ចប់សង្គ្រាមស៊ីវិលនៅកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហារសេនាបតីតេជោ ហ៊ុនសែន នាយករដ្ឋមន្ត្រី។
      ជាសមិទ្ធផលនៃនយោបាយឈ្នះឈ្នះ យើងទទួលបានសន្តិភាពពេញលេញ ដែលជាកត្តាចម្បងសម្រាប់ជំរុញការអភវឌ្ឍន៍ប្រទេសជាតិលើគ្រប់វិស័យនិងការធ្វើសមាហរណកម្មកម្ពុជា ទៅក្នុងកិច្ចការតំបន់និងអន្តរជាតិដោយជោគជ័យហើយបានប្រែក្លាយជីវភាពរបស់ប្រជាជនពីជីវភាពក្រីក្រមកជាប្រជាជនមានចំណូលកម្រិតមធ្យម។
      ឯ.ឧ ទៀ បាញ់ បានសង្កត់ធ្ងន់ថាបទពិសោធន៍ជាប្រវត្តិសាស្ត្រជាច្រើនជំនាន់ក្នុងអតីតកាលនិងសមិទ្ធផលសង្គមជាតិកន្លងមកថ្មីៗនេះគឺជាមូលដ្ឋានដ៏សំខាន់សម្រាប់ឲ្យយើងរួមសាមគ្គីគ្នា ដើម្បីកសាងវិមាននយោបាយឈ្នះឈ្នះ នាថ្ងៃនេះ ដែលបានកើតឡើក្រោមគំនិតផ្តួចផ្តើមដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុនសែន ដើម្បីបង្ហាញ និងរំលឹកដល់វីរភាព និងស្នាដៃរបស់វីរជនដែលបានចំណាយសាច់ស្រស់ឈាមស្រស់និងភាពឈ្លាស់វៃរបស់ថ្នាក់ដឹកនាំក្នុងការស្វែងរកសន្តិភាព។
      វិមាននយោបាយឈ្នះឈ្នះនេះនិងជាមោទនភាពជាតិខ្មែរដោយសារវិមាននិងបរិវេណនេះនឹងក្លាយជាពិភពខ្មែរខ្នាតតូចដែលនឹងបង្ហាញនូវចំណុចសំខាន់នៃប្រវត្តិសាស្ត្រជាតិ និងវប្បធម៌ជាតិជាង២០០០ឆ្នាំ ជាពិសេសបង្ហាញនូវបញ្ញាញាណជាតិខ្មែរ អំពីមូលដ្ឋានទស្សនវិជ្ជាសុខដុមនីយ៍កម្មក្នុងការគ្រប់គ្រងសង្គមជាតិយើងតាំងពីសម័យនគរគោកធ្លកនគរភ្នំចេនឡាអង្គរនិងក្រោយអង្គរ។
      វិមានឈ្នះឈ្នះនេះក៏នឹងបង្ហាញផងដែរនូវវប្បធម៌កតញ្ញូនិរន្តរភាពនៃសង្គមជាតិក្នុងគ្រប់វិស័យសុខដុមនីយ៍កម្មខាងជនជាតិនិងសាសនារួមទាំងការអភិវឌ្ឍនៃទំនាក់ទំនងរវាងវប្បធម៌ធម្មជាតិនិងមនុស្សព្រមទាំងទំនាក់ទំនងរវាងអតីតកាលបច្ចុប្បន្ននិងអនាគត។នៅក្នុងនោះមួយផ្នែកក៏ទំនាក់ទំនងទៅនឹងសម័យសង្គមរាស្ត្រនិយមតភ្ជាប់មកដល់សម័យសាធារណរដ្ឋនិងសម័យប៉ុលពត រួមទាំងដំណាក់កាលក្នុងអំឡុងឆ្នាំ១៩៧៩-១៩៨៩ និងដំណាក់កាលឆ្នាំ១៩៩១-១៩៩៣ ព្រមទាំងតភ្ជាប់មកដល់ដំណាកើកាលនៃនយោបាយឈ្នះឈ្នះដែលជាបរិបទសន្តិភាពអភិវឌ្ឍន៍មិនធ្លាប់មានក្នុងប្រវត្តិសាស្ត្របង្រួបបង្រួមទឹកដីដែលដឹកនាំនិងកសាងស្ថាបនាប្រកបដោយគតិបណ្ឌិតដ៏ខ្ពង់ខ្ពស់ដ៏ខ្ពង់ខ្ពស់របស់ សម្តេចតេជោ ហ៊ុនសែន ផ្ទាល់។
      តាមផែនការដែលបានគ្រោងទុកការរៀបចំគម្រោងប្លង់មេនៃវិមានឈ្នះឈ្នះត្រូវបានចែកចេញជា០៣តំបន់តំបន់ទី១បង្ហាញពីសុខដុមនីយ៍កម្មប្រវត្តិសាស្ត្រខ្មែរតំបន់ទី២សន្តិភាពពេញលេញតាមរយៈនយោបាយឈ្នះឈ្នះនិងតំបន់ទី៣សមិទ្ធផលនានាដែលទទួលបានពីនយោបាយឈ្នះឈ្នះចាប់តាំងពីឆ្នាំ១៩៩៨ ២០១៨។សំណង់នេះត្រូវបានសាងសង់ឡើងមានការចូលរួមពីគ្រប់មជ្ឈដ្ឋានទាំងធនធានគំនិតនិន្នាការនយោបាយឡើយហើយសំណង់នេះនឹងប្រែក្លាយទៅជាសំណង់ប្រវត្តិសាស្ត្រជាតិគ្រប់ជំនាន់។
      ឯ.ឧ ឧបនាយករដ្ឋមន្ត្រី ទៀ បាញ់ បានបញ្ជាក់ច្បាស់ថាសំណង់វិមានឈ្នះឈ្នះនេះនឹងមានការចូលរួមប្រកួតប្រជែងប្រកបដោយតម្លាភាពប្រសិទ្ធភាពក្នុងការរចនារូបគំនូរសម្រាប់កសាងរូបចម្លាក់នៅវិមានឈ្នះឈ្នះដែលជាការកសាងប្រវត្តិសាស្ត្រនៃប្រជាជាតិខ្មែរដោយខ្មែរខ្លួនឯងដែលមានភារកិច្ចបង្កើតវីរជនវីរនារីជាតិឲ្យបានកាន់តែច្រើនសម្រាប់ថែរក្សាសន្តិភាព និងការអភិវឌ្ឍន៍ប្រទេសជាតិប្រកបដោយចីរភាពនាពេលអនាគត។សំណង់ក៏នឹងរំលេចចេញនូវការកសាងវប្បធម៌សុខដុមនីយ៍កម្មនៃសាសនាជនជាតិទំនាក់ទំនងនៃវប្បធម៌ប្រវត្តិសាស្ត្រធម្មជាតិនិងមនុស្សនយោបាយសន្តិភាពនិងនយោបាយទឹក។ល។ដើម្បីជំរុញឲ្យកូនខ្មែរសម័យបច្ចុប្បន្នចេះបន្តការកសាងស្នាដៃពីដូនតាដូចសម័យមហានគរ។
    ប្រមជាមួយនេះវិមានឈ្នះឈ្នះក៏ផ្ទុកនូវចំណេះដឹងប្រវត្តិសាស្ត្រសម្រាប់ភ្ញៀវជាតិអន្តរជាតិដើម្បីស្វែងយល់អំពីសន្តិភាពដែលកម្ពុជាកំពុងមានសព្វថ្ងៃ។ចំណុចនេះនឹងលើកកិត្យានុភាពកម្ពុជាមួយកម្រិតថែមទៀតពីព្រោះនយោបាយឈ្នះឈ្នះរបស់សម្តេចតេជោ ហ៊ុនសែន នាយករដ្ឋមន្ត្រីបាននាំសន្តិភាពពេញលេញមកឲ្យកម្ពុជាខណៈដែលប្រទេសជាតិជាច្រើនក្នុងតំបន់និងសកលលោកមិនទាន់អាចបញ្ចប់សង្គ្រាមស៊ីវិល។