កាលពីររសៀលថ្ងៃអង្គារ ទី១៤ ខែវិច្ឆិកា ឆ្នាំ២០២៣ កន្លងទៅថ្មីៗនេះ នៅទីស្ដីការក្រសួងការពារជាតិ នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ បានអនុញ្ញាតឲ្យ លោកវរសេនីយ៍ឯក អេឌា ម៉ាសគេល (Eddie MASKEEL) សេនានុព័ន្ធយោធា ចក្រភពអង់គ្លេសថ្មី ប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងបង្ហាញមុខពិភាក្សាការងារ ក្នុងឱកាសដែលរូបលោកបានមកបំពេញបេសកម្មការទូតយោធានៅកម្ពុជា។
ក្នុងជំនួបនោះ នាយឧត្តមសេនីយ៍ នាង ផាត បានស្វាគមន៍ចំពោះបេសកកម្មការទូតយោធារបស់លោក វរសេនីយ៍ឯក អេឌា ម៉ាសគេល (Eddie MASKEEL) សេនានុព័ន្ធយោធាថ្មីចក្រភពអង់គ្លេស ប្រចាំកម្ពុជា។ ដែលឯកឧត្តម រដ្ឋលេខាធិការប្រចាំការ បានបញ្ជាក់ថា៖ តាមរយៈនៃការមកបំពេញបេសកម្មការទូតយោធារបស់លោក សេនានុព័ន្ធយោធាថ្មី ចក្រភពអង់គ្លេសនៅកម្ពុជា គឺពិតជាបានពង្រឹងពង្រីកទំនាក់ទំនង រវាងកងទ័ពប្រទេសទាំងពីរ កម្ពុជា-អង់គ្លេស កាន់តែជិតស្និទ្ធនឹងល្អប្រសើរ ពិសេសបានចូលរួមចំណែកក្នុងការថែរក្សាសន្តិភាពស្ថិរភាព នយោបាយ ក្នុងតំបន់ និងនៅលើសាកលលោក។
លោក អេឌា ម៉ាសគេល (Eddie MASKEEL) បានសម្ដែងនូវការអំណរអរគុណ ចំពោះ ឯកឧត្តមរដ្ឋលេខាធិការប្រចាំការ ក្រសួងការពារជាតិ រួមនិងថ្នាក់ដឹកនាំ នៃកងយោធពលខេមរភូមិន្ទទាំងអស់ ដែលបានផ្ដល់ពេលវេលាដ៏សមគួរអនុញ្ញាតឲ្យរូបលោក និងសហការី បានចូលជួបសម្ដែងការគួរសមបង្ហាញមុខ និងពិភាក្សាការងារ។ ក្នុងឱកាសនេះលោក អេឌា ម៉ាសគេល (Eddie MASKEEL) បានសម្ដែងនូវក្តីសប្បាយរីករាយ និងចូលរួមអបអរសាទរ ជាមួយកងទ័ព និងប្រជាជនកម្ពុជា ចំពោះភាពជោគជ័យ នៃការបញ្ចប់ការសិក្សារបស់និស្សិតយោធាកម្ពុជា ជាលើកទីមួយ នៅសាលាយោធាអង់គ្លេស តាមរយៈនៃកិច្ចសហប្រតិបត្តិការដ៏ល្អ រវាងកងទ័ពប្រទេសទាំង២។ ជាមួយគ្នានេះដែរ លោកក៏បានសូមអរគុណដល់កម្ពុជា តាមរយៈកិច្ចសហប្រតិបត្តិការទំនាក់ទំនង រវាងកងទ័ពប្រទេសទាំងពីរផងដែរ ដែលបានជំរុញឲ្យការចូលចតធ្វើទស្សនកិច្ចរបស់កប៉ាល់កងទ័ពជើងទឹក ចក្រភពអង់គ្លេស កាលពីខែកុម្ភៈ ឆ្នាំ២០២៣ កន្លងទៅនៅកំពង់ផែរបស់ប្រទេសកម្ពុជា ប្រកបដោយជោគជ័យ។ លោកបញ្ជាក់ថា៖ អង់គ្លេសសង្ឃឹមថា យើងមានដំណើរទស្សនកិច្ចមួយទៀត នៅក្នុងឆ្នាំ២០២៥ ខាងមុខរបស់នាវាចក្រភពអង់គ្លេស មកកាន់កំពង់ផែខេត្តព្រះសីហនុ របស់ប្រទេសកម្ពុជា ជាថ្មីម្ដងទៀត។ លោក អេឌា ម៉ាសគេល (Eddie MASKEEL) បានបន្ថែមថា ដូចដែលថ្នាក់ដឹកនាំចក្រភពអង់គ្លេសបានពិភាក្សាជាមួយ សម្ដេចនាយករដ្ឋមន្ត្រីកម្ពុជា ថាយើងចង់មានការហ្វឹកហាត់រួមគ្នាមួយ រវាងកងទ័ពជើងទឹកចក្រភពអង់គ្លេស ជាមួយនិងកងទ័ពជើងទឹកមូលដ្ឋានសមុទ្ររាម របស់កម្ពុជា ប៉ុន្តែលោកយល់ឃើញថាមិនទាន់អាចធ្វើទៅបានទេ ហើយកងទ័ពចក្រភពអង់គ្លេស ក៏មានសញ្ចេតនា និងបន្តការគាំទ្រសម្រាប់ការងារដោះមីនផងដែរ នាពេលបច្ចុប្បន្ន និងទៅថ្ងៃអនាគត។
តាមរយៈការជួបពិភាក្សា រវាងលោកជាមួយថ្នាក់ដឹកនាំ នៃមជ្ឈមណ្ឌលជាតិថែរក្សាសន្តិភាព បោស សម្អាតមីន និងកាកសំណល់សង្គ្រាម របស់កម្ពុជា។ លោក អេឌា ម៉ាសគេល(Eddie MASKEEL) បានបញ្ជាក់អំពីការគាំទ្ររបស់អង់គ្លេស ដើម្បីជួយឲ្យកម្ពុជាអស់គ្រាប់មីននៅក្នុងឆ្នាំ២០២៥ ខាងមុខនេះ។ លោក អេឌា ម៉ាសគេល(Eddie MASKEEL) បានជម្រាបជូន ឯកឧត្តម រដ្ឋលេខាធិការប្រចាំការផងដែរថា៖ នៅថ្ងៃនេះលោកក៏បានជួបប្រជុំផងដែរជាមួយខាង នាយកដ្ឋានទំនាក់ទំនងអន្តរជាតិកងទ័ពកម្ពុជា អំពីបញ្ហានេះ។
ជាការឆ្លើយតប ឯកឧត្តម នាង ផាត បានបញ្ជាក់ថា៖ ចំពោះទំនាក់ទំនងការទូត រវាងកងទ័ព នៃប្រទេសយើងទាំងពីរ តាមរយៈការចូលចតរបស់នាវាកងទ័ពជើងទឹក ចក្រភពអង់គ្លេស កាលពីខែកុម្ភៈ ឆ្នាំ២០២៣ កន្លងទៅនេះ នៅកំពង់ផែខេត្តព្រះសីហនុ ឯកឧត្តម បានជួបជាមួយកាប់ពីទែនកាប៉ាល់ និងឯកអគ្គរដ្ឋទូតអង់គ្លេស ប្រចាំកម្ពុជា ដែលកាលនោះ ឯកឧត្តម បញ្ជាក់ថា ការចូលចតរបស់នាវាកងទ័ពជើងទឹកចក្រភពអង់គ្លេស នៅកំពង់ផែរបស់កម្ពុជានៅពេលនោះ កម្ពុជាមានមោទនភាពណាស់ ដែលបានបង្ហាញឲ្យឃើញពីទំនាក់ទំនងដ៏ល្អក្នុងការផ្សារភ្ជាប់ទំនាក់ទំនង រវាងកងទ័ពទាំងពីរកម្ពុជា ចក្រភពអង់គ្លេស។ ឯកឧត្តម នាង ផាត បានសម្ដែងការអរគុណចំពោះចក្រភពអង់គ្លេស ដែលបានផ្ដល់អាហារូបករណ៍យោធា និងជម្រុញឲ្យនិស្សិតយោធាកម្ពុជា បានបញ្ចប់ការសិក្សាប្រកបដោយជោគជ័យ។ ឯកឧត្តម បញ្ជាក់ថា៖ ដើម្បីឱ្យទំនាក់ទំនង រវាងកងទ័ពប្រទេសយើងទាំងពីរមានទំនាក់ទំនងកាន់តែល្អ ឯកឧត្ដមបានស្នើឲ្យសេនានុព័ន្ធយោធាថ្មីបន្តកិច្ចសហប្រតិបត្តិការ ដែលធ្លាប់មានពីលោកសេនានុព័ន្ធចាស់បន្តកិច្ចការនេះ អោយកាន់តែល្អ ថែមទៀត។
លោក អេឌា ម៉ាសគេល (Eddie MASKEEL) បានលើកឡើងថា ទាក់ទងជាមួយបញ្ហាដែលឯកឧត្តម បានលើកឡើង ទាក់ទងទៅនឹងអព្យាក្រឹត្យភាពរបស់អាស៊ាន ក៏ដូចជាកម្ពុជា ចក្រភពអង់គ្លេស គោរពការប្តេជ្ញាចិត្តរបស់អាស៊ាន និងការសម្រេចចិត្តរបស់កម្ពុជាហើយក៏ ដើម្បីក្លាយជាដៃគូសន្ទនា រវាងអាស៊ានជាមួយចក្រភពអង់គ្លេស ផងដែរ។ លោក អេឌា ម៉ាសគេល(Eddie MASKEEL) ចក្រភពអង់គ្លេសបានមើលឃើញអំពីការផ្សព្វផ្សាយអត្ថបទថ្មីៗមួយ ដែលបានចុះអំពីការវាយប្រហារតាមរយៈប្រព័ន្ធអនឡាញមកកាន់ប្រទេសកម្ពុជា ដែលបញ្ហានេះ លោកបានពិភាក្សាជាមួយនាយកដ្ឋានទាក់ទងអន្តរជាតិរបស់កងទ័ពកម្ពុជា ចំពោះបញ្ហានេះហើយកងទ័ពចក្រភពអង់គ្លេស រីករាយនឹងសហការផ្ដល់ការជួយគាំទ្រចំពោះបញ្ហានេះ។
ឯកឧត្តម នាង ផាត បានអបអរសាទរចំពោះកិច្ចសហប្រតិបត្តិការទាំងឡាយ របស់ចក្រភពអង់គ្លេសសម្រាប់កម្ពុជា តែ ឯកឧត្ដមបានស្នើដល់សេនានុព័ន្ធយោធាអង់គ្លេស ឲ្យធ្វើការជាមួយនាយកដ្ឋានទាក់ទងអន្តរជាតិ របស់ក្រសួងការពារជាតិកម្ពុជា ហើយបញ្ហាទាំងឡាយនេះដែលពាក់ព័ន្ធ ដល់ប្រទេសកម្ពុជាហើយនាយកដ្ឋាននេះ នឹងរាយការណ៍ជូនឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ពិនិត្យ និងសម្រេចទាំងបញ្ហាវាយប្រហារតាមប្រព័ន្ធអនឡាញ បញ្ហាសន្តិសុខរួម និងតំបន់ ដើម្បីចូលរួមជាគំនិត ដល់បណ្ដាប្រទេសអាស៊ាន ដើម្បីពិនិត្យហើយ និងបន្តកិច្ចសហប្រតិបត្តិការ រវាងកងទ័ពប្រទេសយើងទាំងពីរបន្ថែមទៀតទៅតាមអ្វីដែលជាផលប្រយោជន៍របស់ប្រទេសទាំងពីរ គឺយើងត្រូវរួមគ្នាធ្វើឲ្យបានល្អ ដើម្បីចូលរួម ក្នុងការថែរក្សាសន្តិភាព សន្តិសុខ សណ្តាប់ធ្នាប់ ស្ថិរភាព នៅក្នុងតំបន់ និងក៏ដូចជាសកលលោក ពិសេសដើម្បីធ្វើឲ្យសន្តិសុខ និងសន្តិភាព នៅក្នុងឥណ្ឌូប៉ាស៊ីហ្វិក របស់អាស៊ីអាគ្នេយ៍មានសន្តិភាព ស្ថិរភាព វិបុលភាព ដោយគ្មានការគំរាមកំហែងពីមជ្ឈដ្ឋានណាមួយឡើយ។ ឯកឧត្តម នាង ផាត បានជូនពរឲ្យបេសកកម្មការទូតយោធារបស់ លោកវរសេនីយ៍ឯក អេឌា ម៉ាសគេល(Eddie MASKEEL) នៅកម្ពុជាទទួលបានជោគជ័យ ហើយឯកឧត្តម សន្យាថា នឹងបង្កគ្រប់លក្ខណៈសម្បត្តិសម្រាប់បេសកម្មមួយនេះ ៕
