ឯកឧត្តម ប៊ុន ឡឺត រដ្ឋលេខាធិការក្រសួងការពារជាតិ ជួបសវនាការជាមួយមេបញ្ជាការកងទ័ពជើងគោក នៃកងទ័ពរំដោះប្រជាជនចិន
នៅព្រឹកថ្ងៃទី០៨ ខែវិច្ឆិកា ឆ្នាំ២០២៣ នៅទីស្ដីការក្រសួងការពារជាតិ នាយឧត្តមសេនីយ៍ ប៊ុន ឡឺត រដ្ឋលេខាក្រសួងការពារជាតិ តំណាងនាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានទទួលជួបធ្វើសវនាការជាមួយ នាយឧត្តមសេនីយ៍ លី ឈីវមីង (LI QIAOMING) មេបញ្ជាការកងទ័ពជើងគោក កងទ័ពរំដោះប្រជាជនចិន ក្នុងឱកាសដែលឯកឧត្តមដឹកនាំគណៈប្រតិភូមកបំពេញទស្សនកិច្ចផ្លូវការ នៅកម្ពុជា។
ក្នុងជំនួបនោះ ភាគីទាំងពីរបានបង្ហាញនូវមោទភាព ចំពោះទំនាក់ទំនងក្នុងប្រវត្តិសាស្រ្តជាង ២.០០០ឆ្នាំ រវាងកម្ពុជា-ចិន ក៏ដូចជាការបង្កើតចំណងការទូតផ្លូវការក្នុងឆ្នាំ១៩៥៨ ដែលជាស្នាមព្រះហស្ថ និងស្នាដៃដ៏ឧត្តុង្គឧត្តម ខ្ពង់ខ្ពស់បំផុតរបស់ព្រះបរមរតនកោដ្ឋ និងថ្នាក់ដឹកនាំចិនគ្រប់ជំនាន់ ដែលត្រូវបានពូនជ្រុំដោយ សម្ដេចតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រនៃកម្ពុជា និងជាអតីតនាយករដ្ឋមន្ត្រី នៃកម្ពុជា។
នាយឧត្តមសេនីយ៍ ប៊ុន ឡឺត បានបញ្ជាក់ថា៖ រាជរដ្ឋាភិបាលកម្ពុជា អាណត្តិទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជាប្រមុខ គឺកម្ពុជានៅតែបន្តផ្តល់សារៈសំខាន់ខ្ពស់ដល់ការពង្រឹង និងពង្រីកទំនាក់ទំនង ជាមួយមិត្តចិន ទាំងក្នុងក្របខ័ណ្ឌទ្វេភាគី និងពហុភាគី ហើយគោលនយោបាយមេត្រីភាព ចំពោះមិត្តចិន នឹងមិនប្រែប្រួលឡើយ គឺនៅតែដើរតាមបន្ទាត់នយោបាយ និងគោលគំនិតដឹកនាំដ៏ខ្ពង់ខ្ពស់របស់សម្តេចតេជោ ហ៊ុន សែន គឺគោរពនូវគោលនយោបាយចិនតែមួយ បន្តពង្រឹងនូវសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ បន្តកសាងសហគមន៍វាសនារួមប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់ ហើយនឹងបន្តអនុវត្តនូវ កិច្ចសហប្រតិបត្តិការត្បូងពេជ្រ។
ជាការឆ្លើយតប នាយឧត្តមសេនីយ៍ លី ឈីវមីង (LI QIAOMING) បានចូលរួមអបអរសាទរ ជាមួយរាជ រដ្ឋាភិបាល កងទ័ព-ប្រជាជនកម្ពុជា ទាំងមូល ក្នុងឱកាសរំលឹកខួបលើកទី៧០ ទិវាបុណ្យឯករាជ្យជាតិ និងអបអរសាទរថ្ងៃខួបកំណើត នៃកងយោធពលខេមរភូមិន្ទ ០៩ វិច្ឆិកា ១៩៥៣-០៩ វិច្ឆិកា ២០២៣។ ពាក់ព័ន្ធដល់កិច្ចសហប្រតិបត្តិការយោធា ភាគីទាំងពីរ បានវាយតម្លៃខ្ពស់ចំពោះលទ្ធផលផ្លែផ្កាជាច្រើន ដែលសម្រេចបានកន្លងមកនៅក្នុងការអប់រំ បណ្តុះបណ្តាលធនធានមនុស្ស ការផ្លាស់ប្តូរគណៈប្រតិភូគ្រប់កម្រិត និងការផ្តល់ជំនួយឧបត្ថម្ភផ្នែកសម្ភារៈ ជាដើម ព្រមទាំងបានកត់សម្គាល់អំពីសារៈសំខាន់ចាំបាច់ ក្នុងការបន្តពង្រឹង និងពង្រីកកិច្ចសហប្រតិបត្តិការដែលមានស្រាប់ បន្តសហការរួមគ្នា បន្តអនុវត្តផែនការស្របតាមស្មារតី MOU ដោយឈរលើមូលដ្ឋាន នៃទំនាក់ទំនងរឹងមាំ មិត្តភាពជាប្រពៃណី និងប្រកបដោយទំនុកចិត្ត រវាងប្រទេស និងប្រជាជនទាំងពីរ ដើម្បីផលប្រយោជន៍ទៅវិញទៅមក ក៏ដូចជាការរួមចំណែកថែរក្សាសន្តិភាព និងសន្តិសុខនៅក្នុងតំបន់ ដើម្បីចូលរួមចំណែកក្នុងការគាំទ្រដល់ដំណើការទៅមុខ នៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ក៏ដូចជាការកសាងសហគមន៍វាសនារួមកម្ពុជា-ចិន ឱ្យកាន់តែរឹងមាំ និងយូរអង្វែង។
គួរបញ្ជាក់ថា៖ ដំណើរទស្សនកិច្ចរបស់ នាយឧត្តមសេនីយ៍ លី ឈីវមីង (LI QIAOMING) មេបញ្ជាការកងទ័ពជើងគោក នៃកងទ័ពរំដោះប្រជាជនចិន នាពេលនេះ គឺជាដំណើរទស្សនកិច្ចផ្លូវការលើកទី១ ក្នុងប្រវត្តិសាស្រ្តទំនាក់ទំនងកងទ័ពជើងគោក នៃប្រទេសទាំងពីរកម្ពុជា-ចិន ដែលការនេះ នឹងក្លាយជាកម្លាំងចលករបន្ថែមទៀតក្នុងការជំរុញ និងលើកកម្ពស់ទំនាក់ទំនង រវាងកងទ័ពជើងគោក នៃប្រទេសទាំងពីរ ឱ្យកាន់តែសកម្ម ស៊ីជម្រៅ និងរឹងមាំ ៕
