ក្នុងឱកាសអញ្ជើញទៅបំពេញទស្សនកិច្ចជាផ្លូវការ និងជាមិត្តភាព នៅសាធារណរដ្ឋប្រជាមានិតចិន នៅថ្ងៃទី៣០ ខែតុលា ឆ្នាំ២០២៣ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ អមដោយ នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និង កិច្ចការបរទេសក្រសួងការពារជាតិ ព្រមទាំងនាយទាហានមួយចំនួនទៀត បានដឹកនាំគណៈប្រតិភូក្រសួងការពារជាតិចូលរួមក្នុងវេទិកា សៀងសាន លើកទី១០ ដែលបានប្រព្រឹត្តទៅនៅមជ្ឈមណ្ឌលសន្និសីទអន្តរជាតិ ទីក្រុងប៉េកាំង។ វេទិកា សៀងសាន លើកទី១០ ឆ្នាំ២០២៣ មានការអញ្ជើញចូលរួមពី ប្រមុខថ្នាក់ដឹកនាំការពារជាតិ និងកងទ័ព មកពីបណ្តាប្រទេសនៅអឺរុប អាហ្វ្រិក អាស៊ី និងប្រទេសក្នុងតំបន់អាស៊ាន ចូលរួមជាង ៦០ ប្រទេស។
ថ្លែងទៅកាន់ ក្នុងសម័យប្រជុំពេញអង្គលើកទី ១ ក្នុងវេទិកា សៀងសាន លើកទី១០ ស្តីពីទំនួលខុសត្រូវ របស់ប្រទេសធំៗ និងកិច្ចសហប្រតិបត្តិការសាកល ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រី ក្រសួងការពារជាតិ នៃព្រះរាជាណាចក្រកម្ពុជា បានសម្តែងនូវសេចក្តីសោមនស្សរីករាយ ដែលបានចូលរួមក្នុងវេទិកា សៀងសាន ទីក្រុងប៉េកាំងលើកទី ១០ ដែលជាវេទិកាដ៏សំខាន់ សម្រាប់ការប្តេជ្ញាចិត្តរួមរបស់យើង ក្នុងការលើកកម្ពស់ និងថែរក្សាសន្តិភាព សន្តិសុខ និងកិច្ចសហប្រតិបត្តិការ។ ឯកឧត្តម បានបញ្ជាក់ថា៖ ទិដ្ឋភាពសកលលោកកំពុងឆ្លងកាត់ការផ្លាស់ប្តូរយ៉ាងរហ័ស ដែលមិនធ្លាប់ឃើញពីមុនមក និងពោរពេញទៅដោយភាពមិនប្រាកដប្រជា ទាំងការប្រែប្រួលភូមិសាស្ត្រនយោបាយ និងការកើតឡើងនូវបញ្ហាប្រឈមផ្នែកសន្តិសុខ ដែលចេះតែរីកធំឡើងពីមួយថ្ងៃទៅមួយថ្ងៃ។ ការប្រកួតប្រជែងភូមិសាស្ត្រនយោបាយកាន់តែខ្លាំងឡើង ក្នុងចំណោមមហាអំណាចនានា កំពុងជំរុញឱ្យមានការផ្លាស់ប្តូរជាបន្តបន្ទាប់ នៅក្នុងទិដ្ឋភាពយុទ្ធសាស្ត្រក្នុងតំបន់ និងពិភពលោក ដោយស្ថានភាពនេះ បានដាក់សម្ពាធលើសន្តិភាព សន្តិសុខ និងវិបុលភាព។ ឯកឧត្តម ទៀ សីហា បានបញ្ជាក់ទៀតថា៖ តាមបទពិសោធន៍របស់កម្ពុជា យើងជឿជាក់យ៉ាងមុតមាំថា៖ ការសន្ទនា និងការទូតជាឧបករណ៍ដ៏មានប្រសិទ្ធភាពបំផុត ក្នុងការដោះស្រាយជម្លោះ។ ភាគីពាក់ព័ន្ធទាំងអស់ក្នុងជម្លោះ គួរតែធ្វើការទំនាក់ទំនងគ្នាទៅវិញទៅមក ប្រកបដោយការស្ថាបនា ដើម្បីបញ្ឈប់អំពើហិង្សា ជំរុញការយោគយល់គ្នា និងគោរពផលប្រយោជន៍ និងសន្តិសុខរបស់គ្នាទៅវិញទៅមក ក្នុងពេលដែលនៅបន្តរក្សាសន្តិសុខ និងផលប្រយោជន៍ជាតិរៀងៗខ្លួន។ សន្តិភាពនៅតែជាមូលដ្ឋានគ្រឹះ នៃសេចក្តីប្រាថ្នារួមរបស់យើង។ មានតែតាមរយៈការរួមរស់ជាមួយគ្នាដោយសន្តិវិធី និងការសន្ទនាប៉ុណ្ណោះ ទើបយើងអាចសម្រេចបាននូវស្ថិរភាព និងបង្កើតបរិយាកាសអំណោយផលដល់វឌ្ឍនភាព និងការអភិវឌ្ឍ។ ក្នុងនាម ក្រសួងការពារជាតិកម្ពុជា ឯកឧត្តម ទៀ សីហា បញ្ជាក់ឡើងវិញនូវការប្តេជ្ញាចិត្តរបស់កម្ពុជា ក្នុងការពង្រឹង និងពង្រីកកិច្ចសហប្រតិបត្តិការប្រកបដោយការស្ថាបនា ជាមួយប្រជាជាតិទាំងអស់ តាមរយៈក្របខណ្ឌទ្វេភាគី តំបន់ និងអន្តរជាតិ ដើម្បីរួមចំណែកដល់សន្តិភាព សន្តិសុខ ស្ថិរភាព ការអភិវឌ្ឍប្រកបដោយចីរភាព និងវិបុលភាពពិភពលោក។
កម្ពុជានឹងបន្តដើរតាមផ្លូវ នៃគោលនយោបាយការបរទេសឯករាជ្យ និងអព្យាក្រឹតផ្អែកលើច្បាប់ ការគោរពគ្នាទៅវិញទៅមក និងការប្រកាន់ខ្ជាប់នូវគោលការណ៍ទាំងធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។ គោលដៅរបស់យើង គឺលើកកម្ពស់ផលប្រយោជន៍ជាតិ ពង្រឹងមិត្តភាព ដែលមានស្រាប់ និងជំរុញទំនាក់ទំនងមិត្តភាពថ្មី។ កម្ពុជានៅតែប្រកាន់ជំហរប្រឆាំងនឹងការគំរាមកំហែង ឬការប្រើប្រាស់កម្លាំងក្នុងទំនាក់ទំនងអន្តរជាតិ ការជ្រៀតជ្រែកកិច្ចការផ្ទៃក្នុងរបស់ប្រទេសដទៃ។ ដោយសាររាជរដ្ឋាភិបាលកម្ពុជាមានគោលបំណងក្លាយជាប្រទេសគ្មានមីននៅឆ្នាំ២០២៥ យើងអំពាវនាវឱ្យមានការបន្តគាំទ្រផ្នែកហិរញ្ញវត្ថុ និងបច្ចេកទេស។ យើងក៏ជំរុញឱ្យមានការចូលរួមកាន់តែច្រើន ពីសហគមន៍អន្តរជាតិ ជាពិសេសប្រទេសមហាអំណាច ដើម្បីលើកកម្ពស់ការយល់ដឹងអំពីគ្រោះថ្នាក់នៃគ្រាប់មីន និងគ្រាប់មីនមិនទាន់ផ្ទុះ ដែលជាសសរស្តម្ភលាក់មុខ គំរាមកំហែងដល់សន្តិសុខមនុស្ស សូម្បីតែបន្ទាប់ពីការបញ្ចប់ជម្លោះប្រដាប់អាវុធក៏ដោយ។ ជាងនេះទៅទៀត ក្នុងនាមជាប្រទេសដែលចូលរួមចំណែកបរិច្ចាគកងទ័ពក្នុងប្រតិបត្តិការរក្សាសន្តិភាព កម្ពុជានៅតែប្រកាន់ខ្ជាប់នូវការប្តេជ្ញាចិត្តរបស់ខ្លួន ចំពោះប្រតិបត្តិការរក្សាសន្តិភាព ដែលជាសក្ខីភាពនៃការយកចិត្តទុកដាក់របស់យើងចំពោះសន្តិភាព សន្តិសុខ និងស្ថិរភាពអន្តរជាតិ ដែលជាកត្តាសំខាន់ សម្រាប់ការអភិវឌ្ឍប្រកបដោយចីរភាព ៕
