សម្តេចពិជ័យសេនា ទៀ បាញ់ ចូលរួមក្នុងពិធីអបអរសាទរប្រាសទកោះកេរ ត្រូវបានដាក់បញ្ចូលជា សម្បត្តិបេតិកភណ្ឌពិភពលោក
នៅថ្ងៃទី២០ ខែកញ្ញា ឆ្នាំ២០២៣ នៅវិមានឈ្នះ ឈ្នះ បានប្រារព្ធពិធី វាយគង ទូងស្គរ ទះប៉ោត និងគោះ ត្រដោក នាម៉ោង០៧:០០ព្រឹក អបអរសាទរព្រឹត្តិការណ៍ប្រវត្តិសាស្ត្រ ដែលប្រទេសកម្ពុជារបស់យើងបានចុះបញ្ជីតំបន់ប្រាសាទកោះកេរ ដែលជារមណីយដ្ឋានបុរាណវិទ្យា បញ្ចូលក្នុងបញ្ជីបេតិកភណ្ឌពិភពលោក នៅក្នុងកិច្ចប្រជុំលើកទី៤៥ របស់គណៈកម្មាធិការបេតិកភណ្ឌពិភពលោក នៅទីក្រុង រីយ៉ាដ ប្រទេសអារ៉ាប៊ីសាអូឌីត កាលពីថ្ងៃទី១៧ ខែកញ្ញា ឆ្នាំ២០២៣កន្លងទៅនេះ។
ពិធីអបអរសាទរនេះ បានធ្វើឡើងក្រោមអធិបតីភាព សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងក្រោមការដឹកនាំរៀបចំពី នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស និងជាប្រធានក្រុមការងារសាងសង់វិមានឈ្នះ ឈ្នះ ព្រមទាំងនាយទាហាន នាយទាហានរង និងពលទាហាន បានចូលរួមយ៉ាងច្រើនកុះករ។
ការប្រារព្ធពិធីអបអរនេះ ដោយគោរពតាមអនុសាសន៍ណែនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានធ្វើការណែនាំទៅដល់គ្រប់ក្រសួង-ស្ថាប័ន នៃរាជរដ្ឋាភិបាលនៅថ្នាក់ជាតិ និងគ្រប់ស្ថានប័ននៅថ្នាក់ក្រោមជាតិ រួមមាន៖ គ្រប់រាជធានី-ខេត្ត គ្រប់មន្ទីរជំនាញ រាជធានី-ខេត្ត គ្រប់ក្រុង-ស្រុក-ខ័ណ្ឌ និងគ្រប់ឃុំ-សង្កាត់ ព្រមទាំងអំពាវនាវដល់ជនរួមជាតិកម្ពុជាគ្រប់រូបដោយមិនប្រកាន់អាយុ ស្រទាប់វណ្ណៈ ពណ៌សម្បុរ មុខរបរ និងឋានៈសង្គម រួមគ្នាធ្វើការវាយគង ទូងស្គរ ទះប៉ោត និងគោះត្រដោក តាមគ្រប់មធ្យោបាយដែលខ្លូនមាន។
កាប្រារព្ធពិធីអបអរសាទរនូវព្រឹត្តិការណ៍ជាប្រវត្តិសាស្ត្រ នៃការចុះបញ្ជីប្រាសាទកោះកេរ នៅវិមានឈ្នះ ឈ្នះនាពេលនេះ ក៏ជាការបំផុសនូវស្មារតីដល់យុវជន និងប្រជាជន កូនចៅជំនាន់ក្រោយ ឲ្យចូលរួមថែរក្សាការពារសម្បត្តិវប្បធម៌របស់ដូនតាខ្មែរ បានបន្សល់ទុកតាំងពីយូរលុងមកហើយ ពិសេសជម្រុញលើកទឹកចិត្តឲ្យបន្តចូលរួមថែរក្សា-ការពារសុខសន្តិភាព ដែលមាននៅពេលបច្ចុប្បន្ននេះ ឲ្យគង់វង្សជារៀងរហូត។
សូមបញ្ជាក់ថា៖ នៅក្នុងសួនសុខដុមនីយកម្ម នៃវិមានឈ្នះ ឈ្នះ មានសាងសង់ ប្រាង្គប្រាសាទបុរាណខ្មែរ មានចំនួន៤ ជានិមិត្តរូប ក្នុងនោះរួមមាន ប្រាសាទព្រះវិហារ, ប្រាសាទសំបូរព្រៃគុប, ប្រាសាទកោះកេរ និងប្រាសាទបាយ័ន្ត។ រមណីយដ្ឋានបុរាណវិទ្យា កោះកេរ គឺជាអតីត រាជធានីខ្មែរនៅដើមសតវត្សទី១០ ដែលមានទីតាំងស្ថិតនៅក្នុងឃុំស្រយ៉ង់ ស្រុកគូលែន ខេត្តព្រះវិហារ ហើយមានចម្ងាយប្រមាណ ៩៥គីឡូម៉ែត្រ ពីតំបន់អង្គរ។ យោងតាមសេចក្តីរាយពីក្រុមការងារវិមានឈ្នះឈ្នះ បានឱ្យដឹងថា ក្រោយការប្រារព្ធពិធីអបអរសាទរនេះត្រូវបានបញ្ចប់, វិមានឈ្នះ ឈ្នះនៅតែរក្សា ស្គរ ប៉ោត និងឧបករណ៍សម្ភារៈផ្សេងៗ នៅចំនុចប្រាសាទកោះកេរ សម្រាប់ប្រជាពលរដ្ឋមកលេងកំសាន្ត និងគោះស្គរជ័យស្រែកអបអរសាទរ ថតយករូបភាព ជាព្រឹត្តិការណ៍ប្រវត្តិសាស្ត្រ និងភាពជោគជ័យពីការខិតខំតាំងពីឆ្នាំ ២០២១ របស់សម្តេចតេជោ ហ៊ុន សែន ទម្រាំបានជាមហាសមិទ្ធផលយ៉ាងធំធេង និងជាទីគាប់ចិត្តសម្រាប់ជាតិមាតុភូមិកម្ពុជាទាំងមូល។
សូមបញ្ជាក់ថា សម្បត្តិបេតិកភណ្ឌ របស់កម្ពុជា មានចំនួន ៤ ដែលត្រូវបានដាក់បញ្ចូលទៅក្នុងបញ្ជីបេតិកភណ្ឌ វប្បធម៌ពិភពលោក ក្នុងនោះ រមណីយដ្ឋានអង្គរ ចុះថ្ងៃទី១៤ ខែធ្នូ ឆ្នាំ១៩៩២ នៅទីក្រុងសាន់តាហ្វេ សហរដ្ឋអាមេរិក។ តំបន់ប្រាសាទព្រះវិហារ ចុះថ្ងៃទី៧ ខែកក្កដា ឆ្នាំ២០០៨ នៅទីក្រុងកេបិក ប្រទេសកាណាដា។ តំបន់ប្រាសាទសំបូរព្រៃគុក ចុះថ្ងៃទី៨ កក្កដា ឆ្នាំ២០១៧ នៅទីក្រុងក្រាកូវ ប្រទេសប៉ូឡូញ។ តំបន់ប្រាសាទកោះកេរ ចុះថ្ងៃទី១៧ ខែកញ្ញ ឆ្នាំ២០២៣ ក្រុងរីយ៉ាដប្រទេសអារ៉ាប៊ីសាអូឌីត។
ស្របពេលនោះដែរ បន្ទាប់ពីបានបញ្ចប់ប្រារព្ធពិធីអបអរសាទរការដាក់បញ្ចូលប្រាសាទកោះកេរ ជាសម្បត្តិបេតិកភណ្ឌពិភពលោករួចមក នៅវេលាម៉ោង៨:០០ ព្រឹកថ្ងៃទី២០ ខែកញ្ញានេះ ដែលថ្ងៃក្រុមការងារវិមានឈ្នះ ឈ្នះ បានទទួលគណៈប្រតិភូនៃយុវជន រដ្ឋបាលខេត្តព្រៃវែង លើកទី១៦ ដែលមានចំនួនសរុប ២០០នាក់ បានចូលមកធ្វើទស្សនកិច្ច សិក្សាស្វែងយល់ សំណង់ ប្រវត្តិសាស្ត្រនៅវិមានឈ្នះ ឈ្នះ។ ប្រតិភូនៃយុវជន រដ្ឋបាលខេត្តព្រៃវែងទាំងអស់ បានសម្តែងនូវក្តីសប្បាយរីករាយ ដែលបានមកទស្សនាវិមានឈ្នះ ឈ្នះ ក្នុងពេលដែល ព្រះរាជាណាចក្រកម្ពុជាបានប្រារព្ធពិធីអបអរសាទរការដាក់បញ្ចូល ប្រាសាទកោះកេរ ជាសម្បត្តិបេតិកភណ្ឌពិភពលោក ដែលយុវជន យុវនារីយើង បានធ្វើការវាយស្គរ គោះត្រដោក ប្រព្រឹត្តទៅក្នុងបរិយាកាសសប្បាយរីករាយ នៅក្នុងវិមានឈ្នះ ឈ្នះ ៕
