នាយឧត្តមសេនីយ៍ ជៀង អំ សំណេះសំណាលរវាង ឯកឧត្តម រដ្ឋលេខាធិការ អនុរដ្ឋលេខា ជួយរដ្ឋមន្ត្រីលើការងារ អគ្គនាយកដ្ឋានយោធសេវា
នៅទីស្តីការក្រសួងការពារជាតិ ព្រឹកថ្ងៃទី០៦ ខែកញ្ញា ឆ្នាំ២០២៣ នាយឧត្តមសេនីយ៍ ជៀង អំ រដ្ឋលេខាធិការក្រសួងការពារជាតិ បានអញ្ជើញជាអធិបតី ក្នុងពិធីសំណេះសំណាល រវាងឯកឧត្តម រដ្ឋលេខាធិការ អនុរដ្ឋលេខា ជួយរដ្ឋមន្ត្រី លើការងារ អគ្គនាយកដ្ឋានយោធសេវា ក្រសួងការពារជាតិ ក្នុងអាណត្តិទី៧ នៃរដ្ឋសភា ជាមូយថ្នាក់ដឹកនាំ អគ្គនាយកដ្ឋានយោធសេវា និងអង្គភាពចំណុះ ដោយមានការអញ្ជើញចូលរួមពី នាយឧត្តមសេនីយ៍ មាស សាវ៉ន អគ្គនាយក អគ្គនាយកដ្ឋានយោធសេវា ក្រសួងការពារជាតិ និងឯកឧត្តម ជាអគ្គនាយករង នាយក នាយកដ្ឋានចំណុះជាច្រើនរូបទៀត។
ថ្លែងក្នុងកិច្ចប្រជុំនាឱកាសនោះ នាយឧត្តមសេនីយ៍ ជៀង អំ បានមានប្រសាសន៍ថា៖ ក្នុងរាជរដ្ឋាភិបាល អណត្តិទី៧ នេះ ក្រសួងការពារជាតិ បានចេញសេចក្តីសម្រេច ដោយបានកំណត់ អោយរដ្ឋលេខាធិការ អនុរដ្ឋលេខាធិការ ក្រសួងការពារជាតិ ជួយរដ្ឋមន្ត្រីលើការងារដឹកនាំ អគ្គនាយកដ្ឋានយោធសេវា ដែលក្នុងនោះមាន៖ នាយឧត្តមសេនីយ៍ ជៀង អំ រដ្ឋលេខាធិការក្រសួងការពារជាតិ ជាប្រធាន, ឧត្តមសេនីយ៍ឯក នាង អេង អនុរដ្ឋលេខាធិការក្រសួងការពារជាតិ ជាអនុប្រធាន, ឧត្តមសេនីយ៍ឯក នាម អៀង អនុរដ្ឋលេខាធិការក្រសួងការពារជាតិ ជាសមាជិក និងឧត្តមសេនីយ៍ឯក ម៉ី សឹង្ហន អនុរដ្ឋលេខាធិការក្រសួងការពារជាតិ ជាសមាជិក។ ឯកឧត្តម ជៀង អំ បានសំណួមពរដល់ ឯកឧត្តម ដែលទទួលបន្ទុកការងារ អគ្គនាយកដ្ឋានយោធសេវានេះ ត្រូវសាមគ្គី សហការគ្នាអោយបានល្អ និងជួយសម្របសម្រួលរាល់កិច្ចការទាំងអស់ ដើម្បីជួយដល់ រដ្ឋមន្ត្រីការពារជាតិ អណត្តថ្មីនេះ។ នាយឧត្តមសេនីយ៍ ជៀង អំ បានលើកឡើងអំពីផែនការផ្សព្វផ្សាយ កម្មវិធីនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល អណត្តទី៧ នៃរដ្ឋសភា អោយដល់ខ.ភ.ម ទាំងមូល បានយល់ជ្រួតជ្រាបអំពី កម្មវិធីនយោបាយយុទ្ធសាស្ត្រ បញ្ចកោណនេះ។ ឯកឧត្តម ក៏បានជំរុញដល់អគ្គនាយកដ្ឋានយោធសេវា ត្រូវធ្វើសេចក្តីការណែនាំមួយ ដើម្បីផ្សព្វផ្សាយ និងរៀនសូត្រ នូវកម្មវិធីនយោបាយយុទ្ធសាស្ត្រ បញ្ចកោណ ដំណាក់កាលទី១ របស់រាជរដ្ឋាភិបាល ដល់នាយទាហាន នាយទាហានរង និងពលទាហាន ខ.ភ.ម យើង អោយបានយល់ជ្រួតជ្រាបនៅពេលខាងមុខ។
ឆ្លៀតក្នុងឱកាសនោះ ឯកឧត្តម ជៀង អំ ក៏បានលើកឡើងអំពីវិស័យមួយចំនួន ដែលពាក់ពន្ធ័ នឹងកិច្ចការ ការពារជាតិ ដែលអគ្គនាយកដ្ឋានយោធសេវា ក្រសួងការពារជាតិ ត្រូវយកចិត្តទុកដាក់ បន្តចូលរួមអនុវត្តិ ដែលក្នុងនោះរួមមាន៖ ការចូលរួមបន្តពង្រឹងខឿនការពារជាតិ របស់ប្រជាជន ដើម្បីការពារឯករាជ អធិបតេយ្យ បូរណភាពទឹកដី ការពារសុខសន្តិភាព ស្ថេរភាព នយោបាយសន្តិសុខ សណ្តាប់ធ្នាប់សង្គម អោយបានល្អប្រសើរ។ បន្តអនុវត្តផែនការកំណែទម្រង់ ខ.ភ.ម កសាងពង្រឹង កម្លាំង ខ.ភ.ម អោយបានរឹងមាំ ទាំងបរិមាណ និងគុណភាព មានឆន្ទៈប្រយុទ្ធមុតស្រួច ស្មោះត្រង់ចំពោះ ជាតិ សាសនា ព្រះមហាក្សត្រ និងមានសមត្ថភាព ប្រយុទ្ធការពារប្រទេសជាតិ អោយបានរឹងមាំ។ ទទឺមនេះត្រូវយកចិត្តទុកដាក់អនុវត្តគោលនយោបាយ ពលី ពិការ និវត្តជន និងអតីតយុទ្ធជន អោយមានជីវភាពរស់នៅសមរម្យ។ ត្រូវពង្រឹងនូវការគោរពបទវិន័យ ខ.ភ.ម អោយបានម៉ឺងមាត់ ពង្រឹងការសាមគ្គីភាព ការឯកភាពផ្ទៃក្នុងអង្គភាព អោយបានរឹងមាំ។ បន្តផ្សព្វផ្សាយអំពីអត្ថន័យ គុណតម្លៃនយោបាយឈ្នះ ឈ្នះ ដែលបាននាំមកនូវសន្តិភាព ការឯកភាពជាតិ ឯកភាពទឹកដី កសាងតំបន់ប្រវត្តិសាស្ត្រយោធា នៅតាមបណ្តាខេត្ត និងតាមបណ្តោយព្រំដែន ៕
