សម្តេចពិជ័យសេនា ទៀ បាញ់ ប្រគល់ព្រះរាជក្រិត និងអនុក្រិត តែងតាំងមុខតំណែងជូននាយទាហាន ខ.ភ.ម
ក្រសួងការពារជាតិ បានប្រារព្ធពិធីប្រកាស និងប្រគល់ព្រះរាជក្រឹត្យ និងអនុក្រឹត្យ តែងតាំងមុខតំណែងជូន នាយទាហាន នៃខ.ភ.ម នាព្រឹកថ្ងៃទី១៥ ខែសីហា ឆ្នាំ២០២៣ ស្ថិតក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
នៅក្នុងព្រះរាជក្រឹត្យ និងអនុក្រឹត្យ តែងតាំងមុខតំណែង ជូននាយទាហាន នៃ ខ.ភ.ម ដែលអានដោយ នាយឧត្តមសេនីយ៍ មាស សំអុល អគ្គនាយករង អគ្គនាយកដ្ឋានយោធាសេវា និងជានាយក នាយកដ្ឋានបុគ្គលិក ក្រសួងការពារជាតិ បានប្រកាសតែងតាំង ឧត្តមសេនីយ៍ទោ ម៉ឹង ពន្លក ជាអគ្គនាយក អគ្គនាយកដ្ឋានភស្តុភារ ហិរញ្ញវុត្ថុ, ឧត្តមសេនីយ៍ឯក សឿន រឿត ជានាយក នាយកដ្ឋានវិស្វកម្ម ក្រសួងការពារជាតិ, ឧត្តមសេនីយ៍ទោ សេង សំរិទ្ធ ជាអគ្គនាយករង អគ្គនាយកដ្ឋានភស្តុភារ ហិរញ្ញវត្ថុ និងជានាយក នាយកដ្ឋានផ្គត់ផ្គង់, ឧត្តមសេនីយ៍ត្រី គឹម សុណារ៉ា ជានាយក នាយកដ្ឋានហិរញ្ញ អគ្គនាយកដ្ឋានភស្តុភារ ហិរញ្ញវត្ថុ និង ឧត្តមសេនីយ៍ត្រី ខូវ ឆាយ ជានាយក មជ្ឈមណ្ឌលកីឡា ខ.ភ.ម។
ថ្លែងនៅក្នុងពិធីប្រកាស និងប្រគល់ព្រះរាជក្រឹត្យ និងអនុក្រឹត្យ តែងតាំងមុខតំណែងជូន នាយទាហាន នៃខ.ភ.ម នាឱកាសនោះ សម្ដេចពិជ័យសេនា ទៀ បាញ់ បានគូសបញ្ជាក់ថា៖ ការប្រកាសតែងតាំងនាយទាហាន នាពេលនេះ គឺជាផ្នែកមួយ នៃផែនការកែទម្រង់ ខ.ភ.ម ដែលបានដាក់ចេញ ស្របនឹងសភាពការណ៍វិវត្តន៍ ទៅថ្មីៗនាពេលបច្ចុប្បន្ន និងទៅអនាគត។ ជាមួយគ្នានេះ សម្តេចពិជ័យសេនា បានសម្តែងនូវការអបអរសាទរចំពោះឯកឧត្តម អស់លោក ដែលត្រូវបាន ព្រះករុណាអង្គម្ចាស់ជីវិតតម្កល់លើត្បូងជាទីគោរពសក្ការៈដ៏ខ្ពង់ខ្ពស់បំផុត ត្រាស់បង្គាប់តែងតាំង និងការសម្រេចរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានតែងតាំង ឯកឧត្តមទាំងអស់ តាមសំណើរបស់ក្រសួងការពារជាតិ។ សម្តេចពិជ័យសេនា បានថ្លែងនូវការកោតសរសើរ និងវាយតម្លៃខ្ពស់ចំពោះឯកឧត្តម លោកជំទាវ អស់លោក លោកស្រី ជាប្រធានស្ថាប័ន-មេបញ្ជាការ គ្រប់កងឯកភាព នៃខ.ភ.ម ដែលបានរួមគ្នាខិតខំប្រឹងប្រែងបំពេញភារកិច្ចបេសកកម្មរបស់ខ្លួនយ៉ាងខ្ជាប់ខ្ជួន ប្រកបដោយស្មារតីទទួលខុសត្រូវ ហើយសម្រេចបាននូវសមិទ្ធផលជាច្រើនគួរឲ្យកត់សម្គាល់នាពេលកន្លងមក។ ជាការពិតនៅក្នុងនីតិកាលទី៦ នៃរដ្ឋសភា រយៈពេល៥ឆ្នាំមកនេះ នាយទាហាន ពលទាហាន នៃ ខ.ភ.ម បានពុះពារបំពេញការងារតួនាទីភារកិច្ច ដែលរាជរដ្ឋាភិបាល និងក្រសួងការពារជាតិប្រគល់ជូន និងទទួលបានលទ្ធផលគួរជាទីមោទន។ ហើយជាការពិតណាស់ ភារកិច្ចដែលយើងបានបំពេញក្នុងអាណត្តិទី៦ កន្លងមកនេះ យើងបានបំពេញកិច្ចការ ឈានមុខយ៉ាងខ្លាំង នៅគ្រប់ផ្នែកទាំងអស់ ទាំងក្នុង ខ.ភ.ម ក៏ដូចជានៅក្នុងវិស័យជាច្រើនទៀតផងដែរ។ សម្តេចពិជ័យសេនា បានលើកឡើងថា៖ អគ្គនាយកដ្ឋាន មេបញ្ជាការប្រភេទទ័ព ចាប់ពីពេលនេះតទៅ មានឋានន្តរស័ក្តិ ត្រឹមថ្នាក់ឧត្តមសេនីយ៍ឯក។ សម្តេចពិជ័យសេនា បានបន្តថា៖ ខ.ភ.ម ត្រូវបានចាត់ទុកជាឆ្អឹងខ្នងក្នុងកិច្ចការពារជាតិ ការពារបូរណភាពទឹកដី និងប្រជាជន។
ឆ្លៀតក្នុងឱកាសនោះ សម្តេចពិជ័យសេនា ទៀ បាញ់ បានផ្តាំផ្ញើឲ្យ បន្តថែរក្សាសមិទ្ធផល ដែលមាននៅពេលនេះ ឲ្យនៅគង់វង្សតទៅមុខ។ សម្តេចពិជ័យសេនា ក៏បានរំលឹកអំពីការរៀបចំព្រឹត្តការណ៍ការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ ឆ្នាំ២០២៣ បានល្បីរន្ទឺកិត្តិនាម កិត្តិស័ព្ទ មានមុខមាត់លើឆាកអន្តរជាតិ។ ហើយទន្ទឹមនឹងនេះ កម្ពុជាទទួលបានសិទ្ធការត្រៀមរៀបចំធ្វើជាម្ចាស់ផ្ទះនៃព្រឹត្តិការណ៍កីឡាយុវជនអូឡាំពិកពិភពលោក ឆ្នាំ២០២៩ ផងដែរ។ សម្តេចពិជ័យសេនា ទៀ បាញ់ ក៏បានរំលឹក និងជម្រុញលើការសាងសង់វិមានឈ្នះៗ និងសួនតេជោសន្តិភាពនៅតាមបណ្តាខេត្តនានា ដោយចាត់ទុកសំណង់នេះមានសារៈសំខាន់ណាស់ និងជាសច្ចភាពប្រវត្តិសាស្ត្រ មានផលប្រយោជន៍ធំធេងសម្រាប់ជាតិកម្ពុជា ព្រមទាំងបន្តរៀបចំតំបន់ប្រវត្តិសាស្ត្រយោធា ដែលមាន ៨៧ទីតាំង នៅទូទាំងប្រទេស ដើម្បីបង្ហាញភាពពិត នយោបាយឈ្នះ ឈ្នះ តដល់កូនចៅគ្រប់ជំនាន់ក្នុងការថែរក្សាសុខសន្តិភាពនៅកម្ពុជា។
ជាមួយគ្នានេះដែរ សម្តេចពិជ័យសេនា ក៏បានបញ្ជាក់ឲ្យអ្នកមកកាន់មុខតំណែងថ្មី ដែលបានប្រកាលតែងតាំងនាពេលនេះ ត្រូវបន្តវេនក្នុងការបំពេញតួនាទីភារកិច្ច ឲ្យទទួលបានជោគជ័យធំៗថ្មីៗបន្ថែមទៀត ជូនក្រសួងការពារជាតិ និងរាជរដ្ឋាភិបាលអាណត្តិទី៧ ៕
